Category: Webs y blogs

Iñaki Anasagasti, esi clásicu del parlamentu español, ta acabante de montala bien gorda por decir les coses como xente abondo les piensa, como de xuru que les diría nun chigre ente culín y culín colos collacios, o ente ‘pote’ y ‘pote’ (entiéndase pote nel sentíu vascu, el del poteo o txikiteo).

Y armóse. Armóse demostrando que lo que diz nel blog ye la verdá nidia: que pa colos reis bromes nenguna y a poder ser llambiotaes.

De toles maneres, ye perinteresante lo que pasa con Anasagasti. Porque lo que diz, dizlo nel so blog personal, y non nuna rueda de prensa, nin nos corredores parlamentarios, nin una columna nel Deia. Dizlo nun llugar nel que lo públicu y lo privao nun paez tar mui bien xebrao. Un blog ye personal, y suel lleelu un grupu de xente mui determinao. Nun ye un mediu de comunicación de mases… pero sí ta al algame de cásique cualisquier persona.

Eses peculiaridaes tán detrás de que Anasagasti se soltara la guedeya y se sintiera llibre pa dicir lo que piensa. Y bienveníu seya’l blog por eso, qu’apurre al políticu a dicir qué quier, cómo lo quier, y que-y paez el mundu que mos rodea. Quiciaves, tamién por eso, los blogs políticos nun furrulen como deberíen. Fálta-yos sinceridá, como verdadera canal de comunicación y rellación ente’l votante y el políticu, un políticu que se sincera, pese a quien-y pese. Pero hai que ser valiente pa ser sinceru. Nun vaya ser que se t’espurran les idees y acabes fadiando al xefe de turnu.

Anasagasti: tuelf points.

Germán Abad, cabezaleru d’Unidá y candidatu pel Oriente, escribe en El Comentario.tv un artículu sobre lo que pretende ser la coalición y lo que ye la preba de la so aición política nos tiempos últimos. D’una banda, les aiciones xudiciales a la escontra del PXOU de Llanes, na que s’enfrenta al Gobiernu socialista y a tol poderíu constructor. De la otra parte, la denuncia pol llibru ‘Construyendo Asturias’, misteriosa publicación que por sí mesma simboliza la concepción de la propaganda pola parte del Gobiernin FSA-PSOE-IU-BA-LV. Nesti últimu caso, Abad cuenta qu’Unidá yá punxo el güevu, yá adelantó l’aval que-y piden los xueces pa meter p’alantre a nun se sabe quién ¿el gobiernín ‘d’izquierda plural’?, ¿a les constructores agradecíes?… Toles desplicaciones teneisles na estaya de colaboradores de El Comentario, o nesti mesmu post calcando darréu.

Sigui lleendo Unidá pon el güevu

Ayeri lleí la columna de Xuan Bello en ‘Les Noticies‘ y prestóme. Préstame munches vegaes, pero ayeri especialmente. Serenamente, desplicó per ónde va dir el so votu ensin pedilu dafechu pa esi asturianismu d’izquierdes posibilista al que piensa votar, pero envolviéndolu, el votu, de ‘seny’ aposentáu. Esi ‘bon xacíu’ que busca tresmitir na columna, ye’l que fai que munchos vayan dir nestes elecciones a votar a Izquierda Xunida como si ello fuera ‘votu útil’, y lo entiendo. Pero pela mio parte nun creo que mereza’l mio votu daquién que nun cumple con bien d’ellos de los compromisos ‘fundamentales’ colos que foron a les pasaes elecciones. Pase que’l sociu minoritariu del gobiernu quiera facer como que se tapa la nariz énte aquellos episodios ‘menores’ nos que la podredume del mayoritariu rescampla especialmente (Candido-Morala, Teleasturias, ‘Construyendo Asturias’ y demás propaganda…), pero lo que nun ye de recibo ye que se pretenda facer lo mesmu con les ‘grandes apuestes’. Que se pase por una política urbanística xabaz, por un modelu enerxéticu descomanáu y proxectáu dende Madrid, que s’acombaye cola corrupción de baxa escala (esa que diz: ‘agora mos toca contratar, o meter nos conseyos d’alministración, a los de nueso’), o que se proteste polo baxo non yá pola falta d’oficialidá de la llingua, sinon pola falta total d’interés en desendolcar les midíes previstes na Llei d’Usu y promoción.

Too eso, y más, fai que munchos mos sintamos estafaos. Y por eso miramos agora pa quienes, con munches torgues pel medio, intenten construir una alternativa propia, d’izquierdes, asturiana y con esi ‘seny’ que los ‘nacionaliegos puros’ nun amosaron nunca. Por eso merez la pena reconocer, haya o non un diputáu llueu, esi esfuerzu, esi enfotu nun proyeutu políticu que busca el so espaciu y que, espero, tenga munchu recorríu per delante. Yá saben, equí sofitamos Unidá.

Resume ‘oxetivamente’ los programes de los principales partíos políticos asturianos. 😉 Quien lo vea, sabrá a quién votar el día 27.

El presidente Vicente nun tien que ser mala persona nes distancies cortes. Si non, nun s’entiende que tenga amigos tan arrogantes como pa pagá-y una web tan prestosa como tiniareces.es y anunciala al altu la lleva por tolos medios posibles. Cada vegada que calco na web d’un de los diarios asturianos apaezme la guapa sorrisa d’estos arrogantes ‘asturianos por Areces’ pero… ¿quién son?. Na so web namás dicen que “un grupo de asturianos y asturianas que buscábamos un cauce para que cualquier ciudadano/a pudiese hablar de tú a tú con Vicente Álvarez Areces”. Nun dicen si son vieyos compañeros de llucha comunista, si son amigos de la infancia o vecinos de bloque.

Y lo cierto ye que son xente que quier munchu a Tini. Nun s’entiende, d’otra manera, que si nun lu quixeran fueran a gastar tantes perres en cuntar lo guapu, gayoleru y bon rapaz que ye. Porque sí, tan gastando perres abondo. Miles de euros. Miles cada selmana, que ye lo que cuesta toa esa publicidá.

Asina que, una de dos, o son munchos los Asturianos por Areces, agradecíos por qu’el presi-yos dio trabayu o arregló-yos dalguna llicencia d’obra y fixeron una puya pa sacar perres y falar bien d’él… o son unos pocos que tienen ‘dos pisos y un bajo’, polo menos, y creen que sofitando a Tini van tener más.

Arrogantes son, nun hai dubia posible, pero amás, oye, son modestos, que nun quieren asoleyar perhí que dan perres pa la causa. ¿Sabrán daqué de les espublizaciones aquelles del ‘Asturies Adelante’? Misterios tien la precampaña.

Por cierto, nun penséis mal. La foto d’enriba nun ye de la sé de la FSA.