La Policía quixo facer de Fer un icono

Agora qu’acabó la vista na Audiencia Nacional, la mesma que ta xulgando los casos de presuntu latrociniu del PP, apetezme meteme nel asuntu Fer, nel affaire Fer. Y apetezme especialmente depués de lleer la prensa de güei.

ferFer nun me cai especialmente simpáticu. Nun comparto el rollu borroka que me gasta y cuido qu’esa estratexa suya de poner petardinos pa protestar pola represión a la contra manifa de Democracia Nacional nun ye lo más afayadizu pa naide. Garráronlu, y tendrá que pagar por ello, que pa eso l’Estáu tien el monopoliu de la fuercia y toes eses coses que, de xuru, él asume.

Agora bien, güei llevántome y lleo una noticia asina como alloriante. Que fala de lo esmolecía que ta la policía porque nun-y empuraron a esti rapaz por otros 17 petardos. La Policía Nacional qu’opera n’Asturies, esa de los manolones, a la que-y pasó el 11-M per delantre les narices ¿ensin golelu?, la que nun ye quien a esclariar un asesinatu (esti asuntu dio hasta pa facer una serie na TPA),  el coño la bernarda de les policíes del mundu, va, y s’esmolez porque a esti rapaz nun-y empuraron 17 petardos, porque nun fueron quien a convertilu nun símbolu col que criminalizar d’una sentada al nacionalismu asturianu, a los bablistes de mierda y a esos sindicaleros de los coyones que se manifiesten en Xixón y nun firmen Acebas ni Acebos.

Esa ‘información’ convenientemente filtrada al primer diariu de Xixón el día en qu’acaba la vista del xuiciu na Audiencia Nacional, ye la preba de que quixeron facer de Fer un icono, la mierda cola que chiscar a una parte relevante de la sociedá asturiana mui incómoda pal ‘establishment’ y que básicamente responde a dos grupos: d’una banda los asturianistes, de la otra la esquierda real, la que nun dexó de movese n’utilitarios nos trenta años últimos.

Que’l casu de Fer diba usase pa chiscar y emporcar el movimientu de reivindicación llingüística n’Asturies (véase casu Fernández de Castro) ye dalgo nidio y a lo que, mayormente, y como ye normal, l’asturianismu respondió con un  ‘esto nun va comigo’. Les tintes se cargaron, de fechu, en que esti rapaz aneciaba en falar n’asturianu y en que una xueza iletrada negába-ylo porque-y salía de ahí.

D’otra banda, tamién s’asoleyaba, tolo al altu la lleva que se pudo, que como testigu de la defensa fuera Redondo, sí, esi cabezaleru de la CSI, esi esi, señaláu col déu por dir a ayudar a un acusáu d’estragos terroristes. Como si’l prestixu de la CSI na defensa de los trabayadores tuviera no qu’espubliza un periódicu. Ya l’ultimu día del xuiciu, ayer mesmu, víase nes ediciones dixitales cómo facíen referencia a lo asocedíu en Piloña cola contramanifa antifascista. Nos testos ‘periodísticos’ se distinguía perbien a los ‘extremistas radicales de izquierda’ del ‘partido Democracia Nacional’. Y entós voi pensar que lo que denuncien les madres aconceyaes polo que-yos pasa a los sos fíos izquierdistes (vei Les Noticies impresa d’esta selmana) ye verdá. Que unos son indeseables radicalones, y los del partíu racista filonazi son unos respetables demócrates. Paez claro qu’unos son molestos, y otros interesen (¿serán coleguitas, como Trashorras, el dinamita y el porteru del horósopo?).

Inaciu Iglesias, editor de Les Noticies, facía va unos númberos un analís, cuido qu’axustáu, de lo que taba pasando: ‘Defender Asturies nun ye delitu’, non, pero poner bombes sí. Y esi delitu ye oro propagandísticu.

D’otra manera: ¿dalguien s’imaxina que un diariu asturianu espublizara los esmolecimientos d’una policía incapaz d’empurar a proxenetes, traficantes o conceyales corruptos, y que se detallaren les supuestes ‘coincidencies’ ente’l casu d’esi proxeneta o traficante y los otros que-y queríes empurar? Non. Yo, polo menos, nunca lo viera.

Nun soi un radical antisistema. Pero a vegaes véome fuera, escluyíu por nun poder aguantar el fedor de lo que veo, lleo o siento. Nun pueser que mereza’l mesmu tratamientu esti Fer que un asesinu. Nun pue ser que la llibertá seya namás qu’una palabra na bocona de Jiménez Losantos. Nun pueo callar énte lo que me paez una gochada. Nun ye de paisanos. Anque me chisque.

7 comentarios en “La Policía quixo facer de Fer un icono”

  1. Como nacionalista, ya inclusu como asturianu con un “corazón” dixebriegu, siento muncha vergoña por tou esti casu Fer. Ye la cuenta pa que mos criminalicen a toos. Nun son métodos. Ye la típica faltosada infantil que produz efeutos contraproducentes. A min tamién me prestó l´artículu d´Inaciu Iglesias, por más qu´Inaciu seya de lo más ayenu ideolóxicamente a min. Foi too un espectáculu escesivu, una imitación llariega del batasunismu, que tanta desgracia truxo a la propia Euskalherria. Lo que menos necesita Asturies ye esto. Ficiste un analís “chapó”, pa quitase´l sombreru.

  2. Toi d’alcuerdu con esa opinión, pero tamién tengo nidio que tán criminalizando’l casu. Fáenlo pa criminalizar al acusáu -con un xuiciu escuru y ideoloxizáu- pero tamién a tol nacionalismu, nun sólo énte la sociedá, sinón dientro d’él: dixebrar énte los que quieran chiscase y los que-yos dea mieu.

    Nun hai que cayer con esa falcatrúa. Ye llexítimo y posible defender ensin medranes el derechu a un xuiciu xustu pa Fer, lluchar escontra la criminalización político-mediática pa con tol independentismu que lleva’l so casu y el de Cangues d’Onís, y al mesmu tiempu defender la resistencia civil non-violenta cola que triunfaron los movimientos polos derechos civiles históricos y refugar dafechu los actos que-y acusen.

  3. Sí, tán criminalizando, yo d´eso nun teo dulda: paez ser que lu acusaron d´otres aiciones ensin pruebes, y que tamién quieren chiscar y solliñar – cola complicidá de la “prensa rexonal” – al “entornu d´Andecha” y “del independentismu radical”, etc, etc. Eso ye criminalización facista, nun tien otru nome. Nun ha caer embaxu que n´Asturies quieren facer “castigos exemplarizantes” nun vaiga ser que apruzan doscientos o mil Fer perendayuri… Hai que pidir: 1-Que nun se faiga inxusticia con él, y 2- que´l nacionalismu salga p´alantre lo menos chiscáu y esgonciáu posible d´estos circos y antroxos llamentables…

  4. En xeneral toi d’acuerdu colo que camentáis perequí y cola entrada de GyG. Creo que, dende’l casu Carnero y Morala, que foi vergonzosamente manipuláu pola prensa (sí, sí, n’especial pol primer diariu de Xixón) y sobre too pola policía. Lo qu’asocedió col casu Carnero y Morala foi la represión más grande de los últimos tiempos y silenciada (bien callando, bien malinformando) pola prensa d’Asturies. Visto aquello, onde dos persones fueron condenaes a multa y cárcel por delitos qu’ellos nun cometieron con pruebes que demostraben que nun yeren ellos, con policíes que mintieron y que se pudo demostrar… en fin, visto aquel circu, col casu Fer tenemos que la criminalización del asturianismu/nacionalismu asturianu ye coser y cantar.

  5. Alégrome de los vuesos comentarios. Hai una cosa clara. Na situación actual, tolo que se salga del guión va llevales per riba y per baxo, y dientro d’esi guión sí ta la estrema derecha, non una izquierda real y entá fuerte que dexe n’evidencia a la casta gobernante. Candido y Morala son un gran exemplu, pero tamién lo ye el que se camudara el sistema de representación sindical na Alministración autonómica pa caltener el poder de decisión en UGT y CC OO ya impedir l’acción de Suatea tres ganar les elecciones n’Educación. Por eso fai falta aire fresco nesta Asturies fedionda, y non petardinos nin clubs de fans de los batasunis.

Responder

La direición de corréu electrónicu nun va espublizase. Ríquense los campos marcaos con *