Oh Dios mío!!! Enterámonos de que la Sony manda quitar el videu electoral del fíu d’Isolina porque entienden que ye un plaxu del cantar Alejandro de la gran Lady Gaga. Alejandro Fernández, el fíu d’Isolina, ye’l candidatu a alcalde de Tarragona del PP, asina que los de la Sony decidieron mandar un burofax al PP de Teruel. Si ye que ye pa piratealos hasta dicir basta!!!
Dende González y González, tol nuestru apoyu al más friker candidatu de lo que va de campaña.
A naide se-y escapa ya que les encuestes electorales hailes de dos tipos. Unu ye’l de la encuesta interna, ferramienta que sirve pal analís estratéxicu de cada partíu nos tiempos previos a la cita electoral. Eses encuestes nun se suelen asoleyar nun siendo qu’ello beneficie a quien la encargó, y si se publiquen, pasen a formar parte del segundu tipu d’encuestes: les propagandístiques.
N’esti puntu falamos d’encuestes empobinaes nun determináu sen. Preséntense como ferramientes informatives, pa conocer la orientación política, pero siempre pasen pela famosa ‘cocina’ na que los resultaos cuecen, mengüen o xuben como por gracia de llevadurina acordies con una determinada orientación política interesada.
Mesmo que nun hai un mediu de comunicación asépticu, nun hai portada d’Interviú ensin fotoxó, nin carretera ensin barru; tampoco nun hai encuesta que nun tea retocada.
No tocante a les elecciones del 22 de mayu asoleyáronse entá poques encuestes, y toes amuesen aspeutos qu’amenorguen la so credibilidá. Les dos primeres (que recordemos), foron espublizaes en pleno boom casquista polos diarios El Comercio y el madrilán El Mundo. Dambos dáben-y al ex ministro casquista una abultada victoria, magar que diferíen enforma nel volume d’apoyos recibíos por PP y PSOE. Nel casu del diariu xixonés, la encuesta fecha por Asturbarómetro, los socialistes alcanzaben un 21,4% y un 18% los populares. La encuesta de Sigma Dos pa El Mundo dába-y un 27,3% al PSOE y un 22,5% al PP. Dambes encuestes basábanse en datos recoyíos a ente 450 y 500 encuestaos de toa Asturies, nun momentu nel que la expectación polos movimientos d’Alvarez Cascos yera máxima.
Nenguna de les dos encuestes destacó entós pola so apariencia de fiabilidá, habida cuenta de les circunstancies en que se fixeren, y el fechu de que un vuelcu tan acusáu paez, de toes toes, improbable nun electoráu tan conservador col so votu como l’asturianu. Dicíalo esti día Inaciu Iglesias na edición en papel del selmanariu Les Noticies, y nun hai más que ver los resultaos electorales pasaos pa ver que ye verdá, qu’un vuelcu nos resultaos ye tarea mui improbable… pel momentu.
Y agora apaez una nueva encuesta, que se presenta como del primer tipu (interna de Bloque por Asturies-UNA), pero que s’espubliza tolo al altu la lleva que se puede por mor de que vendría a confirmar lo que paez que ya apuntaben encuestes internes d’otros partíos: que Bloque-UNA llogren superar esi 3% de votos que-y da entrada a la Xunta Xeneral.
Hai puntos nos que la encuesta abúltanos con un puntu más de credibilidá que les otres dos. D’una banda, que se base nuna cifra muncho más presentable d’entrevistes (mil llamaes telefóniques), d’otra, que tea llendada a la circunscripción central (les otres dos encuestes tomen Asturies como una única circunscripción). Los resultaos, amás, paecen más acordes col mentáu ‘conservadurismu’ del votante asturianu: una baxada relativamente importante de los apoyos del PSOE (de 15 a 14 escaños, anque la perda en porcentaxe ye mayor), una caída entá más fuerte del PP (de 15 a 9 escaños) y la irrupción del fenómeno Cascos con nada menos que casi un 20% de los votos, lo que-y permite algamar 6 escaños. Un resultáu realmente espectacular. Tres d’ellos, IU caltién el tipu xunto a Los Verdes y llogra 4 escaños, y Bloque-UNA consigue un diputáu, escañu qu’ocuparía Rafa Palacios.
Lo que más choca d’esta encuesta, de fechu, son los datos relativos al grau de conocimientu de los candidatos. Paez raro que los insípidos Javier Fernández e Isabel Pérez Espinosa sean más conocíos que Álvarez Cascos (aunque sea por un porcentaxe de diferencia mínimu), y dicir que más del 70% de los votantes de la circunscripción central conocen a un tal Ignacio Prendes d’UPyD, da que pensar. ¿Esplicaciones? Los procedimientos siguíos na famosa ‘cocina’ de los datos sobre conocencia de candidatos, podrían tener muncho que ver. Y tamién la entruga que se-y fai al encuestáu. Nun ye lo mesmo preguntar ‘¿Conoz vusté a Isabel Pérez Espinosa?’ que ‘¿Conoz al candidatu d’Ideas?’.
Sicasí, equí quedamos coles ganes de saber más, de conocer más detalles d’una encuesta qu’abulta ser la más fiable de les conocíes hasta la fecha públicamente. Porque, polo que mos llega, los sondeos d’usu ‘internu’ que manexen en dellos partíos dan resultaos mui asemeyaos a lo que nella se reflexa… Quizás, tal vez, a lo meyor, ello esplica la discreta acoyida mediática de la encuesta.
En 1945 los Nazis fueron a la lluna – y en 2018 ¡van tornar! Esta ye la base de “Iron Sky”, una comedia escura de ciencia ficción, y con llicencia Creative Commons, que cuenta con un presupuestu de 6.900.000 € recaudaos con donaciones, venta de caxigalines y inversores… (inda falta-yos 900.000 €).
Ta producida por “Blind Spot Pictures” (Finlandia), “Energia Productions” (Finlandia), “27 Films Production” (Alemaña) y “New Holland Pictures” (Australia), dirixida por Timo Vuorensola y protagonizada por Julia Dietze (1½ Ritter), Götz Otto (Downfall), Tilo Prückner (The Neverending Story), Christopher Kirby (The Matrix Reloaded & Revolutions) y Udo Kier (Dancer in the Dark), la banda sonora ponenla los eslovenos Laibach.
L’estrenu ta previstu pa 2012, podeis dar con más información (y aidar colos 900.000 € restantes) na web oficial de la peli.
Llegó’l día en qu’esti minúsculu universu nel multiversu divín de Raticulín, diz ‘so’. Pararáse’l mundu tal y como lo conocemos p’asistir cola bocona bien abierta y les rodíes cincaes nel formigón a l’apertura del Centro Cultural Internacional Oscar Niemeyer.
Tamos énte la gran obra, la robla d’una traxectoria espiritual empobinada con inspiración celestial por un Gobiernu que supo tener presente a los sos súbditos; esos qu’esta nueche asistirán al aquelarre místicu de Woody Allen y The New Orleans Jazz Band. Namás dende l’altor del cielu qu’abelluga’l Centru Niemeyer saben si será azar o conxuru lo que faiga a la masa decidise pol suicidiu colectivu o l’afalagu unánime a les maquinaciones inmaculaes de Natalio Grueso, el mesías de l’alta cultura encargáu nesti tiempu de recoyer lo más guapu de les margarites coles que nutrir a la corripa .
Sicasí, hailos qu’entá nun foron capaces d’acolumbrar la divinidá de la conspiración que vien de llantar n’Avilés esta catedral de la sabidurida, esti presente de los seres supremos al vulgu que nagua por sintise próximu a esa forma nueva d’espíritu santu que ye’l reconocimientu colectivu, la fama como valor divín, acullá del valir intelectual o artísticu.
Hailos que siguen pensando que les caxigalines, los detalles mundanos como’l costu, los presupuestos o los criterios de programación, son motivu d’alderique públicu. Entá nun fueron a ver que tamos énte una obra trescendental, ayena a la xestión mundana, que ta un nivel por riba de la intelixencia media y los usos humanos. Énte’l Centru Niemeyer, nun hai alternativa posible: o te sumes a l’adoración colectiva, o nun yes. El cosmos ye incontestable.
Y menos mal que nun se viera entá xente a la que nun-y gusta razonadamente esi edificiu calcáu a los que la factoría Niemeyer vien construyendo dende va tres décades. Nin persones que nun sean a ver l’aciertu ‘cultural’ d’una inversión puramente propagandística. Porque tocagüevos, resentíos y conspiranoicos, hailos en toles catacumbes, queríos hermanos.
Alucináu me tien esti paisanón. Tolos eslóganes publicitarios d’adidas, nike y demás-y vanm que ni pintaos: just do it, impossible is nothing… Si el deporte ye superación personal, el ye campeon del mundu. Ya tengo deportista al qu’almirar. Nesti videu cuenta la so historia, cómo dexó de tener pesu afayadizu pa la llucha llibre y se pasó al sumo, y como lluéu quixo demosstrase a sigo mesmu que yera capaz de correr una maraton… y ta acabante de facelo…
http://www.youtube.com/watch?v=yFY500suH_I
Pa vela nun tamañu más curiosu, calca na imaxe.
Estos del PSOE asturianu son unos bocayones, muncho quexase de lo malín que ta el buenu del vieyín de Riopedre, allá na fría cárcele, y lluéu nun son quien a axuntase unos cuantos pa emprestá-y un dinerín pa pagar la fianza. ¿Nun ven que na familia del ex conseyeru nun tienen pa salvá-y la vida a esti probe paisanu, que son xente humilde? Vete del PCE pa esto!!
Esti rapazón tan curiosu que veis equí enriba ye Alejandro Fernández, el fíu de Isolina y Angel, que cuantayá dexaron “la ganadería vacuna en los verdes y hermosos pastos asturianos” pa buscase la vida en Catalunya. Agora, Alejandro quier ser alcalde de Tarragona col PP.
De verdá que tamos énte un de los más bizarros de los candidatos conocíos hasta agora n’España (tuvi dudando si facé-y una entrada na Asturian Weird y too). Ye que el videu que-y ta faciendo famosu lo pide.
http://www.youtube.com/watch?v=4-FbT0u0ros
Pero’l friquismu d’Alejandro va acullá d’esa ‘travesura’. Por exemplu, Alejandro diz que ye ‘lliberal’, como tantos, aunque el mesmu reconoz ‘fisures’ na solidez de les sos convicciones: “A algunos les resulta paradójico el hecho de que un defensor a ultranza de la libertad en la enseñanza haya estudiado siempre en la pública” (8-o) diz na so web. Toos sabemos que ser lliberal ye llamar de ‘usté’ al votante que ta flipando col videu en cuestión.
Alejandro tamién tien un claro enfotu contra la inmigración mala. Non la inmigración llegada de los ‘verdes pastos’, non. La inmigración qu’enllena de moros y rumanos los barrios de la buena xente charnega. Asina, esti gran intelectual lliberal diz de les barriaes tarraconenses d’aluvión:
“Nadie compró entonces su piso para que, años después, al lado haya un piso patera con 40 inmigrantes ilegales durmiendo con el sistema de ‘cama caliente’. Nadie compró su piso entonces para ver que en pleno 2011 haya gente que tire la basura por la ventana o que sólo unos pocos vecinos paguen la escalera y se queden sin servicios. Y no hay derecho. (…) La gente de los barrios tampoco tiene porqué aguantar que a escasos metros de sus pisos no se respete la igualdad entre hombres y mujeres y algunos derechos fundamentales. Y tampoco tienen porqué aguantar que algunos que no conviven con esa realidad les llamen racistas”.
Como tol mundu sabe, el sistema de ‘cames calientes’ inventáronlu los moros de cuando vinieron a la Ensidesa. Y nos barrios de Tarragona y toa España, el civismu, el pagu relixosu de cuotes de la comunidá y la igualdá ente homes y muyeres, foi siempre seña d’identidá hasta que llegó toa esta chusma de la patera.
Tien razón Alejandro, nun se-y puede llamar racista por pensar asina. Simplemente, como dicimos na Asturies de verdes pastos de la que colaron Ángel ya Isolina, simplemente ye “tuntu p’alcalde”.
Una última perla: diz Alejandro que nun ye nacionalista. “No soy nacionalista. Me siento tarraconense, catalán y español con orgullo”. XDD
