Lleo en El Comentario.tv que Tini Areces, esi presidente, ta acabante d’espublizar un discu. Ablucante. Paez que se trata d’un discu editáu por Ámbitu-L’Aguañaz empobináu pa la emigración asturiano. Y paez que trata d’averar un poquiñín de música del país p’acompañar la señaldá de los centros asturianos de perende. Pero non sólo eso, si non qu’el Tini Areces aprovecha pa unviar un saludín a esos miles d’asturianos que, dende la distancia, habrán de votar nes próximes elecciones autonómiques. Ye’l primer corte del discu, y pues sintilo calcando equí.
Ye otra vuelta más de tuerca n’esi enfotu tan espantible pola propaganda d’esti gobiernín nuestru del Construyendo Asturies, los Premios Príncipe, la TPA, les feries de muestres y la ¿publicidá? institucional descomanada. Una vuelta que lleva a Tini Areces al patetismu más ablucante, a un nivel tan baxo de dignidá que namás pue xenerar la risa si nun fuera porque los sos ‘pinitos’ discográficos pagolos yo. Y será por perres, que soi mui arrogante, pero esti disquín nun me da pola gana pagalu. Nun sé quién coyones asesora a esti home en temes propagandísticos, pero más-y valía metese a monxu, o monxa. L’efeutu qu’una ‘production’ d’esti tipu nun sé si será bultable ente la emigración, pero lo que ye en casa, sedrá de too menos positivo pa esti nuevu ‘monologuista’.
Cuido que coses como estes fain de El Comentario.Tv (ECTV) un espaciu indispensable pal internet asturianu, si nun lu hubiera tendríen d’inventalu porque, nun ye broma, esi espaciu (y en cierta midida otros, cierto) ta asumiendo les funciones que se-ys tendría de suponer a los medios de comunicación tradicionales, que dafechu yá van col pie cambiao. Por cierto, el fotomontax tamién ye de ECTV.
