Category: Webs y blogs

L’ALLA mira pa internet

Toi acabante de ver que l’ALLA espublizó n’internet les normes ortográfiques y la gramática de la llingua asturiana.

Esto, xunto a la versión web del diccionariu, considero que son unos pequeños pero importantes pasos qu’agora da l’Academia, y ye que pienso que la comunidá de falantes d’asturianu que usamos internet ye más que curiosina y agora tenemos más facilidaes (y menos escuses) pa entamar a usar bien la nuesa llingua.

Recordavos que podéis instalar el motor de busqueda pal DALLA nel navegador dende esta páxina.

El falsante que nun s’escuende

Cambiando de tema… Hai coses que me llamen munchu l’atención, que, en cierta manera, fascínenme y repúnenme. Y una d’elles son esos sanadores qu’a partir de la relixón xueguen cola inorancia y la fe de les persones pa facer un negociu rellumante.

Al traviés del impagable portal evanxelista GodTube atopé güei a ún d’esos falsantes qu’amás tien el rostru de nomase ‘Cash’. Cash Luna (qu’asina se fai llamar el menda) y la so esposa Sonia son un par de guatemaltecos que tienen montao un chiringu perguapu que ya s’espardió dende la so probe Guatemala a zones non menos probes de la redolada (nos videos de les sos televisaes ‘Nueches de Gloria’ vese xente de Méxicu).

Telexénicu, el matrimoniu Cash fai milagros qu’ellos atribúin (qué menos) al Espíritu Santu, dalgo que los avera a ciertes ilesies pentecostales (n’Asturies la que se conoz ye la de Philadelphia, que nada tien que ver afortunadamente con estos pantasmes), pero qu’ellos aprovechen pa facer audiencia… y dineru, munchu dineru.

Dende cashluna.org llévente a otros portales de so. La muyer alministra ‘Mujer, eres excepcional’, consultoriu femenín nel que, tampoco, nun falta l’enllaz, pervisible, pa facer donativos. Seminarios pa formar cabezaleros del so ministeriu, muncha llabia y puesta en escena ablucante qu’enllena estadios y cuentes corrientes.

Nel so portal, y nel mesmu GoTube, atópense decenes de demostraciones de milagros ablucantes y fantásticos, como esti d’una paisana a la que-y crez una teta nueva (magar que Cash prefiera nomalu, tou paraxismeru él, ‘milagro creativo’).

Enllace de descarga

Apache, PHP, MySQL y phpMyAdmin nel iBook

ibook_g4.jpg

Güei tuve que configurar Apache con PHP, MySQL y phpMyAdmin nun iBook G4, y anque podemos instalar Debian en ppc, vamos facelo nel Mac OS X Tiger que venia col equipu.

Lo primero ye arrancar l’Apache que vien “de serie” nel sistema, vamos a “Preferencias del Sistema” y na estaya “Internet y red” calcamos “Compartir” y marcamos “Compartir Web”, zarramos les preferencies y yá tenemos Apache corriendo nel equipu.

Pero l’Apache que trae Mac OS X, anque tien instalao PHP4, nun lo tien activao. Abrimos entos una terminal y editamos httpd.conf con Nano.

$ sudo nano /etc/httpd/httpd.conf

y descomentamos les llínies

LoadModule php4_module libexec/httpd/libphp4.so

y

AddModule mod_php4.c

Guardamos, zarramos y reiniciamos Apache

$ sudo apachectl restart

Nesti puntu yá tenemos Apache corriendo PHP, pa probalo vamos a la nuesa carpeta d’usuariu y na carpeta nueva “Web” facemos un ficheru nuevu col nome phpinfo.php col códigu <?php phpinfo();?> y comprobamos que funciona en http://localhost/~nomedusuariu/phpinfo.php

Agora toca instalar MySQL, baxamos el paquete que mos interese, nesti casu Mac OS X 10.4 PowerPC 32-bit.

Abrimos la imaxe y instalamos primero mysql-5.0.51a.osx10.4-powerpc.pkg (el nome dependerá de la versión), llueu instalamos MySQStartupitem.pkg y pa finar MySQL.prefPane

Volvemos al terminal y creamos un ficheru .profile na nuesa carpeta d’usuariu pa indicar a la terminal onde tan les aplicaciones que queremos executar

$ touch .profile

$ nano .profile

indicamos les rutes cola siguiente llinia

PATH=/bin:/sbin:/usr/bin:/usr/sbin:/usr/local/mysql/bin

guardamos el ficheru y reiniciamos la máquina qu’entamará a correr MySQL.

Agora toca configurar: dende la terminal executamos

$ mysql_secure_installation

diremos respondiendo a les entrugues del script según convenga y daremos-y la clave pal usuariu root

Yá tenemos Apache, PHP y MySQL corriendo, pero PHP y MySQL entá nun se comuniquen como deben, primero creamos en MySQL un usuariu pa PHP

$ mysql -u root -p

y nel prompt de mysql executamos

SET PASSWORD FOR root@localhost = OLD_PASSWORD(‘laclavequedimospalroot’)

zarramos MySQL pero… PHP sigue ensin ver a MySQL, esto ye por un problema coles rutes de PHP en Tiger, pero vamos engañalo… pa eso tenemos que facer un direutoriu nuevu y un enllaz

$ sudo mkdir /var/mysql

$ sudo ln -s /tmp/mysql.sock /var/mysql/mysql.sock

Yá ta, yá tenemos Apache con PHP y MySQL nel piquiñín iBook, pero agora vamos instalar phpMyAdmin pa xestionar les nueses bases de datos, descargamos la última versión, y la descomprimimos en ~/Sites/phpmyadmin (o dicho d’otra forma na carpeta “Webs” del nuesu direutoriu d’usuariu). Agora lo configuramos usando l’exemplu config.sample.inc.php

$cfg[‘blowfish_secret’] = ‘lafrasequemopete’;

y vamos configurar un servidor namás polo que $i = 1;

Nosotros namás que vamos usar esti servidor pa desendolcu, nun va usase pa producción polo que nun usamos proteición pa phpMyAdmin

$cfg[‘Servers’][$i][‘auth_type’] = ‘config’;

damos el nome del host el usuariu del del server y la clave

$cfg[‘Servers’][$i][‘host’] = ‘localhost’;

$cfg[‘Servers’][$i][‘user’] = ‘root’;

$cfg[‘Servers’][$i][‘auth_type’] = ‘laclavequedimospalroot’;

Guardamos el ficheru como config.inc.php y nos vamos a http://localhost/~nomedusuariu/phpmyadmin pa crear les bases de datos que necesitemos.

Esta instalación y estes configuraciones nun se recomienden pa un entornu de producción, ta fechu pa un portatil pa poder trabayar con él nel desendolcu d’aplicaciones web.

La semeya del iBook ye d’Akira Kamikura con llicencia CC-by 2.0.

Altuxa blogs, abre pa blogs nuevos.

Tamos acabantes d’abrir el rexistru d’usuarios y blogs nuevos p’Altuxa blogs.

Esta historia entamó va un añu y unos meses, cuando entamamos a trastiar un pocu con WordPressµ, que nun ye más que la versión multi usuariu del famosísimu WordPress. La idea yera ver si somos quien a facer una comunidá tipo blogger o wordpress.com n’asturianu, y como escusa nació González y González.

La idea nun ye la d’ufiertar un serviciu de blogues gratuitos al usu. Pa eso hai yá servicios como’l de Nireblog. Pel momentu, el alta nel serviciu ye ‘manual’, esto ye: va ser un alministrador quien apruebe l’apertura del blogue acordies col interés del proyeutu candidatu. L’oxetivu, básicamente, ye dar soporte n’asturianu, con tola calidá que seya posible, a blogues temáticos que puean tar xestionaos  por ún o dellos autores.

Depués de munches pruebes, y dellos cambeos importantes (llegamos a tar casi que un mes ensin actividá) podemos dicir que tamos nuna fase bastante estable del proyeutu, que podíemos dicir que sal d’una fase alpha pa entrar en beta (esto pa los mui geeks) anque presta más vhs como dicen los de chuza.

Enfin, que Altuxa blogs ye una comunidá pa blogs escritos n’asturianu, tol sistema funciona n’asturianu (dalgún mensaxe puede qu’entá salga n’inglés), ye de baldre y nun tien publicidá.

Ente les sos caracterítiques, inclúi soporte pa ḥ y Ḷḷ nel editor de testos. Esto ye pa los que nun pueden instalar el tecláu asturianu nel so sistema (Windows y Mac OSX). Son simplemente unos botones que permiten enxertar estes grafíes ensin tener que andar copia-pega.

El sistema permite esportar tol conteníu pa llevalu a otru blogue y tamién permite importar dende plataformes como Blogger, Blogware, LiveJournal, Movable Type, TypePad, otros WordPress y de feeds RSS.

Tien soporte pa incrustar video y audio, ye personalizble con estremaes plantíes y te puedes construir fácilmente la to barra llateral gracies a pequeños “widgets”. Tamién pueden utilizase plugins qu’añaden funcionalidá al blogue.

Anguaño tenemos mui poques plantíes y plugins (fuimos instalando según facía falta), de forma que quien quiera un diseñu que nun tea n’Altuxa.com tendrá qu’avisanos pa instalalo, hai munches plantíes pa WordPress.

Pel momentu ufrimos 10Mb d’espaciu (pa semeyes y ficheros).

Tamién tamos acabantes d’abrir un blogue nuevu onde diremos dando anuncia de les novedaes y proyeutos nuevos que puean surdir de les idees nes que yá tamos trabayando dende Altuxa.com, qu’esperamos que sean unos cuantos y que sean d’utilidá.

La cosa medra…

Dende que entamamos col blogue siempres vi que yeramos cuatru frikis los que escribiamos n’internet, pero nun se si ye sensación mia o ye que cada vez hai más blogs n’asturianu. Y digo que igual ye sensación mia porque nun me paro en munchos blogues, y más de la metá nun los conozo. Esto veolo como una bona siñal, ya que dexamos de ser frikis pa ser una comunidá curiosina. Y ye que acabo topame con un blogue pa xente gocho n’asturianu… (mayores d’edá)

 

Motores de busqueda de webs n’asturianu… agora Nireblog

El vienres fice una xml pa poder buscar nel Diccionariu ALLA dende Firefox y iexplorer 7, y güei fice uno pal Google custom serach de Nireblog que espero vos sirva a tolos que teneis un blogue n’esta plataforma. Pa los que non, ye mui cenciellu facese uno (ficelo pa esti blogue…) podeis descargavos cualesquier xml de los que fice y nun ye mui complicáu entender como ye. De toes formes si vos ye mui complicáu o vos da pereza y tais interesaos en facer dalgún en concretu podeis pedilu n’esti post y miraré si soi a facelu.

Podeis instalar tolos motores que fice dende http://altuxa.com/motores_busqueda.php (más alantre preparé una web curiosina pa esto).

Goatse 2.0

Acabo d’enterame del surdimientu de la frikada 2.0. Si a finales de los 90, el fenómenu yera la semeya hello.jpg del sitiu Goatse.cx y la so contribución a la creatividá global, nel entamu del nuevu sieglu va camín de facer lo propio un videu, que lleva por títulu “2 girls, 1 cup”. Lo gochu de Goatse queda con esti videu en daqué entrañable y inocentón. Por eso, el fenómenu nun ye yá’l videu en sí, sinon la ‘reaction’, la respuesta, el ‘feed back’, como nun podía ser d’otra manera n’esto de la web 2.0.

Básicamente, y pa que nun paséis pol tragu que tuvi que pasar yo, “2 girls, 1 cup” ye un vidéu porno de conteníu fetichista coprófago. Esto ye, dos moces de buen ver que comen mierda d’una copa de les de xeláu. La gochada va in crescendo, y ello ye lo que permite la gracia de la ‘reaction’. En youtube hai ya decenes de videos de reacciones al videu. Si vos interesa (nun dexa de ser ‘cultura popular’), podéis buscar “2 girls, 1 cup reaction” y a perder el tiempu.

Piesllamos… Ximiélgame.net

logoliquid.png

Dende llueu, esti nun ye’l mensaxe que mos hubiera prestao escribir al quintu día de funcionamientu de Ximielgame.net, pero cuidamos que ye lo meyor.

Suponemos que los más perspicaces blogosferos asturianos vos decataríeis de la llamentable coincidencia de que dos proyeutos idénticos, casique coles mesmes funcionalidaes, asoleyáronse al empar el pasáu martes. Nós, cuidamos que nun ye lo meyor pa que un sitiu d’esti tipu tenga un bon nivel d’usu que convivan o compitan dos sitios pensaos pa una comunidá tan ruinuca como la nuestra.

A la hora d’entamar Ximiélgame nun mos movíen intereses económicos nin de ego, sinon el presto de desenvolver una ferramienta que, al nuesu entender, ye perguapa p’afitar les rellaciones ente los blogueros d’Asturies.

Per embargu, les coses nun salieron bien. El día (meyor dicho, la nueche, del llunes) na que tábemos faciendo los últimos axustes a Ximiélgame, probando enllaces y demás, mos enteramos de que otra xente tuvo la mesma idea (orixinales, cierto ye, nun somos). Al traviés d’un corréu, desplicaben qu’habíen atopáu el dominiu y mos ofrecíen ‘axuntar esfuercios’ pa desendolcar el proyeutu de forma conxunta. Al tiempu, nos informaben de que teníen rexistráu la direición esbilla.net, direición que, lóxicamente, visitamos. Per embargu, nun había un res, y al poco vimos qu’acababen d’instalar Pligg (la ferramienta cola que furrula tamién Ximiélgame) y al poco qu’entamaben la traducción del sistema del inglés al asturianu.

Nesi puntu, lo reconocemos, pecamos de ‘malpensaos’. Nun-y dimos credibilidá a la invitación a ‘axuntar esfuercios’ y entendimos que aquel enfotu en asoleyar un sitiu mínimamente operativu (se pue facer en poques hores) convertía l’ofrecimientu inicial en papel moyáu. Asina qu’adelantamos unes hores l’apertura de Ximiélgame.

Sicasí, al día siguiente punxímonos en contautu cola xente d’Esbilla pa tratar d’esclariar l’asuntu, cola idea de que comprenderíen qu’aquella situación nun tenía xacíu, que yera lóxico que nun aparáramos un proyeutu nel que llevábemos cerca de dos meses trabayando, y que de toles maneres bien podíen axuntase a nós cola alministración de Ximiélgame, al tiempu que nós collaboraríemos con ellos nel desendolcu d’otros proyeutos.

Pero nun pudo ser. La nuesa ‘premura’ nel asoleyamientu de Ximiélgame foi interpretada como una forma de desconfianza qu’existió (polo ya espuesto enriba), y que llamentamos fondamente.

Asina, y énte la perspectiva d’atopanos con dos proyeutos iguales, o mui asemeyaos, compitiendo nuna comunidá tan pequeña como la nuesa, pensamos que lo meyor ye dexar sitiu, asumir nuestru error, y pedir disculpes fonderes a la trentena d’usuarios que se rexistraron estos díes. Tamién queremos agradecer, y muncho, los mensaxes recibidos tres de l’apertura de Ximiélgame, y a toa esa xente que corrió a poner el so enllaz nel so blogue o na so web, y mui especialmente a Nireblog. A toos, vos encamentamos a facer lo propio con Esbilla.net, pa que haiga un sitiu de promoción de noticies n’asturianu que tenga un bon nivel d’usu, que sirva pa cohesionar a la comunidá, y que seya ún de los puntos de referencia del internet n’ast.

Ximiélgame.net siguirá funcionando entá unos díes. Depués, se procederá al so pieslle, qu’incluirá l’esborráu de tolos datos qu’apurrieron los usuarios nestos díes de funcionamientu, tales como nomatos, claves, direiciones IP y, por supuestu, señes de corréu electrónicu. Vémonos.