Tag: pp

Ye la hora de la xuntanza… de votos

Si dalgo pon n’amuesa la encuesta qu’ayeri espublizara’l CIS ye que l’asturianismu cuerre’l peligru serio de desapaecer totalmente del mapa políticu asturianu. Ente les distintes candidatures que se presenten, namás la de Bloque por Asturies-UNA apaez con posibilidades de salise por poco del mecigayu ‘otros partios’. La encuesta-y da un 1,1% d’estimación de voto, per baxo incluso d’UPYD. A partir d’ehí, partíos como Uras-Pas o Conceyu Abiertu, Ideas, Frente de la Izquierda, Pacma, Los Verdes-Grupo Verde, Frente Nacional-MSR, el Pdyc del cura La Manxoya y maroto’l de la moto, repartiríense un 2,9% del votu a ‘otros partíos’. El panorama, pa los que sentimos entá la necesidá de que l’asturianismu seya quien a participar, a influir na cosa pública de la provincia, ye murniu enforma.

Nos tiempos últimos, mientres la estratexa d’anulación del asturianismu en xeneral (cultural y políticu) avanzaba dende les esferes de poder n’Asturies (por dios, que l’unicu periódicu qu’anunciara con xeitu la manifa de la Xunta Pola d’esta tarde ye l’Avui!!), los líderes políticos del nacionalismu o el rexonalismu asturianu nun fueron quien a fraguar la necesaria xuntanza de fuerces y abrir un camín de futuru pa esti movimientu políticu. Hailos que más que trabayar por ello, paecía qu’enredaben pa que nun se fixera ren. Pero nun ye esti’l momentu d’echar culpes.

Énte esa falta d’enfotu de los líderes políticos, a lo meyor habría que pensar que los que votamos, esi porcentaxe de población qu’ apuesta por que Asturies seya un país consciente de sí mesmu; podemos facer muncho pola masuñada xuntanza. Y podemos facelo votando.

Nun ye ‘por dar males noticies’, pero hai series posibilidaes de que l’asturianismu quede dafechu fuera de la Xunta Xeneral nestes elecciones por primer vez dende 1991. Dende entós, fuera la Coalición Asturiana de Pas-UNA, el Pas solu, la Uras o el Bloque por Asturies con IU, l’asturianismu tuvo presente de dalguna manera nel parlamentín. Esta vez, difícilmente un asturianista se puede conformar cola presencia de Foro Asturias, non ya solo por Cascos, sinon pola bultable presencia nos sos ‘cuadros’ de cabezaleros n’Asturies de la mui sincera Fundación para la Defensa de la Nación Española (Denaes), ente otros peculiares integrantes d’esa especie d’exércitu de rebotaos.

Nun hai otra. Si queremos evitar la extinción d’esta forma de ver el mundu y la realidá d’Asturies, habrá que tomar midíes, y midíes d’urxencia que pasen por dir toos a una y votar una candidatura asturianista,  una candidatura que de dalguna manera seya quién a dicir qu’equí sigue habiendo país.

Volviendo a les encuestes, podemos ver que los resultaos de la acabante d’asoleyar pol CIS (fecha ente marzu y abril) ye mui asemeyada a la que va un mes espublizara precisamente Bloque-UNA, y que-y daba a la coalición asturianista un diputáu. La del CIS repartía los 45 escaños ente’l PSOE (19), PP (16), FAC (7) e IU (3), mientres que la fecha por encargu de Bloque-UNA namás analizaba datos de la circunscripción central y repartía los 34 escaños correspondientes ente PSOE (14), PP (9), FAC (6), IU (4) y BA-UNA (1).

Ensin xéneru de duldes, esta última encuesta, anque ‘de parte’, ye la que más s’avera a la fecha pol muérganu públicu estatal d’estudios demoscópicos, especialmente no que cinca al repartu de les fuerces mayoritaries. Distintu ye lo que pasa col baille de diputaos de los dos grupos minoritarios: IU sacaría 4 ó 3 diputaos, y BA-UNA algamaría 1 ó 0. Y paez que, atendiendo a la prospección del CIS, nel momentu en que se fizo la encuesta Bloque-UNA taba más cerca del cero e IU del 3. (Los márxenes d’error, sicasí, son del 3,5%, un porcentaxe que ya de por sí puede suponer hasta dos diputaos).

Pero lo que paez evidente, ye que a la vista de les encuestes más importantes de les espublizaes hasta agora, si hai una opción de que l’asturianismu entre na Xunta Xeneral, esa ye la de Bloque-UNA.

Al marxe de que les tendencies de voto seyan eses, tamién la opción de Bloque-UNA gana, dende’l nuestru puntu de vista, otres comparaciones. Actualmente, ye l’intentu más serio de facer una propuesta política xenuinamente asturiana y asturianista na que dalgunos, dende fuera del asturianismu, ven como un guañu de BNG ‘a la asturiana’. Con tolos ‘peros’ que munchos puean dar al so ‘izquierdismu internacionalista’, al usu d’asturines ensin estrella colorada o a los pendientinos de Rafa Palacios, lo cierto ye que na precampaña fízose evidente que ye la propuesta más ilusionante y con puxu del espectro ‘asturianista’.

Naide va negar a estes altures nada a Xuan Xosé Sánchez Vicente y lo que pa too asturianista supunxo nel so momentu Conceyu Bable o el Pas, partíu que preside dende la so fundación va 26 años, y col que se presenta a les elecciones dende va 24 años. Pero ye evidente que toa figura pública, por mui rellumante que seya, como ye’l casu, sufre un desgaste. De fechu, los cabezaleros d’Uras qu’avecen a acompañalu nes sos apariciones públiques últimes, tal paecen empleaos de pompes fúnebres qu’asperen l’entierru definitivu d’esta vía del asturianismu.  Lo que podía aportar el Pas, que foi munchu, ya se vio nel cuartu de sieglu pasáu. Agora a lo meyor ye’l momentu d’intentar otres víes y dexar pasu a otros que, pudiendo dicir lo mesmu, quizás lo digan d’otra manera más efectiva. Quizás.

Y tampoco-y vamos restar méritos a esa xente de Conceyu Abiertu que se sienten firmes nunes convicciones y una visión de la realidá que, temen, se dilirá si acepten determinaes táctiques de xuegu. Ye cierto que, dacuando, la radicalidá na defensa de principios ideolóxicos ye la única forma de plantar cara a los que tienen tolos resortes del poder, pero tampoco ello tien que confundise col inmovilismu. Un inmovilismu al que, les más de les veces, nun se-y ve xacíu dalu. Pa nun movenos de onde tamos, ¿faen falta organizaciones? ¿Paga la pena presentase a unes elecciones?

Nos creemos que sí que paga la pena presentase a les elecciones. Pero presentase pa ganar. Pa facer daqué. La victoria del asturianismu nun va ser otra que la de superar toles torgues que dende’l poder económicu, políticu y mediáticu de la provincia se ponen a una alternativa política que, de medrar, diba supone-yos un grave problema. Corrientes polítiques que discutan les esencies del nacionalismu españolista son tolerables en País Vascu y Cataluña, incluso en Galicia o Canaries. Tamién n’Aragón o Andalucía. Pero n’Asturies, na ‘cuna d’España’, non fíu non.

Por eso, de nosotros, de los asturianos, va depender que se superen eses torgues. Llevamos tiempu esperando que quienes tan al frente de los partidinos políticos asturianistes se pongan d’alcuerdu, pidiéndo-yos intelixencia y que miren pol futuru del país. A lo meyor va siendo hora de que la xuntanza alcance tamién a la base, al votu. Obviando pequeñes diferencies, defectos, pero salvando los muebles y aniciando a partir de xunu una etapa nueva pal asturianismu que, esperemos, seya pa bien. Por eso, y parafraseando a Inaciu Iglesias (nun tengais miéu, nun vamos de candidatos casquistes) “si fuéramos Xuan Xosé o Mariu Arbesú, pidiríamos el votu por Bloque-UNA, pidiríamoslu si lo fuéramos… pero nun lo somos”. De xuru Bloque-UNA nun ye lo que toos desearíen que fuera. Pero ye lo meyor que tenemos y podemos facer por qu’ameyore día a día, toos, en xuntanza.

Tiempu d’encuestes

A naide se-y escapa ya que les encuestes electorales hailes de dos tipos. Unu ye’l de la encuesta interna, ferramienta que sirve pal analís estratéxicu de cada partíu nos tiempos previos a la cita electoral. Eses encuestes nun se suelen asoleyar nun siendo qu’ello beneficie a quien la encargó, y si se publiquen, pasen a formar parte del segundu tipu d’encuestes: les propagandístiques.

N’esti puntu falamos d’encuestes empobinaes nun determináu sen. Preséntense como ferramientes informatives, pa conocer la orientación política, pero siempre pasen pela famosa ‘cocina’ na que los resultaos cuecen, mengüen o xuben como por gracia de llevadurina acordies con una determinada orientación política interesada.

Mesmo que nun hai un mediu de comunicación asépticu, nun hai portada d’Interviú ensin fotoxó, nin carretera ensin barru; tampoco nun hai encuesta que nun tea retocada.

No tocante a les elecciones del 22 de mayu asoleyáronse entá poques encuestes, y toes amuesen aspeutos qu’amenorguen la so credibilidá. Les dos primeres (que recordemos), foron espublizaes en pleno boom casquista polos diarios El Comercio y el madrilán El Mundo. Dambos dáben-y al ex ministro casquista una abultada victoria, magar que diferíen enforma nel volume d’apoyos recibíos por PP y PSOE. Nel casu del diariu xixonés, la encuesta fecha por Asturbarómetro, los socialistes alcanzaben un 21,4% y un 18% los populares. La encuesta de Sigma Dos pa El Mundo dába-y un 27,3% al PSOE y un 22,5% al PP. Dambes encuestes basábanse en datos recoyíos a ente 450 y 500 encuestaos de toa Asturies, nun momentu nel que la expectación polos movimientos d’Alvarez Cascos yera máxima.

Nenguna de les dos encuestes destacó entós pola so apariencia de fiabilidá, habida cuenta de les circunstancies en que se fixeren, y el fechu de que un vuelcu tan acusáu paez, de toes toes, improbable nun electoráu tan conservador col so votu como l’asturianu. Dicíalo esti día Inaciu Iglesias na edición en papel del selmanariu Les Noticies, y nun hai más que ver los resultaos electorales pasaos pa ver que ye verdá, qu’un vuelcu nos resultaos ye tarea mui improbable… pel momentu.

Y agora apaez una nueva encuesta, que se presenta como del primer tipu (interna de Bloque por Asturies-UNA), pero que s’espubliza tolo al altu la lleva que se puede por mor de que vendría a confirmar lo que paez que ya apuntaben encuestes internes d’otros partíos: que Bloque-UNA llogren superar esi 3% de votos que-y da entrada a la Xunta Xeneral.

Hai puntos nos que la encuesta abúltanos con un puntu más de credibilidá que les otres dos. D’una banda, que se base nuna cifra muncho más presentable d’entrevistes (mil llamaes telefóniques), d’otra, que tea llendada a la circunscripción central (les otres dos encuestes tomen Asturies como una única circunscripción). Los resultaos, amás, paecen más acordes col mentáu ‘conservadurismu’ del votante asturianu: una baxada relativamente importante de los apoyos del PSOE (de 15 a 14 escaños, anque la perda en porcentaxe ye mayor), una caída entá más fuerte del PP (de 15 a 9 escaños) y la irrupción del fenómeno Cascos con nada menos que casi un 20% de los votos, lo que-y permite algamar 6 escaños. Un resultáu realmente espectacular. Tres d’ellos, IU caltién el tipu xunto a Los Verdes y llogra 4 escaños, y Bloque-UNA consigue un diputáu, escañu qu’ocuparía Rafa Palacios.

Lo que más choca d’esta encuesta, de fechu, son los datos relativos al grau de conocimientu de los candidatos. Paez raro que los insípidos Javier Fernández e Isabel Pérez Espinosa sean más conocíos  que Álvarez Cascos (aunque sea por un porcentaxe de diferencia mínimu), y dicir que más del 70% de los votantes de la circunscripción central conocen a un tal Ignacio Prendes d’UPyD, da que pensar. ¿Esplicaciones? Los procedimientos siguíos na famosa ‘cocina’ de los datos sobre conocencia de candidatos, podrían tener muncho que ver. Y tamién la entruga que se-y fai al encuestáu. Nun ye lo mesmo preguntar ‘¿Conoz vusté a Isabel Pérez Espinosa?’ que ‘¿Conoz al candidatu d’Ideas?’.

Sicasí, equí quedamos coles ganes de saber más, de conocer más detalles d’una encuesta qu’abulta ser la más fiable de les conocíes hasta la fecha públicamente. Porque, polo que mos llega, los sondeos d’usu ‘internu’ que manexen en dellos partíos dan resultaos mui asemeyaos a lo que nella se reflexa… Quizás, tal vez, a lo meyor, ello esplica la discreta acoyida mediática de la encuesta.

¿Pero quién-y pon al PP la pierna encima?

El PP escoyó como candidata a la presidencia del Principáu, Cascos mediante, a una conceyala uvieína que se llama Isabel Pérez Espinosa, aunque Rajoy piense que ye Fernández Espinosa, o dalgo pol estilu. El casu ye que esta probe, que de xuru nunca la vio tan gorda, va y pon yá la cara a los cartelos pre-electorales del PP, nos que se ve un eslogan que tal paez que lo fizo un cabezaleru de Foro Asturias.

¿Qué coyones ye ‘Puedes confiar’? Paez evidente que ye la ‘creación’ d’un becariu de Primero de ‘Nunpiensesnunelefanteoloxía‘. Axunta ‘puedes’, de poder, de yes we can, de podemos (pártome polo baḥinis), con ‘confiar’, de seguridá, confianza, de calor familiar, de fiabilidá… Pero el resultáu ye de desastre. ‘Puedes’ nun ye lo mesmo que ‘podemos’, ‘puedes’ suxer esfuerzu individual, como cuando tas estreñíu… pero el casu ye que si además, cuando axuntes  dos palabres nun tas sumando conceptos, sinon que tenemos un conceptu nuevu. ¿Quien te diz ‘puedes confiar’? Pues un yonki cuando ta dándote la chapa enantes de date’l palu, un corruptor de menores (fíate de mi guapín, mira que piruleta tengo…). Más qu’inspirar confianza, inspira lo contrariu. ¿pa qué me diz que me pueo fiar d’ella, ‘cola que ta cayendo’? Excusatio non petita ¿non? ¿O ye que tien miéu a que l’asuntu Riopedre salpique la so credibilidá?

En fin, coses de la precampaña. Lo que sé que querríemos dende equí ye felicitar a ‘Fueya en blanco‘ y al ‘Conceyu Nacional de Liriu‘ pola so victoria na nueva edición del premiu al Meyor Blogue (gracies otra vuelta a Trayasgaya y compañía por caltener l’espíritu de comunidá na blogosfera n’ast). Como ya tuiteáramos esti día, nel nuestru casu el méritu del diseñu ye mayormente de Julien de Luca, autor de la plantiya pa WordPress na que se basa esti blogue, y tamién de Jim Henson y del equipu téunicu de grafismu de la Public Broadcasting Service (PBS) de los Estaos Xuníos d’América, autores de monstruu de dos cabeces y del logo de Barriu Sésamo nel que basamos el nuestru. De xuru que se nos olvida más xente, pero de verdá, y ya en serio, que gracies.

Cascos gasta bufanda oversize

La comedia esta de Cascos ta a piques d’acabar con pinta de ser un fracasu de crítica y públicu. Les imáxenes de l’aparición última d’esti paisanu en Siero dan cuenta del patetismu nel que ta enllamargáu el PP asturianu. San Cascos, el so gran salvador, aquel que nos 90 se cargó la posibilidá de facer del PP un partíu sólidu n’Asturies, ya nun ta pa baños de mases. Ye más una especie de friqui con traces al que namás-y siguen peperos rebotaos y periodistes. Lo más consistente que se puede sacar de su visita absurda a Siero ye que gusten-y les bufandes ‘oversize’, que nun sé si ye otra d’eses tendencies piḥes, como peinase p’atrás con gomina o siguir l’actualidá del pádel nacional n’Intereconomía, pero ye igual d’absurda. ¿Pa qué se pon una bufanda que-y escolinga hasta la entrepierna?

Esta semeya, del foteru d’El Comercio, Pablo Nosti y publicada nesta galería, ye la preba de lo que digo.  Cascos ya nun tá pa axuntar a cientos de correlixionarios. Cascos asusta a les paisanes que tienen que facer maniobres arriesgaes col carru la compra y salise del pasu cebra pa nun topase pela cai con elli, que tal paez un Luis Aguilé d’hibiernu.

El casu ye que esta historia ya fiede. Qu’esti papelón del PP (el de los ya de por sí desprestixaos medios de comunicación asturianos, ye otra), ye’l reflexu del trunfu social del PSOE. Guste o non, n’Asturies tenemos un partíu únicu, que llega a tolos requexos de la sociedá asturiana, a toos, dende la indixencia a los Masaveu, y que consiguió controlar a distancia a un PP cuya dirección, como si de Belén Esteban se tratare, mata por siguir apigazando nos escaños y calteniendo la so posición privilexada y atopadiza. Por eso a Cascos namás-y queden los rebotaos, los friquis que nagüen por un PP asambleariu nel que s’acepte lo que dicen les bases (y creen en Cascos, ya, son asina de necios, prubinos). El casu ye que cuidadín con Juan Morales.

Colunga irrita a Areces

Resulta que’l debate sobre l’estáu de la pación valió pa que rescample el miéu que tan xenerando los movimientos últimos del asturianismu nel ‘stablishment’ sociata. Asina quedó n’amuesa na respuesta que-y dedicó el presidente caducáu Areces al diputáu del Bloque por Asturies. Lloñe de responder a nada, dedicóse a espatuxar como una morsa reprochando a Colunga que seya diputáu y minoritariu, más que minoritariu minoritarísimu, microscópicu… a la fin, despreciatible… Areces cayó nuna trampa boba: acusa-y a Colunga d’afear agora a un gobiernu qu’enantes sofitó, pues igualmente Areces desprecia y menosprecia agora a una formación qu’enantes tuviere gustosamente como socia. La diferencia ye que foi la pequeña la que nun aguantó más el golor de la grande y marchó. ¿Oportunismu? Quién sabe… a la vista de cómo se irrita Areces, tal paez que nel Bloque, UNA y redolada, tan dando pasos acertaos. Na FSA saben muncho d’encuestes… ¿qué dirán les que tan manexando a siete meses de les elecciones? Con un PP d’engarradiella n’engarradiella, y una IU fiel… l’enemigu que ven nel PSOE estos díes paez que venga pela izquierda y pel asturianismu…

Iconografía casquista

Esti asuntu del Cascos (cómo-y presta revolver a esti home) abúltame mui entreteníu. Quien vaya ser el próximu presidente del Principedo ye dalgo que me la refanfinfla enforma a estes altures. L’asuntu políticu ye lo de menos, porque confío nel bon xacíu de los míos p’axuntase y convertise na verdadera alternativa política del país d’equí a unos meses. Lo que de verdá presta del asuntu Cascos ye la iconografía que vien desendolcando esi movimientu que puxa pol líder.

Toes ese romeríes que faen perende a mayor gloria del santu Cascos son, a la vista de lo espublizao nos diarios, toa una amuesa de lo que ye la derecha asturiana de tola vida, n’estáu puro. De xuru que nun soi l’unicu al que-y flipa la pancarta esta de la romería de Xixón. “Gijón con Cascos” ye un eslogan tan salchicheru, paternalista y cutre que a cualquier asturianu-y paecerá atopadizu, caldiu, entrañable.

Na semeya sirvida pola axencia Efe malapenes s’aldovina la galería personaxes que participen na misa pol santu. Xente de les bases qu’aprendieron a ponese detrál del orador pa la semeya, como nes mises preconciliares, pero a los que-yos falta la dirección de los caros gabinetes d’imaxe y diseñu gráficu que comanden la escenografía pública de too actu de los grandes partíos políticos.

Imaxe y non conteníos. Eso ye lo que fai que la xente vote, lo que fai que’l pueblu asturianu se movilice y cuerra a Valencia de don Juan a afalagar al mesías de la derecha asturiana (echa-y un güeyu a la galería de Nacho Orejas en LNE).

La verdá ye que, procesiones del santu como la de la foto d’enriba, son Asturies pura, la mesma Asturies que va unos años enllenaba el pabellón de deportes d’Uviéu a la gueta d’un líder, d’una personalidá fuerte que-yos empobinara pel camín de la xente ‘de orden’.

¿Alón a la década de la travesía pel desiertu?

logos¿Qué balance se pue facer de la década que ta a piques d’acabar no que cinca al asturianismu? Ye d’esperar que, de dalguna manera, lo asocedío pente l’añu 2000 y el 2009 nun foi tan ruino como pudiera paecer. A lo meyor tamos énte un escenariu nuevu depués de diez años d’un movimientu en víes de madurecer y de presentase énte’l restu la sociedá d’un mou enforma más convincente, creible y serio de lo que se pudo facer dende los setenta.

La década entamaba cola resaca de la gran crisis nel principal partíu asturianista de la historia. El Pas, condergáu al extraparlamentarismu polos propios errores y por un rexonalismu d’ocasión como’l de Uras, nun supo aprovechar la posición algamada na década anterior p’axuntar y abellugar el sentir asturianista. Poro, anicióse una desintegración que nun aparó hasta va poco.

Los resultaos electorales d’aquel 1999, col PSOE en mayoría absoluta, dexaron en nada les posibilidaes del rexonalismu ramplón de la Unión Renovadora Asturiana, que bien lluéu foi perdiendo fuelle col gruesu de les sos files tornando cola cabeza gacha al llar del PP.

Pel lláu de la izquierda nacionalista, too diba movese nesta década a guelpe de convocatoria electoral. Nes primeres autonómiques, les de 2003, aquella INA de Rafa Palacios, ún de los vértices de l’atomización d’esta estaya del asturianismu, diba reñacer en forma de Bloque por Asturies pa abrir una estratexa nueva, en xuntanza con una Izquierda Xunida necesitada de recuperar la so posición de tercer fuercia política na Xunta Xeneral. Y l’esperimentu funcionó, especialmente pa IX, qu’entró nun gobiernu nel qu’el pesu del Bloque vióse especialmente nel ‘internacionalismu’ del cargu concedíu a Palacios como responsable de Cooperación.

Aquella primer lexislatura de la ‘esquierda plural’ foi la d’un ciertu espoxigue de la presencia institucional de la llingua asturiana, del anicio de la igua de la toponimia y de dalguna otra aición cosmética sin que s’avanzara munchu más nel enfotu en ‘facer país’ del asturianismu. Cierto ye, la representatividá nun daba pa muncho más.

Nes mesmes eleiciones de 2003, confirmábase l’esbarrumbe d’un Pas al debalu, mentes que Uras diba amosase como lo que foi: una rempuesta fracasada a la yá tradicional tendencia del PP asturianu a l’amarraza interna. Tamién foi l’añu nel qu’Andecha Astur algamaba el so cumal de votos con más de 3.800 papeletes nel so favor. Una situación cásique marxinal que, col tiempu, diba amosase como l’aparentemente deseable pa un seutor relevante de les sos bases y cargos.

La sangría nel Pas diba siguir seliquino pero de contino nesos años, tamién no que se refier a una presencia nos conceyos que diba retroceder entá más nes eleiciones de 2007.

Esa convocatoria diba ser un puntu y a parte nel panorama políticu asturianista al abrise estratexes nueves que nun dieron resultaos inmediatos, pero que podríen converxer con éxitu nesta década a piques d’entamar.

D’una banda, axuntábense pela derecha lo que quedaba d’un Pas y una Uras cola idea de que sumando los votos algamaos por caúna d’elles en 2003 diben recuperar un escañu na Xunta Xeneral. Pero l’electoráu nun vio más que un intentu desesperáu y poco creíble a lo que ayudó enforma el cambéu de discursu del PP, muncho más sensible agora pa col arume rexonalista de los sos fíos pródigos.

Pela otra banda, l’intentu de xunión d’Ias y Andecha, los otros dos vértices de l’atomización de la esquierda nacionalista, acabó nun pleitu nunca esclariáu del too que sólo sirvió pa que rescamplara una vuelta más la incapacidá, o les poques ganes, de dellos seutores pa sacar alantre un proyeutu serio.

politicos

El resultáu d’aquella xuntanza a medies foi la recuperación de les sigles UNA p’abellugar a Izquierda Asturiana y Andecha Astur Suyúdice nun intentu de facer una propuesta mui asemeyada al Bloque por Asturies, pero sin estratexes de coalición con formaciones subsidiaries d’organizaciones estatales que comprometan los sos oxetivos políticos. Pel momentu, los errores y la debilidá organizativos vienen lastrando enforma la so actividá y el so desenvolvimientu na vida pública asturiana.

Lo cierto ye que, dende aquelles eleiciones, l’asturianismu políticu entró nun procesu de depresión con síntomes claros. Asina, énte les llamaes a la xuntanza y la bronca pesimista xeneralizada, Andecha vuelve a entamar un llamáu a la xunión de los asturianistes al que-y sigui el xuegu el Pas, d’un mou bien poco creible y de nula repercusión acullá del ruxideru cibernéticu. Pela so parte, la crisis interna n’Izquierda Xunida arrequexa al so seutor más asturianista y acaba cola dimisión d’un Valledor que nun dexó de falar de refundaciones y xuntances con mención esplítica a UNA. Nesi sentíu, y ya nes selmanes últimes de la década, la dimisión de Valledor abre la puerta de la Xunta Xeneral a la esquierda nacionalista na persona del secretariu xeneral del Bloque, Roberto Colunga, quien tamién dexa abierta la puerta a contautos con otres formaciones de cara a los comicios de 2011.

Sicasí, l’escenariu col qu’entama la década ye’l del enfotu nuna serie de previsibles movimientos que puean dar resulatos sólidos a mediu y llargu plazu. Con una militancia entá probe y una sopa de sigles y logos nes que s’atopen fórmules claramente fracasaes y otres con un recorríu posible, dende’l próximu 1 de xineru lo mesmo podemos tar énte l’aniciu d’un nuevu momentu históricu pa un asturianismu que, d’una vez, tien de dexar de perder trenes.

Cascos retornable, Valledor insiste

returns

Entamen a tomase posiciones cara a les eleiciones de 2011. Güei apaez Cascos dando anuncia en La Nueva España a la so intención de volver a la política. Como si nun se fuera a esperar esta anuncia depués del so mitin na ceremonia d’entrega de los caspipremios de la Sardina, va unos díes n’Avilés. Con ciertu tonu salvapatries, Cascos vien a dicir qu’a los del PP asturianu ta visto que nun se-yos pue dexar solos, y qu’Asturies, ensin él, pierde muncho. Esto último, nun hai quien-y lo discuta. El casu ye que la murnia y folgazana cúpula pepera asturiana, que se creía llibre de Cascos, ya se pue preparar. ¿Qué cálculos fadrán na FSA?

valledo

D’otra manera, Valledor insiste na so propuesta de partíu políticu nuevu. Failu nel númberu trés de Atlántica XXII (yá nos quioscos), nun artículu nel qu’afonda no ya conocío: les sos ganes por impulsar un partíu asturianu, d’esquierda, asturianista, ecoloxista y feminista. Sacante lo de ‘partíu asturianu’, lo demás paez que se correspuende con la definició que de sigo faen n’Izquierda Xunida… asina qu’a ver. Como dicíen va poco en Les Noticies, cuido que yera Inaciu Iglesias nun artículu: falta saber qué ye lo que más diba primar nesi hipotéticu partíu, si Asturies, o si la supuesta izquierdosidá que xustifica pactos que-y permitan a la FSA caltener el chiringu.

Sorpresa!! Los resultaos de les europees son un fedor!!

Siendo serios, nun se podía esperar otra cosa de los resultaos de les pasaes europees. La FSA-PSOE perdió 25.000 votos y tres puntos pero siguió ganando nuna Asturies na que un provincianu y folgazán PP vive de les rentes d’Esperanza Aguirre. IU–BA frena daqué’l so esbarrumbe progresivu y UPyD apaez como la cuarta fuerza na segunda ‘rexón’ na que más porcentaxe de votos algamara. Hasta equí, lo que votaron el 96% de los asturianos que punxeron el sobre na urna.
Esi mesmu porcentaxe, más o menos, foi’l que se repartieron cincu años anantes PSOE, PP y IU. Asina qu’UPyD paez que ye quién a facese un requexín colos sos casi 18.000 votos, casi esautamente los que pierde el PP folgazán d’Ovidiu Sánchez y compañía. Paez bastante claro que ye ehí ónde’l partíu de Rosa Díez garra cachu, porque si equí el castellanu, la unidá d’España y l’estatutu paecen nun ser un problema, sí que lo ye pa una parte de la derecha asturiana la falta d’iniciativa y la probitú política del Partíu Popular. Ello, xunío al desgaste del gobiernín socialista, va facer qu’UPyD seya, yá, un referente nel panorama políticu asturianu pal prósimu quinqueniu (o lo que tarde’l dúu PP-PSOE en reaccionar).

posters

Pasemos agora a analizar el votu puxarra, esi 2,35% de los sufraxos (descontemos el votu’n blanco y los nulos, quinta y sesta opción de los asturianos con 6.038 y 2.662 sobres, respectivamente). Ecoloxistes/proteccionistes, nacionalistes, ultraderechistes y friquis se reparten, per esi orde, 12.447 votos n’Asturies.

La marca ‘verde’, la relativamente visible militancia ecoloxista y proteccionista n’Asturies y el votu refalfiáu vendríen a esplicar la habitual presencia de llistes como Los Verdes-Grupo Verde y el recién PACMA nos primeros puestos de les eleiciones underground. El murniu panorama nacionalista asturianu tamién se vio refrendáu nel resultáu con UNA superando por venti votos los casi 421.000 qu’hubo, a Iniciativa Internacionalista. Dende ehí a ‘Europa de los pueblos verdes’, pasando por PCPE y Andecha Astur, la diferencia foi tan patética como’l fechu d’analizar los resultaos d’estes opciones microscópiques.

Detrás (cola escepción d’Izquierda Anticapitalista), vien una retafila de partíos d’ultraderecha. Ehí ta el Frente Nacional del ‘carismáticu’ Fernando Cantalapiedra, un mozo pol que nagüen vieyos falanxistes como’l futuru de la nación española, qu’entamó esti proyeutu de xuntanza nacionalista que ye FN, pero que nun foi quien a despegase de los troglodíticos Democracia Nacional (quiciavis los ultres más conocíos n’Asturies), nin de les falanxes nes que militara va tiempu Cantalapiedra.

La tercera fuercia d’estrema derecha ye’l neonazi Movimiento Social Republicano (MSR), partíu encabezáu nestes eleiciones pola skin-girl Carmen Martín, y que s’alloña de la herencia franquista de la ultraderecha española pa ufrir la ortodoxa nacional socialista a la sociedá. (Usen davezu l’asturianu nos sos blogues y na so propaganda, y exercen una suerte de patriotismu asturianu como ‘patria carnal’ frente a la ‘patria histórica’ que sería la española o la ‘patria política’ europea).

Tres d’ellos, les clásiques falanxes, partíos rexonalistes, agrupaciones de sectes y outsiders de toa triba se repartieron dos mil votos, más o menos los qu’algamaron UNA, II y AA xuntos.

Conclusión: o organizamos un suicidiu colectivu del asturianismu, o facemos daqué. La opción d’IU-BA, per sé, ye la única presencia decente pal asturianismu nel panorama político, pero abúltame escosa y con mui mala pinta si s’anecia na estratexa actual cara a les eleiciones de 2011. D’otra banda, el resultáu d’UNA nun cambia un res l’enfotu de quienes facemos esti blogue nesta formación, porque otra cosa nun se pue esperar. L’Angliru cuesta xubilo’n bicicleta. Nun te digo nada si lo que tienes ye un triciclu ensin pedales. Pero oye, hai que siguir entrenando y, demientres, buscar equipu col que competir. Les tresfusiones, la nandrolona y la EPO dexámos-yla a UPyD, que ya-y vendrá la páxara.

PD: ¿Por qué la xente sigue votando al PSOE? Porque son socialistes de tola vida y porque con ellos, va-yos bien. Nun hai más.

PD2: ¿A quién-y importa que la derecha vaya ser mayoría nel Parlamentu Européu? ¿Daquién sabe qué mayoría había enantes?