Pal que nun lo sepa, dicímos-ylo: Tinita acabante d’ordenar el pieslle dafechu de Teleasturias. Al traviés del so brazu executor, Luis Iturrioz (viceconseyeru d’alministraciones públiques), ordenó a la empresa encargada del tresporte de la señal televisiva analóxica de Teleasturias la suspensión de toes les emisiones. Tamos ante l’ultimu episodiu d’una traxectoria nel control de los medios de comunicación aniciada por Tini namás entrar nel Gobiernu del Principau, cola retirada de la llicencia d’emisión que-y concediera’l gobiernu anterior a la emisora n’asturianu Radio Sele, va cásique ocho años.
Enantes de nada, querría dicir qu’esta canal nun foi nunca, precisamente, la que más me prestaba ver (magar d’escepciones como el boxeo, dellos alderiques, Tómbola o el prestosu proyeutu ‘El faru d’Illán’). El so dueñu ye amás ún d’esos siniestros personaxes metíos a empresariu con milenta asuntos turbios al llombu. Pero esto ye otra cosa. A Tini y compaña lo que de verdá-yos da zuna d’esta canal ye la so llinia crítica col PSOE, afondada nos meses caberos cola apaición de la TPA y el intentu del Gobiernín de facer hexemónica la ‘so’ televisión.
David Rivas demostró otra vegada apocayá que ye un home razonable y fizo pública la so renuncia a participar nes próximes elecciones énte la llaceria na que se tien convertío Andecha Astur. Nun m’esmolez un res lo que pasa nesi partiducu enfotao en buscar torgues al so desenvolvimientu na vida pública asturiana. La so historia, ye la historia de tolos que s’afayen na minoría microscópica porque nun son quién a confiar en naide que tea a dos metros de distancia. Esa xente nun val pa facer llegar a naide un proyeutu de nada, porque nun-yos peta compartilo. Pasen páxina.
Cándido y Morala van ser condenaos a trés años de cárcel por españar el caxetín d’un semáforu en mediu d’una protesta pol caltenimientu de l’actividá del astilleru Naval Gijón. N’una d’eses histories que nel cine la progresía española aplaudió na película ‘Los lunes al sol’, y que tuvo que rodase en Galicia poles torgues que n’Asturies atopó la producción.
La condena a los dos cabezaleros del sindicatu CSI ye la mesma que-y cayó a De Juana poles amenaces y enaltecimientu del terrorismu, y malapenes cuatro meses menos que lo que-y cayó al sociata del grupu terrorista GAL Rafael Vera pol secuestru d’un ciudadanu francés y malversación de fondos públicos. Xusticia ciega.
Dende equí, tol sofitu a esti par de collacios, a los que PSOE e IU fizo yá símbolu de la honestidá énte’l fartonismu y la combayonería pa colos intereses inmobiliarios y especulativos.
D’un tiempu p’acá tamos viviendo un fenómenu nuevu, y ye’l del desprestixu de la xusticia. Apocayá recusaron a un xuez porque fizo un encargu pa un órgenu de la Generalitat catalana y agora diba tener qu’emitir un dictame so’l nuevu estatutu d’autonomía d’aquel país. ¿Bien? non. Pal PP eso ye una victoria de so, pal PSOE una maniobra pa tratar de qu’el recursu de inconstitucionalidá empobináu pol PP trunfe. Esto ye, sea como sea, los dos ‘grandes’ partidos reconocen que la xusticia faenla ellos. O al menos, ye lo qu’entiendo.
Va tiempu que nun disimulen. Les coses tiénenles tan torgaes que nun yos fai falta disimular sobro la separtación de poderes y ese coses qu’afiten el llamáu estáu de derechu y el sistema democráticu.
Tol mundu daba ya por una realidá que esos mesmos ‘grandes’ partidos presionaben, manipulaben y comandaben a les empreses de comunicación pa qu’al votante-y llegara ún o otro mensaxe favoratible al poder de turno. Tol mundu daba por una realidá la connivencia ente poder políticu y económicu. Agora-yos toca a los xueces, personaxes que nun podíen presumir de prestixu social, pero qu’agora amás son presentaos polos propios partidos ‘estructurales’ como marionetes. En fin. Qué mieu.
Güei xulguen en Xixón a Cándido González Carnero y Juan Manuel Martínez Morala. Pal que nun tea enteráu, piden-yos seis años y mediu de cárcel por los disturbios qu’hubiere ente una protesta llaboral del naval na que se frañó’l caxetín d’un semáforu (valoráu en cásique 6.000 euros, que tamién reclámense-yos). La Casa Conceyu de Xixón (PSOE-IU) al traviés de la so Policía Llocal, ye quien empobina una denuncia dafechu surrealista, si detrás nun hubiere un claro interés n’apartar a estos dos dirixentes del sindicatu Corriente Sindical d’Izquierda de la so actividá de defensa de los trabayadores. (Va poco, Cándido ganó’l xuiciu escontra la prexubilación na que-y metieron en Naval Gijón siendo él del comité d’empresa y escontra la so voluntá. Enantes, quixeron unvialu a trabayar nuna sucontrata de la empresa n’Ucrania).
La historia de la Corriente ta enllena de lo que n’Asturies siempre se llamó ‘paisanos’. Demuestra de contino que sigue siendo un sindicatu de clas, un sindicatu cuya prioridá ye la defensa de los derechos de los trabayadores énte grandes operaciones inmobiliaries (véase el naval en Xixón), y especulatives de toa mena. Quiciabes, por eso, pola so dignidá, sigue siendo un sindicatu minoritariu (magar de los sos 5.000 afiliaos).
Cuesta creer qu’a Justo Rodríguez Braga (el so ¿sindicatu o academia de cursinos? UGT tamién participaba nes movilizaciones poles qu’agora se xulguen) fueran a metelu presu como a Cándido y Morala. Pero non, elli ye parte de la ‘famiglia’.
Como yá se dixera va meses en dellos foros, Localia va esplotar la única televisión privada autonómica dixital d’Asturies. Nun ye una sorpresa. Tampoco lo ye el repartu qu’Areces y el so gobiernín fizo públicu güei de les demás llicencies de televisión dixital terrestre n’Asturies. La Nueva España tendrá de facto una cadena autonómica de televisiones llocales al obtener toles llicencies posibles, lo que-y permitirá a esti periódicu empobinar una estratexa de desconexiones que yá se verá si-y furrula tan bien como col diariu. De mano, paez una clara recompensa al mou en que LNE ta tratando dende va un tiempu p’acá al gobiernín.
D’otra miente, el repartu contenta a El Comercio, siempre fiel a la causa, coles llicencies pa Uviéu, Xixón y Avilés, y premia a TeleAvilés, una canal que dende va unos meses entamó a pagar el sueldu a los pocos trabayadores qu’entá-y quedaben, al tiempu qu’entamaba una de les más patétiques y poco profesionales actitúes de tratu servil a la mano que ximielga la cuna. Oviedo Televisión y Televisión Local Gijón caltienen el preste pa seguir emitiendo pola ‘gracia’ d’Areces y compaña, a quien de xuru-yos abulta migaya ambes llicencies.
TeleAsturias ‘La Autonómica’ y Popular TV, xunto al rentista Blas Herrero, son les grandes damnificaes pola arbitrariedá del Gobiernín, y viven agora nes sos propies caNNes l’estilu ‘Soprano’ que ya sofriera cásique en silencio Radio Sele.
El panorama ye el que ye. Areces y compaña, la ‘famiglia’ sociata astur, reparten y alministren como-yos peta, y como-yos dexen, la ‘llibertá de prensa’ aprovechando una llexislación que, por demás, favorez esti control gubernamental y con dineru públicu de los mensaxes que se-yos apurre a la población. Yá sé que la llibertá ye d’empresa, non de prensa, pero coime, disimulái.
P’acabar dexámosvos un sermón illustrativu de cómo percibe Areces la televisión, y como funciona dafechu esi mediu, n’Asturies y en tol mundu. Entiéndese-y bien a esti home, y onde diz de ‘les montañes de Nepal a les biesques de Suramérica’, bien podemos pensar en Cabrales, Somiedu o los Ozcos. El casu ye que la televisión, como diz, uniforma, tresllada mensaxes qu’anulen la diversidá cultural, relixosa, política, y acaba apurriendo una mentalidá na qu’el mundu (n’esti casu Asturies), paez disneylandia (n’esti casu, el parque temáticu proxectáu por Areces p’Asturies). De xuru qu’el mensaxe d’esti curón musulmán ye simplón, pero ye, en esencia, el proyeutu que ta empobinando su ilustrísima Don Vicente.
Asturies merez otra referencia política, otres idees, y éstes tan bien averaes a nós: en Portugal. Ellí desendolcó esti añu el Candidato Vieira una campaña imaxinativa, sincera, próxima a lo que mos prestaría ver perequé d’equí a un par de meses.
Eslóganes qu’esconsoñen a una sociedá entera, promeses reales pa xente real. Vieira, un home d’esti tiempu.
Ta mui feo facer comparances, pero nun mos digáis que lo que se ta viendo yá peles cais y los periódicos d’Asturies tien la credibilidá d’esti home.
Lleo en Asturias Liberal que la Fundación pola Denfensa de la Nación Española (Denaes) va presentase n’Asturies de la mano de Gustavo Bueno y el delegau d’esi ensame, Joaquín Santiago, nel club de prensa del diariu La Nueva España. Nun tengo mui claro qué ye lo que quier esta peña de la Denaes, ni qué España quieren defender, ni si ye verdá qu’España va españar, pero el caso ye que ehí tan, Santiago y cierra España. Españoleando, españoleando, atopé esti videu ilustrativu nel youtube, fala d’España y de La Nueva España. A lo meyor ye col que van entamar la so presentación.
Nun sé si taréis al tantu, pero al PP-y dio pol outing. Dende que se supo que la candidata del PSOE de Avilés ye la conceyala Pilar Varela, dellos sectores de la derecha avilesina enfotáronse en ¿desprestixala? asoleyando ‘rumores’ a mou ‘chistes de mariquitas’ revistíos de ‘apuntes biográficos’ de la susodicha.
Pero la cosa nun podía quedar ehí. Había que ‘destapar’ a esta muyer, sacala del armariu nel que taba metida, glayar al altu la lleva con quién s’acuesta y con quién se llevanta. Y ya lo ficieron cola collaboración, too hai que dicilo, de La Nueva España. Una acusación de nepotismu (sin más argumentu que la sospecha) y negada darréu pola afectada, foi la escusa perfeuta pa apuntar col deu a la conceyala socialista pa dici-y que ‘tien novia’, daque que tamién negó dafechu Pilar Varela.
La cosa tien un puntu. Habrá quien diga que, ‘qué pasa, ¿nun ye normal saber si un conceyal ta casáu o solteru?’. Y (emulando a Xabel) González y González diz: sí, ye normal, siempre qu’el conceyal en cuestión considere que deba o puea dicilo. Porque, de nun ser asina, taríamos xustificando actitúes llamargoses: ¿ha saber la ciudadanía con quién, con cuántes o cuántos, o cómo folla caún de los candidatos? De xuru que la política asturiano diba ser muncho más divertida, pero tamién díbamos perder la perspectiva de lo que ye importante pal país.
Si Pilar Varela ye o nun ye lesbiana, si-y gusta el BDSM o les freses con ñata, a nos, impórtanos un res. Bastante perversión ye tar nel PSOE, qu’eso sí qu’inflúi y ye importante, pa nun votala.
