Asturlinux y como fui a instalar Debian

D’un tiempu a esta parte vengo sintiendo crítiques dirixíes a Asturlinux, tachándolos de forma totalmente gratuita de nun facer nada. Sentí demasiaes veces la yá tristemente famosa frase de “Ye que faen unes xornaes de Software Llibre al añu y nada más”.

Yo yá empiezo a tar fartu de sentir estos argumentos vacios y qu’amuesen un desconocimientu total del trabayu desendolcáu por Asturlinux. Lo peor de too ye que normalmente estos comentarios vienen de xente que tan en casa ensin facer nada y que seríen capaces d’iguar tolos problemes del mundu… pero ye que nun tienen tiempu…

Puede que tengamos munches coses que criticar a Asturlinux, al fin y al cabo les asociaciones llévenles persones que, como toos, nun son perfectes. Pero de lo que quiero falar ye de la mio esperiencia personal con Asturlinux (y nun soi nin fui sociu).

Cuando por fín entró en mio casa un modem de 56 kb y pude coneutame a internet, pude lleer sobre GNU/Linux muncho más comodamente y más tiempu que los pocos ratos que podía parar nel cibercafé que taba delantre’l Lord Byron d’Avilés, y restolando pela rede acabes dando con Asturlinux, una asociación d’usuarios asturianos d’esti sistema que tanto me llamaba l’atención, tanto técnicamente,  como pol so sentíu éticu. Soscribime a la llista de corréu, y nun participé hasta que depués de tanto sentir les bondaes de “LA DISTRIBUCIÓN” la famosa Debian, entrugué si daquién yera a facilitame una copia d’esta distribución. Hasta entonces namás que fui a faceme con dalguna copia de revistes espcializaes (Mandrake, Suse y Red Hat) y la idea de baxar 5 CD col mio modem de 56 kb nun yera mui alentadora. En dos díes quedé con un sociu d’Asturlinux (creo que foi wikier, sicasí nun toi seguru) na estación de tren d’Uviéu y a cambiu de 5 cd virxenes conseguí una copia de Debian Potato (sería l’añu 2001), foi’l primeru d’un montón de problemes que m’aidaríen a resolver dende la, al mio entender, histórica asociación. Gracies a ellos conseguí echar a  andar per primer vegada el wifi del mio ibook en Debian ppc, o entendí lo que yera un script de shell… en gran midida son “culpables” de qu’agora yo seya un activista del Software Llibre…

Puede que de cara a la galería namás que ficieran unes xornaes (más qu’interesantes por cierto), pero lo cierto ye qu’Asturlinux contribuyó y contribuye a la difusión del Software Llibre n’Asturies como naide lo fizo hasta agora, yo personalmente como usuariu de GNU quiero dar les gracies a Asturlinux pol so llabor nestos 12 años.

El Bloque pidi negociar col Diablu

Esti día salió la noticia de que representantes del Bloque por Asturies entrugáren-y en Bilbao a  un representante de Microsoft por qué nun hai versión del so software n’asturianu. Y como quiera que’l mensaxeru de la multinacional a esi congresu de llingües minoritaries de Bilbao dixera que nunca se-yos ufriera la posibilidá de tornar al asturianu nada, el Bloque por Asturies anuncia agora que van pidir al Gobiernu asturianu que negocie con ellos una versión n’asturianu del so software. Y nós flipamos.

Flipamos, ente otres coses, porque la iniciativa vien d’una formacion que diz qu’apoya el software llibre… y empezamos a pensar que nun apoya el software llibre porque entienda’l so sentíu éticu, sinon pol mero fechu de que ta n’asturianu.

Tal paez que nel Bloque por Asturies nun se pararon a pensar por qué hai programes n’asturianu esclusivamente de software llibre y non de Microsoft o de Apple. Y nun ye porque haya un grupu xente enfotáu en facer tornes al asturianu de programes informáticos, que tamién. Ye porque existe un tipu de software que se puede modificar, copiar y distribuir llibremente (cobrando o de baldre), que se puede adaptar a les necesidaes de cada comunidá, que ye éticu, insisto, y que nun aspera a que un Gobiernín-y ponga millones d’euros MILLONES D’EUROS enriba la mesa pa entamar a tener versiones n’idiomes minoritarios. Nesti sitiu, por exemplu, cuenten cómo el Gobiernu vascu pagó más de 3,4 millones d’euros pa una primer traducción de Windows XP y de Office, cantidá que ye la que trescendiera, magar que se supón que ye enforma mayor.

L’argumentu del Bloque por Asturies ye que’l Principau yá gasta munches perres en llicencies d’usu de los programes de Microsoft, tantes perres como pa encamenta-y a la multinacional del Bill Gates a que torne al asturianu el so sistema operativu. Y, por supuesto, el señor de Microsoft que taba en Bilbao diba tar encantáu de qu’hubiere conversaciones nesi sentíu: empecemos polos más de 3,4 millones d’euros de 2004, más de tol montante del presupuestu autonómicu tocante al asturianu nesti 2010, qu’andaba na redolada los tres millones pa too (Educación, Cultura, sovenciones, obres pa la nueva sede de l’Academia… lo que se diz too).

Pero nun acaba ehí la cosa. Un alcuerdu d’esi tipu n’Asturies nun diba significar que’l software de Microsoft pasara a ser de los asturianos, como yá lo son Ubuntu, Open Office o Mozilla Firefox, por exemplu. Non. Los asturianos que quixeren usar el software de Microsoft n’asturianu diben tener que pagar, caún d’ellos, la correspondiente llicencia d’usu, amás de lo que ya pagaren previamente colos sos impuestos. Y como nun diba ser d’ellos, namás diben tener permisu pa usalu, tampoco diben poder modificar o iguar el software o les sos traducciones. Y esto ye asina, non porque lo diga yo, ye asina porque’l software de Microsoft, como’l d’Apple, nun ye llibre, ye privativu. Nun ye éticu. Nun se basa na idea d’adaptar el conocimientu existente  (GNU/Linux, por exemplu) a les necesidaes d’una comunidá (como l’asturfalante) y volver a ponelo a disposición de la comunidá (GNU/Linux n’asturianu).

Asina, cuido qu’un partíu políticu que de verdá tea pol software llibre, nun diba emprender aiciones que diben beneficiar namás a una empresa que ya de por sí gocia d’una situación monopolítica, sinon que diba facer tolo contrariu: empobinar aiciones en favor de que l’alministración asturiana dea pasos asemeyaos a los desendolcaos dende va años nes alministraciones extremeña, andaluza o valenciana por citar bien delles, y empiece a migrar a sistemes llibres. Non solo por aforrar costes o porque tean n’asturianu, que tamién, sinon porque son llibres.

Y amás, un partíu políticu que se considere asturianista nun diba tampoco emprender aiciones que diben beneficiar namás a una empresa multinacional monopolistica y a los sos satélites, sinon que diba facer tolo contrariu: empobinar aiciones en favor d’un modelu de desarrollu tecnolóxicu que favoreza a les pymes locales, nesti casu asturianes, que namás al traviés del software llibre pueden competir n’igualdá de condiciones énte quienes xueguen a práctiques que poco tienen que ver cola llibertá (tamién llibertá de mercáu) y la igualdá d’oportunidaes.

Por si daquién sigui con duldes, voi dexavos un videu twiteáu güei por Asturlinux nel que s’explica que, de lo que falamos, ye puro bon xacíu.

Ver el vídeu en Youtube

La ética del Software Llibre

Cuando falamos de Software Llibre frente al privativu tendemos a facer comparances téuniques, si Winbug$ ye una ponzoña, que si Mac O$ X ye mui “cool”, que si GNU ye o non dificil de remanar… pero solemos dexar de lláu (paezme que cada vez más) el sentíu éticu/ideolóxicu del movimientu.

Y ye precisamente esti aspeutu, al mio entender, l’interesante del Software Llibre, “ye qu’en Windows puedo xugar al Sims” ¿pero a qué preciu?, cuido que  ye importantísimu pal desenrrollu d’una sociedá crear una cultura del conocimientu y esto incluye  a la teunoloxía. Una vegada sentí a una moza dicir que “El software privativu ye a la sociedá del conocimientu, como el patriarcáu a la sociedá igualitaria”, y cuido que nun puede tar más acertada. El software privativu atesora el conocimientu y restrinxe les llibertaes de compartilu, d’estudialu y ameyoralu. Agora imaxina que’l inventor de la fabada nun compartiere la forma de preparala, y te prohibiere compartila col vecín porque namás que tienes permisu a tastiala, pero la fabada ye namái que del inventor y tú nun puedes modificala (adiós a les fabes con amasueles). Suena rídiculo ¿verdá? pues esto ye lo que pasa col software privativu.

Nun tamos falando de que quien desendolque software nun cobre por ello, sinon de que nun torgue l’accesu a “la receta”, a compartilu. El propiu Richard Stallman vivió de mercar copies d’Emacs.

Por eso anque téunicamente un software privativu seya meyor qu’ún llibre hai de refugar el so usu, porque falamos de llibertá y cuido que’l principiu de la llibertá ta (o debería tar) perriba la téunica.

Esti aspeutu de la llibertá ye mui claru con proyeutos de llocalización como l’asturianu, el tener accesu a una teunoloxía llibre permítenos modificala pa usala na llingua que nos pete. Hai unos meses coincidimos dalgunos miembros de Softastur con una académica de la Llingua, y mientres esplicávemos les distintes funcionalidaes d’Ubuntu interrumpiónos diciendo: “Nun me vender la moto, como si ye peor que lo que tengo, si ta n’asturianu ye lo que tengo d’usar por principios”, esti mesmu principiu éticu ye comparable al del Software Llibre. Tengo d’usalu porque ye éticu, y non porque seya meyor y/o de baldre.

Cuando falamos de Software Llibre falamos de sostenibilidá de verdá, munchos paises con pocos recursos tan consiguiendo informatizase y frayar la famosa “brecha dixital” gracies al Software Llibre, y ye que quiciabes esti movimientu -que xurde nos paises del primer mundu, principalmente colos proyeutos GNU n’EE.XX y Linux en Finlandia-, suponga la mayor tresferencia de propiedá intelectual de los grandes paises industrializaos al tercer mundu.

Otru aspeutu importante ye que nel Software Llibre munchos proyeutos apuesten por plataformes obsoletes (pa dalgunos) y minoritaries, colo que la llibertá yá nun ta namái que nel software, sinon nel hardware. Por poner un exemplu, toi escribiendo esti artículu dende un equipu que nun tien recursos suficientes pa correr Windows XP, esto implicaría que va años que o desfacíame d’él (normalmente pa la basura) o taría usando un Windows 98 ensin soporte nin aplicaciones nueves… pero gracies al Software Llibre (concretamente a Debian GNU/Linux) tengo un entornu  de trabayu agradable y modernu, puede que nun tenga “sombres espectaculares” nos iconos del escritoriu, pero puedo vivir ensin elles…

El poder estirar la vida de los equipos d’esta forma (aparte del aforru económicu) supón un amenorgue considerable de la basura que xeneramos, si tas a la escontra de que nos llanten una incineradora de basura n’Asturies… Software Llibre… ;P

Si esti sistema de reutilización (reutiliza enantes de reciclar) treslladamoslu a l’Alministración y organismos públicos, falamos de munchos millones d’euros… igual los suficientes como pa nun tener que facer recortes sociales nin a trabayadores, y nun ye una grandonada mia: La propia Microsoft, fala de que’l so volume de negociu n’España ye de 3.600 millones d’€uros, el principal cliente de Microsoft n’España ye l’Estáu y les comunidaes autónomes (sacante esceiciones como Extremadura y Andalucia), que pa comparar destinen un total de 3.209 millones a la educación… y con esto falamos namás que de software y non de tol hardware qu’hai que cambiar pa que pueda mover Windows 7…

Si crees que’l conocimientu tien de compartise pa progresar y ser una sociedá innovadora, si quies vivir n’asturianu, si yes verde o si te da perceguera’l consumismu nel que nos quieren meter les grandes multinacionales, usa Software Llibre, porque ye éticu.

Déxovos un videu d’una conferencia de Richard Stallman onde esplica los conceptos éticos del Software Llibre (castellanu):

Richard Stallman en Buenos Aires

Ordenador “vintage” (instalando’l sistema)

VER ENTAMU D’ESTI ARTÍCULU

Cuando yá tenemos la nuesa máquina preparada, lo primero ye instalar el sistema operativu básicu, nesti casu Debian Lenny (a día d’esti minimanual la versión estable) col sistema básicu.

Depués de baxar el discu d’instalación en rede, y quemalu nun cd (nun sistema GNU/Linux, calca col botón derechu del mur nel ficheru ISO y “grabar en discu”, en Winbugs tendrás d’usar programes complexos como’l nero o similar). Enxertamos el cd nel ordenador y arrancamos con el.

Si l’equipu nun arranca dende’l cd tendremos d’entrar na bios y configurala pa que busque nel cd enantes que nel discu duru (la bios varía según l’equipu).

Na primer pantalla tenemos les opciones d’instalación, podemos escoyer “Graphical install” pero falando d’equipos vieyos nun ye mui recomendable. Ponemos en “Install” y calcamos “Enter”.

Na primer pantalla pídinos la llingua, en Debian Lenny inda nun apaez l’asturianu (vendrá con Squeeze), polo que de momentu escoyemos “Spanish” y cuando te instalao cambearemos a asturianu.

Escoyemos la rexón na que tamos, nel mio casu “España” y el mapa de tecláu “español”.

Agora toca da-y un nome a la máquina, yo soi mui orixinal y nomela “PentiumII”…

El nome de dominiu, ye’l nome de la rede a la que vais conectavos… nel mio casu (y en xenereal) val con dexalu ermu.

Agora configuramos el reloj (qu’anovaráse dende un sirvidor d’internet) escoyemos entós la zona onde tamos (p’Asturies sería “Península”)

El siguiente pasu ye el particionamientu del discu, equí nun nos vamos complicar, namás que vamos tener Debian polo qu’escoyemos “Guiado – utilizar todo el disco” y siguimos a la siguiente pantalla (calcando enter) y escoyemos el discu que vamos usar, como namás tengo un escueyu el que sal…

Depués decimos como queremos ordenar los ficheros y vamos metelos toos na mesma partición, si queremos que los datos de los usuarios ten n’otra partición escoyemos la segunda opción.

Dicimos que fine’l particionáu y confirmamos pa que formatee.

Depués tendremos de configurar los usuarios, Debian tien superusuariu (root) que ye’l alministrador del sistema (tamién podemos instalar sudo pero personalmente nun me presta). Pedirános una clave pal usuariu root y que la confirmemos pa evitar ponela mal. Y depués configuramos el usuariu que vamos usar pa trabayar col equipu (podemos amestar los que queramos en acabando la instalación), ponemos nome y apellíu, nome d’usuariu y clave.

Agora vamos configurar los sirvidores que queremos usar pa baxar el software que queremos instalar, saldrános “España” marcao, pero la conectividá española ye pa llorar polo que recomiendo escoyer “Francia” y depués marcamos el espeyu que vamos usar, yo marqué’l primeru del llistáu “ftp.fr.debian.org”.

Si sales por un proxy podrás configuralu n’esti pasu, si nun uses proxy o nun sabes de lo que toi falando déxalu ermu y calca “Enter”.

Entrugarános el sistema si queremos unviar datos anónimos de les aplicaciones instalaes, esto ye un tema personal, yo marco que sí porque cuido que ye importante aidar a los desendolcadores a ver les prioridades d’usu de les distintes aplicaciones.

Agora entrugarános que tipo de sistema vamos instalar “Entorno de escritorio”, “Servidor web”, etc… nesti casu marcamos namás que “Sistema estándar” que vien con les aplicaciones mínimes pa trabayar en modu testu, así podremos optimizar al máximu el sistema. Pa marcar/desmarcar les opciones, ponemonos coles fleches enriba de la opción y calcamos la barra espaciadora, si tien un * ye que t’activáu pa instalase. Calcamos en continuar.

Unos minutinos depués entrugarános pa instalar GRUB (xestor d’arranque) diciendo que nun dió con más sistemes operativos (nun los hai polo que ye normal) aceptamos.

Cuando acabe, sacará el cd (quitamoslu) avisará de que acabó, le dicimos que continue y reaniciará…

Yá tenemos el sistema base pa trabayar, pero enantes vamos anovar el software instaláu (si hai versiones nueves), pa esto cuando arranque tendremos una pantalla negra con testu blacu que da munchu miedu y vemos que abxu del too pon

nomelamaquina login:_

Equi ponemos “root”  (calcamos “enter”) y pediranos la clave del superusuariu, nun aparecerá en pantalla nada mientres escribimos la clave, ponemos la clave y “enter”.

agora que tamos coneutaos vamos anovar el software a la versión más moderna

$ aptitude update

$ aptitude safe-upgrade

Cuando acabé, ya tenemos el sistema base preparáu pa entamar a instalar les aplicaciones que nos interesen.

Ordenador “vintage” (entamu)

Con noticies como la que salió en Ta pa Ponga el pasáu día 2, póngome malu, y nun entro a valorar ya temes de posibles corrupciones o chanchullos pa dar perres o devolver favores a amiguinos, sinon que tan machacándonos col tema de reciclaxe (perimportante, nun me interpretar mal) pero tiren equipos más potentes que’l mio “maquinón” habitual a la basoria con tolos problemes que ta xenerando estos materiales…

Ente la noticia y que un compañeru de trabayu regalóme un tecláu que nun necesitaba (ye conocía la mio afición pol trashware) despertóme otra vuelta les ganes por caciplar con máquines vieyes, y decidí montar un sistema operativu con entornu gráficu, fácil d’usar, n’asturianu (por supuestu) y que tenga aplicaciones básiques como navegador, mensaxería instantanea, editor de testu, etc… pero que trabaye nel equipu más vieyu que fuera capaz de montar colos componentes que tengo en casa…

Al final lo más vieyu que pude usar ye’l mio primer PC… un Pentium II a 350Mhz de fai 12 años, llamentablemente dalgunes coses col pasu del tiempu y del usu nun funcionaben, y al final quedó una máquina más potente de lo que me prestaría… pero yá tengo apallabráu un 386… 😀

Tol procesu d’instalación del software y configuración voi dir describiendolo en unos pequeños artículos lo más clara y detalladamente posible, sicasí pa esta guía ye recomendable unos mínimos conocimientos de sistemes GNU/Linux. El procesu de montaxe del hardware nun voi esplicalu, pero la máquina cola que vamos trabayar ta compuesta de:

-Pentium II a 350 Mhz

– Disco duru de 10 Gb (l’orixinal que cascó yera de 6 Gb valdríanos igual, esti ye rescatáu d’otru equipu vieyu que tenia la mio prima)

– Memoria RAM 256 Mb (tamién del equipu de la mio prima, pero colos 64 Mb orixinales trabayaríemos igual)

– Llector de dvd y grabadora de cd (rescatáu d’equipos d’un compañeru de trabayu)

– Disquetera de 5¼ (del equipu orixinal)

-Tarxeta de soníu Sound Blaster, estereu, entrada de micro y llinia (orixinal del equipu)

-Tarxeta de videu Nvidia de 32 MB (yera la que usaba hasta va pocu nel equipu col que trabayu normalmente, pero regalaronme una de 128MB y tenía esta parada… con tarxetes más básiques tamién valdría…)

-Tarxeta de rede (rescatada del equipu de la mio prima tamién…)

Realmente de too esto sobraríennos munchos componentes pa poder trabayar, pero tamién podemos sacar más provechu al equipu.

El siguiente pasu ye instalar el sistema operativu, y voi usar Debian Lenny (estable) por dos motivos, los cambeos de versión son más espacios nel tiempu que nel casu d’Ubuntu, y porque cuando tenga qu’anovar la versión nunca me dió problemes con Debian pa facelo dende Internet… mientres qu’Ubuntu dalguna vez fizo coses rares.

El procesu d’instalación vamos dexalu pa otru artículu pero vamos dir baxando el calcu del cd pa grabalu, n’esti casu ye el discu d’instalación por rede o “netinst” (porque nun vamos necesitar Gnome nin les aplicaciones habituales d’un escritoriu).

ÍNDIZ:

  1. Instalando’l sistema

Microsoft quier acabar col llibre mercáu

La corporación estaunidense de productos informáticos de baxa calidá Microsoft, ta acabante de confirmar, otra vuelta, los sos planes p’acabar col llibre mercáu y controlar la totalidá de los ordenadores que se vendan nel mundu. L’anunciu féxolu la presidenta de Microsoft Ibérica, María Garaña, durante l’apertura de la feria SIMO, en Madrid. Sigún recueye el diariu Soitu na so crónica, “A la pregunta de cuántos sistemas operativos pensaban vender en España, Garaña respondía que esperaban un Windows 7 en “todos” los ordenadores nuevos”.

Esa pretensión taría afitada en qu’el so sistema operativu nuevu agora tamién sería capaz de furrular nos ‘netbooks’, nos qu’anguañu namás les distintes distribuciones de GNU/Linux son les úniques capaces d’aprovechar toles sos capacidaes. Eso sí, los ‘alcuerdos comerciales’ zarraos por Microsoft colos fabricantes d’estos equipos ultraportátiles yá faen que la mayoría d’ellos se vendan col Windows XP, llanzáu pola empresa en 2001, en cuenta de la versión Vista, entá más insegura y poco operativa que l’anterior.

Pese a les condenes por vulneración de la competencia, Microsoft anecia nos sos alloriaos planes de dominación del mundu gracies a unes estratexes de márketing ya influencia política que-y permiten afitar la so posición…pel momentu.

Nesta semeya vemos al principín xugando con una pantalla multitáctil nel espositor de Microsoft en SIMO. Dicen que ta furrulando con Microsoft Surface, la ferramienta de la empresa pa mover semeyes nuna pantaya… pero equí podéi ver lo que va más de dos años se facía ya con GNU/LINUX!!! (Pronto disponible n’asturianu ḥeḥe)

Big Buck Bunny

Big Buck Bunny ye’l titulu del segundu cortu d’animación del Orange Open Movie Project, proyeutu de la Fundación Blender que produz películes con llicencies llibres y usando software llibre.

Tanto nel so primer proyeutu, Elephants Dream, como nel que tan acabantes de presentar ficeron usu intensivu de ferramientes como Blender, Gimp o CinePaint… y por supuestu en plataformes GNU/Linux.

Dende la so web podéis descargar la película o collaborar mercando’l dvd, la llicencia pa esti proyeutu ye Creative Commons by-3.0.

Ver el vídeu en Youtube

Tecláu n’asturianu pa xkb

teclau_ast.png

Acabo facer una distribución pal tecláu con soporte pa ḥ y ḷḷ. Como lleva un tiempu ente que mando los nuevos ficheros de configuración y demás, equí vos pongo una chapucina pa los que nun queráis esperar.

Namás que ta probáu n’Ubuntu, espero que vos sirva.Lo primero ye baxase (calca col botón drechu y guardar como) el ficheru del tecláu y el del llistáu de distribuciones (esti últimu pesa casi 1 mb).

Lluéu hai que copiar el tecláu al direutoriu /usr/share/X11/xkb/symbols/

$ sudo mv es /usr/share/X11/xkb/symbols/es

y el llistáu a /usr/share/X11/xkb/rules/

$ sudo mv base.xml /usr/share/X11/xkb/rules/base.xml

Y p’acabar vamos al menú Sistema>Preferencias>Teclado

Na pestaña Distribuciones y col modelu de tecláu en “PC genérico 105 teclas (intl)”

Calcamos el botón añadir, nel menú “Capas” marcamos España y nel menú variantes marcamos l’asturiana y calcamos añadir, seleicionamos como predetermináu la distribución asturiana zarramos la ventana y llistu.

Pa poder escribir ḥ calcamos Alt Gr + h pa escribrir Ḥ Alt Gr + Shift + h y pa la ḷ Alt Gr + l y pa la Ḷ Alt Gr + Shift + l

ACTUALIZACIÓN: Tan acabantes d’aceptar el parche en freedesktop, na versión siguiente (mañana) de cvs ya tará soportáu, y pa les prosimes versiones de les distintes distribuciones de GNU/Linux ya deberíen incluilo.

GNU/Linux nes escueles ruses… nun se yo…

Ayer salió la noticia de que’l Gobiernu rusu quier tener GNU/Linux en toles máquines de les escueles del país pal añu 2009. Falen de que van usar la distribución rusa AltLinux y que entamrán a facer pruebes nel oblast de Tomsk, nel krai de Perm y na república de Tataristán en 2008.

Va tiempu que dexé d’allegrame por estes coses, y ye que d’un tiempu p’acá toi fartu de sentir grandes campañes gubernamentales pal usu adaptación y promoción del software llibre que al final acaben en papel moyáu y en contratos “muchimillonarios” cola empresina de Bill Gate$. Vamos que da la sensación de que faen estos anuncios pa llamar l’atención de Micro$oft y conseguir un descuentín (o un maletín).

Yo entá puedo entender (anque cuesta) que un usuariu perezosu por nun cambiar siga pagando la llicencia d’usu del Window$, pero cuando falamos de empreses y organismos públicos, que cuenten con personal pa facer mantenimientu de los equipos, el fechu d’usar aplicaciones privatives ye una amuesa de la so incompetencia xestora.

Y nun falo por falar, iniciatives como la de la Xunta d’Estremadura amuesen que’l apueste pol software llibre trae munchos más beneficios, y nun solo económicos, que’l privativu.

Ubuntu Tribe, the movie

Ubuntu Tribe, un garrapiellu de xente enfotada en da-y puxu al euskera al traviés del software llibre ta acabante d’asoleyar el trailer de lo que sedrá ‘Ubuntu Tribe, the movie’, un proyeutu de mediumetraxe col que difundir el so trabayu al empar del usu de llicencies llibres y el llabor n’andecha pala creación y difusión de la cultura y el desendolcu de ferramientes informátiques.

Ver el vídeu en Youtube