Tag: una

Nueva era

Mira que nos hubiera prestao dedicar güei a la xente de Bloque-UNA esti cantar… pero nun va poder ser. Vamos tener que rescatar esta otra que yá-yos la dedicaremos a la xente d’UNA tres de les elecciones españoles de 2008.

Calca equí p'amosar conteníu dende YouTube.
Consulta la política de privacidá de YouTube.

Abrir "Monty Python - Always Look on the Bright Side of Life" direutamente

(Poneilo si vais siguir leyendo)

El casu ye que los peores pronósticos se cumplieron. Hailos que lo vían venir (recuerda Carlos X Blanco nun post escritu coles tripes…) nosotros nun esperábamos tamaño desastre, non d’esta manera.

La verdá ye que se podían dar mil xustificaciones pa que la suma de Bloque y UNA se quedara en poco menos de siete mil votos, errores propios y circunstancies adverses (mui adverses), que fixeron que l’ultimu y más serio intentu del asturianismu por llevantar la cabecina viniera a repetir resultaos del asturianismu de va un cuartu de sieglu. Los resultaos que llograra un entós flamante Partíu Asturianista nes elecciones autonómiques de 1987. Aquello foi l’entamu d’un proceso que llevó a algamar un diputáu pal asturianismu nos comicios siguientes. Lo d’agora yá veremos.

Hai quien yá ta falando de que l’asturianismu morrió dafechu (boutade) y otros que too pasa pola xuntanza, xuntanza, xuntanza. Pero nun paez claro que xuntos la cosa fuera muncho más allá. Amás, ye evidente que hai xente que nun quier nin falar d’ello, y casi paecía que nun teníen otru obxetivo que dir a la escontra y torpedear lo que facíen pela so parte BA-UNA.

La pantomima d’esta semeya distribuida poles webs asturianistes como si se hubiera fecho na cueva de Bin Laden, el ‘democracy for Asturies’, el menospreciu a quienes intenten llevantar cabeza d’otra manera, les veleidaes del estilu ‘l’asturianismu soi yo, lo demás ye puxarra ḥipi’… son too síntomes claros de que buscar la xuntanza de tol asturianismu hasta agora, yera gastar enerxía innecesaria.

Lo que naide nun puede negar, ye que si n’estos años últimos hebo un intentu de ‘construir’ daqué, el resultáu foi la candidatura de Bloque-UNA. Vémoslo como la xunión de les dos ‘corrientes’ más inquietes, actives y series del asturianismu d’izquierdes, que d’una banda ensayaron la estratexa ‘entrista’ con Izquierda Xunida, y de la otra foron axuntando fuerces dende Ias, Andecha Astur y demás.

El resultáu foi’l de una de les campañes electorales más dignes del asturianismu en años, con una probitú de medios bultable, con un ningunéu, cuando non ocultación (¡¡ai los medios asturianos y l’asturianismu!!), pero que foi quien a despertar esperances n’unos cuantos.

Pero ye evidente qu’esi guañu que ye Bloque-UNA ta entá un poco verde, ye feble tovía. Nun foi quien a contrarrestar el populismu d’IU na campaña, qu’arrampuñó tol voto izquierdista al que podía aspirar BA-UNA faciendo como que nun gobierna n’Asturies, y faciendo suyo el movimientu 15M. Tampoco foi quien a esparder la so imaxe por riba d’otres opciones a guelpe de propaganda, y el día de reflexón vímonos desplicando quién yera Rafa Palacios y el Bloque-UNA a persones del nuesu entorno familiar.

Tal vez l’arranque de la opción BA-UNA nun fuera’l más propiciu. El fechu de que, a quienes siguimos esti mundín ‘dende fuera’, nos sorprendiera la candidatura de Rafa Palacios y la ausencia y el silenciu de Quico Valledor, nun paecía el meyor entamu. Muncho menos si vemos qu’apareyao a ello ta la dimisión de Faustino Zapico na dirección d’UNA ensin esplicación dala, y ye que paez que tolo que se cuez nel asturianismu se decide nel trasteru de la mansión de vacaciones de, otra vuelta, Bin Laden.

Con too, pensamos qu’esa ye la vía, y qu’el trabayu desendolcao n’estos meses pola xente de BA-UNA tien que continuar, tien que dir enantando, axuntando los apoyos de tolos que quieren ‘democracy for Asturies’, facese ver. Los próximos cuatro años van ser mui duros, y tien qu’haber quien tea ehí -nel parlamentín o fuera, nes cases conceyu y na cai-, canalizando la voz de quienes tamos  excluyíos del sistema políticu asturianu. Lo que ye evidente, ye que entama un ciclu nuevu n’Asturies, na política asturiana y, tamién, de xuru, nel asturianismu. Nosotros queremos tar ehí y poner de nuestra parte. Xente de Bloque por Asturies y d’UNA, nun mos falléis agora.

Ye la hora de la xuntanza… de votos

Si dalgo pon n’amuesa la encuesta qu’ayeri espublizara’l CIS ye que l’asturianismu cuerre’l peligru serio de desapaecer totalmente del mapa políticu asturianu. Ente les distintes candidatures que se presenten, namás la de Bloque por Asturies-UNA apaez con posibilidades de salise por poco del mecigayu ‘otros partios’. La encuesta-y da un 1,1% d’estimación de voto, per baxo incluso d’UPYD. A partir d’ehí, partíos como Uras-Pas o Conceyu Abiertu, Ideas, Frente de la Izquierda, Pacma, Los Verdes-Grupo Verde, Frente Nacional-MSR, el Pdyc del cura La Manxoya y maroto’l de la moto, repartiríense un 2,9% del votu a ‘otros partíos’. El panorama, pa los que sentimos entá la necesidá de que l’asturianismu seya quien a participar, a influir na cosa pública de la provincia, ye murniu enforma.

Nos tiempos últimos, mientres la estratexa d’anulación del asturianismu en xeneral (cultural y políticu) avanzaba dende les esferes de poder n’Asturies (por dios, que l’unicu periódicu qu’anunciara con xeitu la manifa de la Xunta Pola d’esta tarde ye l’Avui!!), los líderes políticos del nacionalismu o el rexonalismu asturianu nun fueron quien a fraguar la necesaria xuntanza de fuerces y abrir un camín de futuru pa esti movimientu políticu. Hailos que más que trabayar por ello, paecía qu’enredaben pa que nun se fixera ren. Pero nun ye esti’l momentu d’echar culpes.

Énte esa falta d’enfotu de los líderes políticos, a lo meyor habría que pensar que los que votamos, esi porcentaxe de población qu’ apuesta por que Asturies seya un país consciente de sí mesmu; podemos facer muncho pola masuñada xuntanza. Y podemos facelo votando.

Nun ye ‘por dar males noticies’, pero hai series posibilidaes de que l’asturianismu quede dafechu fuera de la Xunta Xeneral nestes elecciones por primer vez dende 1991. Dende entós, fuera la Coalición Asturiana de Pas-UNA, el Pas solu, la Uras o el Bloque por Asturies con IU, l’asturianismu tuvo presente de dalguna manera nel parlamentín. Esta vez, difícilmente un asturianista se puede conformar cola presencia de Foro Asturias, non ya solo por Cascos, sinon pola bultable presencia nos sos ‘cuadros’ de cabezaleros n’Asturies de la mui sincera Fundación para la Defensa de la Nación Española (Denaes), ente otros peculiares integrantes d’esa especie d’exércitu de rebotaos.

Nun hai otra. Si queremos evitar la extinción d’esta forma de ver el mundu y la realidá d’Asturies, habrá que tomar midíes, y midíes d’urxencia que pasen por dir toos a una y votar una candidatura asturianista,  una candidatura que de dalguna manera seya quién a dicir qu’equí sigue habiendo país.

Volviendo a les encuestes, podemos ver que los resultaos de la acabante d’asoleyar pol CIS (fecha ente marzu y abril) ye mui asemeyada a la que va un mes espublizara precisamente Bloque-UNA, y que-y daba a la coalición asturianista un diputáu. La del CIS repartía los 45 escaños ente’l PSOE (19), PP (16), FAC (7) e IU (3), mientres que la fecha por encargu de Bloque-UNA namás analizaba datos de la circunscripción central y repartía los 34 escaños correspondientes ente PSOE (14), PP (9), FAC (6), IU (4) y BA-UNA (1).

Ensin xéneru de duldes, esta última encuesta, anque ‘de parte’, ye la que más s’avera a la fecha pol muérganu públicu estatal d’estudios demoscópicos, especialmente no que cinca al repartu de les fuerces mayoritaries. Distintu ye lo que pasa col baille de diputaos de los dos grupos minoritarios: IU sacaría 4 ó 3 diputaos, y BA-UNA algamaría 1 ó 0. Y paez que, atendiendo a la prospección del CIS, nel momentu en que se fizo la encuesta Bloque-UNA taba más cerca del cero e IU del 3. (Los márxenes d’error, sicasí, son del 3,5%, un porcentaxe que ya de por sí puede suponer hasta dos diputaos).

Pero lo que paez evidente, ye que a la vista de les encuestes más importantes de les espublizaes hasta agora, si hai una opción de que l’asturianismu entre na Xunta Xeneral, esa ye la de Bloque-UNA.

Al marxe de que les tendencies de voto seyan eses, tamién la opción de Bloque-UNA gana, dende’l nuestru puntu de vista, otres comparaciones. Actualmente, ye l’intentu más serio de facer una propuesta política xenuinamente asturiana y asturianista na que dalgunos, dende fuera del asturianismu, ven como un guañu de BNG ‘a la asturiana’. Con tolos ‘peros’ que munchos puean dar al so ‘izquierdismu internacionalista’, al usu d’asturines ensin estrella colorada o a los pendientinos de Rafa Palacios, lo cierto ye que na precampaña fízose evidente que ye la propuesta más ilusionante y con puxu del espectro ‘asturianista’.

Naide va negar a estes altures nada a Xuan Xosé Sánchez Vicente y lo que pa too asturianista supunxo nel so momentu Conceyu Bable o el Pas, partíu que preside dende la so fundación va 26 años, y col que se presenta a les elecciones dende va 24 años. Pero ye evidente que toa figura pública, por mui rellumante que seya, como ye’l casu, sufre un desgaste. De fechu, los cabezaleros d’Uras qu’avecen a acompañalu nes sos apariciones públiques últimes, tal paecen empleaos de pompes fúnebres qu’asperen l’entierru definitivu d’esta vía del asturianismu.  Lo que podía aportar el Pas, que foi munchu, ya se vio nel cuartu de sieglu pasáu. Agora a lo meyor ye’l momentu d’intentar otres víes y dexar pasu a otros que, pudiendo dicir lo mesmu, quizás lo digan d’otra manera más efectiva. Quizás.

Y tampoco-y vamos restar méritos a esa xente de Conceyu Abiertu que se sienten firmes nunes convicciones y una visión de la realidá que, temen, se dilirá si acepten determinaes táctiques de xuegu. Ye cierto que, dacuando, la radicalidá na defensa de principios ideolóxicos ye la única forma de plantar cara a los que tienen tolos resortes del poder, pero tampoco ello tien que confundise col inmovilismu. Un inmovilismu al que, les más de les veces, nun se-y ve xacíu dalu. Pa nun movenos de onde tamos, ¿faen falta organizaciones? ¿Paga la pena presentase a unes elecciones?

Nos creemos que sí que paga la pena presentase a les elecciones. Pero presentase pa ganar. Pa facer daqué. La victoria del asturianismu nun va ser otra que la de superar toles torgues que dende’l poder económicu, políticu y mediáticu de la provincia se ponen a una alternativa política que, de medrar, diba supone-yos un grave problema. Corrientes polítiques que discutan les esencies del nacionalismu españolista son tolerables en País Vascu y Cataluña, incluso en Galicia o Canaries. Tamién n’Aragón o Andalucía. Pero n’Asturies, na ‘cuna d’España’, non fíu non.

Por eso, de nosotros, de los asturianos, va depender que se superen eses torgues. Llevamos tiempu esperando que quienes tan al frente de los partidinos políticos asturianistes se pongan d’alcuerdu, pidiéndo-yos intelixencia y que miren pol futuru del país. A lo meyor va siendo hora de que la xuntanza alcance tamién a la base, al votu. Obviando pequeñes diferencies, defectos, pero salvando los muebles y aniciando a partir de xunu una etapa nueva pal asturianismu que, esperemos, seya pa bien. Por eso, y parafraseando a Inaciu Iglesias (nun tengais miéu, nun vamos de candidatos casquistes) “si fuéramos Xuan Xosé o Mariu Arbesú, pidiríamos el votu por Bloque-UNA, pidiríamoslu si lo fuéramos… pero nun lo somos”. De xuru Bloque-UNA nun ye lo que toos desearíen que fuera. Pero ye lo meyor que tenemos y podemos facer por qu’ameyore día a día, toos, en xuntanza.

Tiempu d’encuestes

A naide se-y escapa ya que les encuestes electorales hailes de dos tipos. Unu ye’l de la encuesta interna, ferramienta que sirve pal analís estratéxicu de cada partíu nos tiempos previos a la cita electoral. Eses encuestes nun se suelen asoleyar nun siendo qu’ello beneficie a quien la encargó, y si se publiquen, pasen a formar parte del segundu tipu d’encuestes: les propagandístiques.

N’esti puntu falamos d’encuestes empobinaes nun determináu sen. Preséntense como ferramientes informatives, pa conocer la orientación política, pero siempre pasen pela famosa ‘cocina’ na que los resultaos cuecen, mengüen o xuben como por gracia de llevadurina acordies con una determinada orientación política interesada.

Mesmo que nun hai un mediu de comunicación asépticu, nun hai portada d’Interviú ensin fotoxó, nin carretera ensin barru; tampoco nun hai encuesta que nun tea retocada.

No tocante a les elecciones del 22 de mayu asoleyáronse entá poques encuestes, y toes amuesen aspeutos qu’amenorguen la so credibilidá. Les dos primeres (que recordemos), foron espublizaes en pleno boom casquista polos diarios El Comercio y el madrilán El Mundo. Dambos dáben-y al ex ministro casquista una abultada victoria, magar que diferíen enforma nel volume d’apoyos recibíos por PP y PSOE. Nel casu del diariu xixonés, la encuesta fecha por Asturbarómetro, los socialistes alcanzaben un 21,4% y un 18% los populares. La encuesta de Sigma Dos pa El Mundo dába-y un 27,3% al PSOE y un 22,5% al PP. Dambes encuestes basábanse en datos recoyíos a ente 450 y 500 encuestaos de toa Asturies, nun momentu nel que la expectación polos movimientos d’Alvarez Cascos yera máxima.

Nenguna de les dos encuestes destacó entós pola so apariencia de fiabilidá, habida cuenta de les circunstancies en que se fixeren, y el fechu de que un vuelcu tan acusáu paez, de toes toes, improbable nun electoráu tan conservador col so votu como l’asturianu. Dicíalo esti día Inaciu Iglesias na edición en papel del selmanariu Les Noticies, y nun hai más que ver los resultaos electorales pasaos pa ver que ye verdá, qu’un vuelcu nos resultaos ye tarea mui improbable… pel momentu.

Y agora apaez una nueva encuesta, que se presenta como del primer tipu (interna de Bloque por Asturies-UNA), pero que s’espubliza tolo al altu la lleva que se puede por mor de que vendría a confirmar lo que paez que ya apuntaben encuestes internes d’otros partíos: que Bloque-UNA llogren superar esi 3% de votos que-y da entrada a la Xunta Xeneral.

Hai puntos nos que la encuesta abúltanos con un puntu más de credibilidá que les otres dos. D’una banda, que se base nuna cifra muncho más presentable d’entrevistes (mil llamaes telefóniques), d’otra, que tea llendada a la circunscripción central (les otres dos encuestes tomen Asturies como una única circunscripción). Los resultaos, amás, paecen más acordes col mentáu ‘conservadurismu’ del votante asturianu: una baxada relativamente importante de los apoyos del PSOE (de 15 a 14 escaños, anque la perda en porcentaxe ye mayor), una caída entá más fuerte del PP (de 15 a 9 escaños) y la irrupción del fenómeno Cascos con nada menos que casi un 20% de los votos, lo que-y permite algamar 6 escaños. Un resultáu realmente espectacular. Tres d’ellos, IU caltién el tipu xunto a Los Verdes y llogra 4 escaños, y Bloque-UNA consigue un diputáu, escañu qu’ocuparía Rafa Palacios.

Lo que más choca d’esta encuesta, de fechu, son los datos relativos al grau de conocimientu de los candidatos. Paez raro que los insípidos Javier Fernández e Isabel Pérez Espinosa sean más conocíos  que Álvarez Cascos (aunque sea por un porcentaxe de diferencia mínimu), y dicir que más del 70% de los votantes de la circunscripción central conocen a un tal Ignacio Prendes d’UPyD, da que pensar. ¿Esplicaciones? Los procedimientos siguíos na famosa ‘cocina’ de los datos sobre conocencia de candidatos, podrían tener muncho que ver. Y tamién la entruga que se-y fai al encuestáu. Nun ye lo mesmo preguntar ‘¿Conoz vusté a Isabel Pérez Espinosa?’ que ‘¿Conoz al candidatu d’Ideas?’.

Sicasí, equí quedamos coles ganes de saber más, de conocer más detalles d’una encuesta qu’abulta ser la más fiable de les conocíes hasta la fecha públicamente. Porque, polo que mos llega, los sondeos d’usu ‘internu’ que manexen en dellos partíos dan resultaos mui asemeyaos a lo que nella se reflexa… Quizás, tal vez, a lo meyor, ello esplica la discreta acoyida mediática de la encuesta.

Colunga irrita a Areces

Resulta que’l debate sobre l’estáu de la pación valió pa que rescample el miéu que tan xenerando los movimientos últimos del asturianismu nel ‘stablishment’ sociata. Asina quedó n’amuesa na respuesta que-y dedicó el presidente caducáu Areces al diputáu del Bloque por Asturies. Lloñe de responder a nada, dedicóse a espatuxar como una morsa reprochando a Colunga que seya diputáu y minoritariu, más que minoritariu minoritarísimu, microscópicu… a la fin, despreciatible… Areces cayó nuna trampa boba: acusa-y a Colunga d’afear agora a un gobiernu qu’enantes sofitó, pues igualmente Areces desprecia y menosprecia agora a una formación qu’enantes tuviere gustosamente como socia. La diferencia ye que foi la pequeña la que nun aguantó más el golor de la grande y marchó. ¿Oportunismu? Quién sabe… a la vista de cómo se irrita Areces, tal paez que nel Bloque, UNA y redolada, tan dando pasos acertaos. Na FSA saben muncho d’encuestes… ¿qué dirán les que tan manexando a siete meses de les elecciones? Con un PP d’engarradiella n’engarradiella, y una IU fiel… l’enemigu que ven nel PSOE estos díes paez que venga pela izquierda y pel asturianismu…

Vengo de tar en Xixón pol 8S

Vengo de tar en Xixón con mio pa, na concentración del Náutico, polo del 8S, y la verdá que prestóme, y tamién a elli, que diba muncho que nun pasaba per una misa asturḷḷale. Cantó la gran Caunedo (dios como presta sentila) y falóse de la llaceriosa situación del país, de la necesidá d’una alternativa y de la inevitable vía de la xuntanza. “Habrá que ser unitarios, o habrá que joderse”, dixo’l sindicalista refuxáu políticu colombianu n’Asturies, Javier Orozco.

Parlando con dellos conocíos qu’atopamos na plaza, la sensación foi perbona. Había xente y había bon rollu. Además “güei debemos tar colos buenos, que nun hai llecheres”, apuntaben.

La cosa ye que, buenos o non, ellí taba un diputáu autonómicu (Colunga), y un ex diputáu (Valledor), amás  de dellos conceyales, cargos y ex cargos del Bloque por Asturies, UNA, Andecha… y Fai, que repartieron fueyes sobre la comeniencia (y tienen tola razón) de que la fiesta nacional seya’l 25 de mayu. Hebo xente de los sindicatos asturianos Suatea y CSI, xente de la cultura, de los medios de comunicación, pequeños empresarios… De verdá que salimos d’ellí con enfotu. Cola idea de que l’asturianismu puea haber atopao el camín. A lo meyor ye verdá’l lema y “entama un ciclu nuevu” (y nun falamos de llavadores).

Tamos trabayando nello….

(Calcái na semeya si vos peta vela full size)

Ellí vamos dir. Nun tamos toos, falta’l PAS, que nun va porque la parte contratante de la primera parte diba considerase la parte contratante de la primera parte… El casu ye que si tien arreglu, s’arreglará… Tiempu hai… Y otru día falamos de política.

¿Alón a la década de la travesía pel desiertu?

logos¿Qué balance se pue facer de la década que ta a piques d’acabar no que cinca al asturianismu? Ye d’esperar que, de dalguna manera, lo asocedío pente l’añu 2000 y el 2009 nun foi tan ruino como pudiera paecer. A lo meyor tamos énte un escenariu nuevu depués de diez años d’un movimientu en víes de madurecer y de presentase énte’l restu la sociedá d’un mou enforma más convincente, creible y serio de lo que se pudo facer dende los setenta.

La década entamaba cola resaca de la gran crisis nel principal partíu asturianista de la historia. El Pas, condergáu al extraparlamentarismu polos propios errores y por un rexonalismu d’ocasión como’l de Uras, nun supo aprovechar la posición algamada na década anterior p’axuntar y abellugar el sentir asturianista. Poro, anicióse una desintegración que nun aparó hasta va poco.

Los resultaos electorales d’aquel 1999, col PSOE en mayoría absoluta, dexaron en nada les posibilidaes del rexonalismu ramplón de la Unión Renovadora Asturiana, que bien lluéu foi perdiendo fuelle col gruesu de les sos files tornando cola cabeza gacha al llar del PP.

Pel lláu de la izquierda nacionalista, too diba movese nesta década a guelpe de convocatoria electoral. Nes primeres autonómiques, les de 2003, aquella INA de Rafa Palacios, ún de los vértices de l’atomización d’esta estaya del asturianismu, diba reñacer en forma de Bloque por Asturies pa abrir una estratexa nueva, en xuntanza con una Izquierda Xunida necesitada de recuperar la so posición de tercer fuercia política na Xunta Xeneral. Y l’esperimentu funcionó, especialmente pa IX, qu’entró nun gobiernu nel qu’el pesu del Bloque vióse especialmente nel ‘internacionalismu’ del cargu concedíu a Palacios como responsable de Cooperación.

Aquella primer lexislatura de la ‘esquierda plural’ foi la d’un ciertu espoxigue de la presencia institucional de la llingua asturiana, del anicio de la igua de la toponimia y de dalguna otra aición cosmética sin que s’avanzara munchu más nel enfotu en ‘facer país’ del asturianismu. Cierto ye, la representatividá nun daba pa muncho más.

Nes mesmes eleiciones de 2003, confirmábase l’esbarrumbe d’un Pas al debalu, mentes que Uras diba amosase como lo que foi: una rempuesta fracasada a la yá tradicional tendencia del PP asturianu a l’amarraza interna. Tamién foi l’añu nel qu’Andecha Astur algamaba el so cumal de votos con más de 3.800 papeletes nel so favor. Una situación cásique marxinal que, col tiempu, diba amosase como l’aparentemente deseable pa un seutor relevante de les sos bases y cargos.

La sangría nel Pas diba siguir seliquino pero de contino nesos años, tamién no que se refier a una presencia nos conceyos que diba retroceder entá más nes eleiciones de 2007.

Esa convocatoria diba ser un puntu y a parte nel panorama políticu asturianista al abrise estratexes nueves que nun dieron resultaos inmediatos, pero que podríen converxer con éxitu nesta década a piques d’entamar.

D’una banda, axuntábense pela derecha lo que quedaba d’un Pas y una Uras cola idea de que sumando los votos algamaos por caúna d’elles en 2003 diben recuperar un escañu na Xunta Xeneral. Pero l’electoráu nun vio más que un intentu desesperáu y poco creíble a lo que ayudó enforma el cambéu de discursu del PP, muncho más sensible agora pa col arume rexonalista de los sos fíos pródigos.

Pela otra banda, l’intentu de xunión d’Ias y Andecha, los otros dos vértices de l’atomización de la esquierda nacionalista, acabó nun pleitu nunca esclariáu del too que sólo sirvió pa que rescamplara una vuelta más la incapacidá, o les poques ganes, de dellos seutores pa sacar alantre un proyeutu serio.

politicos

El resultáu d’aquella xuntanza a medies foi la recuperación de les sigles UNA p’abellugar a Izquierda Asturiana y Andecha Astur Suyúdice nun intentu de facer una propuesta mui asemeyada al Bloque por Asturies, pero sin estratexes de coalición con formaciones subsidiaries d’organizaciones estatales que comprometan los sos oxetivos políticos. Pel momentu, los errores y la debilidá organizativos vienen lastrando enforma la so actividá y el so desenvolvimientu na vida pública asturiana.

Lo cierto ye que, dende aquelles eleiciones, l’asturianismu políticu entró nun procesu de depresión con síntomes claros. Asina, énte les llamaes a la xuntanza y la bronca pesimista xeneralizada, Andecha vuelve a entamar un llamáu a la xunión de los asturianistes al que-y sigui el xuegu el Pas, d’un mou bien poco creible y de nula repercusión acullá del ruxideru cibernéticu. Pela so parte, la crisis interna n’Izquierda Xunida arrequexa al so seutor más asturianista y acaba cola dimisión d’un Valledor que nun dexó de falar de refundaciones y xuntances con mención esplítica a UNA. Nesi sentíu, y ya nes selmanes últimes de la década, la dimisión de Valledor abre la puerta de la Xunta Xeneral a la esquierda nacionalista na persona del secretariu xeneral del Bloque, Roberto Colunga, quien tamién dexa abierta la puerta a contautos con otres formaciones de cara a los comicios de 2011.

Sicasí, l’escenariu col qu’entama la década ye’l del enfotu nuna serie de previsibles movimientos que puean dar resulatos sólidos a mediu y llargu plazu. Con una militancia entá probe y una sopa de sigles y logos nes que s’atopen fórmules claramente fracasaes y otres con un recorríu posible, dende’l próximu 1 de xineru lo mesmo podemos tar énte l’aniciu d’un nuevu momentu históricu pa un asturianismu que, d’una vez, tien de dexar de perder trenes.

Sorpresa!! Los resultaos de les europees son un fedor!!

Siendo serios, nun se podía esperar otra cosa de los resultaos de les pasaes europees. La FSA-PSOE perdió 25.000 votos y tres puntos pero siguió ganando nuna Asturies na que un provincianu y folgazán PP vive de les rentes d’Esperanza Aguirre. IU–BA frena daqué’l so esbarrumbe progresivu y UPyD apaez como la cuarta fuerza na segunda ‘rexón’ na que más porcentaxe de votos algamara. Hasta equí, lo que votaron el 96% de los asturianos que punxeron el sobre na urna.
Esi mesmu porcentaxe, más o menos, foi’l que se repartieron cincu años anantes PSOE, PP y IU. Asina qu’UPyD paez que ye quién a facese un requexín colos sos casi 18.000 votos, casi esautamente los que pierde el PP folgazán d’Ovidiu Sánchez y compañía. Paez bastante claro que ye ehí ónde’l partíu de Rosa Díez garra cachu, porque si equí el castellanu, la unidá d’España y l’estatutu paecen nun ser un problema, sí que lo ye pa una parte de la derecha asturiana la falta d’iniciativa y la probitú política del Partíu Popular. Ello, xunío al desgaste del gobiernín socialista, va facer qu’UPyD seya, yá, un referente nel panorama políticu asturianu pal prósimu quinqueniu (o lo que tarde’l dúu PP-PSOE en reaccionar).

posters

Pasemos agora a analizar el votu puxarra, esi 2,35% de los sufraxos (descontemos el votu’n blanco y los nulos, quinta y sesta opción de los asturianos con 6.038 y 2.662 sobres, respectivamente). Ecoloxistes/proteccionistes, nacionalistes, ultraderechistes y friquis se reparten, per esi orde, 12.447 votos n’Asturies.

La marca ‘verde’, la relativamente visible militancia ecoloxista y proteccionista n’Asturies y el votu refalfiáu vendríen a esplicar la habitual presencia de llistes como Los Verdes-Grupo Verde y el recién PACMA nos primeros puestos de les eleiciones underground. El murniu panorama nacionalista asturianu tamién se vio refrendáu nel resultáu con UNA superando por venti votos los casi 421.000 qu’hubo, a Iniciativa Internacionalista. Dende ehí a ‘Europa de los pueblos verdes’, pasando por PCPE y Andecha Astur, la diferencia foi tan patética como’l fechu d’analizar los resultaos d’estes opciones microscópiques.

Detrás (cola escepción d’Izquierda Anticapitalista), vien una retafila de partíos d’ultraderecha. Ehí ta el Frente Nacional del ‘carismáticu’ Fernando Cantalapiedra, un mozo pol que nagüen vieyos falanxistes como’l futuru de la nación española, qu’entamó esti proyeutu de xuntanza nacionalista que ye FN, pero que nun foi quien a despegase de los troglodíticos Democracia Nacional (quiciavis los ultres más conocíos n’Asturies), nin de les falanxes nes que militara va tiempu Cantalapiedra.

La tercera fuercia d’estrema derecha ye’l neonazi Movimiento Social Republicano (MSR), partíu encabezáu nestes eleiciones pola skin-girl Carmen Martín, y que s’alloña de la herencia franquista de la ultraderecha española pa ufrir la ortodoxa nacional socialista a la sociedá. (Usen davezu l’asturianu nos sos blogues y na so propaganda, y exercen una suerte de patriotismu asturianu como ‘patria carnal’ frente a la ‘patria histórica’ que sería la española o la ‘patria política’ europea).

Tres d’ellos, les clásiques falanxes, partíos rexonalistes, agrupaciones de sectes y outsiders de toa triba se repartieron dos mil votos, más o menos los qu’algamaron UNA, II y AA xuntos.

Conclusión: o organizamos un suicidiu colectivu del asturianismu, o facemos daqué. La opción d’IU-BA, per sé, ye la única presencia decente pal asturianismu nel panorama político, pero abúltame escosa y con mui mala pinta si s’anecia na estratexa actual cara a les eleiciones de 2011. D’otra banda, el resultáu d’UNA nun cambia un res l’enfotu de quienes facemos esti blogue nesta formación, porque otra cosa nun se pue esperar. L’Angliru cuesta xubilo’n bicicleta. Nun te digo nada si lo que tienes ye un triciclu ensin pedales. Pero oye, hai que siguir entrenando y, demientres, buscar equipu col que competir. Les tresfusiones, la nandrolona y la EPO dexámos-yla a UPyD, que ya-y vendrá la páxara.

PD: ¿Por qué la xente sigue votando al PSOE? Porque son socialistes de tola vida y porque con ellos, va-yos bien. Nun hai más.

PD2: ¿A quién-y importa que la derecha vaya ser mayoría nel Parlamentu Européu? ¿Daquién sabe qué mayoría había enantes?

Xuntances perende acullá

N’esti primer día ensin reflexón dióme poles xuntances, polo precario de la situación d’un asturianismu víctima tanto, o más, d’errores propios como de torgues impuestes. Restolando un poco perhí, vese que’l casu asturianu nun ye únicu nel mundu, y que intentos, xuntances, cambeos d’estratexa, polémiques y ruíu son vezu en tolos movimientos minoritarios y alternativos. Los que a la fin algamen mayor ésitu, ye siempre depués de grandes fracasos y con munchos calabres pel camín. Pero sólo algamaron esi ésitu depués d’aneciar.

Sicasí, y polo que viera esta tarde d’aburrición, siempre hai dos elementos presentes nel espoxigue d’esos movimientos minoritarios: la xuntanza y/o los líderes carismáticos. Llúeu, esi espoxigue caltiénse o retrocede, y nello tien muncho aquel el texíu social, la fuercia que se-y dea a la organización, el ‘músculu’ del que munchos falen.

N’Asturies tamos nuna situación na que nun hai nada de too eso. La famosa Coalición Asturiana foi un finxu que munchos nin siquiera pudimos votar. Aquella xuntanza supunxo la entrada d’un nacionalista con carisma na Xunta Xeneral del Principáu, pero bien ceo les coses entamaron a esgonciase. La disolución de CA dio-y al Pas la oportunidá de reforzar la so cadarma organizativa, ganar músculu, dir convirtiéndose nel gran paraguón qu’abellugara a tol asturianismu. Pero nun foi quien a ello, y pa cuando apaeció Uras y el so rexonalismu descafeináu y oportunista, tola fuercia organizativa algamada pol Pas dilióse como un terronín de zucre.

Y ehí tamos, nuna travesía nel desiertu na que, na mio modesta opinión, entamárense dellos intentos de que l’asturianismu garre cuayu nel panorama políticu asturianu. Unu foi la estratexa del Bloque por Asturies, que d’una banda apurría-y el sellu asturianista a Izquierda Xunida, y d’otra permitía da-y visibilidá a un sector nacionalista que diba dir ganando esperiencia na política real, dalgo fundamental pa fortalecer mínimamente una organización. Ónde llevará esa esperiencia, esi enfotu n’enseñar ‘la patita’ del panorama políticu hexemónicu n’Asturies, magar toles incomprensiones, ye dalgo que ta por ver.

Como tamién ta por ver qué sal de otra estratexa distinta, muncho más difícil nos anicios, que pretende construir dende cero una alternativa política capaz de llegar a una bayura sectores identificaos col asturianismu d’esquierda. Pero esi intentu, primero na forma de coalición electoral Unidá, y lluéu como UNA, tien énte sí toles torgues d’una organización feble, qu’entá, en munchos sentíos, nun zarró el so procesu fundacional. Poro, ta tamién por ver qué pue salir d’elli, si espolleta, o si s’allanca na marxinalidá política de la que’n toos estos años nun foi a salir una de les sos formaciones d’orixen: Andecha Astur.

Sicasí, nenguna d’eses estratexes contenta les aspiraciones d’esi sector de la sociedá asturiana al qu’aspiren a representar políticamente. L’oxetivu tien de ser algamar representación y da-y valir a les esmoliciones de decenes de miles d’asturianos. Y va siendo hora d’ello.

¿Que una opción ye la xuntanza? Paez evidente. Pero lo cierto ye que ¿cómo se fai? Como dicía güei Trayasgaya, dos y dos nun son necesariamente cuatro en política. Vióse col resultáu d’Unión Asturianista nes pasaes autonómiques, y entá más claramente se vió nel casu de Coalición Andalucista. Esta candidatura electoral axuntaba por primer vez a tol espectro nacionalista/rexonalista andaluz: dende’l federalismu socialdemócrata del Partido Andalucista, al islamismu secesionista de Liberación Andaluza. Al final, con casi 124.000 votos quedóse a piques d’algamar representación nel parlamentu andaluz, pero nun entró.

Un casu llamativu ye tamién el de Valencia, con delles corrientes nacionalistes y rexonalistes, delles irreconciliables y mui influyíes, por estremaos motivos, pol catalanismu, que viven tamién anguañu momentos de probitú. Sicasí, la xuntanza presentada pa les autonómiques últimes pue ser l’espeyu nel que se mirara Francisco Javier García Valledor n’aquella propuesta suya de xuntanza pal próximu ochobre. Compromís pel País Valencià integraba d’aquella a Izquierda Xunida, el Bloc Nacionalista Valencià (de la ‘tercera vía’ del nacionalismu valencianu, non pan-catalanistes), dos partíos verdes y Izquierda Republicana. Algamaron seis diputaos (equiparable a los cuatro d’IU-BA-LV), pero lo heteroxéneu del esperimentu acabó en crisis y la escisión del grupu parlamentariu.

N’otros casos, les coaliciones y xuntances fáense y desfáense, pero paez que sólo algamen cierto ésitu cuando son quién a amosar ‘valor añadíu’ a la mera suma de fuerces. Nesti puntu xueguen munchu los líderes (Labordeta na Chunta Aragonesista, Beiras nel BNG) y la imaxe que tresmita la unión al so electoráu (Coalición Canaria, Nafarroa Bai).

De toles maneres, lo que de verdá nun funciona ye la dixebra. Un exemplu qu’esta tarde llamóme munchu l’atención, ye’l del partíu escocés Solidarity, fundáu por dos ex parlamentarios del Partíu Socialista Escocés. Anque nun algamaron escañu, el partíu nuevu triplicó los votos del orixinal. Eso sí, malapenes sumaron los dos 50.000 votos, cuando en 2003 algamaron cásique 130.000 y seis diputaos. El líder de Solidarity, Tommy Sheridan, tien munchu carisma, tantu, que paez que se pasó de vueltes y acabó nel Gran Hermano pa famosos de Gran Bretaña porque “necesitaba’l dineru”. Equí lu tenéis nun videu electoral, desplicando col so marcáu acentu el programa del so partíu.

http://www.youtube.com/watch?v=BJqCGXJZn0U

Y la cuestión ye ¿qué facer?, ¿quién s’axunta?, ¿cómo?, ¿con qué lideres?… ¿Qué xuntanza sedrá la que seya quién a algamar un bultable apoyu social, a ufrir una alternativa creible y viable, averada a la realidá asturiana, qu’ilusione y implique realmente a una parte importante de la sociedá?