Bruce Springsteen quier acabar cola música

O eso ye lo que según determinaes entidaes de xestión, busca Bruces Springsteen al colgar n’internet el so discu nuevu en MP3. Haz unes selmanes salió la noticia de que ponía en descarga el primer single de “Magic” y güei fae lo mesmu col discu completu. Según el propiu bruce ye una forma de promocionar el so discu y los conciertos, que tan a la venta tamién n’internet.

El fechu de que seya precisamente Bruce Springsteen y non otros los músicos que faen este tipu de coses ye bien significativu. Bruce Springsteen ye quiciabes un músicu con tal reconocimientu y exitu que puede decidir que facer cola so música sin que nin siquiera les grandes multinacionales (que viven del so trabayu) puedan negase a colgar el discu na rede. Con esto lo que quiero decir ye que anguaño los músicos son los que tan amarraos por discográfiques y entidaes de xestión (que nun son más que un sindicatu vertical onde hai patronos y trabayadores) tan amarraos porque ellos tienen la pasta y el poder, pero claro Bruce puede decir, pos marcho pa con otra compañia… Entos ¿quienes son los malos de la película? ¿quienes son los que acaben cola música zarrando festivales y llocales con direutos?

Que naide s’engañe, cada vez la xente merca más música (los propios datos de la $GAE lo dicen). Cuando zarren tiendes de discos dicen que ye por culpa de les descargues d’internet, pero yo entá nun fui capaz a baxame del emule medio kilu de picadillo y les carniceries de barriu tamien zarren, igual tien más culpa “Carrefull” que internet.

Amás que polo xeneral cuando daquién siente dalgún discu que-y presta va dir a buscalo, falo de xente a la que-y presta la música, por supuestu que nun voi mercar el Ibiza Mix, pero si que me presta garrar una caxina con semeyes y un diseñu trabayau, tener la referencia física d’un soníu que me diz algo.

GNU/Linux nes escueles ruses… nun se yo…

Ayer salió la noticia de que’l Gobiernu rusu quier tener GNU/Linux en toles máquines de les escueles del país pal añu 2009. Falen de que van usar la distribución rusa AltLinux y que entamrán a facer pruebes nel oblast de Tomsk, nel krai de Perm y na república de Tataristán en 2008.

Va tiempu que dexé d’allegrame por estes coses, y ye que d’un tiempu p’acá toi fartu de sentir grandes campañes gubernamentales pal usu adaptación y promoción del software llibre que al final acaben en papel moyáu y en contratos “muchimillonarios” cola empresina de Bill Gate$. Vamos que da la sensación de que faen estos anuncios pa llamar l’atención de Micro$oft y conseguir un descuentín (o un maletín).

Yo entá puedo entender (anque cuesta) que un usuariu perezosu por nun cambiar siga pagando la llicencia d’usu del Window$, pero cuando falamos de empreses y organismos públicos, que cuenten con personal pa facer mantenimientu de los equipos, el fechu d’usar aplicaciones privatives ye una amuesa de la so incompetencia xestora.

Y nun falo por falar, iniciatives como la de la Xunta d’Estremadura amuesen que’l apueste pol software llibre trae munchos más beneficios, y nun solo económicos, que’l privativu.

El post-franquismu arriba a Asturies

El post-franquismu (que non los nostálxicos del xeneralísimu) ya tien quien lo represente n’Asturies. Ta acabante de presentase l’agrupación asturiana de Ciudadanos, formación qu’en Catalunya algamó tres poltrones nel Parlament por mor de la campaña que-yos fizo El Mundo y La Razón, y qu’acabó por fundir al PP de Piqué.

Lo de post-franquismu nun ye porque sí. Ye lo que son, o polo menos ye lo qu’evidencien les sos declaraciones primeres n’Asturies. Nun son el post-franquismu nel sén de “cantri, reliyon” d’aquella dómina nacionalcatólica. Son el post-franquismu del economato, les barriaes de ‘productores’ (que non obreros) y del ‘nun te meter en política’.

Se presentaron en porrica (ver cartelu d’enriba) y nun se-ys pue negar la sinceridá. Son un partíu ensin ideoloxía (n’Asturies ya hai delles candidatures ‘independientes’ con esi mesmu apueste), que se presenten como estremaos d’una clas política fartona y corrupta (que bien sabemos equí que la hai).

Pero mira tú, que la so sinceridá nun me conquista. La so presentación foi tamién el momentu nel que anuncien que nun van defender la oficialidá porque nun ven “demanda social” pa ello (dizlo El Comercio), y bien ye que lo espresen d’esa manera, porque evidencia que nada se pue esperar d’ellos. ¿Acaso si hubiere demanda social pala independencia d’Asturies diben defendela? ¿Defenderán la continuidá de la FSA nel Gobiernu asturianu, a la vista de qu’hai demanda social pa ello?

Probe arranque el de esta formación que confiesa trenta afiliaos n’Asturies, y nel que se define como un partíu qu’ellabora programes a guelpe de sondeos d’opinión (¿qué sondeos?). Sicasí, de xuru qu’arrampuñarán dellos votos de quienes nunca nun voten y d’esi PP zarzuelero qu’apigaza n’Asturies.

Piesllamos… Ximiélgame.net

logoliquid.png

Dende llueu, esti nun ye’l mensaxe que mos hubiera prestao escribir al quintu día de funcionamientu de Ximielgame.net, pero cuidamos que ye lo meyor.

Suponemos que los más perspicaces blogosferos asturianos vos decataríeis de la llamentable coincidencia de que dos proyeutos idénticos, casique coles mesmes funcionalidaes, asoleyáronse al empar el pasáu martes. Nós, cuidamos que nun ye lo meyor pa que un sitiu d’esti tipu tenga un bon nivel d’usu que convivan o compitan dos sitios pensaos pa una comunidá tan ruinuca como la nuestra.

A la hora d’entamar Ximiélgame nun mos movíen intereses económicos nin de ego, sinon el presto de desenvolver una ferramienta que, al nuesu entender, ye perguapa p’afitar les rellaciones ente los blogueros d’Asturies.

Per embargu, les coses nun salieron bien. El día (meyor dicho, la nueche, del llunes) na que tábemos faciendo los últimos axustes a Ximiélgame, probando enllaces y demás, mos enteramos de que otra xente tuvo la mesma idea (orixinales, cierto ye, nun somos). Al traviés d’un corréu, desplicaben qu’habíen atopáu el dominiu y mos ofrecíen ‘axuntar esfuercios’ pa desendolcar el proyeutu de forma conxunta. Al tiempu, nos informaben de que teníen rexistráu la direición esbilla.net, direición que, lóxicamente, visitamos. Per embargu, nun había un res, y al poco vimos qu’acababen d’instalar Pligg (la ferramienta cola que furrula tamién Ximiélgame) y al poco qu’entamaben la traducción del sistema del inglés al asturianu.

Nesi puntu, lo reconocemos, pecamos de ‘malpensaos’. Nun-y dimos credibilidá a la invitación a ‘axuntar esfuercios’ y entendimos que aquel enfotu en asoleyar un sitiu mínimamente operativu (se pue facer en poques hores) convertía l’ofrecimientu inicial en papel moyáu. Asina qu’adelantamos unes hores l’apertura de Ximiélgame.

Sicasí, al día siguiente punxímonos en contautu cola xente d’Esbilla pa tratar d’esclariar l’asuntu, cola idea de que comprenderíen qu’aquella situación nun tenía xacíu, que yera lóxico que nun aparáramos un proyeutu nel que llevábemos cerca de dos meses trabayando, y que de toles maneres bien podíen axuntase a nós cola alministración de Ximiélgame, al tiempu que nós collaboraríemos con ellos nel desendolcu d’otros proyeutos.

Pero nun pudo ser. La nuesa ‘premura’ nel asoleyamientu de Ximiélgame foi interpretada como una forma de desconfianza qu’existió (polo ya espuesto enriba), y que llamentamos fondamente.

Asina, y énte la perspectiva d’atopanos con dos proyeutos iguales, o mui asemeyaos, compitiendo nuna comunidá tan pequeña como la nuesa, pensamos que lo meyor ye dexar sitiu, asumir nuestru error, y pedir disculpes fonderes a la trentena d’usuarios que se rexistraron estos díes. Tamién queremos agradecer, y muncho, los mensaxes recibidos tres de l’apertura de Ximiélgame, y a toa esa xente que corrió a poner el so enllaz nel so blogue o na so web, y mui especialmente a Nireblog. A toos, vos encamentamos a facer lo propio con Esbilla.net, pa que haiga un sitiu de promoción de noticies n’asturianu que tenga un bon nivel d’usu, que sirva pa cohesionar a la comunidá, y que seya ún de los puntos de referencia del internet n’ast.

Ximiélgame.net siguirá funcionando entá unos díes. Depués, se procederá al so pieslle, qu’incluirá l’esborráu de tolos datos qu’apurrieron los usuarios nestos díes de funcionamientu, tales como nomatos, claves, direiciones IP y, por supuestu, señes de corréu electrónicu. Vémonos.

Presentamos… Ximiélgame.net

Ximiélgame

González y González Webrothers tien el presto de presentavos Ximiélgame.net, un proyeutu nel que venimos trabayando dende va ya unes selmanes y que naguamos por que vos preste a toos tantu como a nosotros mos prestó desenvolvelu y ponelu a la vuesa disposición.

Como ya vos imaxinaréis la mayoría, trátase d’una adaptación de Menéame a la comunidá asturiana n’internet. Poro, ye un sitiu nel que ye esa comunidá la que vota (ximielga) les noticies y hestories que los usuarios unvíen. Va cásique too. Cualisquier noticia que seya d’interés, podéis apurrila a la comunidá al traviés de Ximiélgame. Llueu, sedrá la xente la que diga si-yos interesa, o si queda pa prau. Que vos preste.

Perimportante

Esta vuelta ye especialmente perimportante. Tenemos que poner toos el güevu énte la reforma l’estatutu. Ta claro, nun pue haber dubia, que la FSA y el PP acabarán amagostando la reforma ente ellos. Poro, ye importante que sepan que van tener que tomar en cuenta la opinión de muncha xente capaz de movilizase, d’enllenar Asturies de cartelos, pegatines o banderes desixendo la oficialidá del idioma. Tien que se notar la opinión de quien cree que sí ye importante preservar, curiar y puxar pol asturianu. Tenemos que mete-yos na cabeza que, si caltienen les sos posiciones testerones de refugu, despreciu y belixerancia contra l’asturianu, a lo meyor tan poniéndose a la escontra d’una más que bultable parte de la sociedá asturiana a la que dicen representar.

Quiciaves tamos nun momentu malo, especialmente malo. Nun momentu nel que los resultaos electorales nun foron afayadizos pal asturianismu (magar que más de 82.000 asturianos votaran a formaciones que llevaren espresamente nel so programa la oficialidá de la llingua), y nel que les engarradielles son, quiciaves más que n’anteriores resaques electorales, la principal actividá del asturianismu. Muncha perda d’enerxía que namás val pa entretener a personaxes siniestros (que non d’esquierdes) como’l Lastra o el Javierito Fernandez.

Por eso tenemos que facer qu’esti cursu políticu qu’entama seya’l de la reivindicación llingüística. Con merchandising, con banderes escolingaes de les ventanes, con pegatines y cartelos nos coches, con mensaxes en tolos foros nos que seya posible (nun falo d’internet espresamente), con una monumental manifestación esti 24 payares que más que una manifestación seya toa una cabalgata, con tol espectáculu que seya posible, con personaxes conocíos que presten la so reconocencia, con música, con charangues y bandes de gaites, con xente mazcarao, con fueos artificiales, con majorettes y carroces… nun sé… con too. Tien que ser la de coyer.

Yo, apúntome.