Cursu d’ética periodística

La cobertura que-y dieron a la mani pola oficialidá nos trés diarios asturianos ye pa detenese un momentu. Talamente paez que los responsables d’estos periódicos saben más d’otra cosa que de periodismu. Vamos equí facer un breve analís, n’alcordanza tamién d’aquella estupenda seición del auténticu CQC, qu’en gloria tea.

LA NUEVASPAÑA

La portada de La Nueva España ye sintomática de lo que ye este periódicu, y de lo que piensa de los sos llectores. La semeya en destaque, n’Uviéu, ye tocante a una d’eses maravioses ‘esclusives’ a más gloria de Don Gabino. Porque por munchu que na edición dixital tengan a Palombina Saez, o Sainz, en plan estrella de OT, nun vos engañar, que ye de pagu.

A lo que diba. Esa maraviosa esclusiva gabiniana nos aporta una aproximación de lo que sedrá el centru comercial del palaciu Princesa Letizia. Como to’l mundu sabe, tol mundu n’Uviéu nagua por saber cómo sedrá esi nuevu centru comercial, unu nuevu, pero con aire capitalinu, como’l diariu de Don Gabinu, que pa chulu él. Otros, prubinos, tenemos blogs, él tien un diariu con edición dixital y too.

Pa ver aú tan los 15.000 asturianos glayando pola oficialidá, tienes que movete un poco pela portada y dir a un requexu afayadizu, a mandrecha, a una llamadina con semeyina. El titulín ye pernidio, diz que “Más de diez mil manifestantes piden en Oviedo la oficialidad del asturiano”. Ta xusto embaxu del que diz que “Don Gabino va abrir un muséu de la ciudá nos baxos de la casa conceyu” (pero en castellanu).

Bien. Lo bueno ye que, curiosamente, esa portada, xusto enriba la llamada a la información sobre la mani, ta el titular de portada, el qu’el blog de Don Gabino considera lo más importante pa un domingu: “Diez mil asturianos acuden cada año por primera vez al psiquiatra”. Pero ¿esto que ye?. ¿Nun querrán asociar los diez mil de la mani con dir al psiquiatra?. Pa eso, bien podríen haber tituláu: “Diez mil oligofrénicos percuerren les cais d’Uviéu glayando nun se qué, y los lloqueros nun fixeron nada por pena”. Acababen antes. De toles maneres, a lo meyor los tiros diben per otru lláu, y lo que taba faciendo el blog de Gabino ye propaganda subliminal, y da-y chance a Inaciu Llope, el del IAS, que como tol mundu sabe, ye psiquiatra.
Lo peor ye que, n’otres ediciones, el blog de Don Gabino desaniciaba cualquier referencia a la mani. Pamidea que piensen que la oficialidá y les maravioses esclusives del Don son namás coses de capitalinos.

EL COMERCIO

Posiblemente, el diariu xixonés seya el que ufrió una valoración más afayadiza de la mani na so portada de güei. Nes ediciones d’Uvieu y Avilés, la marcha foi la semeya en destaque, verticalona, mui guapa. En Xixón y Oriente, esi honor diéron-ylu al partíu del Sporting, que ganó, y la mani apaecía entós nel frisu de portada, llamada destacada con semeya. Nun ta mal, magar que nel testu de la información quedaren coles estimaciones d’afluencia d’enantes de que finara la mani (6.000 según la Poli Local, 10.000 según la organización), envede les 10.000 de la P.L. y les 15.000 de la organización, calculaes a lo caberu la marcha.

D’esa miente, la so valoración abulta afayadiza, darréu que la noticia so la mani acabó la xornada nel sextu llugar na clasificación de noticies más lleíes del día na edición dixital.

LA VOZ DE ASTURIAS

La Voz (va tiempu yá que ye más ruxerrux que voz) ye un caso asemeyáu al del blog de Don Gabino. La Voz foi güei más ‘Voz de su Amo’ que nunca. 15.000 persones na cai, muncho más de lo que diben poder axuntar el PSOE o el PP anguaño nuna manifestación (nun siendo alquilando una retafila buses cargaos de xubilaos que bailes lo que-yos digan por un bocata, y nin con eses), nun son pa los cabezaleros d’esti periódicu más qu’una llamada ruinuca en primera. Esto ye, la octava o novena noticia del día cuando, nel ránking de la so web, la crónica foi lo más lleíu del so periódicu durante tola xornada.

Pero non, esti periódicu debió mancase la llingua, de tanto llamber el logo de la FSA. Porque, d’otra miente, nun soi quien a entender cómo yye que pa esta xente, la fotona de portada seya ZP nun congresu que nin yos va nin yos vien namás qu’a los sociates (inclúyase TPA).

Conclusión

Lo que paez que queda pernidio, ye que nun hai prensa n’Asturies que nun tea a lo que diga l’amu. Pero esto nun hai quien lo pare yá. Van tener que pasar pel aru… si hasta Will Smith yá abrió los güeyos…

Ver el vídeu en Youtube

Responder

La direición de corréu electrónicu nun va espublizase. Ríquense los campos marcaos con *