Piesllamos… Ximiélgame.net

logoliquid.png

Dende llueu, esti nun ye’l mensaxe que mos hubiera prestao escribir al quintu día de funcionamientu de Ximielgame.net, pero cuidamos que ye lo meyor.

Suponemos que los más perspicaces blogosferos asturianos vos decataríeis de la llamentable coincidencia de que dos proyeutos idénticos, casique coles mesmes funcionalidaes, asoleyáronse al empar el pasáu martes. Nós, cuidamos que nun ye lo meyor pa que un sitiu d’esti tipu tenga un bon nivel d’usu que convivan o compitan dos sitios pensaos pa una comunidá tan ruinuca como la nuestra.

A la hora d’entamar Ximiélgame nun mos movíen intereses económicos nin de ego, sinon el presto de desenvolver una ferramienta que, al nuesu entender, ye perguapa p’afitar les rellaciones ente los blogueros d’Asturies.

Per embargu, les coses nun salieron bien. El día (meyor dicho, la nueche, del llunes) na que tábemos faciendo los últimos axustes a Ximiélgame, probando enllaces y demás, mos enteramos de que otra xente tuvo la mesma idea (orixinales, cierto ye, nun somos). Al traviés d’un corréu, desplicaben qu’habíen atopáu el dominiu y mos ofrecíen ‘axuntar esfuercios’ pa desendolcar el proyeutu de forma conxunta. Al tiempu, nos informaben de que teníen rexistráu la direición esbilla.net, direición que, lóxicamente, visitamos. Per embargu, nun había un res, y al poco vimos qu’acababen d’instalar Pligg (la ferramienta cola que furrula tamién Ximiélgame) y al poco qu’entamaben la traducción del sistema del inglés al asturianu.

Nesi puntu, lo reconocemos, pecamos de ‘malpensaos’. Nun-y dimos credibilidá a la invitación a ‘axuntar esfuercios’ y entendimos que aquel enfotu en asoleyar un sitiu mínimamente operativu (se pue facer en poques hores) convertía l’ofrecimientu inicial en papel moyáu. Asina qu’adelantamos unes hores l’apertura de Ximiélgame.

Sicasí, al día siguiente punxímonos en contautu cola xente d’Esbilla pa tratar d’esclariar l’asuntu, cola idea de que comprenderíen qu’aquella situación nun tenía xacíu, que yera lóxico que nun aparáramos un proyeutu nel que llevábemos cerca de dos meses trabayando, y que de toles maneres bien podíen axuntase a nós cola alministración de Ximiélgame, al tiempu que nós collaboraríemos con ellos nel desendolcu d’otros proyeutos.

Pero nun pudo ser. La nuesa ‘premura’ nel asoleyamientu de Ximiélgame foi interpretada como una forma de desconfianza qu’existió (polo ya espuesto enriba), y que llamentamos fondamente.

Asina, y énte la perspectiva d’atopanos con dos proyeutos iguales, o mui asemeyaos, compitiendo nuna comunidá tan pequeña como la nuesa, pensamos que lo meyor ye dexar sitiu, asumir nuestru error, y pedir disculpes fonderes a la trentena d’usuarios que se rexistraron estos díes. Tamién queremos agradecer, y muncho, los mensaxes recibidos tres de l’apertura de Ximiélgame, y a toa esa xente que corrió a poner el so enllaz nel so blogue o na so web, y mui especialmente a Nireblog. A toos, vos encamentamos a facer lo propio con Esbilla.net, pa que haiga un sitiu de promoción de noticies n’asturianu que tenga un bon nivel d’usu, que sirva pa cohesionar a la comunidá, y que seya ún de los puntos de referencia del internet n’ast.

Ximiélgame.net siguirá funcionando entá unos díes. Depués, se procederá al so pieslle, qu’incluirá l’esborráu de tolos datos qu’apurrieron los usuarios nestos díes de funcionamientu, tales como nomatos, claves, direiciones IP y, por supuestu, señes de corréu electrónicu. Vémonos.

6 comentarios en “Piesllamos… Ximiélgame.net”

  1. Ye una pena pol trabayu bien fecho, ye increible que de nun haber nada de sutrucu haiga dos. Yo abluque cuando dempués d´enterame de la noticia por un mensax tuyo nel blog al día siguiente llevántome miró´l correu y veo un e-mail onde m´informen de la ñacencía d´esbilla.net.

    Honrate la decisión, tien que ser difícil dexar pa prao daqué que llevo´l so tiempu facer. Ensin dulda va ser lo meyor pa la comunidá asturiana na rede porque qu´hubiere dos nun tenía xacíu dengún. Más xente como tu fai falta nesti país, pol trabayu y pola decisión teniendo en cuenta ante too lo meyor pa la comunidá.

    Un saludu.

  2. Pos sí una pena pol bon trabayu feichu. Ya diz muncho de vós, intentar facer comuña apostando por una iniciativa paecía, d’outros collaciós, pa nun facer competencia… ¡Muncho queda inda a los políticos asturianistas deprender de xente cumo vós!

    Un Abrazu, Puxa González y González

  3. Yo sabía que Próspero tenía el blog http://www.prosperomoran.com/lamaeda/ pero taba semi-escaecíu nuna entrada vieya nel tiempu. Ayeri güeyando el siempre interesante blog http://www.espeleoastur.as/ASTVRA/index.htm atopé un enllaz al blog que puse na entrada d’arriba, nomáu Próspero Morán y con una única entrada nomada “¿Hai blogosfera asturiana?”. La verdá que lo primero que fice ye planteame si yera rialmente d’él y si yera la primer entrada d’un nuevu blog que diba a entamar o namai un testu aisláu que metío pa probar daqué. Lo que me llamó la atención foi que les idees que planteaba yeren les mismes qu’espuso nel I Alcuentru de Blogueros y sobre les cuales tuvimos charrando un cachín. D’esta manera ví la oportunidá de compartilo con tola comunidá bloguera (polo menos cola qu’entre nel mio sitiu) y paecióme afayaizo pa, que nos diera que pensar y facer que xorrezcan opiniones tan interesantes como la tuya. Un saludu.

    P.D.: Norabona otra vegada por trabayar por Ximiélgame y pola dificil decisión tomada, tan axena al asturianismu. Una lleción pa toos y toes.

Responder a ayalgueru Encaboxar la rempuesta

La direición de corréu electrónicu nun va espublizase. Ríquense los campos marcaos con *