Un periódicu

A dalgunos paez que nun-yos prestó demasiao que seya precisamente el blogue L’Asturies lliberal el que diera anuncia de los preparativos pala creación d’un diariu n’asturianu. Pero pa mín ye lo meyor que-y podía pasar al asturianu, seya quien seya’l promotor.

Lo que ta claro, ye que nun van plantease una aventura asina dende la fantasía. Cuido que nun sedrá’l so enfotu arrequexar a tol asturianismu que nun seya de ‘centru’, nin fadrán un periódicu nel que Tini nun salga namás que con cuernos y goliendo a azufre. Espero que, si cuaya, seya un periódicu que nun fieda namás ver la portada, que se pueda lleer ensin sentir vergoña…

El casu ye que, nuna de les reacciones xeneraes pola noticia, Trasgu duldaba de la viabilidá del proyeutu. Y nun ye malo mirar pa otros llugares y ver qué hai perhí.

37018

Cataluña ye, cómo no, motivu de sana envidia. Ellí, amás del Avui, atopes la edición en catalán de El Periódicu de Cataluña asina como los comarcales o provinciales el Segre, El Punt de Girona, El 9 nou, el Regiò 7… En Baleares editen el Diari de Balears, en Galicia el Galicia Hoxe (antiguo Correo Galego) y en Euskadi el Berria. Si nun m’equivoco, esos son tolos diarios en llingües minoritaries del estáu español.

La situación de caún d’ellos ye bien estremada, tanto pol so tamañu como empresa, como pola situación económica. Avui vendióse va unos años y pasó per un mal momentu porque la so estructura yera la de un diariu de los de tola vida. A la fin, integróse nun grupu editorial potente (ta participáu pol Grupu Godó, de La Vanguardia y por Planeta, de La Razón). Llámenlu sinerxa, y fai que la cabecera aguante bien.

El Periódico de Cataluña, edición en catalán, y el Periodic d’Andorra, son cabeceres en catalán del Grupo Zeta (La Voz de Asturias). Cabeceres saludables (l’asturiana non, les catalanes), anque nun grupu que nun ta nel meyor momentu y que negocia la so venta.

Otru grupu que sonará ye Editorial Prensa Ibérica, editora de La Nueva España, y tamién del Regiò7, mientres que les demás cabeceres en catalán sobreviven en empreses de menor tamaño (la más destacable ye El Punt) que se busquen fórmules de collaboración pa competir (suplementos conxuntos y coses asina.

En cuantes a Galicia Hoxe, nun ye precisamente un gran negociu y dizse que vive gracies a la sovención. Edítalu la empresa de El Correo Gallego, vinculada a círculos empresariales del PP y comenten que esi venceyu ye lo que-y resta puxu ente los potenciales lectores en gallego. Sicasí, tamién ye cierto que l’usu del gallegu nes informaciones de los grandes diarios de la zona ye daqué que se fai con normalidá, y que, la prensa gallega ye de provincia más que de comunidá autónoma. De fechu, namás La Voz de Galicia tien presencia bultable en toa Galicia y ello con un númberu espectacular de ediciones comarcales.

Pa final, el Berria del País Vascu tamién vive de les sovenciones a la edición n’euskera. Nesti casu, el mayor problema ye el so indisimuláu venceyu a un nacionalismu radical y minoritariu que-y resta llectores nun mercáu potencial entá ruino como ye’l de los alfabetizaos n’euskera. Sicasí, aguanta.

La conclusión de too esto, pa mín, nun ye otra que un diariu n’asturianu ye posible. D’una parte, ta la esperiencia de Les Noticies, que lleva más d’una década na cai, dalgo que nun se llogró nel País Vascu cuando, recién fechu oficial l’euskera, el Gobiernu autonómicu emperróse en sacar alantre un selmanariu qu’acabó marafundiando perres ensin resultau normalizador nengún. D’otra manera, el fechu de que se fale d’un grupu d’ambitu estatal quier dicir que la estructura ye la lóxica: pequeña, con una redacción contenida y imprentación nuna planta del grupu, o esternalizada (como la gran mayoría de les cabeceres d’anguaño). Tiraes d’ocho mil exemplares pa vender seis mil, por exemplu, munchu trabayu comercial, sovenciones (como toos les tienen)… y ehí tienes un periodiquín que tire p’alantre. Haya suerte.

3 comentarios en “Un periódicu”

  1. Berria tien 15.000 llectores diarios (poor periodicos vendíos) . Los llectores reales suelen multiplicase por 3 ya que un periodicu sobremanera nos chigres leelu más xente del que lu merca.

    15.000 x 1€= 15.000 € diarios
    Amás de la publicidá.

    ¿De veres vive namás de les subvenciones?

    ¿Venceyáu al nacionalismu radical y minoritariu? Habría que velo. Berria al estilu d’Egunkaria ye un periodicu normal y non escesivamente politizáu. Gara por exemplu ta muncho más politizáu y vendese que da gusto.

  2. Yo veolo tovia perprontu pa entamar a falar si pue tener futuru o non. Lo primeru de too ye ver si esta noticia tira p’alantre y materializase, dempués podremos entrar a varolalo con los fechos na manu. Ye mui diferente si asoleyalu un grupin d’amigos a contar col sofitu y participación d’un gran grupu empresarial de l’información, de ser asina ya vendrien dempués los sofitos publicitarios y les subvenciones del Principáu (que vendrien de toes formes xD).

    PD: Gracies pola bienvenida :D, os enllazo. Un saludu!

  3. Yo. Berria tien una difusión similar a la de La Voz de Asturias. Una ruina pa la estructura que tien que soportar la empresa editora (declaren 110 empleaos y decenes de colaboradores).
    Evidentemente, sí tien llectores, tien ingresos, pero d’esi euru descuenta los quince céntimos del quiosqueru, los quince de la impresión, y d’ehí descuenta sueldos, gastos corrientes, una districuión más complexa que n’Asturies (dos comunidaes autónomes y iparralde, onde nun venden un res…). A la fin, los ingresos los cuadren coles subvenciones directes a la edición n’euskera y la publicidá… que mayoritariamente ye d’alministraciones públiques, dende’l Gobiernu vascu y muérganos dependientes, a los conceyos ‘afines’. ¿Que nun ta venceyau al nacionalismu radical? Namás tienes qu’echa-y un güeyu. Anque disimule (pol aquel de les subvenciones), compite nel mesmu caladeru del Gara, que ye mayormente en castellanu.
    Nun me malinterpretes, tengo simpatía pol Berria, y polo que supunxo Egunkaria de proyeutu colectivu. Radical, polo menos pa mín, nun ye una definición necesariamente negativa.
    En cuantes a escaecíu, sí, o ta detrás un grupu d’empresarios asturianos de la manu d’un grupu de comunicación de cierta entidá, o nun hai nada que facer.

Responder a L'escaecíu Encaboxar la rempuesta

La direición de corréu electrónicu nun va espublizase. Ríquense los campos marcaos con *