Con UNA, más que nunca

Aluciflipamos estí día cuando depués d’una fin de selmana de folganza total (lo qu’inclúi ausencia de conexión a internet), atopámosnos cola historia esa de los avales de conceyales del grupu mixto de dellos ayuntamientos vascos a la candidatura d’UNA. Como quiera qu’esos avalistes algamaron el cargu depués de ser escoyíos embaxo les sigles de la illegalizada ANV, ello valió pa qu’un periodista se faga un gran pajote mental con que va ser UNA la ‘llista blanca’ del entorno de Batasuna pa les próximes europees.

3521703574_a21b0cdf8f

De la que t’enteres, la imaxinación cuerre al requexu de la conspiranoia, y yá entames a ver aiciones goches contra una formación política que ta trabayando enforma por presentar a la sociedá asturiana una opción política de la que carez, asturiana, democrática, participativa, d’esquierdes, con unos obxetivos asumíos por una parte relevante de la sociedá, pero que nun atopen entá quien los canalice nel panorama políticu del país.

Y non… nun ye pa tanto. Too ye frutu d’un periodista con munchu oficiu en sacar noticies, y bilordios, de comisaríes y cuarteles, pero que ta mui lloñe de tener idea de lo que ye la política asturiana. Esti sagaz reporter, una de les estrelles de la redaición del diariu madrilán La Razón (editáu pol grupu del catalán Avui), víctima d’un atentáu d’ETA y avezáu plumilla de cabecera de les ‘fuentes antiterroristes’ quixo marcar paquete.

Y equí entama la mio fabulación: cuando toos taben poniendo’l güeyu na llista d’Alfonso Sastre, elli echó mano d’axenda pa preguntar polo que yá fixera l’entornu de Batasuna otres veces, que ye ‘quemar’ la llista más cantosa, pa lluéu espresar el so apoyu a ‘la de tapadillo’. Y la so fonte cuntaría-y que taba perhí una candidatura asturiana, que de 50 avales, venti yeren de ANV… y ya ta armada. ¿Diba esi home a contrastar nada? ¿Diba molestase en llamar a daquién que-y pudiera desplicar que ye eso de la UNA? Non, pa qué. Basta con poner a mitá del testu que a lo meyor nun tienen nada que ver, y asina nun hai querella que llegue a trámite en casu de meter la gamba:

“…Aún es pronto, según las citadas fuentes, para sacar conclusiones definitivas, pero resulta llamativo que destacados elementos del partido ilegalizado hayan prestado «de tapadillo» su aval a esta candidatura, mientras que la atención mediática se centraba en la que encabeza Alfonso Sastre…”.

La prueba de que metió la gamba hasta el fondo ye que la cosa nun tuvo más aquél. Quedóse nuna de les habituales ‘razonadas’ del periódicu derechista. Toi seguru que a los dos grandes diarios asturianos bastó-yos con conocer dalgo de política asturiana, o una simple llamada a Delegación de Gobiernu, pa confirmar que, perhí, diben mal.

20090306200736-1

Sicasí, el periodiquín ruino d’Asturies xubióse al carro d’una manera insólita: desmintiendo lo que diz ‘La Razón’. Ablucante. De xuru que los sos llectores sabíen de lo que se taba falando. ¿Por qué lo fixeron? Pues por miéu a que los demás sí se sumaran al tema, pero fijo. Otra manera, dalgunu vio nel fechu de qu’ilustraben el desmentíu con una semeya d’Ornosa (ex voceru del Conceyu Abiertu pola Oficialidá y númberu trés d’UNA a les próximes eleiciones) como un intentu de machacar al movimientu de reivindicación llingüística, pero apostaría el prepuciu a que foi más cosa de la cortedá del archivu fotográficu del periódicu. ¿A quién diben poner?, ¿al cabeza de llista de les europees? La semeyina del facebook val pa facer gambaes nesti blogue… pero pa reproducir nel periódicu…

Asina qu’equí tenemos dos bultables cagaes periodístiques frutu d’una non menos bultable cagada política. Podría llamar a dalgún collaciu que puea tar enteráu de qué pasara… pero prefiero siguir xugando a periodista de La Razón, y siguir fabulando. Porque ye qu’esta historia tien pinta de tar motivada pola improvisación d’ultima hora. De cómo depués de nun poder sumase a la coalición de la Europa de los Pueblos, punxéronse a buscar los cincuenta avales necesarios.

A lo meyor dalgún tiró d’un collaciu vascu que-y fizo el favor de falar con esos conceyales pa completar el mediu centenar. Y sí, esos conceyales nun son etarres (taríen na cárcel), pero son una carta de presentación impresentable: son incapaces de condenar un atentáu, de condenar la violencia, de condenar l’actividá mafiosa d’una organización que, lloñe de ‘lliberar’ al so país, lo funde en sangre y miéu. ¿Que el so apoyu tendría que ser secretu y que los avales nun tienen por qué responder a coincidencies d’aición política? Sí, pero tamos falando de lo que tamos falando.

Paez que la improvisación y la bisoñez foron de la mano. Y quienes sí siguimos l’actividá d’UNA, conocemos a daquién que ta n’UNA y cómo tan trabayando, sabemos que, como dicía’l voceru Tino Fernández en La Voz de Asturias, cualquier sospecha de prosimidá ente esta formación y esi mundu violentu vascu ye ‘delirante’. Pero pal restu del planeta nun ye asina.

A la fin, esto nun va ser más qu’una anéudota de la historia d’UNA, un mal tragu, un error del que deprender por un partíu que vien demostrando unes convicciones democrátiques que pa sigo quixeren los afiliaos de la FSA, el PP y, últimamente, tamién n’IU. Estes coses faen madurecer y el guañu d’una formación profundamente democrática, pacifista y abierta, capaz de ganar simpatíes, de xugar un papel constructivu na sociedá asturiana, yá ta ehí. Munchu, pero que munchu ánimu a tola xente d’UNA.

12 comentarios en “Con UNA, más que nunca”

  1. Falta una entruga que toi faciéndome dende que m’enteré de tou esti enguedeyu. ¿Por qué pa tener derechu a que te voten necesítase más que l’aval d’ún mesmu (o d’un partíu, seique)? Nun soi atalantar otra cosa democrática más que “una persona, un votu… o un candidatu” Ensin más. 50 avales pa poder presentate a unes eleiciones quier dicir que necesites que 50 rivales políticos tengan que date’l preste. Y eso, cuido, nunca van dalo de baldre.

    Puestos n’estes, y coles prieses, nun ye d’estrañar que la UNA pida-yos esi aval al diañu mesmu; pero el mal nun ye eso, sinon l’orixe de que tenga que ser asina.

    Dicho esto, quédame namái poneme a disposición de la UNA pa lo que necesiten n’estes eleiciones. Nun ye que tenga yo especial enfotu n’averame a partíu dalu, qu’abondo quemáu toi d’abenayá. Nun ye qu’esto vaya durar más que’l tiempu que duren estes eleiciones, o los bilordios escontra. Pero esti ye’l momentu afayadizu pa dar la cara pola democracia y les llibertáes. Nun m’escondo.

  2. Bon analís, como siempre. Lo que me da rabia ye qu´al querer dar rápido la mio solidariedá a la UNA énte una agresión tan gorda de “La (sin)Razón”, el blogue míu sirviera (anque fuera un poquiñín) pa espardir un pocu más el bilordiu. Llaméntolo, daveres. Lo que sía menos dar razón y ecu a “La Razón” (esa cuchera, más bien). Agora decátome de la babayada aneudótica y “made in Madrid” de la noticia.

  3. Nin yo mesmu que milito sé qué mierda ye esto que pasó, pero agradezote permuncho esta entrada.
    Imaxina lo brutal, el shock que ye que ye que t’acusen de lo que nos acusó esi panfletu.
    La xente d’UNA ta pasándolo mal, pero gracies a les nueses convicciones, l’enfotu nel proyectu y a xente como vosotros vamos salir alantre y mui reforzaos. Si nun te funden asina faente mui fuerte. Gracies de verdá.

  4. Nun digo nada nuevo, pero la verdá ye que un post como esti agradézotelu enforma (eso ensin conocete). Como dicía’l collaciu d’arriba’l tragu que tamos pasando ye perduru.
    Nun soi yo nada partidariu de “teoríes conspiratives”, nin nada asemeyao. Paezme qu’intentar montar daqué asturiano, d’izquierdes, y qu’axunte sensibilidaes nueves (como l’ecoloxismu, la llucha contra la corrupción…) nún proyectu políticu nun habría tener coster personales. Pero ta claro que hai dellos que se nomen periodistes que nun lo ven asina… qué-y vamos facer.
    Gracies de verdá.

  5. Gracies a toos polos comentarios, especialmente a la xente d’UNA, que nun merecen dalgo que seguramente nun va pasar d’aneudota. De mano, lo meyor hubiere sío que naide nun fixera casu d’un bilordiu ‘made in madrid’, como diz carlos, pero dalgún comentariu, dalguna reacción d’apoyu a la xente d’UNA, había que lo facer, ¿o non? Tragos tan o más gordos vendrán, de xuru, si esta opción política va garrando cuayu, como paez que lo ta faciendo.
    En cuantes a lo de los avales: tampoco paez mui razonable que se puea presentar too cristo, col marafundiu qu’ello pudiera suponer. Cincuenta avales de cargos electos paez dalgo que, con un poquiñín de tiempu y precuru, consiguese.
    Lo d’Ornosa ya ta iguao, gracies smithi pola correición.

  6. Tola mio solidariedá cola UNA pero tamién con ANV, que tien que carecer la criminalización d’una sociedá mediatizao onde pensar estremao, ser socialista y ser independentista, ye ser “terrorista”.

    Desgraciadamente, esto nun escapa al to propiu analís de la custión, cayendo como caes nel llaberintu impuestu de les “condergues” y “non condergues” (que nun ye lo mesmo que facer apoloxía), onde, si nun pases pel aru del “constitucionalismu” del PPSOE vas pa la basoria. ¿Por qué nun desixes la condena a la guerra d’Iraq, o a los GAL, o al franquismu pa meter nel xuegu democráticu a PPSOE? Pero bono…¿nun dicíes tu qu’igual votabes a Patxi López si tuvieres ellí?

    Total: que sí a los avales d’UNA, que sí al so derechu innegable a presentase y contra les inxuries del españolismu y que non a la llei de partíos.

    Saludos.

  7. Nun voi ser yo quien xustifique la ilegalización de nengún partíu en democracia… sicasí hai una diferencia de bultu entre UNA y ANV los primeros son pacifistes y contrarios a cualesquier tipo de violencia, mientres que los segundos son incapaces de condenar a los asesinos d’ETA…

  8. Tortu, nun pensamos igual. Nun me gusta la llei de partíos de mano, porque me paez negativa pa les llibertaes y la democracia, abúltame que ta empobinada nun sen mui determinao, con efeutos qu’agora paga, y mui caros, la UNA. Pero menos me gusta que se xustifique o se ampare con silenciu cómpliz, ciegu ya hipócrita el crimen. De toles maneres, nun ye el que conderguen o non los atentaos lo que-yos illegaliza, sinon la so vinculación direuta con una banda terrorista. A lo meyor tú podrás discutir les prebes qu’amuesen esa vinculación: yo nun tengo manera.
    Y veo que sigues sin entender un res de la mio alusión a Patxi López. Qué-y vamos facer, pero paezme que yes de los que nun son a ver los matices. Si quies, otru día falamos d’Iraq y el GAL.

  9. ¿Vamos, que nun te presta esta llei pero entiendo que la ves en cierta manera xustificada dientro de lo que pasa nel entornu de la izquierda abertzale?. De toles maneres…has desplicáme ú’l crime (llegal, ¿eh?, non moral, que caún tenga polo suyo) en nun plegase a les “mociones-encierru” que presenten los “constitucionalistes” p’arrampuñar alcaldíes a la IA). La IA lleva condergando dende siempre la violencia “de todo tipo” qu’azota Euskal Herria. Pero caro, eso pal poder nun val, porque inclúi les lleis de partíos cuestionaes n’Europa, les lleis penitenciaries que violen derechos internacionales como denuncia A.Internacional, la tortura y represión en cárceles, aquello de prindar a quien se ponga detrás d’una pancarta que diga “S-E-G-I” etc.

    ¿Condergó’l PP el franquismu? ¿Y el monarca? ¿Plantegástite dacuando esa doble moral na que caemos llexitimando esti rollu de les mociones “étiques” y tal? ¿Entós qué, siguimos metiendo presxs a políticos que cometen el terrible crime de presentar candidatures o tener un periódicu con una llínia ideolóxica determinada? Y la xente de la UNA que pidió l’aval, ¿qué? ¿terroristes tamién?.

    Con esti razonamientu evidentemente nun vamos a sitiu dalu. Bono, o acabamos diciendo lo mesmo que La Razón.

    Sofito a UNA, por dos motivos: el primeru, porque tienen derechu a presentase contra una llei electoral qu’obliga (anque perequí teas d’alcuerdo con esi corporativismu “nun vaya presentase cualquiera” (sic)) a tener 50 amiguinos del “sistema” firmando pa que pueas xugar con ellos.

    En segundu llugar porque toi contra la llei de partíos y la illegalización de cientos de miles de persones y la so voz nesti estáu.

    Al final…lo más murnio ye que, si nun chiscare a UNA esti asuntu…ANV siguiríen siendo unos “cocos” pa munchos…

    En fin, ye evidente que nun tamos pa nada d’alcuerdu. Pa tolo demás el C.Lliberal 🙂

    Saludos.

  10. Ostia, la primer vegada que naide me llama troll. Tranquilu, abocano y más panchu qu’anchu.

    Llarga vida a GyG, el meyor blogue del añu 2008.

    Un saludu y a pol de 2009, que de xuru que ye merecíu!

Responder a Dangerous Piper Encaboxar la rempuesta

La direición de corréu electrónicu nun va espublizase. Ríquense los campos marcaos con *