Esti mediu GyG puede que te rozando’l sindrome de Dióxenes cola so afición a les máquines electróniques vieyes… y ye que toi acabante de sumar una maquinina más a la coleición, gracies a un prestosísimu regalu del otru mediu GyG y siñora, en concretu la maquinina soviética Becëльiй Пobap de la casa Электроника.
Электроника yera una marca de productos electrónicos de la vieya URSS que facién, ente otres coses, relós, despertadores, ordenadores y componentes informáticos de tou tipu, equipos de soníu…
Pero quiciabes lo más famosu seyan les calculadores que entamaron a fabricar al rodiu de 1968. Facíen dende les más simples calculadores pa guaḥes nos colexos a les máquines más complexes dedicaes al estudiu científicu con capacidá pa ser reprogramaes.
Dientru de les técniques qu’usaba Электроника pa desendolcar los diseños de los sos productos destacaba la inxeniería inversa, aplicada especialmente a productos d’orixe xapones. Y frutu d’esta técnica aplicada a les famosísimes Game & Watch de Nintendo xurde una gama de maquinines pal entrenimientu de los guaḥes de los paises del bloque soviéticu. Gracies a que un d’estos guaḥes yera más cuidadosu que los GyG cola so maquinina “Rain Shower” (que anque entá furrula, ta fecha un cristu) güei podemos esfrutar d’esta pequeñina ayalga a piles de botón…
