Tag: nacionalismu

Vengo de tar en Xixón pol 8S

Vengo de tar en Xixón con mio pa, na concentración del Náutico, polo del 8S, y la verdá que prestóme, y tamién a elli, que diba muncho que nun pasaba per una misa asturḷḷale. Cantó la gran Caunedo (dios como presta sentila) y falóse de la llaceriosa situación del país, de la necesidá d’una alternativa y de la inevitable vía de la xuntanza. “Habrá que ser unitarios, o habrá que joderse”, dixo’l sindicalista refuxáu políticu colombianu n’Asturies, Javier Orozco.

Parlando con dellos conocíos qu’atopamos na plaza, la sensación foi perbona. Había xente y había bon rollu. Además “güei debemos tar colos buenos, que nun hai llecheres”, apuntaben.

La cosa ye que, buenos o non, ellí taba un diputáu autonómicu (Colunga), y un ex diputáu (Valledor), amás  de dellos conceyales, cargos y ex cargos del Bloque por Asturies, UNA, Andecha… y Fai, que repartieron fueyes sobre la comeniencia (y tienen tola razón) de que la fiesta nacional seya’l 25 de mayu. Hebo xente de los sindicatos asturianos Suatea y CSI, xente de la cultura, de los medios de comunicación, pequeños empresarios… De verdá que salimos d’ellí con enfotu. Cola idea de que l’asturianismu puea haber atopao el camín. A lo meyor ye verdá’l lema y “entama un ciclu nuevu” (y nun falamos de llavadores).

Tamos trabayando nello….

(Calcái na semeya si vos peta vela full size)

Ellí vamos dir. Nun tamos toos, falta’l PAS, que nun va porque la parte contratante de la primera parte diba considerase la parte contratante de la primera parte… El casu ye que si tien arreglu, s’arreglará… Tiempu hai… Y otru día falamos de política.

¿Alón a la década de la travesía pel desiertu?

logos¿Qué balance se pue facer de la década que ta a piques d’acabar no que cinca al asturianismu? Ye d’esperar que, de dalguna manera, lo asocedío pente l’añu 2000 y el 2009 nun foi tan ruino como pudiera paecer. A lo meyor tamos énte un escenariu nuevu depués de diez años d’un movimientu en víes de madurecer y de presentase énte’l restu la sociedá d’un mou enforma más convincente, creible y serio de lo que se pudo facer dende los setenta.

La década entamaba cola resaca de la gran crisis nel principal partíu asturianista de la historia. El Pas, condergáu al extraparlamentarismu polos propios errores y por un rexonalismu d’ocasión como’l de Uras, nun supo aprovechar la posición algamada na década anterior p’axuntar y abellugar el sentir asturianista. Poro, anicióse una desintegración que nun aparó hasta va poco.

Los resultaos electorales d’aquel 1999, col PSOE en mayoría absoluta, dexaron en nada les posibilidaes del rexonalismu ramplón de la Unión Renovadora Asturiana, que bien lluéu foi perdiendo fuelle col gruesu de les sos files tornando cola cabeza gacha al llar del PP.

Pel lláu de la izquierda nacionalista, too diba movese nesta década a guelpe de convocatoria electoral. Nes primeres autonómiques, les de 2003, aquella INA de Rafa Palacios, ún de los vértices de l’atomización d’esta estaya del asturianismu, diba reñacer en forma de Bloque por Asturies pa abrir una estratexa nueva, en xuntanza con una Izquierda Xunida necesitada de recuperar la so posición de tercer fuercia política na Xunta Xeneral. Y l’esperimentu funcionó, especialmente pa IX, qu’entró nun gobiernu nel qu’el pesu del Bloque vióse especialmente nel ‘internacionalismu’ del cargu concedíu a Palacios como responsable de Cooperación.

Aquella primer lexislatura de la ‘esquierda plural’ foi la d’un ciertu espoxigue de la presencia institucional de la llingua asturiana, del anicio de la igua de la toponimia y de dalguna otra aición cosmética sin que s’avanzara munchu más nel enfotu en ‘facer país’ del asturianismu. Cierto ye, la representatividá nun daba pa muncho más.

Nes mesmes eleiciones de 2003, confirmábase l’esbarrumbe d’un Pas al debalu, mentes que Uras diba amosase como lo que foi: una rempuesta fracasada a la yá tradicional tendencia del PP asturianu a l’amarraza interna. Tamién foi l’añu nel qu’Andecha Astur algamaba el so cumal de votos con más de 3.800 papeletes nel so favor. Una situación cásique marxinal que, col tiempu, diba amosase como l’aparentemente deseable pa un seutor relevante de les sos bases y cargos.

La sangría nel Pas diba siguir seliquino pero de contino nesos años, tamién no que se refier a una presencia nos conceyos que diba retroceder entá más nes eleiciones de 2007.

Esa convocatoria diba ser un puntu y a parte nel panorama políticu asturianista al abrise estratexes nueves que nun dieron resultaos inmediatos, pero que podríen converxer con éxitu nesta década a piques d’entamar.

D’una banda, axuntábense pela derecha lo que quedaba d’un Pas y una Uras cola idea de que sumando los votos algamaos por caúna d’elles en 2003 diben recuperar un escañu na Xunta Xeneral. Pero l’electoráu nun vio más que un intentu desesperáu y poco creíble a lo que ayudó enforma el cambéu de discursu del PP, muncho más sensible agora pa col arume rexonalista de los sos fíos pródigos.

Pela otra banda, l’intentu de xunión d’Ias y Andecha, los otros dos vértices de l’atomización de la esquierda nacionalista, acabó nun pleitu nunca esclariáu del too que sólo sirvió pa que rescamplara una vuelta más la incapacidá, o les poques ganes, de dellos seutores pa sacar alantre un proyeutu serio.

politicos

El resultáu d’aquella xuntanza a medies foi la recuperación de les sigles UNA p’abellugar a Izquierda Asturiana y Andecha Astur Suyúdice nun intentu de facer una propuesta mui asemeyada al Bloque por Asturies, pero sin estratexes de coalición con formaciones subsidiaries d’organizaciones estatales que comprometan los sos oxetivos políticos. Pel momentu, los errores y la debilidá organizativos vienen lastrando enforma la so actividá y el so desenvolvimientu na vida pública asturiana.

Lo cierto ye que, dende aquelles eleiciones, l’asturianismu políticu entró nun procesu de depresión con síntomes claros. Asina, énte les llamaes a la xuntanza y la bronca pesimista xeneralizada, Andecha vuelve a entamar un llamáu a la xunión de los asturianistes al que-y sigui el xuegu el Pas, d’un mou bien poco creible y de nula repercusión acullá del ruxideru cibernéticu. Pela so parte, la crisis interna n’Izquierda Xunida arrequexa al so seutor más asturianista y acaba cola dimisión d’un Valledor que nun dexó de falar de refundaciones y xuntances con mención esplítica a UNA. Nesi sentíu, y ya nes selmanes últimes de la década, la dimisión de Valledor abre la puerta de la Xunta Xeneral a la esquierda nacionalista na persona del secretariu xeneral del Bloque, Roberto Colunga, quien tamién dexa abierta la puerta a contautos con otres formaciones de cara a los comicios de 2011.

Sicasí, l’escenariu col qu’entama la década ye’l del enfotu nuna serie de previsibles movimientos que puean dar resulatos sólidos a mediu y llargu plazu. Con una militancia entá probe y una sopa de sigles y logos nes que s’atopen fórmules claramente fracasaes y otres con un recorríu posible, dende’l próximu 1 de xineru lo mesmo podemos tar énte l’aniciu d’un nuevu momentu históricu pa un asturianismu que, d’una vez, tien de dexar de perder trenes.

Nacionalismu llingüísticu español

El videu que vien darréu ye una conferencia de Juan Carlos Moreno Cabrera, llingüista y Catedráticu de la Universidá Autónoma de Madrid, onde desmonta tolos mitos qu’usa el nacionalismu español pa imponer el español como llingua de tolos españoles y desprestixar al restu de llingües del Estáu. Esplica tamién como gracies al colonialismu y al etnocidíu estes propuestes, que califica como “franquistes”, el nacionalismu español (y otros nacionalismos llingüísticos) intenta imponer les sos tesis. Y esmolezse pola normalidá que tienen estos pensamientos na sociedá, politica y  nos “medios de comunicación” españoles.

http://www.youtube.com/watch?v=d4B6Hu3z-4A

Xuntances perende acullá

N’esti primer día ensin reflexón dióme poles xuntances, polo precario de la situación d’un asturianismu víctima tanto, o más, d’errores propios como de torgues impuestes. Restolando un poco perhí, vese que’l casu asturianu nun ye únicu nel mundu, y que intentos, xuntances, cambeos d’estratexa, polémiques y ruíu son vezu en tolos movimientos minoritarios y alternativos. Los que a la fin algamen mayor ésitu, ye siempre depués de grandes fracasos y con munchos calabres pel camín. Pero sólo algamaron esi ésitu depués d’aneciar.

Sicasí, y polo que viera esta tarde d’aburrición, siempre hai dos elementos presentes nel espoxigue d’esos movimientos minoritarios: la xuntanza y/o los líderes carismáticos. Llúeu, esi espoxigue caltiénse o retrocede, y nello tien muncho aquel el texíu social, la fuercia que se-y dea a la organización, el ‘músculu’ del que munchos falen.

N’Asturies tamos nuna situación na que nun hai nada de too eso. La famosa Coalición Asturiana foi un finxu que munchos nin siquiera pudimos votar. Aquella xuntanza supunxo la entrada d’un nacionalista con carisma na Xunta Xeneral del Principáu, pero bien ceo les coses entamaron a esgonciase. La disolución de CA dio-y al Pas la oportunidá de reforzar la so cadarma organizativa, ganar músculu, dir convirtiéndose nel gran paraguón qu’abellugara a tol asturianismu. Pero nun foi quien a ello, y pa cuando apaeció Uras y el so rexonalismu descafeináu y oportunista, tola fuercia organizativa algamada pol Pas dilióse como un terronín de zucre.

Y ehí tamos, nuna travesía nel desiertu na que, na mio modesta opinión, entamárense dellos intentos de que l’asturianismu garre cuayu nel panorama políticu asturianu. Unu foi la estratexa del Bloque por Asturies, que d’una banda apurría-y el sellu asturianista a Izquierda Xunida, y d’otra permitía da-y visibilidá a un sector nacionalista que diba dir ganando esperiencia na política real, dalgo fundamental pa fortalecer mínimamente una organización. Ónde llevará esa esperiencia, esi enfotu n’enseñar ‘la patita’ del panorama políticu hexemónicu n’Asturies, magar toles incomprensiones, ye dalgo que ta por ver.

Como tamién ta por ver qué sal de otra estratexa distinta, muncho más difícil nos anicios, que pretende construir dende cero una alternativa política capaz de llegar a una bayura sectores identificaos col asturianismu d’esquierda. Pero esi intentu, primero na forma de coalición electoral Unidá, y lluéu como UNA, tien énte sí toles torgues d’una organización feble, qu’entá, en munchos sentíos, nun zarró el so procesu fundacional. Poro, ta tamién por ver qué pue salir d’elli, si espolleta, o si s’allanca na marxinalidá política de la que’n toos estos años nun foi a salir una de les sos formaciones d’orixen: Andecha Astur.

Sicasí, nenguna d’eses estratexes contenta les aspiraciones d’esi sector de la sociedá asturiana al qu’aspiren a representar políticamente. L’oxetivu tien de ser algamar representación y da-y valir a les esmoliciones de decenes de miles d’asturianos. Y va siendo hora d’ello.

¿Que una opción ye la xuntanza? Paez evidente. Pero lo cierto ye que ¿cómo se fai? Como dicía güei Trayasgaya, dos y dos nun son necesariamente cuatro en política. Vióse col resultáu d’Unión Asturianista nes pasaes autonómiques, y entá más claramente se vió nel casu de Coalición Andalucista. Esta candidatura electoral axuntaba por primer vez a tol espectro nacionalista/rexonalista andaluz: dende’l federalismu socialdemócrata del Partido Andalucista, al islamismu secesionista de Liberación Andaluza. Al final, con casi 124.000 votos quedóse a piques d’algamar representación nel parlamentu andaluz, pero nun entró.

Un casu llamativu ye tamién el de Valencia, con delles corrientes nacionalistes y rexonalistes, delles irreconciliables y mui influyíes, por estremaos motivos, pol catalanismu, que viven tamién anguañu momentos de probitú. Sicasí, la xuntanza presentada pa les autonómiques últimes pue ser l’espeyu nel que se mirara Francisco Javier García Valledor n’aquella propuesta suya de xuntanza pal próximu ochobre. Compromís pel País Valencià integraba d’aquella a Izquierda Xunida, el Bloc Nacionalista Valencià (de la ‘tercera vía’ del nacionalismu valencianu, non pan-catalanistes), dos partíos verdes y Izquierda Republicana. Algamaron seis diputaos (equiparable a los cuatro d’IU-BA-LV), pero lo heteroxéneu del esperimentu acabó en crisis y la escisión del grupu parlamentariu.

N’otros casos, les coaliciones y xuntances fáense y desfáense, pero paez que sólo algamen cierto ésitu cuando son quién a amosar ‘valor añadíu’ a la mera suma de fuerces. Nesti puntu xueguen munchu los líderes (Labordeta na Chunta Aragonesista, Beiras nel BNG) y la imaxe que tresmita la unión al so electoráu (Coalición Canaria, Nafarroa Bai).

De toles maneres, lo que de verdá nun funciona ye la dixebra. Un exemplu qu’esta tarde llamóme munchu l’atención, ye’l del partíu escocés Solidarity, fundáu por dos ex parlamentarios del Partíu Socialista Escocés. Anque nun algamaron escañu, el partíu nuevu triplicó los votos del orixinal. Eso sí, malapenes sumaron los dos 50.000 votos, cuando en 2003 algamaron cásique 130.000 y seis diputaos. El líder de Solidarity, Tommy Sheridan, tien munchu carisma, tantu, que paez que se pasó de vueltes y acabó nel Gran Hermano pa famosos de Gran Bretaña porque “necesitaba’l dineru”. Equí lu tenéis nun videu electoral, desplicando col so marcáu acentu el programa del so partíu.

http://www.youtube.com/watch?v=BJqCGXJZn0U

Y la cuestión ye ¿qué facer?, ¿quién s’axunta?, ¿cómo?, ¿con qué lideres?… ¿Qué xuntanza sedrá la que seya quién a algamar un bultable apoyu social, a ufrir una alternativa creible y viable, averada a la realidá asturiana, qu’ilusione y implique realmente a una parte importante de la sociedá?

La xuntanza me pone

Ta acabante d’espublizase una bona iniciativa de xente esmolecío pola ruina realidá del nacionalismu asturianu y que cuiden, como casi toos, que la xuntanza de les fuerces asturianes ye imprescindible. Como diría el gran estadista cántabru, o de les Asturies de Santillana, según se mire, a nós la xuntanza tamién ‘nos pone’.

Pero lo que nun acabo de pillar ye porqué, si los promotores del web reconocen esplícitamente qu’hai más fuerces susceptibles de xuntanza, la cosa queda llendada a UNA y Andecha. De mano, una hipotética xunión de dambes sigles nun diba tener mayor aquél, pero ye que además paez la menos ‘operativa’. Sin saber de lo que pasara va un par d’añinos más que lo que trescendió públicamente, quien anguaño fai usu de la marca Andecha Astur ye precisamente quien nun quixo ‘axuntase’ a IAS pa formar Unidá, güei UNA, nuna patética llucha de ¿poder? que de fechu entá paez que ta nos tribunales. Dende esi puntu de vista, paez que hai una xente con voluntá de xuntanza, y otra, mui esmolecida pol autodetermín d’Asturies y la falta d’ambulancies en Noreña, pero que la xuntanza-yos dexa más bien frío. Sicasí, too pue intentase. De fechu, podría incluso considerase too un xestu qu’Andecha emitiera un escritu d’apoyu a UNA cinco díes depués de qu’españara tol tema de los avales pa les europees.

D’otra manera, nun veo porqué non abrir la ‘xuntanza’ a toles fuerces polítiques y colectivos. De verdá, y siempre como meros observadores d’esti requexu políticu qu’aspira a ser minoritariu en cuenta de marxinal, paez muncho más probable una collaboración UNA-Bloque por Asturies qu’amás resultara atractiva pa xente de la órbita del PAS y pa toos aquellos cansaos de dase testerazos contra una muria. Taría bien recuperar a toa esa xente, enantes de qu’acaben toos de conceyales de Cultura de Gabino.

Sicasí, tolos meyores deseos pa una iniciativa como la de Pola Xuntanza, y pa toes aquelles que puxen pol bon xacíu de les formaciones polítiques asturianes. Ye mui importante el debate, abiertu, tolo al altu la lleva que se puea, p’apurrinos a toa esa amalgama asturianista, que ye mui necia, una alternativa ilusionante, creible y capaz. Fainos falta, como dícía Hevia esti día.

Actualización: Decálogu del ruxideru.

Vos dexamos una memorable actuación del Coru Santiaguín sobre l’asuntu.

Calca equí p'amosar conteníu dende YouTube.
Consulta la política de privacidá de YouTube.

Abrir "Coro Santiaguín - "Axuntábense"" direutamente

Entamen la precampaña

D’equí a unes selmanes, pal 7 de xunu paezme que ye, vamos tener les eleiciones más bobes del calendariu. Eses nes que se trata d’escoyer a les vieyes glories del PSOE y del PP que van vivir un retiru coyonudu a cuenta del Parlamentu Européu. Hailos que ya entamaron güei la precampaña y fainlo escolingando n’internet videos como esti.

http://www.youtube.com/watch?v=KhcXZt2fpwA

N’Asturies la precampaña entamó col vetu del BNG a que la UNA forme parte de la coalición ‘Europa de los pueblos’ pol fechu de ser un partíu asturianu. Como la mera esistencia d’Asturies fai rescamplar lo feble de la historigrafía nacionalista galllega, pues a ḥodese. En fin, too esto ¿sedrá porque Galicia ye un país que hasta que descubrió’l contrabando de farlopa nun esportaba más que fame? ¿O sedrá polo que diz Vicente García Oliva? Al final, nun hai otra: complexu de nuevu ricu. Y pela parte nuestra: una migayina de resentimientu y envidia, por qué negalo.

Actualización Primera: Digo mal cuando digo qu’equí n’Asturies la precampaña empezó colo de la UNA y el BNG. Lo cierto ye qu’entamo bastante enantes, coles discusiones sobre’l retiru o non d’Ovidio Sánchez nel Parlamentu Europeu, y sobre la presencia de socialistes na llista del PSOE. Y sí, bien ceo anunciaron que l’ex rexonalista Masip va repitir poltrona col númberu 17 de la llista socialista. Lluéu, Izquierda Unida anunciónos que l’asturiana Marta Pulgar diba nel númberu trés de la so formación.

Actualización Segunda: Cuenten n’Asturnews qu’Andecha diz que de vetaos nada, qu’ellos son socios d’Europa de los Pueblos y que puede qu’el BNG-yos permita a ellos dir na candidatura. ¿Dalguien puede aclarar too esto? ¿Pue dar el nacionalismu asturianu más pena y dolor? ¿Sedrá qu’empiezo a entender al BNG?

Y Zapico respuende

zapico

La respuesta de Unidá Nacionalista Asturiana al destape de Valledor nun se fizo esperar y foi axustada, abúltanos correuta y midida, faciendo valir a UNA nesti escenariu que ya ta abiertu dafechu. Nun dicir nada, pela parte d’UNA y el so portavoz Faustino Zapico, diba ser como confirmar palabra por palabra les declaraciones de Valledor, y supongo qu’entá ta casi too por facer (porque digo yo que, dalgo fecho habrá). Como diximos enantes, ver veremos, y taremos sollertes a too lo que se mueva 😉

Valledor se destapa

valledor

El que ye cabezaleru de la ‘estaya asturianista’ de IU y fuera candidatu a la presidencia del Principáu, Francisco Javier García Valledor, ta acabante de dar anuncia del proyeutu que-y ta llevando a desmarcase del restu de diputaos y conseyeros de la so formación na lexislatura actual. Failu güei nuna entrevista en LNE na que pon fecha (ochobre d’esti añu) pa la fundación d’una fuerza política “de izquierdas, asturianista, ecologista, republicana y altermundista, que tenga posición en el mundo y que aspire a tener un doble espacio federal en España y en Europa”. Pa ello, espurre la mano hacia UNA e ¿Izquierda Republicana? pa tratar d’axuntar fuerces nun proyeutu que l’entrevistador identifica con un ‘bloque nacionalista a la asturiana”. Ver veremos. A mín suéname más a Chunta aragonesista, que al BNG o Nafarroa Bai. ¿Realismu?. pel momentu dame igual: cualquier iniciativa d’esti tipu tien que se recibir con ilusión y curiosidá a la espera de que vaya cuayando. Da-y tiempu y que madureza, y ver cómo sal. Taremos sollertes.

La Policía quixo facer de Fer un icono

Agora qu’acabó la vista na Audiencia Nacional, la mesma que ta xulgando los casos de presuntu latrociniu del PP, apetezme meteme nel asuntu Fer, nel affaire Fer. Y apetezme especialmente depués de lleer la prensa de güei.

ferFer nun me cai especialmente simpáticu. Nun comparto el rollu borroka que me gasta y cuido qu’esa estratexa suya de poner petardinos pa protestar pola represión a la contra manifa de Democracia Nacional nun ye lo más afayadizu pa naide. Garráronlu, y tendrá que pagar por ello, que pa eso l’Estáu tien el monopoliu de la fuercia y toes eses coses que, de xuru, él asume.

Agora bien, güei llevántome y lleo una noticia asina como alloriante. Que fala de lo esmolecía que ta la policía porque nun-y empuraron a esti rapaz por otros 17 petardos. La Policía Nacional qu’opera n’Asturies, esa de los manolones, a la que-y pasó el 11-M per delantre les narices ¿ensin golelu?, la que nun ye quien a esclariar un asesinatu (esti asuntu dio hasta pa facer una serie na TPA),  el coño la bernarda de les policíes del mundu, va, y s’esmolez porque a esti rapaz nun-y empuraron 17 petardos, porque nun fueron quien a convertilu nun símbolu col que criminalizar d’una sentada al nacionalismu asturianu, a los bablistes de mierda y a esos sindicaleros de los coyones que se manifiesten en Xixón y nun firmen Acebas ni Acebos.

Esa ‘información’ convenientemente filtrada al primer diariu de Xixón el día en qu’acaba la vista del xuiciu na Audiencia Nacional, ye la preba de que quixeron facer de Fer un icono, la mierda cola que chiscar a una parte relevante de la sociedá asturiana mui incómoda pal ‘establishment’ y que básicamente responde a dos grupos: d’una banda los asturianistes, de la otra la esquierda real, la que nun dexó de movese n’utilitarios nos trenta años últimos.

Que’l casu de Fer diba usase pa chiscar y emporcar el movimientu de reivindicación llingüística n’Asturies (véase casu Fernández de Castro) ye dalgo nidio y a lo que, mayormente, y como ye normal, l’asturianismu respondió con un  ‘esto nun va comigo’. Les tintes se cargaron, de fechu, en que esti rapaz aneciaba en falar n’asturianu y en que una xueza iletrada negába-ylo porque-y salía de ahí.

D’otra banda, tamién s’asoleyaba, tolo al altu la lleva que se pudo, que como testigu de la defensa fuera Redondo, sí, esi cabezaleru de la CSI, esi esi, señaláu col déu por dir a ayudar a un acusáu d’estragos terroristes. Como si’l prestixu de la CSI na defensa de los trabayadores tuviera no qu’espubliza un periódicu. Ya l’ultimu día del xuiciu, ayer mesmu, víase nes ediciones dixitales cómo facíen referencia a lo asocedíu en Piloña cola contramanifa antifascista. Nos testos ‘periodísticos’ se distinguía perbien a los ‘extremistas radicales de izquierda’ del ‘partido Democracia Nacional’. Y entós voi pensar que lo que denuncien les madres aconceyaes polo que-yos pasa a los sos fíos izquierdistes (vei Les Noticies impresa d’esta selmana) ye verdá. Que unos son indeseables radicalones, y los del partíu racista filonazi son unos respetables demócrates. Paez claro qu’unos son molestos, y otros interesen (¿serán coleguitas, como Trashorras, el dinamita y el porteru del horósopo?).

Inaciu Iglesias, editor de Les Noticies, facía va unos númberos un analís, cuido qu’axustáu, de lo que taba pasando: ‘Defender Asturies nun ye delitu’, non, pero poner bombes sí. Y esi delitu ye oro propagandísticu.

D’otra manera: ¿dalguien s’imaxina que un diariu asturianu espublizara los esmolecimientos d’una policía incapaz d’empurar a proxenetes, traficantes o conceyales corruptos, y que se detallaren les supuestes ‘coincidencies’ ente’l casu d’esi proxeneta o traficante y los otros que-y queríes empurar? Non. Yo, polo menos, nunca lo viera.

Nun soi un radical antisistema. Pero a vegaes véome fuera, escluyíu por nun poder aguantar el fedor de lo que veo, lleo o siento. Nun pueser que mereza’l mesmu tratamientu esti Fer que un asesinu. Nun pue ser que la llibertá seya namás qu’una palabra na bocona de Jiménez Losantos. Nun pueo callar énte lo que me paez una gochada. Nun ye de paisanos. Anque me chisque.