Ganó’l PRI

sinaloa2.jpg

Nun se podía esperar otra cosa. Siendo realistes. Entá nun tamos tan maduros n’Asturies como pa cambiar el votu como fixeron en Méxicu, y ellí costó-yos cásique setenta años. Asturies ye un país avieyáu, nel que la mayoría la xente entá vota pensando na Guerra Civil y los maquis, que son socialistes como del Sporting, hasta la muerte, y aunque tea en segunda ‘regional’. Asina, nun se pue esperar un cambiu, un vuelcu electoral curiosu, y menos cuando les coses tan como tan ente la COPE y la Ser.

Lo que sí tien más miga ye la ‘burbuxa’, esa especie de país microscópicu en dentro d’un país minúsculu que ye l’asturianismu. Estes elecciones, pesie a lo que digan munchos, nun son de fracasu. Y nun lo son porque naide podía esperar otra cosa… salvo quienes confiaronlo too a la carta Uras-Pas. La cosa ye que tamos como tábamos, anque con un mínimu d’esperanza si de verdá hai ganes de facer daqué. Y voi desplicame darréu…

Sigui lleendo Ganó’l PRI

Priísmu

sinaloa2.jpg
Hai una película de Cantinflas, nun recuerdo’l títulu, na qu’el célebre actor tien un diálogu nel que hai una muyer esmolecía porque cree que nun va ver crecer al so fíu y diz:

-Ay, ya no voy a saber qué votará cuando sea mayor!!

A lo que Cantinflas-y retruca:

-¿Pues a qué va a ser?… al PRI.

Pasaron como cuarenta años dende que Mario Moreno fixera aquella película pa qu’el Partíu Revolucionariu Institucional dexara’l gobiernu de Méxicu, y fízolu pa dexalu en manes del PAN (dalgo asina como’l PP d’equí, pero a lo mexicanu). Llueu llegaríen nueves presidenciales col PRD a puntu de ganar les elecciones, pero yá yera muncho pal ‘stablishment’ mexicanu, pal gringu y por estensión pal européu, tener a un izquierdista como López Obrador na presidencia. (La campaña pa desacreditar y nun desplicar nos medios internacionales a esti partíu, única referencia potente de la izquierda mexicana, foi otra historia que nun cabe equí).

El caso ye que cuido que, o muncho se mueve la cosa, o n’Asturies tamos nel camín d’atopanos un día col chiste de Cantinflas. Funcionarios y prexubilaos cautivos yá tenemos enforma, control mediáticu tamién, una marca política averada a un pasáu lexendariu de fazañes obreres escontra los permalos burgueses, curones y fartones, tamién. Namás mos falta que pase el tiempu.

Axenda

Esti xueves qu’entra, (MAÑANA) a les 8 la tarde, concentración énte la casa conceyu de Xixón. Imprescindible: llevar un céntimu d’euru pa pagar los cinco mil y pico euros que-yos piden a Cándido y Morala pola cámara videu famosa. Cuido que Churruca nun va tar per elli. O sí, que tamos en campaña y a lo meyor promete que va pidir l’indultu pola gracia de dios.

Ver el vídeu en Youtube

Les coses de mesié D’Hondt

Paez que non, pero quien corta’l bacallau equí ye un paisanucu belga muertu en 1901. Mesié D’Hondt foi l’inventor d’esi sistema tan ‘perversu’ que-y quitaa los probes pa da-ylo a los ricos. En realidá, el so sistema tien como oxetivu garantizar mayoríes estables nunos sistemes parlamentarios representativos. Los partíos con más votos tienen preferencia a la hora d’asignar los escaños tres les votaciones y paez de dalguna manera bastante razonable.

La cosa ye cuando entá se-yos ponen más torgues a la entrada nun parlamentu de les minoríes. Asina, por exemplu, nel sistema electoral español un partíu nunca nun algamará un escañu, magar que-y correspondiera pola llei D’Hondt, si nun obtién un mínimu del 3% de los votos (nos parlamentos autonómicos) o el 5% nos conceyos. Esto se xustificaría pa evitar opciones ‘extremadamente minoritaries’, pero lo cierto ye que dexen fuera miles de votos naquellos parlamentos onde l’escañu ye especialmente difícil de consiguir (como ye’l caso del asturianu).

El sistema D’Hondt, d’entrada, pue paecer avegosu d’entender, pero nun ye pa tanto. Calcando equí podéis esfrutar d’un simulador d’asignación d’escaños qu’amuesa de forma clara cómo se fai’l repartu. Por exemplu, si utilizais los datos reales de les elecciones asturianes de 2003, veréis que a Uras-y hubiere correspondío un diputáu polos sos 17.552 votos, y que’l Pas quedara nun intre d’algamalu colos sos 11.376. Sicasí, como nengún d’ellos algamare’l 3% esixíu de votos, los tres partíos ‘grandes’ repartiéronse entá nada menos que CATORCE poltrones. Y ye que, con la participación de les elecciones últimes, hubieren necesitao, polo menos, 18.700 votos pa entrar na Xunta Xeneral. Casi tantos votos como lleendes urbanes.

Dalgo asemeyao yá pasara en 1999. Entós, aplicando estrictamente la llei d’Hondt hubieren entrao nel parlamento el Pas y IU tendría cuatro escaños envede los tres que-y asignaren a la fin. Sicasí, dambos fueron a sumar la mayoría absoluta del PSOE. Ye lo que hai. Agora podéis entreteneros faciendo quinieles col simulador.

Unidá pon el güevu

Germán Abad, cabezaleru d’Unidá y candidatu pel Oriente, escribe en El Comentario.tv un artículu sobre lo que pretende ser la coalición y lo que ye la preba de la so aición política nos tiempos últimos. D’una banda, les aiciones xudiciales a la escontra del PXOU de Llanes, na que s’enfrenta al Gobiernu socialista y a tol poderíu constructor. De la otra parte, la denuncia pol llibru ‘Construyendo Asturias’, misteriosa publicación que por sí mesma simboliza la concepción de la propaganda pola parte del Gobiernin FSA-PSOE-IU-BA-LV. Nesti últimu caso, Abad cuenta qu’Unidá yá punxo el güevu, yá adelantó l’aval que-y piden los xueces pa meter p’alantre a nun se sabe quién ¿el gobiernín ‘d’izquierda plural’?, ¿a les constructores agradecíes?… Toles desplicaciones teneisles na estaya de colaboradores de El Comentario, o nesti mesmu post calcando darréu.

Sigui lleendo Unidá pon el güevu

Encuestes

binguras.jpgToquen encuestes. Como nun podía ser d’otra manera, les encuestes tiren a lo cómodo. Nada de sorpreses bultables. A lo meyor, IU pierde un diputáu en favor d’Uras-Pas ¿?, a lo meyor participen el 68% de los eleutores ¿?, a lo meyor gana el PSOE, a lo meyor gana el PP, según el periódicu que mires… Lo curioso ye que d’esta mena, toos contentos. Unos llamen a la participación (a más alta, dicen que gana el PSOE), otros a frenala (ta too fecho, gana el PSOE, quedo en casa). Poro, nada nun val pa nada. Y nun ye porque a Unidá nun-y dean nengún resultáu afayadizu (lo contrario sedría ablucante, ya que les encuestes entamaron a facese’l 1 de mayu y nunca nun hubo un partíu nuevu que reconocieren como valoratibles nes encuestes, nin siquier los Ciutadans de Catalunya), sinon porque a la fin, too quedará igual.

¿Que saca Uras-Pas un diputáu?Pues norabona pa Marqués, que va tener el culu aposentáu cuatro añinos (o dos, si cumplen lo de la alternancia qu’el Pas incumplió cola UNA, de cuando sacó’l diputáu va 12 años). Porque nada más. Eso nun-ys diba poner nerviosos nin a PSOE nin a IU, que diban poder acombayar a gustu ensin una izquierda que lo fuera de verdá tocando los güevinos na Xunta. Tiempu al tiempu, y al platu vendrás arbeyu. Pero bueno, chico, si al Roxu y al otru-yos toca dalgo, alégrome por ellos.