Aforrando cobre

Voi esplicar una idea, por si sirve pa alguien más, pa nun tener que tirar otru cable pa llevar el teléfonu de la sala a una habitación ente les que yá hai un cable de par trenzáu  FTP (nun confundir col protoculu de rede “File Transfer Protocol”) o lo comunmente llamamos cable de rede.

Los cables de rede corrientes tienen 4 pares de filos, y en redes Gigabit necesitamos los 4 pares, sicasí lo normal nes redes doméstiques ye que los equipos como muncho ufran 100BASE-TX (100 Mbps) y nesti casu namás que usamos 2 pares. La idea ye usar ún de los otros dos pares pa unviar la llinia telefónica (1 par).

Como el cable ente la sala y la habitación yá ta fechu, y nun sá si dalgún día tendré equipos Gigabit, opté por facer un par de adaptadores a cada estremu.

Usaré la norma 568A

Los datos de rede viaxan pelos filos: blanco verde, verde, blanco naranxa y naranxa. Quedando llibres: blanco marrón, marrón, blanco azul y azul. Yo usaré el par d’azules pal teléfonu (los marrones queden llibres).

Anduvi a la gueta d’una fema de RJ45 aérea pero nun di con ella polo que merqué una base de superficie, con esta base un cable telefónicu (2 filos), otru de rede (8 filos, anque valnos con 4), un machu RJ11 y otru RJ45 ponémonos a ello.

wpid-DSC00322.jpg

Primero facemos les conexones na base de superficie cola fema pal RJ45 usando les conexones que corresponderíen al par d’azules, y depués coneutamos el cable de rede (dexando llibre el par d’azules y si queremos el de marrones, anque yo coneutelos). Pa estes conexones miraremos les indicaciones del fabricante pa identificar los pines.

Depués nel cable telefónicu crimpamos el RJ11 (los dos pines centrales) y nel de rede el RJ45 siguiendo la norma. Otra opción que valdría pa los que nun tengan crimpadora ye usar cables fechos y corta-yos una de les cabeces pa depués facer les conexones na base.

Y así ye como queda la cosa:

wpid-DSC00326.jpg

Repetiremos el procesu pa facer el segundu adaptador, y empatamos tolos cables como nesti esquema:

esquema

Y fechu, aforramos d’andar furando (más) paredes…

水书法器 (Somos chinos ¿non? #3)

Na China, o polo menos en Beixín, ente toles actividaes que desendolquen nos parques públicos, tienen el vezu de dir con un calderu d’agua y un pincel enorme y ponese a practicar caligrafía.

Un home practicando la so caligrafía a la entrada del parque Beihai (北海公園) en Beixín
Un home practicando la so caligrafía a la entrada del parque Beihai (北海公園) en Beixín

Pero que pasa cuando xuntes caligrafía china con agua, una bici de carga, un pocu d’electrónica, otru pocu de fontanería y el software adecuáu… pues aparte de que la llinea ente lo friki y lo artísticu ta más borrosa, damos col últimu proyeutu de Nicholas Hanna, un arquitectu canadiense de 30 años reconvertiu n’artista multimedia asitiau na capital china. Déxovos un videu qu’amuesa la idea, sicasí na web de Nicholas teneis un videu más llargu (n’inglés) esplicando la movida y otros proyeutos mui chulos tamién…

Ver el vídeu en Vimeo

Ordenador “vintage” (entamu)

Con noticies como la que salió en Ta pa Ponga el pasáu día 2, póngome malu, y nun entro a valorar ya temes de posibles corrupciones o chanchullos pa dar perres o devolver favores a amiguinos, sinon que tan machacándonos col tema de reciclaxe (perimportante, nun me interpretar mal) pero tiren equipos más potentes que’l mio “maquinón” habitual a la basoria con tolos problemes que ta xenerando estos materiales…

Ente la noticia y que un compañeru de trabayu regalóme un tecláu que nun necesitaba (ye conocía la mio afición pol trashware) despertóme otra vuelta les ganes por caciplar con máquines vieyes, y decidí montar un sistema operativu con entornu gráficu, fácil d’usar, n’asturianu (por supuestu) y que tenga aplicaciones básiques como navegador, mensaxería instantanea, editor de testu, etc… pero que trabaye nel equipu más vieyu que fuera capaz de montar colos componentes que tengo en casa…

Al final lo más vieyu que pude usar ye’l mio primer PC… un Pentium II a 350Mhz de fai 12 años, llamentablemente dalgunes coses col pasu del tiempu y del usu nun funcionaben, y al final quedó una máquina más potente de lo que me prestaría… pero yá tengo apallabráu un 386… 😀

Tol procesu d’instalación del software y configuración voi dir describiendolo en unos pequeños artículos lo más clara y detalladamente posible, sicasí pa esta guía ye recomendable unos mínimos conocimientos de sistemes GNU/Linux. El procesu de montaxe del hardware nun voi esplicalu, pero la máquina cola que vamos trabayar ta compuesta de:

-Pentium II a 350 Mhz

– Disco duru de 10 Gb (l’orixinal que cascó yera de 6 Gb valdríanos igual, esti ye rescatáu d’otru equipu vieyu que tenia la mio prima)

– Memoria RAM 256 Mb (tamién del equipu de la mio prima, pero colos 64 Mb orixinales trabayaríemos igual)

– Llector de dvd y grabadora de cd (rescatáu d’equipos d’un compañeru de trabayu)

– Disquetera de 5¼ (del equipu orixinal)

-Tarxeta de soníu Sound Blaster, estereu, entrada de micro y llinia (orixinal del equipu)

-Tarxeta de videu Nvidia de 32 MB (yera la que usaba hasta va pocu nel equipu col que trabayu normalmente, pero regalaronme una de 128MB y tenía esta parada… con tarxetes más básiques tamién valdría…)

-Tarxeta de rede (rescatada del equipu de la mio prima tamién…)

Realmente de too esto sobraríennos munchos componentes pa poder trabayar, pero tamién podemos sacar más provechu al equipu.

El siguiente pasu ye instalar el sistema operativu, y voi usar Debian Lenny (estable) por dos motivos, los cambeos de versión son más espacios nel tiempu que nel casu d’Ubuntu, y porque cuando tenga qu’anovar la versión nunca me dió problemes con Debian pa facelo dende Internet… mientres qu’Ubuntu dalguna vez fizo coses rares.

El procesu d’instalación vamos dexalu pa otru artículu pero vamos dir baxando el calcu del cd pa grabalu, n’esti casu ye el discu d’instalación por rede o “netinst” (porque nun vamos necesitar Gnome nin les aplicaciones habituales d’un escritoriu).

ÍNDIZ:

  1. Instalando’l sistema

Maquinines vieyes soviétiques

Esti mediu GyG puede que te rozando’l sindrome de Dióxenes cola so afición a les máquines electróniques vieyes… y ye que toi acabante de sumar una maquinina más a la coleición, gracies a un prestosísimu regalu del otru mediu GyG y siñora, en concretu la maquinina soviética Becëльiй Пobap de la casa Электроника.

maquinina_elektronika

Электроника yera una marca de productos electrónicos de la vieya URSS que facién, ente otres coses, relós, despertadores, ordenadores y componentes informáticos de tou tipu, equipos de soníu…

Pero quiciabes lo más famosu seyan les calculadores que entamaron a fabricar al rodiu de 1968. Facíen dende les más simples calculadores pa guaḥes nos colexos a les máquines más complexes dedicaes al estudiu científicu con capacidá pa ser reprogramaes.

Dientru de les técniques qu’usaba Электроника pa desendolcar los diseños de los sos productos destacaba la inxeniería inversa, aplicada especialmente a productos d’orixe xapones. Y frutu d’esta técnica aplicada a les famosísimes Game & Watch de Nintendo xurde una gama de maquinines pal entrenimientu de los guaḥes de los paises del bloque soviéticu. Gracies a que un d’estos guaḥes yera más cuidadosu que los GyG cola so maquinina “Rain Shower” (que anque entá furrula, ta fecha un cristu) güei podemos esfrutar d’esta pequeñina ayalga a piles de botón…

game_watch_rain_shower

¿Qué ye pa ti un ordenador vieyu?

falé en Ta pa Ponga de la manía que tengo de reciclar equipos informáticos y busca-yos otru usu cuando, supuestamente, ya nun sirven (“el winbugs nun tira, voi cambiar d’ordenador”).

Esti recilaxe ye en realidá motiváu por una necesidá, que yera tener na habitación onde duermo un ordenador prendíu 24 hores. Necesitaba un equipu silenciosu (pa poder domir sin ruidos de ventiladores) y que gastase poco. Pos la solución llegó de dos bonos amigos que me regalaron un vieyu portatil que usaben pa un proyeutu que rastrea semeyes del espaciu (nun m’enteré mui bien prometo entrugar, que ye cosa bien friki).

¿Qué pa que quiero un ordenador funcionando 24 hores? pa distintes coses. La primera ye que necesitamos un servidor onde poder probar los desendolcos que facemos pa Altuxa.com pero ya que tamos… vamos aprovechalo. González y González tamos separtaos físicamente por unos cuantos quilometros y que meyor forma de compartir documentos que tener un servidor ftp priváu en casa… pero hai más… préstame abondo la música, pero soi mui vago, y eso de carretar cds da pereza… solución… un servidor priváu de streaming de audiu, así puedo escuchar la mio música favorita nel pc, nel portatil, nel trabayu o en sitios con wifi abiertu… pero vamos esprimilo más… aMule daemon ye un aMule ensin entornu gráficu y que puedo controlar dende una web… 24 hores de mula nun ta nada mal…

Yá sabeis pa que queremos el aparatu… El portatil en cuestión ye un Pentium II con 64mb de RAM, 4,8 Gb de discu duru, cola pantalla reventada, ensin batería y ensin tarxeta de rede.

¿Como solucionamos estos problemes? Sigui lleendo ¿Qué ye pa ti un ordenador vieyu?

Cumpleaños d’ocho bits

Esti pequeñu aparatín foi’l primer ordenador que pasó poles mios manes, y el pasáu día 23 cumplió 25 años. Güei paez ridículo falar d’un ordenador con un microprocesador de 3,5 MHz y una RAM de 16K, el nuesu modelu yera de 48K, más otros 16K de ROM, pero la verdá ye qu’esta pequeña máquina, que mio güela-y regaló a mio hermanu cuando yo tenía 4 años, enchufada a un televisor y un radiocasete, valiónos pa hores y hores d’entretenimientu y permitiónos ponenos en contautu cola incipiente industria informática doméstica. Dende 1985 hasta qu’en 1993 dexó de furrular en condiciones y mio ma decidió tiralu a la basura cuando los mios collacios ya teníen eses maquinones nomaes 386, foi’l principal entretenimientu electrónicu de mio casa.

Angüaño conservo un modelu de 128K que foi nomau ZX Spectrum+ y que tien compatiblidaácoles cerca de 60 cintes magnétiques de software que conservamos, programaes pa 48K. Amás sirvionos de tituladora de video improvisada (el testu amosau en pantalla ye igual que’l teletestu).

¿Por qué falo güei d’esto?, nun se realmente porqué, quiciabes seya porque incoscientemente dende guah.e toi atraido por esti tipu de maquinines y nun se si por ecoloxismu informáticu me niego a almitir qu’un equipu ya nun val por que lo diga Micro$oft, afotunadamente Linux permite prorrogar la vida d’equipos vieyos. Y coses que pa mio pa son mui modernes (hai que tener en cuenta que los de la so edá conocieron la televisión con casi 20 años) pa min son recuerdos de la infancia… el ZX Spectrum cumple 25 años, yo acabo cumplir 26…

LOAD “”

Ver el vídeu en Youtube

Ubuntu Studio, llibertá empaquetada.

Ubuntu Studio

Ubuntu Studio quiciabes seya el productu qu’espero dende fai más tiempu con gran impaciencia, y ye que pa los que trabayamos con audiu y/o vídeu, o bien soltamos perres asgaya pa mercar unos productos que pa enriba creen dependencies, o ponemonos delantre d’un ordenador durante hores pa configurar y compilar les aplicaciones que necesitemos pal desenrollu de los nuesos proyeutos.

Anque en cuantes a edición de vídeu (y nun falo de modeláu y animación 3D) les posibilidaes dende GNU/Linux son llimitaes ya que aplicaciones como Final Cut tan a años lluz de les disponibles pal sistema del pingüinu, nel casu del audiu ya podemos falar de coses más series y competitives. Aplicaciones como Audacity, Rosegarden, Ardour, Wired, Linux Sampler, etc, y ya nun falemos de proyeutos tan importantes como los qu’entama la Fundación Xiph.org (creadores de vorbis, theora y ogg entre otros). Tou esto montáu enriba d’ALSA permiten trabayar col soníu de forma profesional pero claro ta, problemes… primeru ta el tema de facer les instalaciones (acabes fartucu de compilaciones) y lluéu configuralo too pa que furrule como debería, a día de güei ye un trabayu de chinos y lleva la de Dios de tiempu, amás d’esto ta el problema perconocíu del prauticamente soporte nulu que dan los fábricantes de hardware especializáu necesariu pa estos procesos.

Pos bien, a lo que diba, pal próximu mes d’abril anuncien la primer versión d’Ubuntu Studio, anqué ya hai versión nos repositorios oficiales en forma de paquetes instalables sobre Ubuntu. Tamos falando d’una distribución nueva basada n’Ubuntu que bien preparada y orientada pa la edición y composición d’audiu, videu, medios impresos (fotografía, ilustración y maquetación) y modeláu y animación 3D. Si bien tanto el tema gráficu y 3D ya ta bien superau pa cualisquier distribución GNU/Linux d’aguaño (namai hai que ver les grandes produciones “Hollywoodiegues” que tiren de productos como CinePaint o Blender), esta ye la primer distribución que va facilitanos el trabayu col audiu dixital y más p’alantre enfotarse col videu.

Ye una comunidá acabante d’entamar y ya tien dellos collaboradores, anque enta hai trabayu que facer. D’otra mena, y ya toi especulando, el fechu de que empreses tan importantes como NVIDIA, HP o Intel, por nomar unes poques, tean detrás d’un proyeutu tan interesante como ye Jahshaka, faime ser optimista en cuantes al futuru de la creción de multimedios con GNU/Linux.

Un pocu d’esperanza con Sony…

Nunca entendí les postures comerciales de Sony que siempres van a la escontra lo que paez llóxicu. Cagola col Betamax siendo esti un sistema munchu meyor que’l VHS pola so negativa a la comercialización del sistema por parte d’otres empreses.

Anguaño pa poder pasar música al mio Sony net MiniDisc en formatu comprimíu teo que facer usu de ReactOS porque a los señoritos no-yos apetez facer versiones pa MacOS X nin pa GNU/Linux nin muncho menos lliberar l’especificaciones pa que otru pueda facelo si quier.

Reconozo que de siempres prestaronme les consoles de Sony, anguaño tengo la PlayStation2, cumplen la so función y tienen milenta xuegos, pero d’unos meses paca tamién reconozo que la Nintendo Wii ganó munchos puntos ya que de les tres consoles de nueva xeneración (xBox 360, PlayStation3 y Wii) ye la única que aporta coses nueves (amás aporta munches).

Pero resulta que los de Sony sabiendo que la competencia ye dura (y nun falo de la consola de Microsoft…) sacase un as de la manga cola noticia de que incluirá de serie na nueva versión de PlayStation el sistema operativo Yellow Dog Linux, una distribución GNU/Linux que los usuarios de PPC conocemos ya que ta especialmente orientada a este tipu d’arquitectures, anque yo uso Ubuntu pal mio pequeñu ibook. Lo que nun se, ye como será esa versión 5.0 de Yellow Dog, nun aclaran muncho na páxina, anque lo que paez evidente ye que más que d’una consola tamos falando d’un ordenador de salón… a ver como respuende Nintendo…