Joaquín Aréstegui diz non, ¿soprendíos?

Joaquín Aréstegui diz nones, y tovía hai quien diz que ye una opinión ‘personal’ del cabezaleru del PP. ¿Daquién puede sorprendese pola rápida anuncia de que d’oficialidá ‘nones’?

Joaquín Aréstegui, pa quien nun lo sepa, ye l’home de confianza d’Ovidio Sánchez, quien-y apurre’l cachu de cerebru qu’al llavianés-y falta pa facer discursos y declaraciones amañoses, quien-y marca estratexes, quien-y diz lo guapu y llistu que ye depués d’agarrar la depresión tres de perder una elleición tres d’otra.

Aréstegui ye un home llistu, intelixente, con un nivel mui periba la media de la política asturiana. Ye un estratega diz que maquiavélicu, y sabe cuándo dexar facer a los suyos y cuándo  cortar polo sano. Pa él, el problema llingüísticu n’Asturies nun ye más qu’un peón na so estratexia, un peón del que nun sabe mui bien qué va sacar (cuida que más bien poco), polo que nun-y importa un res dexar que-y lu coman y garantizase asina otres pieces más valoratibles nel alcuerdu económicu y de poder que va roblar cola FSA.

Porque lo importante pa’l PP nel tema l’estatutu ye sacar dalgo… ¿pol bien de los asturianos? Non, pol bien del partíu y de los que faen carrera nelli. Como la FSA, tamién nagua por un bipartidismu que-yos permita afitar esi comederu. Pa manexar dalgo, faise meyor ente dos qu’ente tres.

Aréstegui se xuega munchu, política y personalmente (más o menos, nel so casu, ye lo mesmu), como p’andar con boberíes col tema la llingua. Siéntolo polos del Círculu Lliberal, que a esti pasu van quedar ensin vaselina en dos díes.

2 comentarios en “Joaquín Aréstegui diz non, ¿soprendíos?”

  1. Nes últimes eleiciones autonómiques, n’aquelles que’l PP amosaba nos cartelos “OV” (depués de criticar el ZP, que como-yos dio resultáu a los socialistes, van ellos y copien) en clara referencia al OVidio y a OViedo (nun cartelu que vieran ablucantes los mios güeyos, na cuenca’l nalón (pa mas inri) dicíen “Asturias como Oviedo” y salíen Gabino y Ovidio dándose la mano, pues a lo que diba, neses eleiciones, ficiéron-y una entrevista a Ovidio (futurible presidente’l gobiernu) y énte la cuestión llingüística, él dixo que l’asturianu taba bien como taba, que nun se diba camudar nada nesi asuntu (pallabres lliterales). Asina la cuestión, a min nun me sorprende nada, por muncho que tean per ehí metíos Humberto Gonzali, Felechosa o Fernández Pardo, persones que creo que sí tienen un compromisu col asturianu pero que tán/tuvieron siendo usaos pol so partíu pa ganar votos, como peones más nesti xuegu. Ye una opinión. Saludos

  2. lo que ta perclaru ye qu´estos (PSOE, PP, IU) nun van danos drechos, nin van respetar nin protexer la nuesa identidá. Tuvieron el so tiempu pa facelu. Ye hora votar asturianu (URAS-PAS, UNIDÁ, Andecha Astur).

    Un saludu

Responder a Ricardo Encaboxar la rempuesta

La direición de corréu electrónicu nun va espublizase. Ríquense los campos marcaos con *