Category: González y González

Paez que non, pero quien corta’l bacallau equí ye un paisanucu belga muertu en 1901. Mesié D’Hondt foi l’inventor d’esi sistema tan ‘perversu’ que-y quitaa los probes pa da-ylo a los ricos. En realidá, el so sistema tien como oxetivu garantizar mayoríes estables nunos sistemes parlamentarios representativos. Los partíos con más votos tienen preferencia a la hora d’asignar los escaños tres les votaciones y paez de dalguna manera bastante razonable.

La cosa ye cuando entá se-yos ponen más torgues a la entrada nun parlamentu de les minoríes. Asina, por exemplu, nel sistema electoral español un partíu nunca nun algamará un escañu, magar que-y correspondiera pola llei D’Hondt, si nun obtién un mínimu del 3% de los votos (nos parlamentos autonómicos) o el 5% nos conceyos. Esto se xustificaría pa evitar opciones ‘extremadamente minoritaries’, pero lo cierto ye que dexen fuera miles de votos naquellos parlamentos onde l’escañu ye especialmente difícil de consiguir (como ye’l caso del asturianu).

El sistema D’Hondt, d’entrada, pue paecer avegosu d’entender, pero nun ye pa tanto. Calcando equí podéis esfrutar d’un simulador d’asignación d’escaños qu’amuesa de forma clara cómo se fai’l repartu. Por exemplu, si utilizais los datos reales de les elecciones asturianes de 2003, veréis que a Uras-y hubiere correspondío un diputáu polos sos 17.552 votos, y que’l Pas quedara nun intre d’algamalu colos sos 11.376. Sicasí, como nengún d’ellos algamare’l 3% esixíu de votos, los tres partíos ‘grandes’ repartiéronse entá nada menos que CATORCE poltrones. Y ye que, con la participación de les elecciones últimes, hubieren necesitao, polo menos, 18.700 votos pa entrar na Xunta Xeneral. Casi tantos votos como lleendes urbanes.

Dalgo asemeyao yá pasara en 1999. Entós, aplicando estrictamente la llei d’Hondt hubieren entrao nel parlamento el Pas y IU tendría cuatro escaños envede los tres que-y asignaren a la fin. Sicasí, dambos fueron a sumar la mayoría absoluta del PSOE. Ye lo que hai. Agora podéis entreteneros faciendo quinieles col simulador.