Category: Frikaes
José Luis de Jesús Miranda
Esti home d’enrriba ye ‘l ‘doctor apóstol’ José Luis de Jesús Miranda, alias ‘Jesucristo Hombre’, ‘Anticristo’, ‘Presidente Mundial de la Gracia’ o ‘Papi’. Ye un nota portorriqueñu al que se-y atribúi un pasáu de drogues y cárcele al que un día metióse-y en cuerpu el mesmu Xesucristu (dizlo él nuna entrevista que-y ficieron na NBC d’Estaos Xuníos que anda pel youtube). Dende entós, predica pel mundu que cuantayá que nun hai pecaos, que toos quedaren redimíos dende que se crucificare a Xesús, que toos a chumar, a calcala y a metese farlopa (dizlo él tamién nun reportaxe de la televisión colombiana que tamién anda pel yoputube). Interpreta ‘graciosamente’ la Biblia pa convidar, como podéis ver calcando equí, a tolos alloriaos que-y siguen a tatuase un 666 o les tres ‘s’ (SSS) na mandrecha o na tiesta, ya que son l’Anticristu pa toes eses ‘relixiones mentiroses’ que namás quieren mete-y mieu a la xente col pecáu y eses coses.
Esti llibertador, a mediu camín ente Hugo Chávez y Inri Cristo, ye tan buenu tan buenu, que namás cobra’l diezmu a les sos oveyes, sicasí acepta de con grau regalinos como coches, títulos d’empreses y mansiones perende (tamién lo reconoz nel reportaxe de la NBC). Y ello nun-y esmolez un res porque, como yá nun hai pecaos.
El doctor apostol, Jesucristo Hombre, cunta que son alrodiu de 100.000 los alloriaos que-y siguen, pero diz tamién que nun se para a cuntalos tolos díes. N’España tien ya abiertos dellos ‘centros educacionales’ en Madrid y Barcelona, y trabaya con Telegracia (una canal vía satélite) y Netgracia (tv pel internet), amás d’emisores de radio pel mundu.
Esti, llega a nacer en Texas y ye presidente d’Estaos Uníos de fixo.
Too esto, podría tomase a coña si nun fuera por coses como esta: neños.
¿100.000 euros diarios en propaganda?
Güei ye xueves, un día normalín, como otru. Bien ciertu ye que tamos a dos meses de les elecciones, pero nun ye que fuera güei un día especialmente apretáu no que cinca a inauguraciones, fartures y mercadeos de fumos diarios. Asina que paeciome un día afayadizu pa facer una preba. Merqué los tres periódicos asturianos, y púnxeme a mirar cuánta publicidá pagada con dineru públicu enxertaben. Y fice un cálculu. Nun incluyí publicidá institucional: eses anuncies oficiales (espropiaciones, concursos públicos, contrataciones…) que l’alministración tien d’espublizar obligatoriamente nos medios de comunicación atendiendo a razones de tirada y difusión. Tampoco incluyí les anuncies de cartelera (funciones en teatros municipales, esposiciones y demás), porque pue considerase ‘serviciu públicu’ de dalguna manera. Namás calculé (por baxo más que por riba) les anuncies de mera propaganda. Esto ye: obres, proyeutos, publirreportaxes y anuncies sobre lo perbién que lo faen los gobiernos de turno. El resultáu: 105.000 euros ente LNE, El Comercio y La Voz de Asturias.
La Pita for presidenta!!
Énte’l panorama que se mos avecina (otra vegada les mesmes cares, los mesmos discursos, la mesma zuna asturianista en nun facer un ren, la mesma aburrición) cuido que lo meyor ye l’alternativa. Y ello ye que mos vamos enfotar d’equí a les elecciones, a puxar pola Pita, que ye de lo más serio de la política asturiano. LaPita for presidenta! (too ello cola fonda reconocencia y respetu a la Xunta Pola)
Primer cartel de campaña (prometemos más)
Cuenques freak show (El blog de Villa)
Güei flipé al atopar el blog de Villa, esi home de verbu floríu al que-y llambe la punta bona parte del prexubileríu. Paga la pena pasase perhí y echar una güeyada a un blog que, por demás, ye’l coñazu más grande que vos podéis imaxinar. Cuido que, colo tecnolóxicu que ye un home incapaz de pronunficar de siguío ‘ácido acetilsalicílico’, ye un pariente el que-y ‘cortipega’ los discursos colos qu’enllena de posts infumables esta auténtica fricada. Pero dacuando tien perles, como esa tendencia villista a citar a Antonio Machado (pamidea l’unicu llibru que tienen na biblioteca del SOMA ye ‘Campos de Castilla). Darréu qu’el blog de Villa resume toa la intelectualidá del prexubileríu y el sociateríu astur, que tamién apurre cites propies d’esos calendarios pa llevar en monederu con cursis frases d’autoayuda del tipu: “Los silencios a tiempo son tesoros en el tiempo” o “Los aduladores tienen forma de amigos como los lobos tienen apariencia de perros”. Grandes verdades rescamplen nel pensamientu de Villa. Dame la risa.
Otra de les perles d’esti blog son les imáxenes. Namás-y falten unicornios esnalando pel cosmos. Anque tamién atopes semeyes como esta, na qu’apaez Villa tou gallasperu xunta Alfonso Guerra y un par de maderos que disimulen col pañuelín bermeyu de dir a Rodiezmo. Impagable. Asturies, que guapina yes. Con fabes y sidrina nun fai falta gasolina. Les muyeres y les mazanes tienen de ser asturianes. Puxa’l SOMA.
Alloriante fucking machine
Equí vos dexo un videu que nun sé aulo clasificar, pero que me tien alloriau. Ye de lo más bizarro qu’atopé perhí en munchu tiempu. Si daquién sabe d’au sal, que lo diga, por favor.
https://www.youtube.com/watch?v=ZcjnTuIr9vI
Solla Solla Enna Perumai
Un clip que tien too pa llograr un exércitu de fans. En Bombai tamién-yos da la febre nel sábadu nueche. Paez que ye de la peli Ellam Inba Mayam, de 1981, y ta percorriendo l’internet de la manera. Y nun m’estraña. Ta disponible en DVD pel internet (dende’l Reinu Uníu), en llingua Tamil. La música ye de Ilayaraja, que firma la música de ¡¡893 películes!!. Kamal Hassan ye’l prota. Una cosa: a ver si atopais per dalgún lláu del videu el cartelu de Blancanieves.
A video used to be embedded here but the service that it was hosted on has shut down.
Y pa finar esta esbilla n’homenaxe al nuevu amu d’Ensidesa, equí vos dexo esta demostración de creatividá friqui.
Perdióse l’enllaz
Siempre mos quedará Portugal
Asturies merez otra referencia política, otres idees, y éstes tan bien averaes a nós: en Portugal. Ellí desendolcó esti añu el Candidato Vieira una campaña imaxinativa, sincera, próxima a lo que mos prestaría ver perequé d’equí a un par de meses.
Eslóganes qu’esconsoñen a una sociedá entera, promeses reales pa xente real. Vieira, un home d’esti tiempu.
Ta mui feo facer comparances, pero nun mos digáis que lo que se ta viendo yá peles cais y los periódicos d’Asturies tien la credibilidá d’esti home.
Nun dexéis de pasar pela so web.
Por España, en La Nueva España, por si españa
Lleo en Asturias Liberal que la Fundación pola Denfensa de la Nación Española (Denaes) va presentase n’Asturies de la mano de Gustavo Bueno y el delegau d’esi ensame, Joaquín Santiago, nel club de prensa del diariu La Nueva España. Nun tengo mui claro qué ye lo que quier esta peña de la Denaes, ni qué España quieren defender, ni si ye verdá qu’España va españar, pero el caso ye que ehí tan, Santiago y cierra España. Españoleando, españoleando, atopé esti videu ilustrativu nel youtube, fala d’España y de La Nueva España. A lo meyor ye col que van entamar la so presentación.
https://www.youtube.com/watch?v=O2R-q-RswxQ
Sigui lleendo Por España, en La Nueva España, por si españaPillow fighters, el deporte
Toi acabante de descubrir un deporte perguapu: pelees d’almuhades. Nueches de cerveza y fumu, dos moces nel ring, un par d’almuhades, y a entamala.
L’inventu paez que vien de Canadá, y ya tien bien d’adeptos nos Estaos Xuníos, que pa esto del entertainment son mui agradecíos. Hai una lliga oficial, con una esbilla de lluchadores con nomes tan prestosos como Eiffel Power, Trashley, Polly Esther, Sarah Bellum o Digi Jones.
A manzorga tais viendo a Champain, anguaño campeona del mundu d’esti deporte tan guapu. Esta misma nueche, en New York City, va tener que defender el títulu énte Betty Clocker (a mandrecha, y de xuru que l’ambiente va ser de lo meyor. Champain fuma y bebe, tien 27 años y ye fía d’una pareya de moteros. Gusten-y les películes de mieu y kung-fu. D’otra banda, Betty Clocker diz de sí mesma que ‘llucha como una chica, y fai pastelinos como la to ma’. Nun fuma, pero presta-y dar al vasu, y gusta-y el pop de los 80. La caña.
Estes dos moces, ehí les tenéis, son la elite del Pillow fighting. La pena ye qu’entá esti deporte nun tien una presencia mundial, magar que yá ta empobinándose una versión europea (peme que n’Holanda).
La PFL (Pillow Fight League) ta abierta a la incorporación de lluchadores nueves. Tienen que ser ‘cool’, célebres y vivir na redolada de Toronto. Asina que, si dalguna s’anima, pue apuntase na web de la lliga. Yá tenemos un Asturiano na lliga de llucha llibre circense mexicana, por qué no una rapaza ‘cool’ y célebre na lliga d’almuhades d’América. Como siempre digo, too ye ponese.
Habrá quien diga que too esto ye un show pa calentorros, al estilo de les pelees nel barru. Pues sí, pero acaso el tenis ¿nun se sigue pa ver como se-y ximielguen les tetes a la Kournikova? o ¿nun ye’l fútbol una pasarela de modelos?, o les propies federaciones ¿nun roblaron cuantayá la mengua de les ropes de les xugadores de volley?. La llucha d’almuhades, ye la sinceridá fecha deporte.
Si vos peta ver una esbilla de combates (el desendolcu de la pelea ente Wynn Cognito y Vic Payback, por exemplu, podéis facelo darréu.