Non al pieslle de La Voz de Asturias

Llegóme güei al corréu una carta ‘viral’ que fala d’una d’eses noticies qu’esperes, pero que nun quieres sentir nunca. Fala del cada vegada más prósimu pieslle de La Voz de Asturias: un desastre anunciáu pola mor d’una traxectoria desastrosa que llevó al periódicu a una decadencia constante dende la mitá cabera de la década de 1990.

Se-y podría culpar de too a esti maizón d’enriba y a la so corte d’asesores, de xuru dispuestos a regalar los oyíos d’un críu qu’herieda con malapenes venti años l’imperiu mediáticu de papá. Pero non. El problema vien ya de más atrás, de cuando depués d’una dura fuelga que llevó a qu’el diariu dexara de salir a la cai, la hestórica cabecera asturiana pasara a manes del Grupu Zeta, del floreciente grupu de Antonio Asensio, peculiar personaxe al que se-y atragantó l’audiovisual y, con ello, sus aspiraciones de poder.

Dende entós, La Voz de Asturias caltuvo una llínia errática: dende la guerra a muerte contra Gabino de Lorenzo y su catastrazo, que perdió el periódicu, con consecuencies qu’entá paga pa gayola de La Nueva España; hasta la renuncia a la so propia cabecera na primer ciudá d’Asturies con aquel esperimentu surrealista de ‘El Periodico de Gijón’, pasando pol desastre de la política d’ediciones a finales de los 90, aniciu del declive d’un diariu que foi el más vendíu d’Asturies.

El ERE qu’agora anuncia el Grupu Zeta, con catorce despidos, paez la sentencia de muerte pa un periódicu que vien d’echar a la cai a decenes de trabayadores va malapenes un lustro. Énte esti panorama, namás una movilización seria y contundente, non ya de los trabayadores de La Voz de Asturias, sinon de toa una profesión tan dada a acombayar col poder como la periodística, aparenta manera afayadiza pa salvar un periódicu asturianu que va pagar en bona midida la inutilidá de quienes nun sabríen nin allugar Asturies nel mapa.

Por cierto, equí vos dexo la carta de la que falaba al entamu.

“”La falta de capacidá y de idees nueves que valgan pa superar la crisis a la que los sos xestores llevaron al Grupu Z, devaluó los activos del grupu hasta unes llendes inimaxinables, tanto, que’l pasáu 31 d’avientu, estos xentores presentaron un ERE nel que s’afita el depíu de 533 trabayadores en 26 de les sos empreses, 14 d’ellos en La Voz de Asturias. Pa los que continúen habrá conxelación salarial hasta finales de 2011, asina como un drásticu recorte d’una bayura de llogros sociales y llaborales recoyíos nos convenios coleutivos vixentes.

Además, nel casu concretu de La Voz de Asturias, puxieron en venta la cabecera (del periódicu) col fin d’obtener unos ingresos que sirvan pa “la devolución de parte de la delda contraída pol Grupo Z, ya que la cuenta de resultaos ye insuficiente pa sufragarla”, según argumenten. Los xestores proponen coses como un periódicu con menos páxines, centrando’l so conteníu mayoritariamente na ciudá d’Uviéu y escaeciendo’l pasáu históricu del periódico a nivel rexonal.

Los trabayadores de La Voz de Asturias denunciamos que de forma reiterada se mos negó información sobre esi proyeutu y manifestamos que non sólo ye inviable, nin garantiza la continuidá de los puestos de trabayu nin de la propia cabecera, sinon que ello supón un atentáu direutu a la continuidá d’un diariu rexonal que durante 85 años, día a día, supo recoyer, tresmitir ya informar sobre los acontecimientos ocurríos na nuestra Asturies, a tolos sos habitantes, con quienes caltién un compromisu diariu, acullá de lo qu’estos xestores puean llegar a entender.
Énte eses actuaciones pidimos el to sofitual traviés d’un sitiu web habilitáu pa tal fin. Les señes son http://nocerreislavoz.wordpress.com. Queremos, ente toos, intentar face-ys entender lo que La Voz de Asturias significa pa los asturianos, sobre su vocación rexonal y la esixencia de face-ys buscar unes nueves víes que garanticen el futuru d’esti mediu de comunicación y el de tolos sos trabayadores.””

Responder

La direición de corréu electrónicu nun va espublizase.