Big Buck Bunny ye’l titulu del segundu cortu d’animación del Orange Open Movie Project, proyeutu de la Fundación Blender que produz películes con llicencies llibres y usando software llibre.
Tanto nel so primer proyeutu, Elephants Dream, como nel que tan acabantes de presentar ficeron usu intensivu de ferramientes como Blender, Gimp o CinePaint… y por supuestu en plataformes GNU/Linux.
Esti videu ye como una pastiella de paroxetina. Anima. Dacuando dame por pensar que tamos llocos, que los del bable somos una banda d’alloriaos a los que mos dió la llocura y vivimos nun mundu de fantasía, ayenos a la rialidá del mundu. Va tiempu dixe que quixera ser sociata, vivir tranquilu, a gustu d’habeme conocío y de tener un presidente incoherente llamáu Vicente, que ora se manifiesta pola llingua, ora l’arrequexa a un gueto por mieu a nun controlar lo que se mueve al rodiu d’ella.
Pero non. Videos como esti amuesen que n’Asturies hai una anormalidá manifiesta, hai un conflictu nidiu y hai una sociedá civil de la que formo/amos parte y qu’espatuxa, anque seya a escures y tapecida (como dicía aquel), con tola dignidá y los pasos en falso que ye capaz.
Calca equí p’amosar conteníu dende YouTube. Consulta la política de privacidá de YouTube.
Tuvi nel conciertu pola oficialidá el vienres, y hebo xente abondo. Pero ya cuntaronme lluéu que lo del sábadu foi la de dios. Nun tuvi dulda, pero velu nun videu col soniquete del ‘Indios’ de Dixebra ye otra cosa. Esti ‘evento’, con ¿cuatro mil? ¿cinco mil? persones blincando depués de pagar diez euros, namás tuvo repercusión ente esa Asturies alloriada. Si envede la Xunta pola fuere un conciertu de David Bisbal, ¿hubiere tenío namás como reflexu una fotonoticia nuna esquina d’una páxina na Nueva España?
Como ayeri nun pude dir a la mani de la Xunta por motivos llaborales, púnxeme güei a informame de cómo foi la cosa. Y paez qu’enteréme yo tanto como los periodistes que teníen qu’informar del actu. Asina, podemos dicir que ‘Ente cincuenta persones y varios miles manifestáronse ayeri pola oficialidá’.
La tema del cálculu de participantes nes manifes cuantayá que ye una comedia. Pero nesti casu llegamos a lo paranormal. ¿Cómo ye posible esa diferencia? ¿Hebo abducciones ente medies de la manifa? ¿Acasu cientos de persones taben na mani, pero d’incógnitu?
Lo que ta claro ye que quien acertó colos preseos manifesteros foron los de Suatea. Nada de petos pola oficialidá, lo que se lleva nes manis ye’l paragües. (Semeya vía Asturnews)
Mediu centenar de bicis per Xixón. La lluvia aguantó hasta qu’aportamos de vuelta a la plaza l’Ayuntamientu. Tuvo bien, habría que lo repetir.
Enriba, la cabeza del pelotón llinguateru momentos antes del inicio de la marcha: de la estatua de Pelayo al gloriosu estadiu de El Molinón. Y vuelta pel muru San Llorienzu.
A dalgunos paez que nun-yos prestó demasiao que seya precisamente el blogue L’Asturies lliberal el que diera anuncia de los preparativos pala creación d’un diariu n’asturianu. Pero pa mín ye lo meyor que-y podía pasar al asturianu, seya quien seya’l promotor.
Lo que ta claro, ye que nun van plantease una aventura asina dende la fantasía. Cuido que nun sedrá’l so enfotu arrequexar a tol asturianismu que nun seya de ‘centru’, nin fadrán un periódicu nel que Tini nun salga namás que con cuernos y goliendo a azufre. Espero que, si cuaya, seya un periódicu que nun fieda namás ver la portada, que se pueda lleer ensin sentir vergoña…
El casu ye que, nuna de les reacciones xeneraes pola noticia, Trasgu duldaba de la viabilidá del proyeutu. Y nun ye malo mirar pa otros llugares y ver qué hai perhí.
37018
Cataluña ye, cómo no, motivu de sana envidia. Ellí, amás del Avui, atopes la edición en catalán de El Periódicu de Cataluña asina como los comarcales o provinciales el Segre, El Punt de Girona, El 9 nou, el Regiò 7… En Baleares editen el Diari de Balears, en Galicia el Galicia Hoxe (antiguo Correo Galego) y en Euskadi el Berria. Si nun m’equivoco, esos son tolos diarios en llingües minoritaries del estáu español.
La situación de caún d’ellos ye bien estremada, tanto pol so tamañu como empresa, como pola situación económica. Avui vendióse va unos años y pasó per un mal momentu porque la so estructura yera la de un diariu de los de tola vida. A la fin, integróse nun grupu editorial potente (ta participáu pol Grupu Godó, de La Vanguardia y por Planeta, de La Razón). Llámenlu sinerxa, y fai que la cabecera aguante bien.
El Periódico de Cataluña, edición en catalán, y el Periodic d’Andorra, son cabeceres en catalán del Grupo Zeta (La Voz de Asturias). Cabeceres saludables (l’asturiana non, les catalanes), anque nun grupu que nun ta nel meyor momentu y que negocia la so venta.
Otru grupu que sonará ye Editorial Prensa Ibérica, editora de La Nueva España, y tamién del Regiò7, mientres que les demás cabeceres en catalán sobreviven en empreses de menor tamaño (la más destacable ye El Punt) que se busquen fórmules de collaboración pa competir (suplementos conxuntos y coses asina.
En cuantes a Galicia Hoxe, nun ye precisamente un gran negociu y dizse que vive gracies a la sovención. Edítalu la empresa de El Correo Gallego, vinculada a círculos empresariales del PP y comenten que esi venceyu ye lo que-y resta puxu ente los potenciales lectores en gallego. Sicasí, tamién ye cierto que l’usu del gallegu nes informaciones de los grandes diarios de la zona ye daqué que se fai con normalidá, y que, la prensa gallega ye de provincia más que de comunidá autónoma. De fechu, namás La Voz de Galicia tien presencia bultable en toa Galicia y ello con un númberu espectacular de ediciones comarcales.
Pa final, el Berria del País Vascu tamién vive de les sovenciones a la edición n’euskera. Nesti casu, el mayor problema ye el so indisimuláu venceyu a un nacionalismu radical y minoritariu que-y resta llectores nun mercáu potencial entá ruino como ye’l de los alfabetizaos n’euskera. Sicasí, aguanta.
La conclusión de too esto, pa mín, nun ye otra que un diariu n’asturianu ye posible. D’una parte, ta la esperiencia de Les Noticies, que lleva más d’una década na cai, dalgo que nun se llogró nel País Vascu cuando, recién fechu oficial l’euskera, el Gobiernu autonómicu emperróse en sacar alantre un selmanariu qu’acabó marafundiando perres ensin resultau normalizador nengún. D’otra manera, el fechu de que se fale d’un grupu d’ambitu estatal quier dicir que la estructura ye la lóxica: pequeña, con una redacción contenida y imprentación nuna planta del grupu, o esternalizada (como la gran mayoría de les cabeceres d’anguaño). Tiraes d’ocho mil exemplares pa vender seis mil, por exemplu, munchu trabayu comercial, sovenciones (como toos les tienen)… y ehí tienes un periodiquín que tire p’alantre. Haya suerte.
Esti videu tien tiempu, pero topelu mientres tostaba cds y dvds pa vaciar un pocu el discu duru (internet ye porno, nun pensar bien… ;-p) . Vamos que vos pongo un videu de Jeremy Ellis, un teclista de Detroit que trabaya principalmente en proyeutos de jazz, funk, house… pero tamién fae estos esperimentos d’improvisaciones… Un ordenador, el software adecuáu y un controlador midi un pocu decente… y hala a xugar y pasar un ratu… que vos preste como a min…
Calca equí p’amosar conteníu dende YouTube. Consulta la política de privacidá de YouTube.
Al traviés de Whokilledbambi atopé la semeya d’esti ‘Martir’ inquietante. Ye una de les semeyes de la serie ‘Sub-realismo criollo’ del fotógrafu arxentín Marcos López. Vaga la pena echa-y un güeyu a la so web, enllena d’imáxenes ‘fasinantes’. Nun vos perder el retratu que fai de les estrelles de la Triple A de llucha llibre mexicana de la que falaba va unos díes la fundación.
Faigo esti post namás porque me prestó la foto… magar que tamién me gusta la so música.
Va unos díes atopé nel buscador chinu de ficheros ‘daunlodeables’ Sogou un podcast d’una hora dedicáu a esti monstruo qu’entá disfruto nel coche.
Otra opción ye buscar nel youtube, hai videos d’él abondo, aunque esti bien pudiera ilustrar la definición de ‘cool’ en cualisquier enciclopedia. Que vos preste.
Post dedicáu a les referencies al ‘orwellianismu’ feches esti día por Carlos X Blanco y Trasgu. Nun sé… paezme que daquién fizova un tiempu un post asemeyáu.
… Incluso cuendo escribes sigues pensando na antigua llingua. Lleí delles de les coses qu’escribieres pal Times. Son bastante bones, pero nun pasen de traducciones. No fonderu del to corazón prefieres el vieyu idioma con tola so vaguedá y los sos inútiles matices de significáu. Nun sientes la belleza del desaniciu de les palabres….
… En cierta manera, la visión del mundu inventada pol Partíu imponíase con escelente éxitu a la xente incapaz de comprendela. Facía aceptar les violaciones más flagrantes de la realidá porque nadie nun comprendía del too la enormidá de los que se-yos desixía, nin s’interesaben lo suficiente polos acontecimientos públicos como pa decatase de lo que taba ocurriendo…
… La nueva aristocracia taba formada mayoritariamente por burócrates, homes de ciencia, téunicos, organizadores sindicales, especialistes en propaganda, sociólogos, educadores, periodistes y políticos profesionales…
… Per primer vez na Historia, existía la posibilidá de forzar a los gobernados, non sólo a una completa obediencia a la voluntá del Estáu, sinon a la completa uniformidá de opinión…
… Les crisis económiques del pasáu foron absolutamente innecesaries y agora nun se tolera qu’ocurran, pero de toles maneres nenguna razón de descontentu podrá tener anguaño resultaos políticos, ya que nun hai forma de qu’el descontentu s’articule…
… Les opiniones que tenga o nun tenga la masa se consideran con absoluta indiferencia. A los proletarios se-yos puede conceder la llibertá intelectual pola simple razón de que nun tienen inteleutu nengún. D’otra manera, a un miembru del Partíu nun se-y puede tolerar nin siquier la más pequeña desviación ideolóxica…
