¿Qué ye pa ti un ordenador vieyu?

Yá falé en Ta pa Ponga de la manía que tengo de reciclar equipos informáticos y busca-yos otru usu cuando, supuestamente, ya nun sirven (“el winbugs nun tira, voi cambiar d’ordenador”).

Esti recilaxe ye en realidá motiváu por una necesidá, que yera tener na habitación onde duermo un ordenador prendíu 24 hores. Necesitaba un equipu silenciosu (pa poder domir sin ruidos de ventiladores) y que gastase poco. Pos la solución llegó de dos bonos amigos que me regalaron un vieyu portatil que usaben pa un proyeutu que rastrea semeyes del espaciu (nun m’enteré mui bien prometo entrugar, que ye cosa bien friki).

¿Qué pa que quiero un ordenador funcionando 24 hores? pa distintes coses. La primera ye que necesitamos un servidor onde poder probar los desendolcos que facemos pa Altuxa.com pero ya que tamos… vamos aprovechalo. González y González tamos separtaos físicamente por unos cuantos quilometros y que meyor forma de compartir documentos que tener un servidor ftp priváu en casa… pero hai más… préstame abondo la música, pero soi mui vago, y eso de carretar cds da pereza… solución… un servidor priváu de streaming de audiu, así puedo escuchar la mio música favorita nel pc, nel portatil, nel trabayu o en sitios con wifi abiertu… pero vamos esprimilo más… aMule daemon ye un aMule ensin entornu gráficu y que puedo controlar dende una web… 24 hores de mula nun ta nada mal…

Yá sabeis pa que queremos el aparatu… El portatil en cuestión ye un Pentium II con 64mb de RAM, 4,8 Gb de discu duru, cola pantalla reventada, ensin batería y ensin tarxeta de rede.

¿Como solucionamos estos problemes?

1- Pantalla reventada: lo más fácil, el ordenador tien salida VGA onde coneuto el mio monitor (una vez fecha la instalación del sistema nun voi necesitar monitor).

 2- Ensin batería: esto nun ye problema porque va tar prendíu 24 hores y diba quedar ensin batería de toes formes.

3- Tarxeta de rede: El portatil trae 2 ranures PCMCIA, por 12 € consegui una tarxeta de rede pal “vieyu” portatil.

 4- Espaciu en discu: anque 4,8 gb tan de sobra pa montar un pequeñu servidor web, yo necesitaba más espaciu. Tenía tamién un discu duru esternu de 2,5 pulgaes (que son los que monten la mayoría de portátiles) con 90 gb de capacidá, podía enchufalu por usb pero el únicu puertu usb del portatil ye 1.1 en vez de 2.0 polo que diba ser mui llentu pa copiar datos. Pensé tamien en usar una tarxeta pcmcia d’usb 2.0 pero la de rede nun dexa sitiu pa meter otra. Entos lo que fice fue romper el precintu de la garantía del discu duru esternu, abrir la carcasa y cambiar el discu del portatil.

 Y fechu, agora namás que mos queda instalar y configurar el sistema (igual otru post más alantre pa esplicar esto). Yo pa servidores prefiero Debian, uso la instalación de rede, instalé el sistema básicu y SSH así ya nun necesito monitor ya que puedo coneutame de forma remota dende cualesquier terminal pa siguir la instalación de paquetes y pa configurar el sistema.

 Agora yá tamos trabayando nun “fotomatón” con GNU/Linux pa dona-ylo al CAO pa doilacara.net ;-p