Déxovos pa descargar la semeyona que usé pal videu. Si la quereis/necesitais en png (más calidá) y col fondu tresparente pedila nos comentarios porque pesa demasiáu como pa colgala.
Esta versión ye jpg y tien fondu blancu, ocupa unos 20 MB y tien un tamañu de 12.305 x 8.752 píxeles. Ta archivada en zip pa forciar la descarga y evitar que abra nel navegador.
Fice un videu usando cerca de 1.500 semeyes de la campaña de doi la cara (casi quemo el procesador), nun abulten munchu nel videu poro intentaré xubir “la semeyona”…
D’equí a unes selmanes, pal 7 de xunu paezme que ye, vamos tener les eleiciones más bobes del calendariu. Eses nes que se trata d’escoyer a les vieyes glories del PSOE y del PP que van vivir un retiru coyonudu a cuenta del Parlamentu Européu. Hailos que ya entamaron güei la precampaña y fainlo escolingando n’internet videos como esti.
http://www.youtube.com/watch?v=KhcXZt2fpwAN’Asturies la precampaña entamó col vetu del BNG a que la UNA forme parte de la coalición ‘Europa de los pueblos’ pol fechu de ser un partíu asturianu. Como la mera esistencia d’Asturies fai rescamplar lo feble de la historigrafía nacionalista galllega, pues a ḥodese. En fin, too esto ¿sedrá porque Galicia ye un país que hasta que descubrió’l contrabando de farlopa nun esportaba más que fame? ¿O sedrá polo que diz Vicente García Oliva? Al final, nun hai otra: complexu de nuevu ricu. Y pela parte nuestra: una migayina de resentimientu y envidia, por qué negalo.
Actualización Primera: Digo mal cuando digo qu’equí n’Asturies la precampaña empezó colo de la UNA y el BNG. Lo cierto ye qu’entamo bastante enantes, coles discusiones sobre’l retiru o non d’Ovidio Sánchez nel Parlamentu Europeu, y sobre la presencia de socialistes na llista del PSOE. Y sí, bien ceo anunciaron que l’ex rexonalista Masip va repitir poltrona col númberu 17 de la llista socialista. Lluéu, Izquierda Unida anunciónos que l’asturiana Marta Pulgar diba nel númberu trés de la so formación.
Actualización Segunda: Cuenten n’Asturnews qu’Andecha diz que de vetaos nada, qu’ellos son socios d’Europa de los Pueblos y que puede qu’el BNG-yos permita a ellos dir na candidatura. ¿Dalguien puede aclarar too esto? ¿Pue dar el nacionalismu asturianu más pena y dolor? ¿Sedrá qu’empiezo a entender al BNG?
O eso, o ye que los señores de la clínica oftalmolóxica ‘de los Vega’ tienen los reclinatorios más encontradizos del país. D’otra manera nun s’entiende que l’ampliación del negociu d’esos señores abra güei la estaya de ‘Sociedad y Cultura!!’ de LNE. O que tea na portada del web de La Voz de Asturias. Porque, en verdá vos digo, empreses que dicen qu’invierten 6 millones d’euros y nes que trabayen 35 persones (otra cosa ye que tean toes contrataes, en condiciones y tal…) hai bien d’elles, ensin que-yos faigan reverencies na prensa uvieína.
Pero, de toles maneres, ¿nun sedrá too esto un intentu de facer creer a los llectores, a los que se tomen por bobinos, que esto de la clínica ‘de los Vega’ ye semeyante copón que faga necesario que vengan los reis d’España a inaugurar les nueves oficines?
Por cierto, pal que nun s’enterara, va haber actos n’Uviéu güei y mañana, entamaos pol Ensame República Asturiana pa quien quiera dicir qu’Asturies nun quier rei. Vía: Fueya en blanco.
Esti día alcordeme d’aquella anuncia que ficieran va unos meses nel blogue de l’Asturies Lliberal y nel Asturnews sobre los contautos entamaos por un grupu d’empresarios pa llanzar un diariu n’asturianu. Col tiempu, supimos incluso qu’había nome: ‘La gaceta d’Asturies’, y que se diba firmar en Barcelona un alcuerdu con un grupu del sector con implantación estatal. Amás, se preveía el presente mes de marzu como fecha de salida del nuevu mediu.
Esta semeya d’enriba va servinos pa xugar un poco a la conspiranoia, y pensar qu’aquel grupu de BCN yera Planeta, editora del catalán diario en catalán Avui, y que los contautos d’empresarios asturianistes y lliberales foron debidamente ‘interceptaos’ pola maquinaria Principeda.
A lo meyor entós, buscóse la manera d’ufiertar una compensación a Planeta pol favor de dexar pa ‘práu’ un proyeutu que ‘nin le diba nin le vinía’.Y esa compensación ye face-y al Grupu Planeta un conveniu felaz nesi caldero los pulgos (pulgos delicatessen, eso sí) cultural que ye’l Centru Niemeyer.
Too esto ye ficción, xuegu conspiranoicu, pero sí que molaba saber qué foi d’aquel proyeutu cuya consecución munchos díbemos celebrar.
Al P$O€ nun-y da reparo vulnerar llibertaes de los ciudadanos con tal de devolve-yos el favor propagandísticu que-yos ficieron la $GA€ y demás entidades de xestión de derechos de discográfiques y distribuidores cinematográfiques.
A iniciativa ciudadana xurdió en Twiter un concursu d’eslóganes pa pidir la dimisión del ministru de “cultura”, y ficieron un videu recopilatoriu con dalgunos…
http://vimeo.com/3742855Cuando apareció la campaña de doilacara.net perdimos el culu pa facer un widget pa esti blogue p’amosar les últimes semeyes de la campaña. El otru día dióme por revisar el códigu del widget y decateme de que yera mui gochu púnxeme a ordenalu y acabé faciendo dalgunos cambeos más polo que presentamos la versión 0.2 d’esti widget.
Namás que val pa los que tengais WordPress nun sirvidor propiu, el resultáu final podeis velu na barrina que hai a mandrecha.
Los cambeos principales son:
Pa instalalu DESCARGA y descomprime el ficheru, y xube la carpeta “doilacara” al direutoriu de plugins del to WordPress. Tien de quedar así /wp-content/plugins/doilacara/.
Agora na seición d’alministración actives el plugin y yá podrás arrastrar el widget a la to barra llateral.
Esti widget tien llicencia GNU/GPL.
Nun pude evitar fusilalu d’El Replicate, que fusila d’Un lagarto abuhardillado…
A lo meyor ya los conocíeis… yo non, y vilos, a los Picä Tumilho, esti día nel documental esi sobre’l mirandés del canal Historia que posteó’l Círculu Lliberal. La verdá ye que velos, y viénente a la cabeza Los Berrones. Canten en mirandés y fain ‘rock agricola’ con munchu humor. Esti ye un reportaxe na televisión pública portuguesa, onde espliquen, ente otres coses, lo que ye ‘picar tomillu’. La verdá que diba prestar un show conxuntu Berrones-Picä Tumilho.
Calca equí pa velo nel youtube.
D’otra manera, ye almirable la naturalidá, l’enfotu, el calter positivu que se-y da en Portugal a la oficialidá del mirandés… Hai que ver la estroza que se fizo equí cola llingua y la cultura propio, y que se sigue faciendo. Paga la pena ver el documental. Como diría Siniestro Total, menos mal, que nos queda Portugal.
