Va tiempu que nun faigo nengún post, llevo varios díes d’esos que por dellos motivos nun t’apetez facer nada (más bien nun hai tiempu) y llegues a casa mui quemáu y con ganes de mandalo tou a la mierda. Nestos díes grises hai xente que diz que ye bono’l chicolate, yo tiendo a refuxame na música, y güei voi dir con otru espíritu pa la cama, gracies a Benny Greb:
Güei, cine
Archive.org, esi sitiu nunca bien ponderáu, ufierta un nuevu serviciu, entá en fase beta, qu’abúltanos de lo más prestoso. Amás d’ufrir la posibilidá de descargar archivos nel dominiu públicu o non suxetos a torgues na so distribución, copia o difusión, tamién ufierta delles películes en streaming en formatu .flv. N’amuesa, déxovos el perprestosu El Gabinete del Doctor Caligari (títulos n’inglés).
Meyor con ‘motitas’
Yá lo dicía Arguiñano: meyor con ‘motitas’. La multinacional bananera ‘Chiquita’ ta en crisis depués de reconocer que financió a grupos paramilitares en Colombia. Los comedores de bananes d’esti país ablucaron cola anuncia, que venía a confirmar lo que, paez, yá se dixera bien de vegaes enantes. Na so web chiquita.com, la compañía diz que sí, que-yos pagó a los paramilitares, pero que foi namás pa protexer a los sos trabayaores ¿? Coses que tien el mundu.
Tini, Putin, Chávez, Fraga…
Pal que nun lo sepa, dicímos-ylo: Tinita acabante d’ordenar el pieslle dafechu de Teleasturias. Al traviés del so brazu executor, Luis Iturrioz (viceconseyeru d’alministraciones públiques), ordenó a la empresa encargada del tresporte de la señal televisiva analóxica de Teleasturias la suspensión de toes les emisiones. Tamos ante l’ultimu episodiu d’una traxectoria nel control de los medios de comunicación aniciada por Tini namás entrar nel Gobiernu del Principau, cola retirada de la llicencia d’emisión que-y concediera’l gobiernu anterior a la emisora n’asturianu Radio Sele, va cásique ocho años.
Enantes de nada, querría dicir qu’esta canal nun foi nunca, precisamente, la que más me prestaba ver (magar d’escepciones como el boxeo, dellos alderiques, Tómbola o el prestosu proyeutu ‘El faru d’Illán’). El so dueñu ye amás ún d’esos siniestros personaxes metíos a empresariu con milenta asuntos turbios al llombu. Pero esto ye otra cosa. A Tini y compaña lo que de verdá-yos da zuna d’esta canal ye la so llinia crítica col PSOE, afondada nos meses caberos cola apaición de la TPA y el intentu del Gobiernín de facer hexemónica la ‘so’ televisión.
Copyleft, Copyright, Creative Commons… ¿qué ye eso?
Lleo güei en Barrapunto: “Las licencias “sólo para uso no comercial” no son libres, ¡no las uses!“, el desafortunáu titular ye consecuencia del desconocimientu y facilidá cola que determinaes persones usen les pallabres que titulen esti post. Son munchos los “alternaguais”, que quedense namás col impactu de dicir Copyleft ensin parase a mirar realmente el significáu y lo que’l so usu implica. Güei dende la estaya pedagoxica de González y González trataremos d’aclarar un pocu les coses…
Andecha judaica
David Rivas demostró otra vegada apocayá que ye un home razonable y fizo pública la so renuncia a participar nes próximes elecciones énte la llaceria na que se tien convertío Andecha Astur. Nun m’esmolez un res lo que pasa nesi partiducu enfotao en buscar torgues al so desenvolvimientu na vida pública asturiana. La so historia, ye la historia de tolos que s’afayen na minoría microscópica porque nun son quién a confiar en naide que tea a dos metros de distancia. Esa xente nun val pa facer llegar a naide un proyeutu de nada, porque nun-yos peta compartilo. Pasen páxina.
Pa Cándido y Morala
Seya la cuenca, seya’l Nalón, seya Naval Xixón, Asturies ye una patria ensin sol. Va pa ellos, pa Cándido y Morala, pa los paisanos qu’entá queden.
(Videu: Stoned Atmosphere)
Los desgraciaus
Gracies a un bon collaciu descubrí un grupu mui cachondo del que vos dexo el canciu más prestosu (polo menos pa min)…
Nun se que me presta más si les palmes sampleaes o la sirena de los coches de choque…
Trés años de cárcel
Cándido y Morala van ser condenaos a trés años de cárcel por españar el caxetín d’un semáforu en mediu d’una protesta pol caltenimientu de l’actividá del astilleru Naval Gijón. N’una d’eses histories que nel cine la progresía española aplaudió na película ‘Los lunes al sol’, y que tuvo que rodase en Galicia poles torgues que n’Asturies atopó la producción.
La condena a los dos cabezaleros del sindicatu CSI ye la mesma que-y cayó a De Juana poles amenaces y enaltecimientu del terrorismu, y malapenes cuatro meses menos que lo que-y cayó al sociata del grupu terrorista GAL Rafael Vera pol secuestru d’un ciudadanu francés y malversación de fondos públicos. Xusticia ciega.
Dende equí, tol sofitu a esti par de collacios, a los que PSOE e IU fizo yá símbolu de la honestidá énte’l fartonismu y la combayonería pa colos intereses inmobiliarios y especulativos.
Cuenques freak show (El blog de Villa)
Güei flipé al atopar el blog de Villa, esi home de verbu floríu al que-y llambe la punta bona parte del prexubileríu. Paga la pena pasase perhí y echar una güeyada a un blog que, por demás, ye’l coñazu más grande que vos podéis imaxinar. Cuido que, colo tecnolóxicu que ye un home incapaz de pronunficar de siguío ‘ácido acetilsalicílico’, ye un pariente el que-y ‘cortipega’ los discursos colos qu’enllena de posts infumables esta auténtica fricada. Pero dacuando tien perles, como esa tendencia villista a citar a Antonio Machado (pamidea l’unicu llibru que tienen na biblioteca del SOMA ye ‘Campos de Castilla). Darréu qu’el blog de Villa resume toa la intelectualidá del prexubileríu y el sociateríu astur, que tamién apurre cites propies d’esos calendarios pa llevar en monederu con cursis frases d’autoayuda del tipu: “Los silencios a tiempo son tesoros en el tiempo” o “Los aduladores tienen forma de amigos como los lobos tienen apariencia de perros”. Grandes verdades rescamplen nel pensamientu de Villa. Dame la risa.
Otra de les perles d’esti blog son les imáxenes. Namás-y falten unicornios esnalando pel cosmos. Anque tamién atopes semeyes como esta, na qu’apaez Villa tou gallasperu xunta Alfonso Guerra y un par de maderos que disimulen col pañuelín bermeyu de dir a Rodiezmo. Impagable. Asturies, que guapina yes. Con fabes y sidrina nun fai falta gasolina. Les muyeres y les mazanes tienen de ser asturianes. Puxa’l SOMA.
