Nesti artículu vamos espublizar la cronoloxía d’un viaxe esperimental (y real) pa ver si hai manera de dir en tren dende Asturies a Francia nel día…
06:24
La idea yera salir de Tresona pero nun hai tren pa facer la conexón asina que salimos de Candás, de momentu retrasu de 7 minutos
Vamos siguir l’itinerariu según horarios oficiales de Renfe y Euskotren. Salida de Candás a les 6:16 (salió a les 6:24 y ye el primer tren del día) pa llegar a Hendaia a les 21:22 nun trayectu que lleva más tiempu (si cumplen horarios) que dir d’Hendaia a Berlín.
06:52
Primer tresbordu en Xixón, a les 7:05 arranca el tren que va llevanos al Berrón.
07:36
Llegamos puntuales al Berrón onde esperamos pol tren pa Santander que se supón sal a les 8:19. Dos hores depués de salir de Candás.
08:27
Embarcamos nel Berrón nel tren que nos dexará depués de más de 5 hores en Santander. Tren relativamente cómodu, pa ser Feve, anque ta puerco y nun hai sitiu pa maletes nin pa bicis…
08:40
Como salimos de Candás, una marañuelina pal café de Ca Silverio. Estos trenes nun tiene coche restorán y el viaxe ye bastante llargu. Acabantes de salir de La Pola Siero y más de dos hores de viaxe. Si el viaxe fuera a Madrid ya hubieremos pasao Llión.
09:28
Tres hores y 10 minutos dende que salimos y dexamos atrás la rede de cercaníes d’Asturies… saliendo de L’Infiestu camín del oriente estremu…
09:40
Acaba pasar la revisora, como tenemos el bonu de cercaníes valnos hasta L’Infiestu y podemos sacar en tren el billete de L’Infiestu a Santander. 12,80€. Infórmanos de que en Llanes tenemos que cambiar de tren… 🤔
10:40
A piques de llegar a Nueva, en Llanes, (4 hores y 25 minutos de viaxe) llevamos 5 minutos de retrasu… si nun va a más llegaríemos a tiempu pal tresbordu en Santander… (Ver Asturies dende el tren la verdá que presta)
11:23
Depués de traseganos a otru tren en Llanes siguimos viaxe arrastrando retrasu de 7 minutos. Viaxa bastante xente, si lleguen funcionar bien, tener frecuencies (hai dos al día) y echar un tiempu razonable yo nun se como vendríen…
5 hores de viaxe (en coche ya taríemos n’Hendaia ya inda nun salimos d’Asturies)
11:50
5 hores y media y entramos n’Unquera… nun ufren corbates nel tren asina que siguimos con marañueles (vamos llegar rodando)
13:16
Dexamos atrás Torrelavega y paez que el tren recuperó el retrasu de 10 minutos qu’acumulaba, paez que la vía ta meyor a partir de Cabezón de la Sal y va más rápidu. Paez que llegamos pal tresbordu críticu de 20 minutos en Santander (Renfe nun garantiza esa conexón porque suel haber retrasos)
13:59
Salimos de Santander (ensin tiempu pa cagar y colar) y a piques de perder la conexón porque la xente de taquilla nun yera a danos un billete pa Bilbao, abriónos los tornos y vamos ensin billete que sacaremos en tren…
Candás – Santander 7 hores 22 minutos (llegó puntual)
15:17
Cruciando la ría de Treto a les 9 hores de viaxe…
15:58
A les 9 hores y 40 minutos entramos nel País Vascu per Karrantza… y daste cuenta porque de secute la megafonía del tren deprendió vascu… (como si fuere escarrilar o dalgo por usar les dos llingües nel tramu cántabru)
17:25
Depués dalgo más de 11 hores (y con 30 minutos de retrasu) aportemos a la estación de La Concordia, bien guapa, en Bilbao. Toca dir a la estación del cascu vieyu pa garrar l’Euskotren a Donostia. Hailo cada hora y tendríemos a les 18:00 pero como tenemos amigues espatriaes equí allargaremos la parada…
19:57 (17:57 si nun hubiéremos parao)
Siguimos viaxe depués de descansar un poco en Bilbao… y paez que saltamos de sieglu si compares los trenes d’Euskotren colos de la Renfe: Silenciosos (tola llinia de Bilbao a Hendaia ta electrificada) suspensión neumática en cuenta de muelles y sí son d’anchor métricu tamíen. 11 hores 45 minutos.
Anque como pega son trenes de cercaníes más que rexonales y los asientos son más incómodos… a ver como llegamos.
21:22 (19:22)
Nun vamos llegar a Hendaia, porque vamos quedar nun pueblín de Gipuzkoa que meyor nun conozáis que ya ta enllenu turistes, pero la revisora acaba confirmame qu’Euskotren sí garantiza les conexones ente los sos trenes, polo que si pasara dalgo ponen buses o taxis pa llegar al destín final. Cosa que Renfe nun fai, polo que sí. Puedes dir d’Asturies (dende la zona central namás) a Hendaia nun día siempre que nun retrase muncho el tren que va hasta Santander y nun pierdas la conexón con Bilbao, que nun ta garantizada. Nesi caso habría que facer nueche en Bilbao.
Si lo cosigues son, dende Candás, 15 hores y 6 minutos les que necesites pa llegar en tren a Hendaia.
Ablucamos cola puntualidá británica (ye puntualidá vasca pero entiéndese) d’Euskotren pero claro son trenes que nun tan abandonaos como los de la Renfe, vense inversiones y meyores en los trenes, les víes, les estaciones en too…
Vamos tomar dalgo y equí acaba esta historia… queda la vuelta pero esa ye pa nós 😉