Sorpresa!! Los resultaos de les europees son un fedor!!

Siendo serios, nun se podía esperar otra cosa de los resultaos de les pasaes europees. La FSA-PSOE perdió 25.000 votos y tres puntos pero siguió ganando nuna Asturies na que un provincianu y folgazán PP vive de les rentes d’Esperanza Aguirre. IUBA frena daqué’l so esbarrumbe progresivu y UPyD apaez como la cuarta fuerza na segunda ‘rexón’ na que más porcentaxe de votos algamara. Hasta equí, lo que votaron el 96% de los asturianos que punxeron el sobre na urna.
Esi mesmu porcentaxe, más o menos, foi’l que se repartieron cincu años anantes PSOE, PP y IU. Asina qu’UPyD paez que ye quién a facese un requexín colos sos casi 18.000 votos, casi esautamente los que pierde el PP folgazán d’Ovidiu Sánchez y compañía. Paez bastante claro que ye ehí ónde’l partíu de Rosa Díez garra cachu, porque si equí el castellanu, la unidá d’España y l’estatutu paecen nun ser un problema, sí que lo ye pa una parte de la derecha asturiana la falta d’iniciativa y la probitú política del Partíu Popular. Ello, xunío al desgaste del gobiernín socialista, va facer qu’UPyD seya, yá, un referente nel panorama políticu asturianu pal prósimu quinqueniu (o lo que tarde’l dúu PP-PSOE en reaccionar).

posters

Pasemos agora a analizar el votu puxarra, esi 2,35% de los sufraxos (descontemos el votu’n blanco y los nulos, quinta y sesta opción de los asturianos con 6.038 y 2.662 sobres, respectivamente). Ecoloxistes/proteccionistes, nacionalistes, ultraderechistes y friquis se reparten, per esi orde, 12.447 votos n’Asturies.

La marca ‘verde’, la relativamente visible militancia ecoloxista y proteccionista n’Asturies y el votu refalfiáu vendríen a esplicar la habitual presencia de llistes como Los Verdes-Grupo Verde y el recién PACMA nos primeros puestos de les eleiciones underground. El murniu panorama nacionalista asturianu tamién se vio refrendáu nel resultáu con UNA superando por venti votos los casi 421.000 qu’hubo, a Iniciativa Internacionalista. Dende ehí a ‘Europa de los pueblos verdes’, pasando por PCPE y Andecha Astur, la diferencia foi tan patética como’l fechu d’analizar los resultaos d’estes opciones microscópiques.

Detrás (cola escepción d’Izquierda Anticapitalista), vien una retafila de partíos d’ultraderecha. Ehí ta el Frente Nacional del ‘carismáticu’ Fernando Cantalapiedra, un mozo pol que nagüen vieyos falanxistes como’l futuru de la nación española, qu’entamó esti proyeutu de xuntanza nacionalista que ye FN, pero que nun foi quien a despegase de los troglodíticos Democracia Nacional (quiciavis los ultres más conocíos n’Asturies), nin de les falanxes nes que militara va tiempu Cantalapiedra.

La tercera fuercia d’estrema derecha ye’l neonazi Movimiento Social Republicano (MSR), partíu encabezáu nestes eleiciones pola skin-girl Carmen Martín, y que s’alloña de la herencia franquista de la ultraderecha española pa ufrir la ortodoxa nacional socialista a la sociedá. (Usen davezu l’asturianu nos sos blogues y na so propaganda, y exercen una suerte de patriotismu asturianu como ‘patria carnal’ frente a la ‘patria histórica’ que sería la española o la ‘patria política’ europea).

Tres d’ellos, les clásiques falanxes, partíos rexonalistes, agrupaciones de sectes y outsiders de toa triba se repartieron dos mil votos, más o menos los qu’algamaron UNA, II y AA xuntos.

Conclusión: o organizamos un suicidiu colectivu del asturianismu, o facemos daqué. La opción d’IU-BA, per sé, ye la única presencia decente pal asturianismu nel panorama político, pero abúltame escosa y con mui mala pinta si s’anecia na estratexa actual cara a les eleiciones de 2011. D’otra banda, el resultáu d’UNA nun cambia un res l’enfotu de quienes facemos esti blogue nesta formación, porque otra cosa nun se pue esperar. L’Angliru cuesta xubilo’n bicicleta. Nun te digo nada si lo que tienes ye un triciclu ensin pedales. Pero oye, hai que siguir entrenando y, demientres, buscar equipu col que competir. Les tresfusiones, la nandrolona y la EPO dexámos-yla a UPyD, que ya-y vendrá la páxara.

PD: ¿Por qué la xente sigue votando al PSOE? Porque son socialistes de tola vida y porque con ellos, va-yos bien. Nun hai más.

PD2: ¿A quién-y importa que la derecha vaya ser mayoría nel Parlamentu Européu? ¿Daquién sabe qué mayoría había enantes?

4 comentarios en “Sorpresa!! Los resultaos de les europees son un fedor!!”

  1. pa mi ye imposible dafechu. Lo que dixe enantes; cada añu ye mas complicao, y, pa mas inri, cada añu facemoslo peor…
    Agora esti panorama adobalu con engarradielles internes nos partios del tipu; “diz l`autu del xuez nun se que, que sois pirates…”
    De xuru que te fixaste n`otru detalle curiosu; los votos del nacionalismu dende dientro y fuera d`asturies?
    A lo que se ve, pa nos lo importante ye ser necios, que naide nos corrompa.
    Pues ehí ta toos tranquilos; asturies ye d`esquierdes.
    Del Psoe, esto ye d`esquierdes a lo fato, pero ehi tamos, puros.
    IU esapaez como muncho en dos eleiciones y habrá que ver lo que pasa colos sos votos.
    ¿porque la xente vota`l Psoe? Pues como me parez que nel to blog opina xente sano, y que nun me va tachar de antiasturianu nin de facha, ehi va la mio opinión;

    1.- Del Psoe y la so ruina vive muuuuuuuuuncha xente nesti estrañu pais que ye asturies; dende políticos, a pseudo políticos, sindicatos, empreses feches pal casu, particulares entrampiaos.
    Prueba de los escuros intereses ye parase a contar cuanta xente conocemos cada un que diga a les clares que voten al Psoe. Yo poca.

    2.- Muncha xente n`asturies lleva mui mal entendío el ser de izquierdes. Simplifiquenlo hasta`l absurdu ( votar al Psoe ). Y fai militancia dello hasta`l puntu de que cuando queden sin trabayu ( cosa que ta pasando por mor del probetayu panorama económicu ) atristayen, y hasta te miren con una mezcla de vergoña y rencor pero…… vuelven a votar al Psoe.

    3.- Entá tenemos droga (subenciones, fondos, pensiones) y, en munchos casos, ( y ye bien triste pa mi pensalo así ) nin gota gana de trabayar.
    Vamos camín de convertir a Andalucia nun campu de trabayos forzaos.
    Si a esto sumamos-y que el esbarafuste y l`hambrona nun se nota tanto gracies a les munches lleendes urbanes…

    Igual ye un poco fuerte, pero toi que me lleva Dios.
    Salu.

  2. –Yo pienso que lo de votar al PSOE n’Asturies tien que ver col réximen clientelar que tien equí montau, con que les abondoses clases pasives nuestres consideren que ye’l que-yos da de comer, y con que pa muncha xente una característica identitaria política asturana ye ser d’izquierdes n’abstracto y esi ye’l gran partíu d’izquierdes abstractu asturianu, que pa eso yá yera afiliáu güelu y too.
    –Poniendo voluntá nun veo mayor problema pa dir averando postures ente los nacionalistes d’izquierda, que tampoco veo diferencies insalvables p’apautase nun programa de mínimos. Y atrévome a dir más p’alla, podría incluso intentase llegar a alcuerdos de mínimos colos asturianistes de cara a les elecciones nacionales a la Xunta Xeneral, casu ésti que pondría al alcance de la mano entrar nesta institución. Pero pa eso hai que ponese a facer política con mayúscules. Sentase, negociar, ceder daqué caún, etc.

  3. Xanu, paezme sensato eso que dices, y eso que nun me taba gustando’l tonu paternalista que gastabes últimamente y eses operaciones de propaganda por xuntances internetianes en plena campaña.
    Pero bono, eso yá pasó, agora hai que mirar p’alantre.
    Contéstote: mesmo xuntándonos toos diba ser abegoso entrar na xunta, depués hai sumes que resten, xente que ye mui purista y nun acepta programes de mínimos, personaxes que se resisten a perder protagonismu… pero la situación requier pensar muncho y pensar bien. Y sobre too de dexase de babayaes (toos) y ser conscientes de la situación llaceriosa d’esti país .
    La cosa ye ¿como articules una alternativa que pueda sacar 20.000 votos teniendo al PAS per un llau y al Bloque (con IU) pel otru reclamando’l votu asturianu? Pa mi la xente d’UNA ya dio un pasu nel sen de buscar atropar xente que busque esa alternativa (ya sé qu’ehí discrepamos pero quiciabes esi nun ye’l tema agora), eso yá ta ehí entamao y esperemos que siga medrando, pero l’asuntu ye como se tresforma eso nuna alternativa electoral votable por miles de persones nestes circunstancies.
    Pa mi lo primero ye que TOL MUNDU dea un pasu al frente y se comprometa y se dexe de repunancies o de pensar que la probe xente que milita nos partíos y que gasta tiempu y perres nos debe daqué y tien la obligación de crear esi partíu que toos queremos.
    Hai que moyase, entrar en politica ya influir dende dientro o dende fuera, pero activamente y aportando, non dando llecciones maxistrales con obviedaes que toos yá sabemos (y nun lo digo por Xanu sinon por esa tendencia mayoritaria del asturianismu/nacionalismu que se basa en criticar muncho y facer poco).
    Lo d’UPyD n’Asturies dependerá de si ponen a un bon candidatu. Si sigue Ovidio UPYD entren na Xunta. Si’el PP n’Asturies se renueva y tien opciones eso desinfla.
    Resumiendo; falar, pensar, ceder, dialogar, militar, trabayar y votar.

  4. Ehí toi d’alcuerdu con El Xanu, un programa de mínimos nun ye daqué tan dificil d’algamar pa poder dir tol asturianismu-nacionalismu xuntu. Pero bono, que se sienten toos a falar y algamar un “alcuerdu de mínimos” que llueu toos respetáremos nun sé si se dará entá. Esto ye’l cuentu de nunca acabar.

Responder

La direición de corréu electrónicu nun va espublizase. Ríquense los campos marcaos con *