Ética periodística 2 (Tini maqueta periódicos)

Recuperamos equí una serie entamada tres de l’anterior manifa pola oficialidá, y na que facíemos un analís de cómo la prensa asturiana abordaba l’acontecimientu. Nesta ocasión, les conclusiones nun son, nin de cerca, positives pal periodismu asturianu, qu’amuesa en dellos casos un grau de servilismu hacia la FSA como nunca se viera.

La Nueva España

Por entamar pol diariu ‘lider’ (esto ye, el que más periódicos vende), pudiéramos dicir que una manifestación convocada pola mayor plataforma cívica d’Asturies, la que más manifestantes congregó en tol añu, y que se vien repitiendo como la mayor reivindicación social d’Asturies de los trenta años últimos, nun merez sitiu na so portada, nin na portada dixital, nin na de papel. Cierto ye qu’esti día, Asturies taba tremada de noticies. Asina, el periódicu abre cola opinión del presidente de la Federación Asturiana de Empresarios sobre l’allugamientu de la fábrica d’armes de Trubia, o el desenvolvimientu d’un residencial uvieín, o llamentando la falta de ñeve nes estaciones d’esquí. (Nun ye coña, son los titulares principales pa’l diariu). D’esta manera, nun hai llamada nenguna a la información sobre la manifa, que nun s’atopa hasta la páxina 49 (tercera de la seición de Cultura y Espectáculos). Una crónica, correuta y descriptiva, na que se señalen aspeutos como la presencia d’una pancarta del PP y de cabezaleros d’esti partíu por primer vez nesta convocatoria añal.

El Comercio

El diariu xixonés foi l’unicu de la prensa asturiana qu’inxertó na so portada una llamada a la crónica de la manifestación. Eso sí, en forma de sotítulo de lo que, pa esti diariu, ye la noticia: unes declaraciones del capo de la FSA, Javier Fernández, echando pela oficialidá y vinculando la so demanda a conceutos tan suxerentes como “intolerancia” o “exclusión”. Asina, si siguimos esa llamada llegamos a la páxina 34 de la seición Política. Ellí, l’inquietu periodista fai una ¿información? na que se recopilen delles declaraciones del mandamás socialista (unes del mesmu día de la manifa, otres de va selmanes) nes que se constrúi el siloxismu siguiente: “La reivindicación llingüística ye glorificar la llingua, ello ye sobrevalorar lo propio, que lleva a la intolerancia. El nacionalismu ye intolerante, polo que namái busquen que nel so territorio sólo vivan los suyos. La demanda de la oficialidá namái escuende l’intentu d’imponer el nacionalismu n’Asturies”. Ergo… los que nos manifestamos el sábadu n’Uviéu, en realidá tamos pidiendo el destierru (o daqué peor) de tol que nun tea na manifestación. La crónica de la manifa, n’esti diariu, apaez como un complementu ilustrativu de la rellumante filosofía d’esti home d’eterna americana con vaqueros y reconocíos vezos democráticos.

La Voz de Asturias

Esti periódicu optó güei por amosase como un perfeutu exemplu de propaganda. La so portada recordaba aquellos tiempos nos que les noticies subnormales o internacionales llenaben espaciu pa nun falar de lo que pasaba en casa. A cincu columnes, el titularón ye’l que vien darréu: “Los padres de colegios públicos piden uniforme”. Nun ye broma. La semeya del día, a cuatru columnes, ye la de dos mozos con tables de ‘snow’ en Payares, col titulín: “La nieve llega fiel a la cita”.

La información sobre la manifestación nun se fai notar hasta la páxina 65, la tercera de la seición de ‘Cultura y espectáculos’, tres de dos páxines sobre’l festival de cine de Xixón y un reportaxe a toa páxina sobre una biografía nueva del gran Tino Casal. La crónica de la mani entitúlase ‘Los asturianistas anuncian una ofensiva por la oficialidad’. Puede pasar, pero… ¿daveres foi esa la noticia? O ye que mola más asociar esa reivindicación a términos negativos como ‘ofensiva’, propia de bastasunos quema caxeros?

Avui

El diariu catalán sorprendió al incluir la crónica de la mani servida pola axencia Europa Press na portada de la so edición electrónica. Dafechu foi una de les noticies más comentaes nesti periódicu.

(Igua: De fecho, la noticia apaez el llunes como ‘L’artículu más lleíu d’ayeri’).

TPA

Nun sé si nos informativos dixeron daqué nin cómo lo dixeron. Sólo sé que nel so portal n’internet, nun apaez mención a la manifa, nenguna. Eso sí, nos informen estupendamente de qu’Asturies foi la segunda comunidá na que más medró la oferta hotelera ¡¡dende 2000!!

Teleasturias

Tampoco nun vi los informativos d’esta canal ‘illegalizada’ pol Gobiernu autonómicu y que ya namái emite per cable o internet, pero la mani foi el titular de portada tol domingu.

Conclusiones.

Ta perclaro que nun paga la pena esmolecese. Tamos nuna sociedá na que cuantayá que los diarios nun piensen nos enfotos y intereses informativos del so llector (debe ser que les decenes de miles d’asturianos que de forma activa desiximos la oficialidá nun lleemos periódicos), sinon que trabayan pa la inmediatez de la cuenta de resultaos, y ello depende del dineru públicu (tamién de los que desiximos la oficialidá) que yos apurre el Gobiernu de Álvarez Areces.

D’otra manera. Dalgo falla. La FSA tien munchu mieu a qu’esti movimientu puea amenorgar les sos cotes de poder (nun lo digo yo, lo diz güei en El Comercio el so cabezaleru), y por eso tien una estratexa clara, bien articulada y contundente. Tien un mensaxe fuerte y direutu a les vidayes: ‘oficialidá ye imposición’ (Hostia no, imposición… yo nun quiero que m’impongan nada). ‘oficialidá ye nacionalismo’ (Hostia no, nacionalismu… eso ye lo de la ETA y lo del Carod Rovira esi, cagunmimantu…). Por contra, el mensaxe del CAO ye débil, nun tien medios, y, poro, el so mensaxe requier de continues desplicaciones. Fain falta propagandistes capaces de contrarrestar el mensaxe de la imposición, con consignes comparables, y con estratexes de marketing afayadices. Ensin eso… muncho nos va costar.

Por cierto, les marches a pie dende Xixón, Trubia, Avilés, La Felguera y Mieres, quedaron pa práu.

6 comentarios en “Ética periodística 2 (Tini maqueta periódicos)”

  1. Les marches pa práu, cagun mi manto cola pinga que pillamos y los dolores que teo entá…
    Ye lo qu’hai, cada añu vémoslo y nun se aparen a disimulalo ni un res. Ye de vergoña pero quien tien la información tien el poder. Siempre nos quedarán los blogs ;-). Por ciertu, norabona pol analís y la comparación que ficiste de toles noticies.

    Lo que se faló nel segundu chigre del alcuentru valió pa conocenos un puquiñín más ente nós, dalguna discusión sobre nomenclatura (blog, blogue, bloge, otra pallabra n’ast ya esistente que se puede adaptar…), sobre’l .ast, sobre facer la xunta de blogues en llingua asturiana ensin dase d’alta como asociación por que ye un fregao, sobre la llingua en xeneral, sobre dalgun, proyeutu de futuru, sobre ximielgame.net, de dalguna cosiquina que de xuru se me escapa, y de la cita d’abril que’l pingarateru ya tien casi finiquitá. Lo bono foi que sentámonos nuna mesa toos viéndonos les cares y toos y toes falaron pal grupu enteru, non como en los lagos que al tar de pie falábamos de tres en tres y casique nun llegamos a conocenos toos. Por eso me paeció bona idega lo de cambiar de chigre. En verdá foi una pena nun tar más xente.

    Ye verdá lo que dices de la vergoña. Paezme que ya habíamos falao del frikismu de la situación. Al final ya yeramos collacios tomando una cacipla, aunque nos llamáramos trasgu, la esfoyaza o el chamicu. De xuru que n’Abril la cosa dará menos vergoña. Un saludu.

  2. Un post muy interesante. Suscribo los tos comentarios sobre too lo de “Fain falta propagandistes capaces de contrarrestar el mensaxe de la imposición, con consignes comparables, y con estratexes de marketing afayadices. Ensin eso… muncho nos va costar.”

    De toes formes el nivel del periodismu asturianu ya pateticu en xeneral

  3. Traya: sí ho… la vergoña ye nel primer momentu, pasa llueu. Pa la próxima ya será d’otra manera. Y gracies pola crónica
    Ayalgueru: ye que lo del márketing paezme básicu. Téngolo comentáu con mucha xente que ye muncho más activa que yo en too esto, y que tien más motivos pa falar porque se lo tien currao… y la conclusión ye clara: la pegatina nes papeleres cuantayá que ta superada.

  4. la pegatina na papelera, les sábanes nes muries y les procesiones pela cai uría, … ente otres munches coses.

    Hai quien sigue viviendo nos años 70 pensando que les mases populares van tomar los palacios d’iviernu.

    Les polítiques de comunicación fallen porque nun tan profesionalizaes, sigue pensándose nel voluntarismu de la xente y asina nun vamos a nengún llau. Hai quien sigue enfotáu en salir de procesión añu tres d’añu cuando les decisiones tómense nel planu políticu, mientres l’asturianismu nun pinte un res nel ámbitu políticu la situación nun va cambiar. Eso sí, podemos ser toos mui guais, mui militantes, pegar munchos cartelos y dir andando a Uvieo pa tomar unes de sidra y al día siguiente enfadanos pol tratu de la prensa.

    [mode siegluXXI: on]

  5. Pos nun toi del too d’acuerdu colo que dices (pingarates) nun creo que la solución te nel asturianismu políticu sinon nel social. Creo que no que habría que trabayar ye n’esplicar bien y facer que llegue bien esi mensaxe a la xente ayena al asturianismu políticu, ye esa la que al final va tener que pedir la oficialidá, porque (anque manque) formen la mayor parte de la sociedá asturiana. Y mientras sigamos zarraos en los nuesos grupinos endogámicos asturianistes deciendo lo borrega que ye la xente por votar al PSOE nun vamos conseguir nada. Lo que hai que facer ye que’l prexubiláu de la mina afiliáu al SOMA y al PSOE entienda porque queremos protexer la llingua que el tamién fala. Da-y a entender que ye un patrimoniu un orgullu quiciabes el mayor de ser asturianu, y non un sintoma de ser un ignorante (munchos tovía lo ve asina), consiguiendo esto, conseguiremos la oficialidá.
    Pa ponete un exemplu, conozo xente que ta a favor de la oficialidá (ye apolíticu) y nun sabe lo que ye’l CAO, esto que ye que hai que buscar les iniciatives que hai pa defender l’asturianu. Y esto nun puede ser…
    Esto ye una mera opinión y por supuestu peme que la llabor que tan llevando dende el CAO y más concretamente dende la Xunta pola… ye pa agradecer.

Responder a Dangerous Piper Encaboxar la rempuesta

La direición de corréu electrónicu nun va espublizase. Ríquense los campos marcaos con *