Asturian tipical tablao

Supongo que dalgunos lleísteis estos díes na prensa que esti mes va haber n’Avilés un ablucante alcuentru de responsables de dellos importantes centros culturales del mundu. Denomínenlo la cumbre del G-8 de los centros culturales (el Pompidou, la ópera de Sydney, el Lincoln Center de Nueva York…), y ta montada pa da-y dalgo de puxu al centru cultural que, diseñáu por Oscar Niemeyer, van construir n’Avilés.

Pues bien… el diariu El País dio anuncia d’esti alcuentru esti día, y llamóme l’atención esti parrafin: “Estos auténticos popes de la acción cultural se reunirán en Avilés con el ministro de Cultura español, César Antonio Molina, y con el presidente del Principado de Asturias, Vicente Álvarez Areces. Amenizados por los villancicos flamencos de Enrique Morente, que les dedicará una velada exclusiva como colofón del encuentro…”.

Guai. Enrique Morente. Gran cantador de flamenco, cierto ye. Pero, ¿por qué ye l’elexíu pa esti alcuentru? ¿Ye que los ‘popes’ de la cultura mundial son ‘fans’ d’elli? Porque, cuido que si ye por ameniza-yos con una amuesa de cultura popular española… ¿por qué nun llamen al gallegu Carlos Núñez, al vascu Kepa Junkera o los castellanos Candeal?

¿Sedrá que los ‘popes’ de la cultura son unos incultos que piensen que toa España rezuma flamenco?, ¿organizarán una corrida de toros pala ocasión?, ¿Actuará ‘Siempre así’ al final de la fartura?

Va unos díes daquién fizo un artículu sobre el cosmopaletismu del sociaterío asturiano. Y esta ye una prueba d’ello. ¿Daquién imaxina que la Junta de Andalucía presentara la Expo’92 con Diamantina Rodríguez? ¿o que Xuacu Amieva amenizara l’entamu del xubileu guadalupano n’Extremadura? Cuido que naide.

Too esto rezuma dos coses. D’una banda, incultura: desconocimientu ablucante de lo que ye la cultura popular. D’otra: vergoña, vergoña de ser asturianos, de pensar que quieres ser mundial pero nun te ves capaz d’ello.

Porque, de verdá, nun veo denguna razón oxetiva que xustifique la paletada de monta-yos a los ‘popes de la cultura mundial’ un tablao n’Asturies, un llugar onde’l flamencu ye tan ayeno (col permisu de Rafael ‘Falo’ Jiménez) como lo puea ser la salsa, el son o la cumbia.

Y artistes dignos hailos:

Una voz qu’emociona, ente les meyores de la música popular europea d’anguaño:

[kml_flashembed movie="http://www.youtube.com/v/Zqa71mfLWZU" width="425" height="350" wmode="transparent" /]

¿Artistes internacionales? Nun śe, na BBC paez que gusten:

[kml_flashembed movie="http://www.youtube.com/v/rAENrNQRd8g" width="425" height="350" wmode="transparent" /]

¿Cosmopolitismu? Nun sé como llamar un baille ‘irlandés-escocés’ fechu por escolinos polacos al son del Busindre Reel d’Hevia.

[kml_flashembed movie="http://www.youtube.com/v/qhzEPJYWNEo" width="425" height="350" wmode="transparent" /]