Javier Fernández respondió asi a los periodistes malvados…
Category: Política
Razones pa siguir na poltrona…
Israel nun ye Tierra Santa
Israel ye la única democracia d’Oriente Próximu. Israel tien de garantizar la seguridá de los sos ciudadanos. Israel vien d’una llarga historia de persecución de la que toa Europa se siente y ye culpable. Pero la vida de los israelinos nun pue valir más que la de los demás. La historia nun ye una bula papal. La seguridá d’unes elleiciones nun xustifica la muerte. Un estáu nun ta llexitimáu al ataque preventivu indiscrimináu, al terrorismu, al asesinatu más sangrín. Ya valió.
Palestineblogs — Semeyes en Flickr — Blogue de Haitham Sabbah — La Vanguardia
Memoria histórica
La UPyD de la República
La memoria histórica ye dalgo buenu, dalgo qu’hai que conservar. Magar que tea mui masuñada, na memoria histórica se puen atopar lleiciones interesantes. Como esa que cuenta esti llibru ‘El fascismo en Asturias (1931-1937)’, tesis del caderalgu d’historia de la Universidá de Cantabria, Manuel Suárez Cortina, que fuere asoleyada en 1981 por Silverio Cañada.
El llibru queda coxu en munchos aspeutos. El propiu autor llamenta la perda de datos del Gobiernu militar nos años más sangrinos de la represión facista. Pero, sicasí, nes sos páxines escuéndense pequeñes ayalgues. Güei toi por conseñar la de la paxina 134 que fala de cómo n’aquellos años de Segunda República, la CEDA, sabedora de que calteniendo firme el so ideariu derechista, nun va ser quien a quita-y adeptos a formaciones más moderaes, decide empobinar la creación d’un muérganu satélite suyo: la Unión de Clases Medias (UNCM).
N’Asturies, la formación tenía por cabezaleros a Gumersindo Riego y Gerardo Requejo, dambos venceyaos a la derecha tradicionalista, pero que s’enfotaron dende la UPyD (perdón, d’aquella UNCM) n’amosase como dalgo distinto. Diz el llibru: “la Unión se presentó como apolítica, republicana y no declaró su confesionalidad”. Y añede: “afirmaba no formar un partido político, sino una agrupación al servicio de ese sector de la sociedad que se encuentra entre dos fuerzas: la proletaria y la burguesa”.
Entá más: el so cabezaleru asturianu, Gerardo Requejo, convidaba a axuntase a la UNCM a quienes compartieren “dos postulados fundamentales: la defenda por todos los medios lícitos de España, arrancándola de manos de verdugos y traficantes profesionales, y la defensa, también enérgica y decidida, de nuestros intereses de clase, vejados y encarnecidos por los de arriba y por los de abajo”.
Siete décades depués, la derecha española recuperó esa estratexa pa tratar d’esgastar a la derecha moderada (agora en baxo les sigles del PSOE). Tres de texer una tupida rede d’opinion (universidaes privaes, medios de comunicación, fundaciones -FAES a la cabeza-), a la gran derecha española de tola vida nun-y queda otra y recurre a la UPyD pa quita-y al rival direutu aquel electoráu al que-y esmolez España, que tarrez de vascos y catalanes, y un poco de los galleguzos, pero que nun votaríen al PP nin de coña porque ellos son d’izquierdes de tola vida.
Y equí los tenemos, puxando por que se retire l’usu del ‘dialeutu’ catalán nos vuelos de Swissair con Cataluña, esmolecíos pol futuru del castellanu magar que seya la tercer o cuarta llingua más falada del mundu, y naguando por una reforma ellectoral que sirva, non ya pa que’l so grupu tenga la representación que-y correspuende con respeutu al PSOE y al PP, non, sinon pa que nun la tengan los grupos non españolistes. Y llueu… ¿nun-yos va preocupar qu’haya memoria histórica?
Retratu d’un bocayón
Perbona la entrevista que-y fizo Xuan Bello a Fernando Lastra en Les Noticies, y de la que tuvimos conocencia nel blogue de Mundu Xaime. ¿Como daquién, trenta años depués de la muerte de Franco, pue aneciar nel discursu del ‘falar en cristiano’? ¿Cómo ye que un asturianu que quiera falar asturianu o gallego asturianu n’Asturies ye lo mesmo qu’un británicu?
Yera sabío que Fernando Lastra ye un políticu intelectualmente llimitáu, por nun dicir ermu; que fai por esconder la so probitú a base de tochaes y dalgún argumentu de solapa de llibru que-y abulta de postín. Pero na estrevista amuésase un auténticu bocayón en porrica. Bien Les Noticies. Alderique en esbilla.
¿PetAr Eces o Tini Griffin?
Los seguidores de la serie Family Guy, podrán comprobar el parecíu de Peter Griffin con Tini Areces: un gordu enfrentáu a una pita…
Nun pienses nun fartón
Veríeis que nel Les Noticies d’esti vienres, col envís de la celebración del Día de la Santina, el periódicu aconceyó a cabezaleros del Bloque, UNA y Pas pa falar d’asturianismu, de les sos perspectives. Al tiempu, nun editorial faen un analís de la situación política asturianista que, en cierta manera, apunta lo que ye un evidente problema pal desenvolvimientu d’una opción política que tien que facer por amosase como dalgo creíble y atractivu. Nesti puntu, alcordéme d’esti puntu d’embaxu, que pa quien nun lo sepa ye’l llingüista George Lakoff. Esti puntu ye dalgo asina como la madre del corderu de la propaganda d’Obama, y tien a ZP como ún de los sos fans más fans.
El casu ye qu’el llibrín d’esti home, ‘Nun pienses nun elefante’, preséntase como una especie de manual de propaganda pa torpes que dexó ablucáu a Zapatero, hasta el puntu de fichar a Lakoff pal ‘think tank’ qu’asesoró la campaña última del PSOE. Esi llibrín destripa lo que ye la estratexa de propaganda conservadora n’Estaos Xuníos y apurre idees de per ónde debe dir la progresista pa ganar les elleiciones. Nun entra en pureces ideolóxiques y argumentales. Va al tueru de la cosa, a ganar les elleiciones. Espón les regles del xuegu.
Básicamente, la idea ye que la xente nun vota tanto idees como valores. La xente vota la opción cola que s’identifica, nun vota programes. El llibrín cuenta cómo la identificación parte de la estrutura social más básica, la familia (básicamente estrema la ‘familia del padre estictu/conservador’ y la ‘familia de padres protectores/progresistes’), y cómo el llinguaxe xenera ‘marcos’ nel cerebru de cada votante que tienen un efeutu concretu na percepción del mensaxe (Nun pienses nun elefante… l’elefante, símbolu republicano, ya ta na to cabeza). Asina, cuenta cómo los conservadores americanos vienen desendolcando una estratexa pa difundir los sos valores, espardilos como los únicos válidos, al tiempu qu’afiten una tupida rede d’influencia que configura una sólida clase dirixente conservadora. Y too ello, dende los años sesenta. (Asina ganó Bush… pese a too).
El PSOE vio les similitúes cola situación española de secute. Fundación Faes, nueves universidaes privaes, apoyu a los escritores, ensayistes, intelecutales más o menos afines… contribúin a texer esa nueva clase dirixente, mientres s’apela a valores ampliamente espardíos y asumíos pola población pa facilitar que s’identifique col PP (Apoyo a las víctimas, sí a la vida, defensa del idioma español, de la familia…).
Pues a lo que voi. N’Astuies tamién se puede ver esi modelu, solo qu’agora ya desenvueltu pol PSOE-PP. Ehí ta l’apueste pola llibertá pa usar la llingua, ensin imposiciones; la solidaridá (y non el chupar del bote) ente rexones cola financiación… la tupida clase dirixente asturiana, identificada col ‘progresismu’ FSA…
Énte eso, ¿qué facer?
La rapaza nacionaliega de McCain
Estes elleiciones americanes tan prestándome pola vida. Al furacán Obama xunimos agora a la vice del candidatu republicanu, que ye toa un personaxe. Nun ye namás que seya ex miss de concursu y gobernadora reaccionaria a la que se-y queda preñada la fía adolescente (¿sabrá la rapacina lo que ye un condón?, ye que, además, la señora Sarah Palin simpatizó col nacionalismu d’Alaska.
Nun tuvo afiliada al Alaskan Independence Party, namás tuvo rexistrada y participó nun congresu en 1994, pero sí que paez que so home yera un activu afiliáu. Hai dellos videos pel youtube nos que se fala de la so participación nel AIP.
El partíu ye tan raro pa nos, como tolos partíos estaunidenses en xeneral, enfotáu nun modelu de país cambiante p’Alaska (quixeron ser Canadá, llueu independizaos pero xuníos a un nuevu estau col oeste de Canada, independientes con estatus especial nos USA, miembros de la Commonwealth, ya dixebraos dafechu). Políticamente, cuenten que son un mecigayu de ‘libertarianos’ y republicanos, magar que nes elleiciones piden el votu pal ultraconservador Constitution Party. Con too y con eso, presumen de ser, en proporción, el mayor ‘third party’ de los Estaos Xuníos con 13.500 miembros.
Chupa, chupa, nun soples…
Confimáu, siguimos chupando del bote pero bien. El cuentu de la crisis, de les reconversiones y de la ‘solidaridá’ territorial tien afitao el sistema más encontradizu pa caltener el gobiernin del ‘principedo’ (como diz L’Ayalgueru). ¿Cuántes de les perres de Catalunya, Madrid y Baleares van pa pagar, y mui bien, la inactividá y el refalfiu d’Asturies? ¿Cuántes pa pagar una descomanada (ya inoperante en munchos aspeutos) alministración pública? El casu ye que nun hai datos pa pensar qu’esto vaya camudar a mediu plazu. Tolo contrariu. La tasa d’ocupación ta como ta, y habrán pasar décades pa que cambie, y ello sedrá pola xubilación de los prexubilaos, y porque la población mengüe entá más. ¿Daquién pensó en facer dalgo pa contribuir en cuenta de siguir chupando del tetu? Non. Porque quien decide ye precisamente quien tien la peza nos llabios. Paezme a min. Pero tolos cuentos acaben. Asturies nun ye cuantayá nin obrera nin rebelde… ye un país llamáu refalfiu. Y nel restu d’España decátense d’ello.
(Pa vela bien, calcái nella).
¡¡Viva la provincia de Oviedo!!
Pues ya ta consumao. PP y PSOE acaben d’acordar la vuelta a una Asturies na que los bables yeren una peculiaridá prestosa pa les poesíes y los cantarinos de chigre, y nada más.
Como bien diz Atlantic Prau, el PSOE y el PP acaben d’acordar la derogación de la Llei d’Usu y Promoción del 98 (si non, ¿qué pinta esi puntu de la nueva llei que s’aprobará con mayoría de dos tercios?).
Esta ye la culminación de toa una estratexa, empobinada a aniquilar cualisquier opción que nun pase per un alcuerdu entre PSOE y PP. Quien pieslla emisores de radio con llicencia, quien promueve la prohibición del usu del asturianu, quien ta avezáu a comprar voluntaes, s’atopa nun puntu nel que se ve capaz de da-y el puntu final a esti tema de los bables, l’últimu requexu mínimamente potente y organizáu de contestació cívica, de crítica. Y lo fixeron güei.
La verdá, pa esto nun paga la pena l’autonomía. Una autonomía que nun se desarrolla, que nun medra como colectivu humanu, nun ye más qu’un descomanáu comederu (nun hai más que ver de qué viven estos redactores del estatutu).
Nun val pa nada. Prefiero la Diputación, ye más sincera. L’autonomía, pa quien la quier: Euskal Herria, Catalunya y, quiciavis, Galicia y Andalucía. Les ‘naciones’ que dicía l’editorial del Grupu Zeta que namás se censuró nel boletín de la provincia La Voz de Asturias.