Si ya lo diximos, que con grupinos prefabricaos nun hai manera de facer nada n’Eurovisión. Yo sigo apostando por Vicente Díaz, una voz impresionante y un estilu propiu, que n’Europa ya cansaron d’eso que llamen “ritmos llatinos”. “Qué tien esta sidrina” ye un exitu aseguráu.
Al final ganó Serbia, anque los mios favoritos yeren los ucranianos qu’algamaron la segunda posición, nun sé, diome la sensación de sentir el remix “Na caleya” de La Bandina al tiempu qu’Almodovar y MacNamara…
Ay mamina que disgustu. Toi acabante d’enterame de que metieron a la Panto na cárcele acusada de blanquéu de capitales. ¿Qué vendrá darréu? ¿Cómo van retrucar les autoridaes a esti atentáu a la cultura española? ¿Onde tuvo el rei de ‘viaxe privau’ que tardó dos díes en dir a conocer a la nieta mientres la reina taba nun funeral? Ay mamina, cuántes entrugues ensin responder.
Pal que nun lo sepa, dicímos-ylo: Tinita acabante d’ordenar el pieslle dafechu de Teleasturias. Al traviés del so brazu executor, Luis Iturrioz (viceconseyeru d’alministraciones públiques), ordenó a la empresa encargada del tresporte de la señal televisiva analóxica de Teleasturias la suspensión de toes les emisiones. Tamos ante l’ultimu episodiu d’una traxectoria nel control de los medios de comunicación aniciada por Tini namás entrar nel Gobiernu del Principau, cola retirada de la llicencia d’emisión que-y concediera’l gobiernu anterior a la emisora n’asturianu Radio Sele, va cásique ocho años.
Enantes de nada, querría dicir qu’esta canal nun foi nunca, precisamente, la que más me prestaba ver (magar d’escepciones como el boxeo, dellos alderiques, Tómbola o el prestosu proyeutu ‘El faru d’Illán’). El so dueñu ye amás ún d’esos siniestros personaxes metíos a empresariu con milenta asuntos turbios al llombu. Pero esto ye otra cosa. A Tini y compaña lo que de verdá-yos da zuna d’esta canal ye la so llinia crítica col PSOE, afondada nos meses caberos cola apaición de la TPA y el intentu del Gobiernín de facer hexemónica la ‘so’ televisión.
Sabréis de la acoyida que tovieron dos clips de la peli El Rei Lleón nos que los diálogos tan doblaos al asturianu. Nun ye la primer vez que se fai daqué asina, amás de la serie El faru d’Illán, qu’emitió Teleasturias, fízose dalgo asemeyao pal décimu aniversariu de Les Noticies con un cachu de La vida de Brian. Pero el casu ye qu’esto ta fechu por dos actores porque sí. Demuestren que con un pocoñín de voluntá, la televisión pública asturiana diba poder facer daqué asturiano, divertíu, averáu y n’asturianu. Ánimo y p’alantre.
https://www.youtube.com/watch?v=aAlPV8XojZQ
De secute vienome esta frase popularizada por Manuel Manquiña na película Airbag, al intentar entrar na web de TeleTini y topame con esto… (calca la imaxen pa ver la captura de pantalla completa)
… podría pensase d’un ataque d’un cracker… pero qué coses, qu’eso de caciplar con servidores web ye una cosa que nun se me da mui mal y esi error 403 pa min tien pinta de descuidu por parte del alministrador del servidor… enfin munches perres, muncha teunoloxía, muncho profesional…
Ubuntu Studio quiciabes seya el productu qu’espero dende fai más tiempu con gran impaciencia, y ye que pa los que trabayamos con audiu y/o vídeu, o bien soltamos perres asgaya pa mercar unos productos que pa enriba creen dependencies, o ponemonos delantre d’un ordenador durante hores pa configurar y compilar les aplicaciones que necesitemos pal desenrollu de los nuesos proyeutos.
Anque en cuantes a edición de vídeu (y nun falo de modeláu y animación 3D) les posibilidaes dende GNU/Linux son llimitaes ya que aplicaciones como Final Cut tan a años lluz de les disponibles pal sistema del pingüinu, nel casu del audiu ya podemos falar de coses más series y competitives. Aplicaciones como Audacity, Rosegarden, Ardour, Wired, Linux Sampler, etc, y ya nun falemos de proyeutos tan importantes como los qu’entama la Fundación Xiph.org (creadores de vorbis, theora y ogg entre otros). Tou esto montáu enriba d’ALSA permiten trabayar col soníu de forma profesional pero claro ta, problemes… primeru ta el tema de facer les instalaciones (acabes fartucu de compilaciones) y lluéu configuralo too pa que furrule como debería, a día de güei ye un trabayu de chinos y lleva la de Dios de tiempu, amás d’esto ta el problema perconocíu del prauticamente soporte nulu que dan los fábricantes de hardware especializáu necesariu pa estos procesos.
Pos bien, a lo que diba, pal próximu mes d’abril anuncien la primer versión d’Ubuntu Studio, anqué ya hai versión nos repositorios oficiales en forma de paquetes instalables sobre Ubuntu. Tamos falando d’una distribución nueva basada n’Ubuntu que bien preparada y orientada pa la edición y composición d’audiu, videu, medios impresos (fotografía, ilustración y maquetación) y modeláu y animación 3D. Si bien tanto el tema gráficu y 3D ya ta bien superau pa cualisquier distribución GNU/Linux d’aguaño (namai hai que ver les grandes produciones “Hollywoodiegues” que tiren de productos como CinePaint o Blender), esta ye la primer distribución que va facilitanos el trabayu col audiu dixital y más p’alantre enfotarse col videu.
Ye una comunidá acabante d’entamar y ya tien dellos collaboradores, anque enta hai trabayu que facer. D’otra mena, y ya toi especulando, el fechu de que empreses tan importantes como NVIDIA, HP o Intel, por nomar unes poques, tean detrás d’un proyeutu tan interesante como ye Jahshaka, faime ser optimista en cuantes al futuru de la creción de multimedios con GNU/Linux.
Como yá se dixera va meses en dellos foros, Localia va esplotar la única televisión privada autonómica dixital d’Asturies. Nun ye una sorpresa. Tampoco lo ye el repartu qu’Areces y el so gobiernín fizo públicu güei de les demás llicencies de televisión dixital terrestre n’Asturies. La Nueva España tendrá de facto una cadena autonómica de televisiones llocales al obtener toles llicencies posibles, lo que-y permitirá a esti periódicu empobinar una estratexa de desconexiones que yá se verá si-y furrula tan bien como col diariu. De mano, paez una clara recompensa al mou en que LNE ta tratando dende va un tiempu p’acá al gobiernín.
D’otra miente, el repartu contenta a El Comercio, siempre fiel a la causa, coles llicencies pa Uviéu, Xixón y Avilés, y premia a TeleAvilés, una canal que dende va unos meses entamó a pagar el sueldu a los pocos trabayadores qu’entá-y quedaben, al tiempu qu’entamaba una de les más patétiques y poco profesionales actitúes de tratu servil a la mano que ximielga la cuna. Oviedo Televisión y Televisión Local Gijón caltienen el preste pa seguir emitiendo pola ‘gracia’ d’Areces y compaña, a quien de xuru-yos abulta migaya ambes llicencies.
TeleAsturias ‘La Autonómica’ y Popular TV, xunto al rentista Blas Herrero, son les grandes damnificaes pola arbitrariedá del Gobiernín, y viven agora nes sos propies caNNes l’estilu ‘Soprano’ que ya sofriera cásique en silencio Radio Sele.
El panorama ye el que ye. Areces y compaña, la ‘famiglia’ sociata astur, reparten y alministren como-yos peta, y como-yos dexen, la ‘llibertá de prensa’ aprovechando una llexislación que, por demás, favorez esti control gubernamental y con dineru públicu de los mensaxes que se-yos apurre a la población. Yá sé que la llibertá ye d’empresa, non de prensa, pero coime, disimulái.
P’acabar dexámosvos un sermón illustrativu de cómo percibe Areces la televisión, y como funciona dafechu esi mediu, n’Asturies y en tol mundu. Entiéndese-y bien a esti home, y onde diz de ‘les montañes de Nepal a les biesques de Suramérica’, bien podemos pensar en Cabrales, Somiedu o los Ozcos. El casu ye que la televisión, como diz, uniforma, tresllada mensaxes qu’anulen la diversidá cultural, relixosa, política, y acaba apurriendo una mentalidá na qu’el mundu (n’esti casu Asturies), paez disneylandia (n’esti casu, el parque temáticu proxectáu por Areces p’Asturies). De xuru qu’el mensaxe d’esti curón musulmán ye simplón, pero ye, en esencia, el proyeutu que ta empobinando su ilustrísima Don Vicente.
Pa los que vivimos nel tercer mundu, en cuantes a producción audiovisual se refier, falar de televisiones como la catalana ye falar y ponete a babear.
La televisión catalana ye un exemplu en cuantes a investigación y desarrollu tecnolóxicu. A mor d’exemplu: foi la primer (y única) televisión n’España qu’entamó a emitir en 5.1 por TDT, cuasi tolos programes tienen emisión dual (catalán/castellanu) y tolos programes tan subtitulaos nos dos idiomes.
Pues bien, ún de los problemes de los usuarios de sistemes operativos llibres, y mui grave nun pais democráticu, ye la incapacidá de poder acceder a servicios d’emisión en direutu (streaming) pol fechu de que les televisiones usen sistemes propietarios, como ye’l casu de TeleTini que namás da accesu si uses Windows, d’esta manera namás puedes ver estes emisiones si pagues la llicencia d’usu a Micro$oft, cosa que munchos nun podemos o nun queremos. D’otra banda, la televisión catalana adelántase otra vegada siendo la primer televisión nel mundu qu’ufre la posibilidá de ver la so programación n’internet usando codecs llibres, nesti casu theora y vorbis, utilizando el contenedor multimedia ogg desenrolláu pola comunidá Xiph. Amás, van un pasu más al integrar un reproductor Java pa ver la emisión na so web, d’esta manera nun necesites instalar codecs ya que tan nel propiu servidor.
El sistema, anque entá tan faciendo prebes, funciona mui bien, ye mui rápidu y tien bona calidá, anque hai versión de pagu con meyor calidá entá.
Si quereis probalu calcar esti enllace y abrilu darréu con Totem o Kaffeine, pa los que useis Window$ o MacOsX tendréis que instalavos los codecs enantes.
Pa cuándo veremos algo así nel restu de televisiones… peme que va pa llargu…
Nestos tiempos nos que l’Arzobispu d’Uviéu llama a sínodo, atopámonos con que Cristo vive en Brasil y faise llamar Inri Cristo. La reencarnación del Mesías (diz que él mesmu se lo tien creyíu) yá ye una estrella televisiva con miles de seguidores (dellos porque-y creen, dellos porque s’escarcaxen a cada vegada que sal na tele). El caso ye que pel youtube ya cuerren bien de videos coles sos apariciones, los sos sermones. Hasta un milagru que pues ver darréu.
Dende que Martes y 13 dexaron d’acompañanos en nuechevieya ya nun ye lo mesmu, pa que nun vos atraganteis equi tan recordandonos como son les campanaes na Puerta del Sol de Madrí…
https://www.youtube.com/watch?v=PWft-ROuV4I