Category: Llingua

¡¡Viva la provincia de Oviedo!!

Pues ya ta consumao. PP y PSOE acaben d’acordar la vuelta a una Asturies na que los bables yeren una peculiaridá prestosa pa les poesíes y los cantarinos de chigre, y nada más.

Como bien diz Atlantic Prau, el PSOE y el PP acaben d’acordar la derogación de la Llei d’Usu y Promoción del 98 (si non, ¿qué pinta esi puntu de la nueva llei que s’aprobará con mayoría de dos tercios?).

Esta ye la culminación de toa una estratexa, empobinada a aniquilar cualisquier opción que nun pase per un alcuerdu entre PSOE y PP. Quien pieslla emisores de radio con llicencia, quien promueve la prohibición del usu del asturianu, quien ta avezáu a comprar voluntaes, s’atopa nun puntu nel que se ve capaz de da-y el puntu final a esti tema de los bables, l’últimu requexu mínimamente potente y organizáu de contestació cívica, de crítica. Y lo fixeron güei.

La verdá, pa esto nun paga la pena l’autonomía. Una autonomía que nun se desarrolla, que nun medra como colectivu humanu, nun ye más qu’un descomanáu comederu (nun hai más que ver de qué viven estos redactores del estatutu).

Nun val pa nada. Prefiero la Diputación, ye más sincera. L’autonomía, pa quien la quier: Euskal Herria, Catalunya y, quiciavis, Galicia y Andalucía. Les ‘naciones’ que dicía l’editorial del Grupu Zeta que namás se censuró nel boletín de la provincia La Voz de Asturias.

Joaquín Aréstegui diz non, ¿soprendíos?

Joaquín Aréstegui diz nones, y tovía hai quien diz que ye una opinión ‘personal’ del cabezaleru del PP. ¿Daquién puede sorprendese pola rápida anuncia de que d’oficialidá ‘nones’?

Joaquín Aréstegui, pa quien nun lo sepa, ye l’home de confianza d’Ovidio Sánchez, quien-y apurre’l cachu de cerebru qu’al llavianés-y falta pa facer discursos y declaraciones amañoses, quien-y marca estratexes, quien-y diz lo guapu y llistu que ye depués d’agarrar la depresión tres de perder una elleición tres d’otra.

Aréstegui ye un home llistu, intelixente, con un nivel mui periba la media de la política asturiana. Ye un estratega diz que maquiavélicu, y sabe cuándo dexar facer a los suyos y cuándo  cortar polo sano. Pa él, el problema llingüísticu n’Asturies nun ye más qu’un peón na so estratexia, un peón del que nun sabe mui bien qué va sacar (cuida que más bien poco), polo que nun-y importa un res dexar que-y lu coman y garantizase asina otres pieces más valoratibles nel alcuerdu económicu y de poder que va roblar cola FSA.

Porque lo importante pa’l PP nel tema l’estatutu ye sacar dalgo… ¿pol bien de los asturianos? Non, pol bien del partíu y de los que faen carrera nelli. Como la FSA, tamién nagua por un bipartidismu que-yos permita afitar esi comederu. Pa manexar dalgo, faise meyor ente dos qu’ente tres.

Aréstegui se xuega munchu, política y personalmente (más o menos, nel so casu, ye lo mesmu), como p’andar con boberíes col tema la llingua. Siéntolo polos del Círculu Lliberal, que a esti pasu van quedar ensin vaselina en dos díes.

Y va él y la ḥode

Güei dibemos escribir una entrada poniendo a parir a los trés tontinos qu’entraron al despachu de F. F. de C. a toca-y los coyoninos. Díbemos preguntanos qué ye lo que pretendíen, que si queríen dir de gallos, que si ye que vieron Los Soprano la nueche anterior o qué. Díbemos dexar pa prau comentar la cobertura informativa d’esta trastada de guaḥucos, que ye lo que ye, y díbemos ponenos nel llugar del propiu F. F. de C., entendiendo que la visita d’estos nenos acabara por hincha-y les gorxes.

Pero va el menda y se descuelga con unes declaraciones nel diariu El Comercio qu’acaben por descomponenos dafechu. Fala d’ataques ‘asturtzales propios del entorno etarra’, y queda tan anchu. Fála de “métodos”  propios “del terrorismo etarra”,  como “colgar en Internet la foto del enemigo”. Y ehí ya l’alucine algama máximos histéricos.

Como esti ye ún de los blogues que tien la so semeya sacada de la so propia web personal nel servidor Uniovi,  sentímonos dafechu insultaos. Personalmente, soportamos meyor que nos llamen fíos de puta per corréu a que nos venceyen a la puxarra etarra y batasuna.

Una de dos, o nun tien nin idea de lo que ye l’entornu etarra y los sos ‘métodos’, lo que ye recibir amenaces, o sí lo sabe, y aprovecha la connivencia mediática pa criminalizar un movimientu cívicu al que nun se-y pue atribuyir nin una triste barricada. Porque ye cívicu, porque pide una reforma llegal, non un cambeu de réxime.

Va poco ficimos una ‘rectificación’ de broma, pretendidamente irónica pol llamáu de dellos profesores a nun atacar a F. F. de C. Equí entendímoslo como ún inocente llamáu a nun opinar, que ye lo que quiximos facer dende un primer momentu. Pero vemos que non, que pecamos d’inocentes y que lo que se nos taba diciendo yera que cuidadín, que tolo que digáis o faigáis va ser utilizáu pa desacreditar al movimientu de reivindicación llingüística colos peores argumentos.

Y nós creyéndonos xente normal, democrático, parte de la sociedá… llibres pa opinar sobre una decisión qu’algama gran trescendencia pública y que foi promovida por un señor con nome y apellíos, non por un home al qu’haya que referise poles sos iniciales, como si d’un presuntu delincuente se tratara.

Rectificamos

Énte las preocupación amosada por mediu centenar de profesores de la Universidá ‘Uviéu pola repercusión pública de la enmienda roblada por ún de los sos collacios y refrendada pol votu d’otros 33, rectificamos la nuesa entrada tocante a la cuestión. D’esta manera, queremos amosar el nuesu respetu fondu pola pretensión de los profesores de caltenese como casta inteleutual d’intocables, y pola mui académica y nada politizada enmienda presentada pol profesor agraviau.

fotodos.jpg

Esti home ye F. F. de C., el profesor que firmó la enmienda parcial que la xunta de la faculta de filoloxía de la Universidá d’Uviéu aprebó por una axustada diferencia, lo que llevó a la dimisión de la decana Ana Cano, y que supón que la llingua, con perdón, qu’emplegamos nesti blogue nun merez ser materia d’estudiu al mesmu nivel qu’otres llingües na universidá asturiana, nel marcu qu’ufre el nuevu espaciu europeu d’enseñances universitaries.

La pregunta (con perdón) ye: esti gran profesor, que tantu sabe de perífrasis verbales nel español d’anguañu, ¿hubiere roblao la mesma enmienda si l’asturianu fuere oficial? Nun sabemos..

Quienes votaron la enmienda de F. F. de C. nun fucieron otra qu’apostar por esi modelu que l’Academia Francesa promueve, refugando la reconocencia de les llingües minoritaries.

El señor Gotor ye rector.

Ana Cano, ye filóloga.

Esto, cola oficialidá, nun pasaba

Esti home ye’l ‘profesor’ que firmó la enmienda parcial que la xunta de la faculta de filoloxía de la Universidá d’Uviéu aprebó por una axustada diferencia, lo que llevó a la dimisión de la decana Ana Cano, y que supón que la llingua qu’emplegamos nesti blogue nun merez ser materia d’estudiu al mesmu nivel qu’otres llingües na universidá asturiana, nel marcu qu’ufre el nuevu espaciu europeu d’enseñances universitaries.

La pregunta ye: esti señor, que tantu sabe de perífrasis verbales nel español d’anguañu, ¿hubiere roblao la mesma enmienda si l’asturianu fuere oficial? Non, porque él (ta visto) cuida que lo meyor ye que l’asturianu tenga’l mesmu tratu que tuvieren el vascu, el catalán o el gallegu na universidá franquista, la mesma que munchos de los qu’ayer votaron la so enmienda echen de menos, y cuyu modelu se caltién en bona midida na provincia d’Uviéu.

Ayeri, quienes votaron la enmienda del ‘profesor’ Féix Fernández de Castro, qu’asina se llama, nun fucieron otra qu’apostar por esi modelu que l’Academia Francesa promueve, refugando la reconocencia de les llingües minoritaries non por criterios llingüísticos, nin siquier sociollingüísticos, sinon por meru nacionalismu, el nacionalismu qu’asocia nación y llingua (nun sé si tamién raza), el nacionalismu espansivu y uniformador que tan poco tien que ver con una institución académica.

¿Y el rector Gotor qué, otra vez campeón d’Europa? O ye que cuando-y preguntaron el día anterior y dixo aquello de qu’eso de la titulación propia pal asturianu yera otru cantar… ¿nun sabía lo que se cocía? ¿Yá ye papel moyáu lo que firmó? Paezme qu’esti home mancha, cuidadín con arimase.

Por cierto, Ana Cano, twelve points

Doi la cara pola Oficialidá… plugin pa WordPress

En http://wiki.altuxa.com/WordPress#Doi_la_cara ta el plugin p’amosar les semeyes de Doi la cara pola Oficialidá colgaes en Flickr. Les descargues y instrucciones tan nel enllaz anterior, y podeis ver el resultao a mandrecha.

Probelu en Firefox, Konqueror, Epiphany, Opera, Camino y Safari ensin problemes. Nun tengo Winbug$, polo tanto nun tengo Explorer, y seguramente que rederice mal pa variar. Si alguien quier facer un hack pa igualo agradeciría que avise pa actualizalo.

 doilacara_05.jpg