Nun se podía esperar otra cosa. Siendo realistes. Entá nun tamos tan maduros n’Asturies como pa cambiar el votu como fixeron en Méxicu, y ellí costó-yos cásique setenta años. Asturies ye un país avieyáu, nel que la mayoría la xente entá vota pensando na Guerra Civil y los maquis, que son socialistes como del Sporting, hasta la muerte, y aunque tea en segunda ‘regional’. Asina, nun se pue esperar un cambiu, un vuelcu electoral curiosu, y menos cuando les coses tan como tan ente la COPE y la Ser.
Lo que sí tien más miga ye la ‘burbuxa’, esa especie de país microscópicu en dentro d’un país minúsculu que ye l’asturianismu. Estes elecciones, pesie a lo que digan munchos, nun son de fracasu. Y nun lo son porque naide podía esperar otra cosa… salvo quienes confiaronlo too a la carta Uras-Pas. La cosa ye que tamos como tábamos, anque con un mínimu d’esperanza si de verdá hai ganes de facer daqué. Y voi desplicame darréu…
L’asturianismu presentábase a les elecciones xebrao en delles sigles que conformaben una auténtica sopa de lletres. IU-BA-LV, URAS-PAS, Unidá (AA, con perdón,-IAS-LVGV) y AA. Agora vamos por partes.
IU-BA-LV: perdió 25.000 votos de los 77.000 qu’algamó en 2003. Les razones foron clares, d’una banda, perdiólos pola división comunista que nun entiende que se desdexen les tesis comunistes ‘en favor’ del asturianismu. De la otra, perdió votos asturianistes polos incumplimientos de los sos compromisos y pola incapacidad pa frenar l’apisonadora del PRI. Toos esos votos foron, o pa Ciudadanos pola Izquierda-Izquierda Republicana-PCPE, o pa Unidá, o quedaron en casa. No que nos toca, l’asturianismu de IU-BA-LV tien agora cuatro años pa demostrar que dafechu son la fuercia asturianista posible, que cumpla coles espectatives de esi sector de la sociedá que nagua por dir viendo les coses d’otra manera, y non solo no tocante a la llingua, que tamién.
URAS-PAS: Si d’esta nun reconsideren la so estratexa, tienen menos futuru que Democracia Nacional. Los resultaos algamaos pola coalición dexen claro que la xunión de Marqués y Xuan Xosé foi contra natura. Atrévome a dicir equí que la mayoría de sus 13.000 votos-yos llegaron de la base electoral del PAS, y que Uras viviera hasta les últimes elecciones del votu descontentu del PP, de onde de fechu xurdió. Esa base de los de Marqués perdiéronla darréu que s’afitaron na estaya del asturianismu, y esi orixe ‘peperu’ de Uras prevocó además el refugu de un asturianismu más d’izquierdes a la coalición. Resultáu: cero zapatero: Uras ta condergada al desanicie, y el Pas tien que se refundir dando-y a Xuan Xosé una salida digna, como presidente honorariu, por exemplu.
UNIDÁ: Foi la opción pola qu’apostamos n’esti blogue dende que se diera a conocer, y los sos resultaos anduvieron averaos a lo que esperábemos (calculábemos ente 4.000 y cinco mil votos). Nun se podía esperar más. Taba claro que a UNIDÁ namás diben vota-y asturianistes ‘bien informaos’. Esto ye: xente que llee Les Noticies, Asturies.com y Asturnews y que siente Radio Sele. Nel restu de medios la so presencia foi nula. Lo más bultable, quiciaves, foi una entrevista a Inaciu Llope na seición de partíos friquis na que’l candidatu amosó la so ‘bisoñez’ retrucando a una pregunta con mui mala baba alrodiu de les similitúes ente Unidá y Batasuna. (Nesti mundu, un políticu tien que pensar mal y ser más puta que’l periodista que te tien ganes. A preguntes incómodes, se responde con evasives, a entrugues ‘impertinentes’, se retruca con otra pregunta y que lluéu encaxe’l titular como puea). El casu ye que nel diariu de mayor tirada, el que más espacio-y dio a Unidá en tola campaña, el titular yera “No nos parecemos a Batasuna ni a ningun otro partido”, colo que’l periodista ‘puta’ yá llogró lo que quería. ¿Ye Ovidio el Franco asturiano? o ¿Areces el Fidel Castro? A lo que voi, sopa de lletres con candidatures llocales que nun se identificaben bien col nome nuevu, el d’Unidá… problemes coles impugnaciones, una campaña probetaya, nula presencia nos medios… sicasí van y saquen en un mes el meyor resultáu d’una candidatura nacionalista d’izquierdes na hestoria d’Asturies: cuatro veces menos de lo qu’hubieren necesitao p’algamar un escañu na Xunta Xeneral del Principáu. Tiempu hai.
Andecha Astur: Xugó a competir con Unidá como meyor sabe: tapando colos sos cartelos los d’Unidá. Sicasí, sacó cásique tres mil votos por mor, non de lo bultable de la so militancia, sinon por recoyer gracies a unes sigles perconocíes cierto votu descontento que sí que pudo lleer na prensa y sentir na Ser que Andecha Astur se presentaba tres d’haber denunciao l’asuntu del PGOU de Llanes.
Conclusión: L’escenariu se repite elección tres elección, pero énte dos opciones en claro declive por estremaos motivos (Uras-Pas y Andecha), hai motivos d’esperanza pal asturianismu. ¿Por qué?, porque va haber que siguir bien de cerca lo que pasa internamente n’Izquierda Xunida alrodiu de los resultaos y del pautu col PRI, y tamién l’enfotu, la ilusión y les ganes que-y pongan n’Unidá a lo llargo de los cuatro años qu’entran. De les bases del PAS van depender munches coses, y nun digamos nada de los tribunales no tocante a Andecha. Ver veremos.