Internéeeeeeeeeeeee

Dende va más de tres meses, mediu González y González y mediu Ta pa Ponga tuvo ensin conexón a internet, gracies al anterior proveedor France Telecom (Orange), que me dexó ensin conexón y foi incapaz de solucionalo. El casu ye que (depués de denunciar y muncha paciencia) ya tengo conexón con telefónica dende fai unos díes pero coincidió con que marchaba de vacaciones y agora toi intentando poneme al día, borrando spam y demás. Amás tengo que cacharrear col router pa poder tar complentamente operativu… pero polo menos yá tengo porno :-p

Quiero disculpame a los que nun fui a retrucar esti tiempu y especialmente a los compañeros de proyeutos que tuve que dexar de lláu, especialmente los blogs, Softastur y Uiquipedia…

 

Nun pienses nun fartón

Veríeis que nel Les Noticies d’esti vienres, col envís de la celebración del Día de la Santina, el periódicu aconceyó a cabezaleros del Bloque, UNA y Pas pa falar d’asturianismu, de les sos perspectives. Al tiempu, nun editorial faen un analís de la situación política asturianista que, en cierta manera, apunta lo que ye un evidente problema pal desenvolvimientu d’una opción política que tien que facer por amosase como dalgo creíble y atractivu. Nesti puntu, alcordéme d’esti puntu d’embaxu, que pa quien nun lo sepa ye’l llingüista George Lakoff. Esti puntu ye dalgo asina como la madre del corderu de la propaganda d’Obama, y tien a ZP como ún de los sos fans más fans.

450px-lakoff_george.jpg

El casu ye qu’el llibrín d’esti home, ‘Nun pienses nun elefante’, preséntase como una especie de manual de propaganda pa torpes que dexó ablucáu a Zapatero, hasta el puntu de fichar a Lakoff pal ‘think tank’ qu’asesoró la campaña última del PSOE. Esi llibrín destripa lo que ye la estratexa de propaganda conservadora n’Estaos Xuníos y apurre idees de per ónde debe dir la progresista pa ganar les elleiciones. Nun entra en pureces ideolóxiques y argumentales. Va al tueru de la cosa, a ganar les elleiciones. Espón les regles del xuegu.

Básicamente, la idea ye que la xente nun vota tanto idees como valores. La xente vota la opción cola que s’identifica, nun vota programes. El llibrín cuenta cómo la identificación parte de la estrutura social más básica, la familia (básicamente estrema la ‘familia del padre estictu/conservador’ y la ‘familia de padres protectores/progresistes’), y cómo el llinguaxe xenera ‘marcos’ nel cerebru de cada votante que tienen un efeutu concretu na percepción del mensaxe (Nun pienses nun elefante… l’elefante, símbolu republicano, ya ta na to cabeza). Asina, cuenta cómo los conservadores americanos vienen desendolcando una estratexa pa difundir los sos valores, espardilos como los únicos válidos, al tiempu qu’afiten una tupida rede d’influencia que configura una sólida clase dirixente conservadora. Y too ello, dende los años sesenta. (Asina ganó Bush… pese a too).

El PSOE vio les similitúes cola situación española de secute. Fundación Faes, nueves universidaes privaes, apoyu a los escritores, ensayistes, intelecutales más o menos afines… contribúin a texer esa nueva clase dirixente, mientres s’apela a valores ampliamente espardíos y asumíos pola población pa facilitar que s’identifique col PP (Apoyo a las víctimas, sí a la vida, defensa del idioma español, de la familia…).

Pues a lo que voi. N’Astuies tamién se puede ver esi modelu, solo qu’agora ya desenvueltu pol PSOE-PP. Ehí ta l’apueste pola llibertá pa usar la llingua, ensin imposiciones; la solidaridá (y non el chupar del bote) ente rexones cola financiación… la tupida clase dirixente asturiana, identificada col ‘progresismu’ FSA…

Énte eso, ¿qué facer?

Sigui lleendo Nun pienses nun fartón

La rapaza nacionaliega de McCain

palin1.JPG

Estes elleiciones americanes tan prestándome pola vida. Al furacán Obama xunimos agora a la vice del candidatu republicanu, que ye toa un personaxe. Nun ye namás que seya ex miss de concursu y gobernadora reaccionaria a la que se-y queda preñada la fía adolescente (¿sabrá la rapacina lo que ye un condón?, ye que, además, la señora Sarah Palin simpatizó col nacionalismu d’Alaska.

alaskan_independence_party_logo.jpgNun tuvo afiliada al Alaskan Independence Party, namás tuvo rexistrada y participó nun congresu en 1994, pero sí que paez que so home yera un activu afiliáu. Hai dellos videos pel youtube nos que se fala de la so participación nel AIP.

El partíu ye tan raro pa nos, como tolos partíos estaunidenses en xeneral, enfotáu nun modelu de país cambiante p’Alaska (quixeron ser Canadá, llueu independizaos pero xuníos a un nuevu estau col oeste de Canada, independientes con estatus especial nos USA, miembros de la Commonwealth, ya dixebraos dafechu). Políticamente, cuenten que son un mecigayu de ‘libertarianos’ y republicanos, magar que nes elleiciones piden el votu pal ultraconservador Constitution Party. Con too y con eso, presumen de ser, en proporción, el mayor ‘third party’ de los Estaos Xuníos con 13.500 miembros.