Yá lu dixera’l preclaru Tini Areces cuantayá: el so gobiernu ve Asturies como un parque temáticu, coles sos atracciones museístiques, aboríxenes, carbayos y osinos en perfeutu estáu de revista pal turista. Faltábamos la mascota, y yá la tenemos: Ye Yogui, l’osu Yogui col so collaciu Bubú.
Esta Asturies bizarra na que mos tamos convirtiendo va gastase 5,4 millones d’euros (Migoya dixit) en que los osinos de Yellowstone mos anuncien per España, o lo que ye lo mismo: más del doble del ‘históricu’ presupuestu pa promoción y proteición de la llingua.
Poro, la cuestión ye la siguiente: ¿acierten cola escoyeta de Yogui y Bubú? Posiblemente temos ante dos osos afayadizos pa la imaxen que quieren dar nel gobiernín del parque temáticu. Son fácilmente reconocibles y ye posible antroxar al personal de les oficines de turismu pa contrarrestar a La Pita.
El caso ye que la decisión nun debió ser fácil, y precisó d’una inversión de mediu millón d’euros (tamién Migoya dixit), lo qu’abultaría munchu si nun fuera porque, quiciabes, dellos sectores del Gobiernín (Izquierda Xunida, especialmente), bien preferiríen al queríu Ositu Misha, más soviet, más d’esquierdes.
Otres opciones, de xuru, sedríen refugaes dafechu por tolos miembros del executivín. La imaxe nun sedría la que buscaren pa la so Asturies ‘parque temática’, magar que representaren meyor la rialidá del país:
El ‘panda del acoso sexual’ sedría tamién fácil de convertir en disfraz, pero les semayances d’Asturies con South Park aporten una semaya del país que na FSA nun son quien a soportar.
Con too, ye posible qu’esta llínia osuna vaya cuayando col tiempu, y la promoción turística asturiana vaya diversificándose p’atraer a tou tipu de turismu. Asina, ya posible qu’el ‘Asturias Paraísu Natural’ seya dacuando un icono nel movimientu ‘bear’.
Presta más la versión de los Simpsons