ベビーメタル: Heavy + X-pop = Kawaii metal

babymetal

Les tres moces de la semeya son ベビーメタル (o Babymetal), un grupu precocináu que fusiona heavy metal con x-pop pa llegar a lo que nomen kawaii metal, dalgo ansí como “metal adorable”… pero nun lo tomar como una traducción lliteral, kawaii ye un conceutu más del universu cultural de les tribus urbanes xaponeses.

Dende 2010 lleven les sos coreografíes y voces más propies del k-pop con soníu metaleru por tou Xapón y agora anuncien la entrada nel mercáu européu y norteamericanu con so futuru tercer discu.

La mezcla ye rara, y nun se si acaba de prestar o non, sicasí les producciones d’estos grupos son la caña, y el micrófonu-katana del videu más…

Ver el vídeu en Youtube

Candidatos con munchu ‘swag’

10425149_807869755932597_1774284909052525899_n

Aburrímonos muncho con esta campaña electoral. Los candidatos y los mensaxes que nos lleguen prodúcennos una sensación asemeyada a la de mazcar cartón. Asina que que punxímonos a buscar y atopamos en Nixeria los candidatos que necesita Asturies: elegantes, con estilu y naturalidá, no esa panda de maniquís de Novedades Eloína que anden percorriendo Asturies estos díes.

Prestábanos ver ente tantu Fernández a un Abolore Akande, que cola so tarabica a lo David Rivas, dió-y munchu ‘swag’ (sí, tenemos visto videos d’ElRubius) a les primaries del APC (dalgo asina como’l PSOE nixerianu).

Más conocíu en Nixeria como 9ice esti raperu asoleyó una retafila cartelos que yá-yos prestaría a Obama o a Llamazares.

9ice-campaign-poster

 

Que non?

aboloreakande

Pero Akande nun foi l’únicu candidatu del star system nixerianu que caleció la precampaña d’aquel país. Nes primaries del otru gran partíu, el centroderechista PDP, participó Kate Henshaw, actriz de la esporpollante industria cinematográfica de Nollywood.

kate-henshaw

Ella tampoco foi mui lloñe cola so campaña, y los sos cartelos tampoco ye que fueran gran cosa, pero la so presencia y naturalidá énte les cámares sí que ta a años lluz de lo que tamos viendo perequí.

(La verdá ye que una cosa ye l’estilu y la elegancia, y otra la imaxinación. Obama tien fecho munchu mal y paez que nun hai política ensin ‘change’ nin ‘yes we can’. Nel segundu cartelu de Abolore Akame yá diz que ‘El cambiu ye inevitable), pero Kate Henshaw dió-y al tema una vueltina más con su ‘El cambiu nel que podemos creer’.

Sicasí, presta vela cómo-y retruca al plumilla pela tele.

Ver el vídeu en Youtube

Por cierto, que si vos peta echar un güeyu al tipu de películes que la ficieron famosa, equí apurrímosvos una amuesa. Ye la peli ‘Emotional Hazard’, producción de 2014 de Ruke Amata, con Kate Henshaw, Fred Amata, Alex Lopez, Segun Arinze y Bimbo Akintola nos principales papeles. Muncho meyor que la campaña de les autonómiques asturianes. Ónde va parar.

 

 

Bombino, el Nuberu tuareg

Omara Moctar, “Bombino” ye un guitarrista, compositor y cantante tuareg, que combina sones tradicionales con rock y blues pa disparar cantares protesta a la escontra de los gobiernos de Níxer y Mali.bambino

Ñació en 1980 en Tidene, un campamentu na rexón d’Agadez nel desiertu del Sáḥara y dientru del estáu de Níxer. En 1990, demientres la tercera revolución tuareg, la so familia refuxase n’Arxelia y nesti tiempu unos parientes de pasu dexaron una guitarra cola qu’entama a estudiar pola so cuenta. Más tarde entama a estudiar col tamién guitarrista Haja Bebe, quién-y pon el nomatu de Bombino, deriváu del italianu “bambino” (guaḥe). Nestos años de formación influyen-y enforma músicos como Jimi Hendrix o Mark Knopfler y entama a trabayar como músicu y pastor “cerca” de Tripoli.

En 1997 torna a Agadez dedicándose namás que a la música, y algama bastante popularidá col so primer grupu col que grabaría el so primer discu que nun s’espublizaría hasta 2009.  Pero demientres la cuarta revolución tuareg (2007 a 2009) el gobiernu de Níxer torga l’usu de guitarres a los tuaregs, al considerales un símbolu de rebeldía. Nuna entrevista Bombino diz: “La mio guitarra nun ye un arma, ye un preséu pa construir la casa del pueblu Tuareg”, a los pocos díes el gobiernu de Níxer executa a dos miembros del grupu de Bombino y esti fuxe exiliáu a Burkina Fasu.

En xineru de 2010 torna a Agadez onde entama un conciertu pa celebrar l’acabación de la guerra, col permisu del Sultán, na base de la Gran Mezquita de la capital onde tocaron pa más de 1.000 persones, la ciudá d’Agadez tenía hai cinco años una población de 81.326 habitantes.

En 2012 espubliza el so segundu trabayu, que distribuyere pela rede garrando gran sonadía internacional, en 2013 espubliza el tercer discu y entama una xira pelos Estaos Xuníos.

Dende entós lleva dellos conciertos en distintos paises del mundu, amás d’Agadez.

Ver el vídeu en Youtube

王蓉 (Somos chinos ¿non? #6)

wangrong王蓉 nació 1978 en Ḷḷindao (capital china de la cerveza) dende los ocho años amuesa interés pola música y ye cuando escomienza a estudiar vigulín, el so instrumentu principal, pero tamién estudió pianu y guitarra.
Declárase amante de les llingües, con 15 años compuso el so primer cantar n’inglés.
En 2003 espublizá el so primer discu “非想非非想”, “Ensin pensar”, al que-y siguiría en 2004 “我不是黃蓉”, “Yo nun soi 是黃蓉” en referencia al personaxe 是黃蓉, de la novela “射鵰英雄傳“, ya que esti nome pronúnciase de forma mui asemeyada al so nome en mandarín ya idéntica en cantonés. Pa finar en 2005 espubliza “多愛”, “Amor múltiple”.
Dende esa época los sos trabayos serán cantares sueltos que distribúi per internet.
Anque yá yera famosa, en 2004 pasa a ser un fenómenu en tola China al componer ya interpretar el cantar d’aniciu de la popular serie televisiva “小魚兒與花無缺” (si tas lleendo dende La China continental puedes vela en Youku) sicasí na China nacionalista cambiaron esti cantar por otru d’un artista llocal.
Y dende va un mes ta arrasando, en La China y fuera d’ella, col tema “小鸡小鸡” (Pita, pita) del que soi fan declaráu y que vos dexo de secute…

What does the fox say?

ylvis4_bilde

Estos dos de la semeya son Ylvis, un grupu cómicu noruegu formáu polos hermanos Ylvisåker na ciudá de Bergen, toi acabante de descubrilos y declárome fan. Podeis ver los sos videos nel canal de youtube de la televisión noruega, y equí queda un exemplu (la prosima que me salga un raposu na carretera entrugare-y a ver que me diz)

Ver el vídeu en Youtube

Polca punk rock ucraín

Toi acabante de descubrir Los Colorados, pa los que como yo nun los conoceis, son un grupu de Тернопіль, n’Ucraína, y faen lo qu’ellos nomen “polca punk rock ucraín”, sicasí orixinariamente autodefiníense como “agro-alco-rock” (el alco, vien d’alcohol pol so vezu a chumar nes sos actuaciones) que presta más, anque cuido que por mor de lo políticamente incorrecho cambiaron d’etiqueta.

los colorados

Entamaron en 2006 con temes propios, cuando se xuntaran unos compañeros del trabayu pa divertise y facer el gamberru, tocaron nun llocal de la so ciudá y de secute taben percorriendo’l país. En 2008 una televisión llocal de Тернопіль convidólos a facer unes actuaciones y decidieron preparar versiones de cantares d’otros artistes como’l rusu Peter Nalitch, los alemanes Rammstein, los australianos ACϟDC, los neoyorquinos Reel 2 Real o la californiana Katy Perry, a la que-y versionaron el cantar “Hot n Cold” (el videu que vien darréu). Xubieron la grabación del programa a internet y foi cuando garraron popularidá fuera d’Ucraína, especialmente n’Alemaña y Polonia.

Y sí, el cantante nun sabe nada d’inglés, según diz trecribieron-y los cantares cola pronunciación ucraina…

Ver el vídeu en Youtube

铁骑 (Somos chinos ¿non? #5)

铁骑 usen n’inglés el nome Tengger Cavalry, Tenger en mongol fai referencia al xamanismu polo qu’entiendo que ye algo así como “caballería xamán”.

Ye una banda asitiada en Beixín y formada por tres mongoles de La China hai tres años, llamóme l’atención porque de la música mongola contemporánea son los primeros de Mongolia interior colos que doi que tean amestando sones nuevos a la tradición mongola que persigue’l gobiernu chinu, sacante’l cantar punkarra que tien 杭盖乐队.

tenngercavalry
铁骑 na sala 简介 – Mao Livehouse de Beixín el pasáu 3 de marzu.

Defínense como black metal basáu na música tradicional mongola, sicasí polo que sentí pela rede paez qu’esperimenten con sones de tou tipu: folc, rock, pop, incluso sentí un tango y un tema con sones sintéticos. Tamién recurren bastante a la heterofonía, más propia de los han que de los mongoles (algo que yá sintiera a otros grupos de Mongolia interior).

Habrá que seguilos pa ver por onde salen…