Política – Páxina 16 – González&González

La rapaza nacionaliega de McCain

Estes elleiciones americanes tan prestándome pola vida. Al furacán Obama xunimos agora a la vice del candidatu republicanu, que ye toa un personaxe. Nun ye namás que seya ex miss de concursu y gobernadora reaccionaria a la que se-y queda preñada la fía adolescente (¿sabrá la rapacina lo que ye un condón?, ye que, además, la señora Sarah Palin simpatizó col nacionalismu d’Alaska.

Nun tuvo afiliada al Alaskan Independence Party, namás tuvo rexistrada y participó nun congresu en 1994, pero sí que paez que so home yera un activu afiliáu. Hai dellos videos pel youtube nos que se fala de la so participación nel AIP.

El partíu ye tan raro pa nos, como tolos partíos estaunidenses en xeneral, enfotáu nun modelu de país cambiante p’Alaska (quixeron ser Canadá, llueu independizaos pero xuníos a un nuevu estau col oeste de Canada, independientes con estatus especial nos USA, miembros de la Commonwealth, ya dixebraos dafechu). Políticamente, cuenten que son un mecigayu de ‘libertarianos’ y republicanos, magar que nes elleiciones piden el votu pal ultraconservador Constitution Party. Con too y con eso, presumen de ser, en proporción, el mayor ‘third party’ de los Estaos Xuníos con 13.500 miembros.

Chupa, chupa, nun soples…

Confimáu, siguimos chupando del bote pero bien. El cuentu de la crisis, de les reconversiones y de la ‘solidaridá’ territorial tien afitao el sistema más encontradizu pa caltener el gobiernin del ‘principedo’ (como diz L’Ayalgueru). ¿Cuántes de les perres de Catalunya, Madrid y Baleares van pa pagar, y mui bien, la inactividá y el refalfiu d’Asturies? ¿Cuántes pa pagar una descomanada (ya inoperante en munchos aspeutos) alministración pública? El casu ye que nun hai datos pa pensar qu’esto vaya camudar a mediu plazu. Tolo contrariu. La tasa d’ocupación ta como ta, y habrán pasar décades pa que cambie, y ello sedrá pola xubilación de los prexubilaos, y porque la población mengüe entá más. ¿Daquién pensó en facer dalgo pa contribuir en cuenta de siguir chupando del tetu? Non. Porque quien decide ye precisamente quien tien la peza nos llabios. Paezme a min. Pero tolos cuentos acaben. Asturies nun ye cuantayá nin obrera nin rebelde… ye un país llamáu refalfiu. Y nel restu d’España decátense d’ello.

(Pa vela bien, calcái nella).

¡¡Viva la provincia de Oviedo!!

Pues ya ta consumao. PP y PSOE acaben d’acordar la vuelta a una Asturies na que los bables yeren una peculiaridá prestosa pa les poesíes y los cantarinos de chigre, y nada más.

Como bien diz Atlantic Prau, el PSOE y el PP acaben d’acordar la derogación de la Llei d’Usu y Promoción del 98 (si non, ¿qué pinta esi puntu de la nueva llei que s’aprobará con mayoría de dos tercios?).

Esta ye la culminación de toa una estratexa, empobinada a aniquilar cualisquier opción que nun pase per un alcuerdu entre PSOE y PP. Quien pieslla emisores de radio con llicencia, quien promueve la prohibición del usu del asturianu, quien ta avezáu a comprar voluntaes, s’atopa nun puntu nel que se ve capaz de da-y el puntu final a esti tema de los bables, l’últimu requexu mínimamente potente y organizáu de contestació cívica, de crítica. Y lo fixeron güei.

La verdá, pa esto nun paga la pena l’autonomía. Una autonomía que nun se desarrolla, que nun medra como colectivu humanu, nun ye más qu’un descomanáu comederu (nun hai más que ver de qué viven estos redactores del estatutu).

Nun val pa nada. Prefiero la Diputación, ye más sincera. L’autonomía, pa quien la quier: Euskal Herria, Catalunya y, quiciavis, Galicia y Andalucía. Les ‘naciones’ que dicía l’editorial del Grupu Zeta que namás se censuró nel boletín de la provincia La Voz de Asturias.

Joaquín Aréstegui diz non, ¿soprendíos?

Joaquín Aréstegui diz nones, y tovía hai quien diz que ye una opinión ‘personal’ del cabezaleru del PP. ¿Daquién puede sorprendese pola rápida anuncia de que d’oficialidá ‘nones’?

Joaquín Aréstegui, pa quien nun lo sepa, ye l’home de confianza d’Ovidio Sánchez, quien-y apurre’l cachu de cerebru qu’al llavianés-y falta pa facer discursos y declaraciones amañoses, quien-y marca estratexes, quien-y diz lo guapu y llistu que ye depués d’agarrar la depresión tres de perder una elleición tres d’otra.

Aréstegui ye un home llistu, intelixente, con un nivel mui periba la media de la política asturiana. Ye un estratega diz que maquiavélicu, y sabe cuándo dexar facer a los suyos y cuándo cortar polo sano. Pa él, el problema llingüísticu n’Asturies nun ye más qu’un peón na so estratexia, un peón del que nun sabe mui bien qué va sacar (cuida que más bien poco), polo que nun-y importa un res dexar que-y lu coman y garantizase asina otres pieces más valoratibles nel alcuerdu económicu y de poder que va roblar cola FSA.

Porque lo importante pa’l PP nel tema l’estatutu ye sacar dalgo… ¿pol bien de los asturianos? Non, pol bien del partíu y de los que faen carrera nelli. Como la FSA, tamién nagua por un bipartidismu que-yos permita afitar esi comederu. Pa manexar dalgo, faise meyor ente dos qu’ente tres.

Aréstegui se xuega munchu, política y personalmente (más o menos, nel so casu, ye lo mesmu), como p’andar con boberíes col tema la llingua. Siéntolo polos del Círculu Lliberal, que a esti pasu van quedar ensin vaselina en dos díes.

EXCLUSIVA!!!

Calca nel thumbnail pa velu en condiciones.

[[Pal que nun sepa de qué va el tema, direvos que tien que ver cola decisión de Red Eléctrica Española de siguir p’alantre col proyeutu de la llínia Soto-Penagos, magar qu’haya una sentencia en contra. Como van recurrir, entienden que puen siguir con ella. D’otra manera, el conseyeru d’Industria y el Sindicatu Vertical (estaya CCOO), sofiten la decisión de REE y dicen que nun van aparar el proyeutu “pol caprichu” de colectivos “minoritarios”]].

El Chiki Tini

Calcái la semeya pa ver al Chiki Tini.

Censura… un pocu más…

La $GA€ demanda a Público pola so llinia editorial, contraria a les práctiques de la sociedá xestora, y tamién por pemitir a los usuarios de la so web espublizar comentarios llibremente que, pa la entida xestora, son ofensivos.

Toos conocemos la forma d’actuar de la SGAE (lluéu lloren porque tienen mala imaxe), pero lo que ta asustandome ye la normalidá cola que se ve a la censura. Y yá nun falo de los intentos de la SGAE por zarrar la boca a toles voces molestes, sinon que fai unos años zarrose Egin al pocu zarren tamien Egunkaria. Equí nun pasaba nada porque yeren radicalones vascos que queríen acabar coles “llibertaes democrátiques” d’ESPAÑA (pronunciai bien fuerte)… Coimes pero si lleemos la Constitución Española, nel artículu 20 fala d’un derechu democráticu… llibertá d’espresión o algo así…

Fai mui pocu toco-y a los republicanos, y secuestren la famosa portada del Jueves…

Nun voi falar ya del servilismu políticu de los medios de comunicación n’Asturies… de Radio Sele… de TeleAsturias… de la COPE en Catalunya… de TeleK en Vallecas… etc… etc… pero ye que toi mui asustáu de la normalidá que va garrando lo de “censurar lo que nun mos presta”…

La SGAE investigada por fraude fiscal

Por barrapunto enterámonos de la noticia nel blogue Carlosues, l’Axencia Tributariala investiga a la SGAE por posible fraude fiscal y defraudación a socios “non residentes”.

Lo que nun soi a pescanciar tovía ye como dende esta entidá s’atreven a danos lleiciones morales y a insultanos a los que usamos redes p2p llamandonos pirates… amás ye que en frikipedia falten al honor d’estos “señores”…

Por supuestu… ZP… “son de los tuyos”…

Esto sí qu’interesa

Por fin atopamos un motivu que sí-yos va interesar a los asturianos. La llingua ya nun va ser el centru de la discusión del debate estatutariu n’Asturies. Lo importante ye dexar claro qué conceyu ye la capital hestórica, política, alministrativa d’Asturies. Ya puestos, podíen discutir tamién si existe Asturies, o si-y ponen caseta al perru de la Xunta Xeneral. Pero non, esto tien más posu como pa que la prensa adepta entretenga al personal. Nun creo que tuviera pautáu, pero Gabino púnxolo a güevu.

Agora que PSOE y PP ya tienen dalgo más afayadizo pa facer como s’engarren, ya podemos quedar toos tranquilos. Y yo que pensaba que neso de la capitalidá nun había discusión.

De fechu, nel informe del Conseyu Consultivu, aquel de los rellumantes espertos de la provincia, que tanta tinta y saliva gastaron pa dicir qu’el bable diba ser problemáticu pa una parte importante de la población provinciana ¿dicía dalgo d’esti tema? A cascala. Emigro a Ehtremaúra.

Alloriante polémica

Dos medios electrónicos, Libertad Digital y e-noticies, fainse eco estos díes d’una ablucante polémica al rodiu d’una carta al direutor de La Vanguardia. La cosa ye que nel programa de la TV3 que conduz Julia Otero (No em ratllis! / ¡Nun me ralles!) ficieron un esperimentu con un garrapiellu guaḥes sobre’l so conocimientu del himnu catalán Els Segadors. El casu ye qu’al final, la presentadora y los rapacinos acaben cantando cola manu nel corazón, como nes películes.

La escena abultó-y gafienta a una espectadora qu’escribió una carta de protesta al diariu mencionáu, molesta porque nun ficieren el mesmu esperimentu col himnu español, y considerando la cosa una muestra d’atroctinamientu nacionalista y tal.

La verdá, la estampa de guaḥes cantando himnos nacionales cola manu en pechu dióme siempre perceguera… pero la cosa nun diría a más si nun fuera porque nesti casu s’opón, pola parte de los ‘non nacionalistes’ (nomatu col que-yos presta llamase a los nacionalistes españoles), l’himnu d’una comunidá autónoma al del estáu. Hai munchu enfotáu nesa España suañada y falsa, castellana de fala, flamenca ya imperial. Y esi enfotu de so, a la fin, sedrá’l qu’acabe frañando España. ¿Daveres-yos paez ‘sensato’ esa zuna que-yos entró coles polítiques de proteición de les llingües minoritaries? Voi poner radio Sele.