Ubuntu Tribe, un garrapiellu de xente enfotada en da-y puxu al euskera al traviés del software llibre ta acabante d’asoleyar el trailer de lo que sedrá ‘Ubuntu Tribe, the movie’, un proyeutu de mediumetraxe col que difundir el so trabayu al empar del usu de llicencies llibres y el llabor n’andecha pala creación y difusión de la cultura y el desendolcu de ferramientes informátiques.
Category: Software
Unidá apúntase a Ubuntu
Unidá ta acabante d’entamar la campaña con un cartelu nel que, claramente, asemeya l’estilu d’Ubuntu, esa distribución de GNU-Linux tan prestosa y que tantes alegríes vien dando dende unos años p’acá. Dalgunos podríen dicir que ye dafechu un plaxu, pero quiciaves ye más reflexu del apueste pol Software Llibre que, dicen, faen dende la coalición. Pal que nun tea avezáu a les campañes d’Ubuntu, dexámosvos darréu ún de los exemplos más espardíos, asína como una nota aclaratoria sobre’l sofitu d’esti web a Unidá.
Cumpleaños d’ocho bits
Esti pequeñu aparatín foi’l primer ordenador que pasó poles mios manes, y el pasáu día 23 cumplió 25 años. Güei paez ridículo falar d’un ordenador con un microprocesador de 3,5 MHz y una RAM de 16K, el nuesu modelu yera de 48K, más otros 16K de ROM, pero la verdá ye qu’esta pequeña máquina, que mio güela-y regaló a mio hermanu cuando yo tenía 4 años, enchufada a un televisor y un radiocasete, valiónos pa hores y hores d’entretenimientu y permitiónos ponenos en contautu cola incipiente industria informática doméstica. Dende 1985 hasta qu’en 1993 dexó de furrular en condiciones y mio ma decidió tiralu a la basura cuando los mios collacios ya teníen eses maquinones nomaes 386, foi’l principal entretenimientu electrónicu de mio casa.
Angüaño conservo un modelu de 128K que foi nomau ZX Spectrum+ y que tien compatiblidaácoles cerca de 60 cintes magnétiques de software que conservamos, programaes pa 48K. Amás sirvionos de tituladora de video improvisada (el testu amosau en pantalla ye igual que’l teletestu).
¿Por qué falo güei d’esto?, nun se realmente porqué, quiciabes seya porque incoscientemente dende guah.e toi atraido por esti tipu de maquinines y nun se si por ecoloxismu informáticu me niego a almitir qu’un equipu ya nun val por que lo diga Micro$oft, afotunadamente Linux permite prorrogar la vida d’equipos vieyos. Y coses que pa mio pa son mui modernes (hai que tener en cuenta que los de la so edá conocieron la televisión con casi 20 años) pa min son recuerdos de la infancia… el ZX Spectrum cumple 25 años, yo acabo cumplir 26…
LOAD “”
Copyleft, Copyright, Creative Commons… ¿qué ye eso?
Lleo güei en Barrapunto: “Las licencias “sólo para uso no comercial” no son libres, ¡no las uses!“, el desafortunáu titular ye consecuencia del desconocimientu y facilidá cola que determinaes persones usen les pallabres que titulen esti post. Son munchos los “alternaguais”, que quedense namás col impactu de dicir Copyleft ensin parase a mirar realmente el significáu y lo que’l so usu implica. Güei dende la estaya pedagoxica de González y González trataremos d’aclarar un pocu les coses…
¡Mui profesional!
De secute vienome esta frase popularizada por Manuel Manquiña na película Airbag, al intentar entrar na web de TeleTini y topame con esto… (calca la imaxen pa ver la captura de pantalla completa)
… podría pensase d’un ataque d’un cracker… pero qué coses, qu’eso de caciplar con servidores web ye una cosa que nun se me da mui mal y esi error 403 pa min tien pinta de descuidu por parte del alministrador del servidor… enfin munches perres, muncha teunoloxía, muncho profesional…
Ubuntu Studio, llibertá empaquetada.
Ubuntu Studio quiciabes seya el productu qu’espero dende fai más tiempu con gran impaciencia, y ye que pa los que trabayamos con audiu y/o vídeu, o bien soltamos perres asgaya pa mercar unos productos que pa enriba creen dependencies, o ponemonos delantre d’un ordenador durante hores pa configurar y compilar les aplicaciones que necesitemos pal desenrollu de los nuesos proyeutos.
Anque en cuantes a edición de vídeu (y nun falo de modeláu y animación 3D) les posibilidaes dende GNU/Linux son llimitaes ya que aplicaciones como Final Cut tan a años lluz de les disponibles pal sistema del pingüinu, nel casu del audiu ya podemos falar de coses más series y competitives. Aplicaciones como Audacity, Rosegarden, Ardour, Wired, Linux Sampler, etc, y ya nun falemos de proyeutos tan importantes como los qu’entama la Fundación Xiph.org (creadores de vorbis, theora y ogg entre otros). Tou esto montáu enriba d’ALSA permiten trabayar col soníu de forma profesional pero claro ta, problemes… primeru ta el tema de facer les instalaciones (acabes fartucu de compilaciones) y lluéu configuralo too pa que furrule como debería, a día de güei ye un trabayu de chinos y lleva la de Dios de tiempu, amás d’esto ta el problema perconocíu del prauticamente soporte nulu que dan los fábricantes de hardware especializáu necesariu pa estos procesos.
Pos bien, a lo que diba, pal próximu mes d’abril anuncien la primer versión d’Ubuntu Studio, anqué ya hai versión nos repositorios oficiales en forma de paquetes instalables sobre Ubuntu. Tamos falando d’una distribución nueva basada n’Ubuntu que bien preparada y orientada pa la edición y composición d’audiu, videu, medios impresos (fotografía, ilustración y maquetación) y modeláu y animación 3D. Si bien tanto el tema gráficu y 3D ya ta bien superau pa cualisquier distribución GNU/Linux d’aguaño (namai hai que ver les grandes produciones “Hollywoodiegues” que tiren de productos como CinePaint o Blender), esta ye la primer distribución que va facilitanos el trabayu col audiu dixital y más p’alantre enfotarse col videu.
Ye una comunidá acabante d’entamar y ya tien dellos collaboradores, anque enta hai trabayu que facer. D’otra mena, y ya toi especulando, el fechu de que empreses tan importantes como NVIDIA, HP o Intel, por nomar unes poques, tean detrás d’un proyeutu tan interesante como ye Jahshaka, faime ser optimista en cuantes al futuru de la creción de multimedios con GNU/Linux.
Los usuarios de Linux la tenemos más gorda
Y nun lo digo yo, dizlo l’institutu Kinsey, dedicáu a estudios alrodiu de costumes sexuales.
Ye una noticia vieya (l’estudiu salió en setiembre) pero llamóme l’atención polo absurdu.
L’estudiu en cuestión comparaba durante seis meses usuarios de Window$ y GNU/Linux (nun diz de MacOsX un res) y demostró que l’usuariu mediu de Linux tien un centímetru más de diametru nel so pene que l’usuariu mediu de Windows.
Según el direutor del proyeutu esto puede ser consecuencia de que l’usuariu de Linux, polo xeneral, echa más hores delantre l’ordenador qu’el de Windows y que la radiación del monitor podría tar nel orixe d’esti aumento de grosor.
De secute salieron teoríes na rede de porqué esta diferencia, hai quien diz que ye consecuencia de qu’hai mui poques usuaries de Linux, aspeutu que nun tien en cuenta’l fechu de que l’estudiu namás foi fechu ente homes.
Otros atribuyen l’aumentu a la seguridá de Linux, esta seguridá fae que l’usuariu de Linux entre ensin mieos en tou tipu de páxines porno pa saciar les sos ansies onanistes y que, de tantu trabayar los músculos del pene, esti medra enforma.
Captura d’Ubuntu Linux 6.10 (el mio ordenador)
Descarga Firefox
Otra vegada dando-y vueltes al diseñu de les webs pa que cuadre en tolos navegadores, en nengún hai problema, hasta que falamos d’Explorer. Esa cosa rara y peligrosa que diseñó Micro$oft pa tener bien controlaos a tolos usuarios del so sistema operativu. Pues bien, paez qu’agora el nuevu Explorer 7 sí que soporta un poco meyor los estándares del W3C (entre ellos css y png) polo qu’agora yá paso de comeme la cabeza con fueyes de diseños alternativos pa les versiones anteriores d’IE. Vamos que, o te actualices el IE, o uses un navegador fiable como ye Firefox, pongovos un anunciu mui divertíu.
Perdióse l’enllaz
MediaWiki, les posibilidaes del software de Wikipedia
A estes altures tol mundu conoz la Wikipedia, la enciclopedia llibre que tien versiones en más de doscientos idiomes (incluyíu l’asturianu). Lo que quiciabes nun sía tan conocíu ye’l software qu’usa esti xigantescu repositoriu del saber humanu, MediaWiki.
Pos bien, los que me conoceis bien sabeis por qué llevo un mes llargu ensin dormir apenes, y ye que pal desarrollu d’ún d’esos proyeutos que van acabar cola mio salú física (la metal perdila hai tiempu yá), decidíme por esti software pal desendolcu del mesmu. Lo que yo consideraba un mui bon software como wikipedista que soi, nun roza nin de cerca el potencial que MediaWiki tien. Y ye que, yá non sólo como “Sysop” (que nun ye más qu’un usuariu con pequeños privilexos), sinon xugando con esti software como alministrador del sistema, permitióme descubrir tol pontencial del mesmu.
Pa facevos un pequeñu resumen, agora mesmu tengo furrulando nel mio servidor de desarrollu un portal nel que cuerren cinco instalaciones de MediaWiki, una pal asturianu, otra pal castellanu, otra pal inglés y otra pal francés, y la quinta ye un repositoriu multimedia que comparte les semeyes, sones y demás multimedios con toles versiones anteriores. Anque suene a una cosa complicadísima ye d’asustar lo cenciellu que resulta montar una “Wiki Family”, como ye conocíu esti tipu d’instalaciones, y ye que namás hai que camudar unes poques variables nel ficheru de configuración de cada wiki. Nun toi diciendo con esto qu’un usuariu común seya capaz a facelo, pero cualisquier programador con un mínimo de conocimientos nun tardaría más de 20 minutos en montar el sistema (con links d’interwiki y too).
En fin, qu’amás del proyeutu de la Wikipedia, con tola importancia que tien en multitú d’aspeutos sociales, culturales, etc… la fundación MediaWiki consiguió un software tan versatil que ye perfeutamente valido pa otros proyeutos… y nun quiero precisamente montar un wiki…
Espero que cuando pase el tiempu y me quite un pocu de trabayu d’encima pueda facer un artículu téunicu pa desplicar los pasos que seguí pa llevar a bon puertu el proyeutu (anque entá nun finé, falta personalizar el diseñu y más cosines).
Yá llega!!
Bill Gates va venir a Uviéu!! Por fin!!, nun me cabe una aguya pel culín dende que m’enteré. Pal que nun lo sepa, William Gates ye un paisanu que tien encabezáo la llista de les personas con más perres del planeta, máximu responsable d’una empresa condenada por práutiques monopolístiques, y al que-y dieron esti día el premiu príncipe de cooperación internacional.
Pues el caso ye que vien p’acá, y que va falar esti nueve payares a les siete y media la tarde na biblioteca del Edificiu Históricu de la Universidá. Eso sí, si nun vos apetez dir a velu, nun vos esmolecer, que nun vos van dexar acercavos. Namás van poder escuchalu el príncipe de los premios y xente a la que-y llegue la invitación nominal que van unviar dende la fundación de los premios.
