Category: Webs y blogs

Doilacara.net nel to blogue

Cuando apareció la campaña de doilacara.net perdimos el culu pa facer un widget pa esti blogue p’amosar les últimes semeyes de la campaña. El otru día dióme por revisar el códigu del widget y decateme de que yera mui gochu púnxeme a ordenalu y acabé faciendo dalgunos cambeos más polo que presentamos la versión 0.2 d’esti widget.

Namás que val pa los que tengais WordPress nun sirvidor propiu, el resultáu final podeis velu na barrina que hai a mandrecha.

Los cambeos principales son:

  • Un enllaz a doilacara.net (paez de coña pero escaecí cuasique lo más importante)
  • El códigu css ta ordenáu nun ficheru aparte y non nel header del blog a lo gochu.
  • El títulu del widget agora ye opcional.
  • Desanicié la tabla gocha usada nel xhtml orixinal.
  • Pequeños cambeos gráficos.

Pa instalalu DESCARGA y descomprime el ficheru, y xube la carpeta “doilacara” al direutoriu de plugins del to WordPress. Tien de quedar así /wp-content/plugins/doilacara/.

Agora na seición d’alministración actives el plugin y yá podrás arrastrar el widget a la to barra llateral.

Esti widget tien llicencia GNU/GPL.

Pica Tumilho, Los Berrones de Miranda

A lo meyor ya los conocíeis… yo non, y vilos, a los Picä Tumilho, esti día nel documental esi sobre’l mirandés del canal Historia que posteó’l Círculu Lliberal. La verdá ye que velos, y viénente a la cabeza  Los Berrones. Canten en mirandés y fain ‘rock agricola’ con munchu humor. Esti ye un reportaxe na televisión pública portuguesa, onde espliquen, ente otres coses, lo que ye ‘picar tomillu’. La verdá que diba prestar un show conxuntu Berrones-Picä Tumilho.

Ver el vídeu en Youtube

Calca equí pa velo nel youtube.

D’otra manera, ye almirable la naturalidá, l’enfotu, el calter positivu que se-y da en Portugal a la oficialidá del mirandés… Hai que ver la estroza que se fizo equí cola llingua y la cultura propio, y que se sigue faciendo. Paga la pena ver el documental. Como diría Siniestro Total, menos mal, que nos queda Portugal.

A lo meyor votaba a Patxi López

Ya lo pensara más d’una vegada… si fuera vascu, o catalán, o gallegu, o valencianu… a lo meyor votaba al PSOE. Según me diera, por aquello del votu util y demás. Dame noxu dicilo, viendo la representación qu’esi partíu tien n’Asturies, pero que-y voi facer.

Si fuera vascu, quiciaves votaba a Patxi López por aquello d’echar a un PNV apoltronáu, y teniendo en cuenta que nun veo qu’EA seya quien a ello. Pero non, soi asturianu. Y equí los apoltronaos tanlo embaxu les sigles FSA y quier la cosa que, en delles cuestiones, tan más averaos a Federico Jiménez Losantos que a ZP, como diz Xuan Xosé nel so blogue. Equí, a los de la FSA nun-yos duel prenda titular un post n’euskera… pero llueu amuesan un espantible despreciu de lo que ye la historia, la cultura y el potencial del país que tienen ente manes.

Por ciertu, que nun sé si tendrá que ver, pero ¿Patxi López y Próspero Morán son primos?

patximoran

(Nota: La hipotética posibilidá de que dacuando votara a Patxi López desapaeció dafechu al conocer, nel procesu de confección d’esti post, un ‘meme’ que percorrió blogues sociates nes selmanes últimes, y pel que se facíen retratos a sí mesmos a lo Obama gracies a la ferramienta qu’apurre esta web.  LOL!!!. Equí teneis al propio Patxi, a la conceyala d’Avilés Ana Concejo, el portavoz del PSC, Miquel Iceta, l’alcalde de Caravia, Pablo García Pando…)

El PP vascu cai nel borderlainismu

El PP vascu vien d’asoleyar una campaña super dos puntu cero chupi guai (dende que descubrieron feisbuk nun hai quien los aguante) na qu’amuesen cómo PNV y PSE almiten xente que nun fale euskera por mor de cobrar la cuota d’afiliau. Con esti videu, amuesen un puntu borderlain que pensábemos esclusivu de dalgún cabezaleru del PP asturianu, magar qu’apuntaren yá maneres n’esti videu. A poco que se conoza al votante vascu nun se pue más que pensar qu’el videu en cuestion ta mas pensáu pa que La Razón tenga dalgo más qu’espublizar que’l rollu esi de los espíes, que pa ganar votos nes autonómiques vasques.

Ver el vídeu en Youtube

Yá ta, yá pasó

Nun mos resistimos a facer referencies a Obama. Güei alcordeme del blogue artofobama.com, nel que diben amestando semeyes con espresiones artístiques más o menos populares y acertaes. Dende que lo descubriera medró enforme. Ente los últimos post, prestóme especialmente esta versión del American Gothic que fizo el caricaturista Frank Harris. Bien visto. Paezme.

Y non al pieslle de La Voz de Asturias

Juan Vega y esi blogue d’apariencia Teleasturiana (La otra TPA) entren a sacu col tema del pieslle de La Voz de Asturias, non ya en la cuestion tocante a los trabayadores, sinon a la de les intrigues polítiques, los xuegos de poder al rodiu de los medios de comunicación n’Asturies. Lo cierto, y nello tamos d’alcuerdu n’esti blogue, ye que colo que pase agora con La Voz de Asturias xugámonos muncho los asturianos, magar que la combayonería cola mano del Gobiernín que-y daba de comer nos años últimos fuera perconocía y dacuando vomitiva.

Y ya que tamos con referencies a otros sitios… mui recomendable la ‘Sabatina intempestiva‘ de güei en La Vanguardia.