Esperances

Na película d’Almodóvar ‘Laflor de mi secreto’, el personaxe de Marisa Paredes, depués d’aferrase a cualisquier detalle pa caltener esperances de siguir al lláu del so home (Imanol Arias) pesie a que él nun y fai casu nengún, acaba por entruga-y: ‘¿Existe alguna posibilidad, por pequeña que sea, de salvar lo nuestro?’. Él y responde llueu y firme: ‘Non, nenguna’.

L’asturianismu ye como’l personax de Marisa Paredes. Enfótase nun amor imposible que-y da de lláu una y otra vegada. Nun hai esperanza pa ella, magar que ella nun lo ve… pero la realidá ye testerona.

La realidá ye que l’asturianismu nun ye quién a facese ver, a amosase como una opción ‘sensata’ pa apurrir el so puntu de vista sobre’l mou d’enfocar el país. Y nun va ser quién a ello en munchu tiempu como nun se faiga una reflexón cola suficiente fondura. Hai que tomar aire. Parase un momentu a pensar por qué pasa lo que pasa y ufrir llueu respuestes a la xente. ¿Qué problemes esmolecen de verdá a los asturianos? ¿Qué ye lo que ofrez el nacionalismu pa resolver esos problemes? ¿Son soluciones posibles, averaes a la rialidá social, económica y cultural del país, y al tiempu estremaes de les del PSOE, PP o IU, o meros ‘brindis al sol’ y declaraciones d’intenciones que nun aguantes el primer asaltu de ‘realpolitik’, que ye lo que manda?

Sicasí, esperances hailes. Echando una güeyada a lo que hai n’otros países del nuesu entorno vense procesos de reconversión del nacionalismu, procesos que permitieron a esta corriente afitase como una fuercia social y política bultable. El caso gallego habría de ser un exemplu p’Asturies por bien dellos motivos. Magar que mos lleven sesenta años de ventaxa, el procesu de tresformación del nacionalismu nuna fuercia relevante féxose de trenta años p’acá, pero se fizo.

N’Andalucía, l’andalucismo tien tamién una traxectoria histórica relevante dende Blas Infante, pero ensin llegar tener el pesu de los nacionalismos gallegu o canariu, y munchu menos el catalán (lléase ‘paísos…’) o vascu, tien anguañu una base social importante dende la qu’entamen a construir un nacionalismu d’izquierdes y superar una crisis orixinada por guerres personalistes, fundamentalmente.

N’Aragón, el rexonalismu más o menos ranciu del PAR enfréntase de tú a tú cola Chunta Aragonesista, una opción que a base de renunciar al nacionalismu (defínese federalista) y d’amosase como una forma nueva d’entender la esquierda n’Aragón (con un cabezaleru de renome y prestixu, como Labordeta), acabó por desaniciar prácticamente del mapa políticu aragonés a Izquierda Unida.

L’exemplu aragonés (y en cierta midida l’andaluz) foron, quiciaves, l’espeyu nel que se miró la nuesa Izquierda Xunida pa entamar un xiro nes sos posiciones y tratar de fagocitar el discursu nacionalista n’Asturies. Yera supervivencia, pero tevo consecuencies, y tamos viéndoles agora, pola rocea de los comunistes a que prime el discursu asturianista-socialista énte la esencia comunista de la formación.

El caso ye que dalgo hai que cambiar. Izquierda Unida tendrá que componese, y fadrálo nestos cuatro años de xuru. PAS, Unidá, AA y quien seya, tamién… pero lo que ta claro ye que nun ye cosa d’axuntase sin más. Hai que ufrir dalgo a la sociedá, y tien que ser nuevu, serio y capaz, y amás, paecelo. Y toos tendremos que poner el güevu… nun val dicir y quedar en casa.