Category: Llingua
Viva el Perú, ¡Carajo!
Una de músiques, que diba tiempu que nun-y echábamos un güeyu al youtube. Equí vos dexo un videu del grupu peruanu Uchpa. Rock y blues en quechua. Pa más información lleéi la Uiquipedia.
Doblaxe
Sabréis de la acoyida que tovieron dos clips de la peli El Rei Lleón nos que los diálogos tan doblaos al asturianu. Nun ye la primer vez que se fai daqué asina, amás de la serie El faru d’Illán, qu’emitió Teleasturias, fízose dalgo asemeyao pal décimu aniversariu de Les Noticies con un cachu de La vida de Brian. Pero el casu ye qu’esto ta fechu por dos actores porque sí. Demuestren que con un pocoñín de voluntá, la televisión pública asturiana diba poder facer daqué asturiano, divertíu, averáu y n’asturianu. Ánimo y p’alantre.
https://www.youtube.com/watch?v=aAlPV8XojZQ
Prietos
Nun diálogu de la película The Commitments decíen dalgo asina como que “los irlandeses somos los negros d’Europa”. De xuru que nun ye un pensamientu mui orixinal, pero dacuando cuido que los ‘asturfalantes’ somos los negros d’Asturies. Salvando les distancies, siempre viera dalguna asemeyanza ente la minoría prieta estaunidense y nosotros. Como movimientu social, que llucha pol reconocimientu de drechos civiles, tenemos contradicciones, tenemos los nuesos ‘Panteres prietes’, y los que son refugaos pol restu acusaos d’acombayar col ‘enemigu’, con una clas dirixente qu’oprime y nun mos quier reconocer. Sicasí, l’aición conxunta de toos, tendrá de servir p’algamar finxos a poco y a poco. Nun sé, acordéme de toes estes coses cuando atopé güei nel youtube esti clásicu: los Public Enemy dirixíos por Spike Lee.
¡Más manifa!
Cursu d’ética periodística
La cobertura que-y dieron a la mani pola oficialidá nos trés diarios asturianos ye pa detenese un momentu. Talamente paez que los responsables d’estos periódicos saben más d’otra cosa que de periodismu. Vamos equí facer un breve analís, n’alcordanza tamién d’aquella estupenda seición del auténticu CQC, qu’en gloria tea.
15.000 persones!!!
Naide nun lo pue negar, la manifestación del CAO güei n’Uvieu foi un ésitu total, magar que munchos nun pudimos tar ellí. 15.000 persones diz el CAO, 10.000 la policía local uvieína… dame igual. Depués de trenta años, a una o dos manis añales pola oficialidá, lo que ta pernidio ye que ésta sí ye una ‘clara demanda social’ de los asturianos. Toi contentu, y arguyosu de sentir a muncha, muncha xente bien cerca.
Queríos Javier Fernández, Tini Areces, Fernando Lastra, Ovidio Sánchez, señores del Ridea, Javier Neira, Vilda d’Alarcos, y a tolos cerriles que perhí anden entá… n’esti momentu d’allegría pa gran parte de los asturianos, dexaime que vos dedique una canción…
https://www.youtube.com/watch?v=CiIlYz2n4Pg
Nun ye ñoña, tien coña, 😉
Nun vaya ser que se vos olvide
¿Cómo suena l’aragonés?
Va tiempu que topé esti videu nel Youtube y prestome pola vida sentir faláu l’aragonés, la otra llingua española entá non oficial pola mor de la falta d’un movimientu nacionalista bayurosu que lu sofitara dende los entamos del sieglu pasáu. Val más escuchalu.
Nueva manifestación pola oficialidá del asturianu
Lleo al travies de la web de la Xunta pola defensa de la llingua asturiana, que’ l Conceyu Abiertu pola Oficialidá convoca otra manifestación pal prósimu sábadu 18 de payares a les 18:00 n’Uviéu. Yo nun voi poder dir porque taré tocando en Cabrales, pero espero que podaís ir cuantos más meyor.
Por cierto ¿conoceis alguna web del CAO? ¿Hai manera pa firmar el manifiestu dende internet? y si non ¿teneis fueyes pa poder firmar el manifiestu?… rempuestes nos comentarios por favor.