Al final el ministeriu fiscal, muérganu pel qu’intervién el gobiernu na xusticia, reculó y propició un alcuerdu de conformidá colos catorce acusaos de desórdenes en Cangues d’Onís a los qu’inicialmente pidíen 35 años de cárcel. Too quedó en multes. Los catorce, y les sos families, respiren, como nun pue ser d’otra manera.
Pue parecer una bobada pero cuido que tamos énte dalgo bien interesante. De dalguna manera, ye evidente que la posibilidá d’atopase con too un pastel de protestes durante cinco díes de vista énte’l palaciu de Xusticia d’Uviéu, habida cuenta de la esperiencia recién de Txomin Goñi, nun yera prestosa pa un gobiernín que bastante tien colo que tien: solombres de corrupción urbanística, Bruseles ñegando les perres que falten pa El Muselón, empleaos públicos en pie de guerra…
D’otra manera, el casu de los catorce de Cangues fai que rescample una evidencia: la estratexa d’equiparar tolo que s’allugue a la derecha del PP con tolo que tea a la esquierda del PSOE (sí, tamién bona parte d’IX) pue valir en Madrid, pero non n’Asturies, onde unes fuercies de seguridá con tendencia al chambonismu, y dacuando con vezos duldosos, tan faciendo un esfuerzu vano por equiparar a unos pandilleros racistes con una masa social de bayurosa ya incontestable traxectoria democrática.
El casu de Cándido y Morala supunxo toa una vergoña pública difícil de dixerir pa parte del PSOE xixonés, muncho más pa unes bases d’IX que nun daben créitu a lo que taba pasando. Agora, el Gobiernu nun taba pol llabor de pasar pela mesma situación. Quiciaves, además, la celebración del xuiciu diba servir pa dexar entá más n’evidencia les maneres d’actuar de les fuerces policiales.
Otra manera, ye de destacar l’olfatu periodísticu de los grandes medios asturianos, qu’esta vez supieron anticipase y ver que l’asuntu de los 35 diba quedar pa prau y decidieron, poro, qu’una manifestación de cientos de persones pel centru d’Uviéu nun merecía nin mención. Namás Glayíu y El Comentario.tv informaben y opinaben puntualmente del casu, cola esceición d’una breve crónica de la marcha na edición uvieína d’El Comercio. Sicasí, a lo meyor estos díes, como pasara col affaire Fer, vemos que ‘fuentes policiales’ se lamenten del resultáu del so trabayu.
