A lo meyor votaba a Patxi López

Ya lo pensara más d’una vegada… si fuera vascu, o catalán, o gallegu, o valencianu… a lo meyor votaba al PSOE. Según me diera, por aquello del votu util y demás. Dame noxu dicilo, viendo la representación qu’esi partíu tien n’Asturies, pero que-y voi facer.

Si fuera vascu, quiciaves votaba a Patxi López por aquello d’echar a un PNV apoltronáu, y teniendo en cuenta que nun veo qu’EA seya quien a ello. Pero non, soi asturianu. Y equí los apoltronaos tanlo embaxu les sigles FSA y quier la cosa que, en delles cuestiones, tan más averaos a Federico Jiménez Losantos que a ZP, como diz Xuan Xosé nel so blogue. Equí, a los de la FSA nun-yos duel prenda titular un post n’euskera… pero llueu amuesan un espantible despreciu de lo que ye la historia, la cultura y el potencial del país que tienen ente manes.

Por ciertu, que nun sé si tendrá que ver, pero ¿Patxi López y Próspero Morán son primos?

patximoran

(Nota: La hipotética posibilidá de que dacuando votara a Patxi López desapaeció dafechu al conocer, nel procesu de confección d’esti post, un ‘meme’ que percorrió blogues sociates nes selmanes últimes, y pel que se facíen retratos a sí mesmos a lo Obama gracies a la ferramienta qu’apurre esta web.  LOL!!!. Equí teneis al propio Patxi, a la conceyala d’Avilés Ana Concejo, el portavoz del PSC, Miquel Iceta, l’alcalde de Caravia, Pablo García Pando…)

6 comentarios en “A lo meyor votaba a Patxi López”

  1. Pos la verdá ye qu’hai que tener estómadu pa pensar en votar al partíu de los torturadores, el d’Intxaurrondo, el del GAL, el de la llei de la patada na puerte, el de los fondos reservaos, el del amiguismu, el de la enseñanza concertada, el de los pisos PSV, el de la venta na transición, el del felipismu.

    Nótase qu’equí tamos mui mui mui mal pa qu’haya xente que llegue a eses conclusiones.

    Pd: nun s’entienda namás como un comentariu d’un ‘nacionaliegu’, sinon sobremanera como un comentariu de persona mínimamente d’isquierda qu’entendería otres postures como EA, EB, Aralar o otros (si’l PSOE los dexare presentase).

    Saludu y norabona pol premiu blogueru, que votar a un blogue nun quier dicir que se tea siempre d’alcuerdo ideolóxicamente, sinon col enfotu, procuru y ganes que-y da l’autor.

  2. ¿Nun te paez que si dalgún detritus d’aquel PSOE de la corrupción, el terrorismu y la manipulación queda perende (que queda) ye la FSA del prexubilarismu la compra de voluntaes y el arribismu? Pos eso. Nun hai más que recordar que, d’aquella, Rosa Díez yera conseyera del PSOE en coalición col PNV. Gracies pola norabona.

  3. Dafechu d’alcuerdu colo que comentes de la FSA, pero, ¿en qué contradiz eso lo que yo te digo?.

    Pensar que nel PSE nun queden la mesma gandaya felipista (y los sos fíos y fíes) ye un poco inxenuo. Vamos, tan inxenuo como pensar que los Pio Cabanillas del PP nun son los mesmos Pios del franquismu. Sigún esi criteriu too val porque nos partíos nacionalsocialistes tampoco hai Hitlers yá.

    Pelo demás, paezme mui normal que te caigan bien, mal o meyor unos o otros. Colo que supongo que coincides ye que silenciar y apartar a cientos de miles de persones del xuegu ‘democráticu’ (h.á!) ye, aparte d’un comportamientu dafechu fascistoide, una incoherencia con daquién tolerante. Si la situación n’Asturies ye d’un déficit democráticu xigante lo qu’asocede na CAV y Nafarroa ye de traca.

    De toles maneres igual ye qu’entendí mal el post, porque de mano nun lo interpreté como ‘escusa’ pa meter caña a la FSA, sinon como reflexón consciente de la situación política d’eso tan guapo que llamen Euskal Herria.

    pd: yo tamién sedría del Athletic…;)

    Un abrazu y siempre alantre!

Responder a Collaciu Encaboxar la rempuesta

La direición de corréu electrónicu nun va espublizase.