Yo, creo n’Unidá

Vais dicir que tamos como teyes, pero ye la verdá. Los resultaos d’esti 9-M son bien murnios, pero cuido qu’hai que mirar colos güeyos puestos n’otres metes. Si vemos les cifres, casi paez que l’asturianismu que nun votó a IU (o a Gabino o al PSOE, que dalgún habrá) ye poco más o menos qu’una asociación de vecinos d’un conceyu mediu. Pero ye que les circunstancies yeren les que yeren.

Pa mí, Unidá nun puede tar mirando qué fai Andecha. Si asina fuera, dexaría de paeceme ilusionante. Andecha lleva venti años con un techu de 2.000 votos, y nestes elecciones algamó la respetable cifra de ¿1.400?, perhí anda ¿non?. Nada va facer qu’esa traxectoria cambie.

Pero cuido qu’Unidá si tien munchu que dicir entá. Nes autonómiques, surdió como proyeutu ilusionante, llamáu a axuntar sensibilidaes pa facer un movimientu sólidu, una alternativa realista qu’apurra un enfoque nuevu a la sociedá asturiana de lo que ye’l país, separtao d’estratexes que nun diben más allá de lo que más paecía un club de fans de Batasuna col preste del establishment asturianu. Asina, polo menos, entendílu yo.

D’esa manera, nunos meses, Unidá llogró un resultau probetayu pero qu’apuntaba maneres. Un par de conceyalinos, 4.000 votos. Oye chico, pa empezar nun taba mal.

Y en menos d’un añu pasó lo que pasó. Unidá, que tien qu’apuntar alto, cunta tovía con una estructura ruina y un conceyal que-y sal rana. Tolo que tresmite ye negativu: Los Verdes friquis colen y desapaez Mias. Cierto ye qu’apaez Emir, mocedaes de nome poco afortunáu. Y poco más. Dalguna actividá perequí y perellí… dalguna moción en Carreño…

Mentantu, lleguen unes elecciones brutales, ZP, Rajoy… Gabino y ‘los bables’… y Unidá con una campaña entusiasta pero, nun mos engañemos, ruina. ¿Cómo ye que nel chat d’El Comercio digital sal ciudadanos y los de Rosa Díez y nun lo fai el cabezaleru de la quinta fuercia d’Asturies?

Cuido qu’estos díes tola xente d’Unidá nun ta pa nada. Que-yos apetez dexalo too pa prau y dedicase a lo suyo… Yo-yos pido que sigan ehí, que xente que nun ta afiliao, nin foi a asamblees nin a mítines d’ellos, tan, güei más que nunca, a la so vera. Porque depués d’esti 9-M, de xuru que nada va ser lo mesmu nel panorama políticu asturianu. A saber qué pasa con IU… por que ya va siendo hora d’una opción asturiana de verdá, que defienda un mou d’enfocar la realidá del país dende la esquierda, unívocu no que a lo que ye Asturies, y que sepa ganase la confianza d’una bultable parte de la sociedá. ¿Tamos llocos? Puede.

Añadíu: dafechu d’acuerdu colo que diz Rafa Palacios en Les Noticies (“O se ponen en marcha proyectos de mayoría o tamos abocaos al ghetto”).

21 comentarios en “Yo, creo n’Unidá”

  1. la xente d’UNIDA nun puede dar marcha atrás, nun puede rendise. Asturies necesita un partíu que faiga frente a los partíos mayoritarios, ye que sinon esfarrapenmos el nuesu país. Asina que UNIDA tien que garrar los bàrtulos y tirar palantre.

  2. Si, si, mira ver de quien yeren los votos de 2007,chico. Netes parezme ue quedó bien clarino colos resultaos de Los Verdes Grupo Verde. ¿non?

    Unidá sacó menos votos qu’IAS qu la probe de tar nel so meyor momentu agora ta….en fin, meyor nun meter el deu na ferida.

    Lo que tien que facer Unidá ye mirar palo que fai DN, furcia más votada qu’Unidá n’Uviéu o Ciudadanos en Blanco más votaos qu’ellos en Xixón. Tamién pue mirar p Alternativa Motor y deporte colos qu´empataron en Nava, la cuna ficitica d’esi partíu políticu ASTURIANISTES qu tien la so sé na d’IAS….

    Yo la verdá si me punxera d´oxetivu algamar 8 mil votos pa llueu quedar en 800, garraría la maleta…..

  3. ¿Quies llevantar la moral? Paezme bien, pero tenéi cuidáu porque sentise “optimistes y esperanzaos” con 821 votos paezme que pue ser el primer pasu p’hacia la sectarización d’Unida, del mesmu mou que-y pasó a Andecha.

    Ta claro lo que’l pueblu quier: Asparavanes, demagoxa, populismu, baxar impuestos… La esquierda nun vende (mirái a IX, quién la ve y quién la vio) y l’asturianismu tampocu… si los axuntes al empar, muncho menos, fai falta uN PSOE asturianu, un PSC, un proyeutu que seya la bisagra, qu’asuma’l discursu de los partíos mayoritarios según la riegla de la diplomacia: “Cede en tolo que nun seya vital”, y ello ye que podemos ceder na esquierda, podemos ceder na politica fiscal, podemos ceder na política ambiental, podemos ceder nel independentismu, na gueta del drechu al autodetermín…

    Onde nun podemos ceder ye na defensa cultural, porque esa ye la esencia del movimientu (sinón nun taríemos falando tolos díes que si dellos votantes d’AA pasen pa Unidá o si dellos d’Unidá pasen pal PAS-URAS, ye un mesmu espaciu, una mesma llucha)… Agora lo qu’hai que facer ye buscar el calce pa qu’esa reclamación cultural seya asumida y sofitada pol conxuntu de la sociedá, y eso ha pasar, por fuercia, per un partíu royu PSOE o PP en tolo demás.

  4. Observese la diferencia ente la crítica dura de embaxador y la mala babaya de “Yo”. Estos que colaron de MIAS sí que tienen que pensar qué van facer políticamente depués de colar de la so organización. Como nun vayan a reforzar andecha astur… (la vida ye asina) porque’l so grau de sectarismu ye asemeyáu y yá se sabe que los estremeños tóquense.
    Pa los que quieren construyir, anque s’enquivoquen, con humildá, modestia y xenerosidá siempre hai un camín abiertu.
    Y más ceo que tarde abriráse’l carreru pol que seyamos a construyir la organización qu’Asturies precisa. Oxalá UNIDÁ siga, cambie lo que tenga que cambiar y tenga l’apoyu de la xente.
    Los sectarios, prepotentes y inflexibles, que yá garraron la maleta va unos meses que se dediquen a montar planes pa dominar el mundu nos chigres.
    A pensar y a rectificar lo que faiga falta!
    Gracies GyG.

  5. Sí Yo, tienes razón, DN n’Uviéu, Motor y Deportes, los antitaurinos, LV-GV… el chikilicuatre… saquen votos. ¿y? Habrá que pensar por qué se saquen 4.000 y lluéu 800. Qué circunstancies se dan y qué estratexa se ta llevando…Y cuido que Unidá, y por eso digo que “creo n’Unidá”, ta a tiempu de dar con esa estratexa. Tamién la xente del Bloque. Porque voto asturianista hailo. Lo que nun hai ye una opción que convenza. ¿LV-GV da votos? Si, siempre que la marca vaya sola. ¿O acaso el PSOE nun diba ganar en munchos conceyos con un chimpancé como candidatu? De fechu ya lo fai.
    Y va, embaxador, nun me tomes el pelo. ¿Quies equí un Revilla? ¿Tas diciéndomelo en serio?

  6. Home dalguna esplicación tendrá esti batacazu ¿non? Yuna cosa evidente y lo de LV-GV. Otra pue ser que l’añu pasáu na precampaña y parte la campaña Unidá dicia qu’Andecha Atur taba dientro de la coalición. Otre ya más rares que se me ocurren son: que esos 3.000 votantes seyan independentists astencionistes nes eleiciones españoles (que los hai y nun son pocos), o que votaren a IU pol votu util quetamién ye raro que nun lo ficiern pa les asturianes…

    Lo pior ye la falta de militancia que se ve na raquítica campaña….

  7. Pues sí, yo, camiento que too eso xuega, pero non de forma determinante. LV-GV daría dalguna decena de votos a Unidá nes autonómiques. Andecha, nin quito nin punxo, porque precisamente tamos falando del gueto, y nel gueto, más o menos, toos nos conocemos. Es más, la diferenciación andecheros constructivos n’unida, andecheros talibanes n’Andecha, foi ún de los mensaxes que, al mio entender, dio votos nesi primer momentu a Unidá. Abstencionistes, posblemente unos cuantos, y votu útil a IU, de xuru que bastantes más. Recuerdo les circunstancies d’una y otra campaña: nes autonómiques, IU taba nel gobiernin cola FSA, con Cándido y Morala pa entrar en Villabona, coles térmiques y les llínies llétriques, cola especulación urbanística, cola TPA y la cosmética llinguística. Nestes últimes, too tenía que ver con que, o gobierna Rajoy, o ZP tien mayoría absoluta. ¿Problemes n’Asturies? Úlos.
    Lo que sí me paez que ye la base de tol problema ye, en bona midida, la reducida, anque entusiasta, militancia… y la, a mi entender, una inexistente política de comunicación. Sí. Pa facer dalgo, nesta sociedá, nun basta col repartu de propaganda. UPyD, ensin militantes, tuvo 9.000 votos n’Asturies porque tien una política de comunicación, una estratexa, sal nos medios, anque seya llorando peles esquines porque nun-yos fain casu, y tresmiten la idea de que son bonos, solventes, xente serio con un modelu d’Estáu qu’ufrir. Nun ye tanto cuestión de perres, como d’estratexa y autoestima. Por eso creo que Unidá tien un futuru per delantre. Lo demás, ye pelease con Andecha poles migayes d’un votu marxinal que nun val pa nada. Nun pue haber argullu en tener 400 votos más qu’otra formación n’Asturies. 400, 800, 1.200, 2.000 ó 4.000 votos son igual a cero.

  8. Na, si al final las culpas sedrán de los que colanun de MIAS pur nun se sabe qué..

    De todu menos autocrítica.

    Lo mesmo andecha qu’unidá son opciones que nun valen nada p’asturias… ya los sos cabezaleros habrían renovase, porque l’asturianismu iá l’únicu movimientu político d’asturias que nun renueva a pesar de zapicar tolos anos ya aneciar nos mesmos erros.

  9. Fartucu, ta Asturies esperando a que te pongas tu, a que vengas tu a anovar, a que montes colos tos amigos esi proyectu que va salvar Asturies porque tu (y los tos) sabes cómo facelo y los demás non.
    Nesi momentu tará too claro y los demás (unidá, andecha, uras, pas, etc.) apartaránse como s’apartanon les augues pa que pasara Moisés (el bíblicu), y tola puxarra quitaráse d’en medio.
    Autocrítica TOA Y MÁS (tranquilu que yá se ta faciendo), con humildá y reconociendo y analizando tolo que se fixo mal y lo que nun se pudo facer meyor. Lo que pasó ye un desastre… pero d’ehí a aguantar les babayaes de miserables que yá amosaron lo que son no político y no personal… non. D’eso NADA.
    La culpa nun ye d’esa xente, claro que non, pero eso nun quier dicir qu’haya qu’aguantalos/vos… a dar la vara a casa-cristo.

  10. Yo animo tamién dende la mio persona a la xente de Unidá, equí teneis a un votante que nin va a mitines ni quier ir, pero que tien ilusión por Asturies y va siguir dando el so apoyu pa que Unidá tire palantre.

  11. “IU… por que ya va siendo hora d’una opción asturiana de verdá, que defienda un mou d’enfocar la realidá del país dende la esquierda”

    la bendita esquierda lleva desgobernandonos 30 anhos ,,, si la esquierda espanhola o non ,,,

    Unida resultame simpatica y tengo amigos dientro ,,, la solucion a los problemes d’asturies vien de lo que nunca probamos ,,, la lliberta .. non mas esquierda ,,, ya tuvimos bastante …

    saludinos

  12. Hum, llamar esquierda a según qué coses… 😉 D’otra manera, cuido que bien de ‘lliberales’ asturianos tan bien contentos col modelu d’Asturies que tenemos (Vigón, Abilio, los Cosmen, Alvargonzalez, Alvarez Cascos y los Masaveus… nun paez que-yos vaya mal). Lo que falta ye bon xacíu al gastar el dineru públicu, qu’entá nun se vio. De fechu, ya tan soltando la monserga de que’l Sespa ta pa la bancarrota…

  13. Equí ta otru d’esos votantes que nun va a mítines; y pa una vez que diba a acercame a ún, paso lo que paso…

    Agora lo que tocaría ye, si, facer autocrítica… pero hai que dase cuenta que el númberu votos nun ye una bona midía de lo que se pudo facer mal. En cantidáes pequeñes, una variación, que se yo, d’un 50% p’arriba o p’abaxo tampoco quier dicir ná; igual fue la mesma sensación de que pa estes elleiciones daba lo mesmo votar que nun facelo.

    Agora… p’alantre. L’Estatutu quieren tenelo pa enantes del branu y esa si que ye la nuesa guerra. Facer que salga bono o facer que nazca muertu y nun puedan aplicalu.

    Saludinos.

  14. El mayor problema que tenemos dende el nacionalismu asturianu ye que vivimos na cueva. Creemos cola única perspetuva de dentro la cueva que tamos faciendolo bien, porque ente nosotros nos animamos, nos atacamos, discutimos, falamos, pero, el problema ye la falta de presencia d’Unidá nel día a día. Posicionase na cai, nes asociaciones, con cartelos, hai de vender imaxe, la imaxe d’Unidá nun esiste na cai, naide mira a ver quien ta dando sofitu a una plataforma que pide esto a aquello, nun mos engañemos. La xente pa eslexir una oución, tien de plategasela anantes, y Unidá nun esiste. Pa cuntar dalgo nun val con que el nacionalismu militante vote, tamién el nacionalismu non militante, el que ye de sentimientu, pero nun busca les fontes. Esa presona que camina pela cai y vio cartelos de tolos partíos y nun se plategó la posibilidá de votar a Unidá porque nun tuvo la opción de facelo.

Responder a luis Encaboxar la rempuesta

La direición de corréu electrónicu nun va espublizase. Ríquense los campos marcaos con *