D’un tiempu p’acá tamos viviendo un fenómenu nuevu, y ye’l del desprestixu de la xusticia. Apocayá recusaron a un xuez porque fizo un encargu pa un órgenu de la Generalitat catalana y agora diba tener qu’emitir un dictame so’l nuevu estatutu d’autonomía d’aquel país. ¿Bien? non. Pal PP eso ye una victoria de so, pal PSOE una maniobra pa tratar de qu’el recursu de inconstitucionalidá empobináu pol PP trunfe. Esto ye, sea como sea, los dos ‘grandes’ partidos reconocen que la xusticia faenla ellos. O al menos, ye lo qu’entiendo.
Va tiempu que nun disimulen. Les coses tiénenles tan torgaes que nun yos fai falta disimular sobro la separtación de poderes y ese coses qu’afiten el llamáu estáu de derechu y el sistema democráticu.
Tol mundu daba ya por una realidá que esos mesmos ‘grandes’ partidos presionaben, manipulaben y comandaben a les empreses de comunicación pa qu’al votante-y llegara ún o otro mensaxe favoratible al poder de turno. Tol mundu daba por una realidá la connivencia ente poder políticu y económicu. Agora-yos toca a los xueces, personaxes que nun podíen presumir de prestixu social, pero qu’agora amás son presentaos polos propios partidos ‘estructurales’ como marionetes. En fin. Qué mieu.
Alaska siempre foi clara encuantes a les grandes mentires de la industria discográfica y de les entidaes que xestionen los drechos d’autor pa facer negociu d’ello esin que repercuta nel propiu autor.
Nuna entrevista en TV Mallorca cuando-y pregunten alrodiu de la “crisis de la industria” diz coses como: “no es la crisis ni de los músicos ni de la música”, “música va a seguir habiendo”, “afecta a los artistas en que tendremos que distribuir la música de otra forma. ¿En qué afecta a los fabricantes de discos? En que desaparecerán, pero yo no soy fabricante de discos, no es mi problema. Así que el que tenga un problema que busque soluciones”, “estas redes de difusión actuales lo único que hacen es difundir más mi música, hacer que llegue a gente a la que nunca le llegaría y creo que de cinco años para acá en España se vive un momento de oro en cuanto a conciertos”.
Equí vos dexo un videu que nun sé aulo clasificar, pero que me tien alloriau. Ye de lo más bizarro qu’atopé perhí en munchu tiempu. Si daquién sabe d’au sal, que lo diga, por favor.
Seyamos claros (y perdón poles groseríes): ¡Toi hasta la polla de sentir el problema de los miluristes!. ¿quién inventó esi términu? ¿yo qué soi? ¿nun existo nesta sociedá?. Y ye que yo soi d’esos que suañan con llegar a los 1.000€ mensuales…
Nun toi xustificando la situación salarial, pero peme que hai muncha xente que pon el gritu nel cielu por que nun lleguen a los 1.200 € cuando otros, y non pocos, malapenes superamos los 600.
Y el problema ye más profundu de lo que nun primer momentu paez, yá que tien muncho que ver coles “necesidaes” de consumu que mos creen les grandes multinacionales y los gobiernos. Y ye triste, pero paez que la meta de toa persona ye comprase el pisu más grande y céntricu posible, tener el coche más tunning del momentu y con tolos extres, tener tolos cacharrinos tecnolóxicos posibles, y la moza coles tetes enllenes de plásticu. Claro dende esta perspectiva 1.000 € nun dan pa nada.
Otru asuntu ye qu’esti términu ta importáu, vamos que bien de zones onde el que menos gana ronda los 1.000 €uros y onde ser mileurista ye comparable con los del 600 n’Asturies (y nun falo de coches), pero los medios acomodense a pallabres que suenen “cool” y faciliten el trabayu. Pienso que falar de mileuristes ye desconocer la realidá asturiana…
Un clip que tien too pa llograr un exércitu de fans. En Bombai tamién-yos da la febre nel sábadu nueche. Paez que ye de la peli Ellam Inba Mayam, de 1981, y ta percorriendo l’internet de la manera. Y nun m’estraña. Ta disponible en DVD pel internet (dende’l Reinu Uníu), en llingua Tamil. La música ye de Ilayaraja, que firma la música de ¡¡893 películes!!. Kamal Hassan ye’l prota. Una cosa: a ver si atopais per dalgún lláu del videu el cartelu de Blancanieves. A video used to be embedded here but the service that it was hosted on has shut down.
Y pa finar esta esbilla n’homenaxe al nuevu amu d’Ensidesa, equí vos dexo esta demostración de creatividá friqui.
Ubuntu Studio quiciabes seya el productu qu’espero dende fai más tiempu con gran impaciencia, y ye que pa los que trabayamos con audiu y/o vídeu, o bien soltamos perres asgaya pa mercar unos productos que pa enriba creen dependencies, o ponemonos delantre d’un ordenador durante hores pa configurar y compilar les aplicaciones que necesitemos pal desenrollu de los nuesos proyeutos.
Anque en cuantes a edición de vídeu (y nun falo de modeláu y animación 3D) les posibilidaes dende GNU/Linux son llimitaes ya que aplicaciones como Final Cut tan a años lluz de les disponibles pal sistema del pingüinu, nel casu del audiu ya podemos falar de coses más series y competitives. Aplicaciones como Audacity, Rosegarden, Ardour, Wired, Linux Sampler, etc, y ya nun falemos de proyeutos tan importantes como los qu’entama la Fundación Xiph.org (creadores de vorbis, theora y ogg entre otros). Tou esto montáu enriba d’ALSA permiten trabayar col soníu de forma profesional pero claro ta, problemes… primeru ta el tema de facer les instalaciones (acabes fartucu de compilaciones) y lluéu configuralo too pa que furrule como debería, a día de güei ye un trabayu de chinos y lleva la de Dios de tiempu, amás d’esto ta el problema perconocíu del prauticamente soporte nulu que dan los fábricantes de hardware especializáu necesariu pa estos procesos.
Pos bien, a lo que diba, pal próximu mes d’abril anuncien la primer versión d’Ubuntu Studio, anqué ya hai versión nos repositorios oficiales en forma de paquetes instalables sobre Ubuntu. Tamos falando d’una distribución nueva basada n’Ubuntu que bien preparada y orientada pa la edición y composición d’audiu, videu, medios impresos (fotografía, ilustración y maquetación) y modeláu y animación 3D. Si bien tanto el tema gráficu y 3D ya ta bien superau pa cualisquier distribución GNU/Linux d’aguaño (namai hai que ver les grandes produciones “Hollywoodiegues” que tiren de productos como CinePaint o Blender), esta ye la primer distribución que va facilitanos el trabayu col audiu dixital y más p’alantre enfotarse col videu.
Ye una comunidá acabante d’entamar y ya tien dellos collaboradores, anque enta hai trabayu que facer. D’otra mena, y ya toi especulando, el fechu de que empreses tan importantes como NVIDIA, HP o Intel, por nomar unes poques, tean detrás d’un proyeutu tan interesante como ye Jahshaka, faime ser optimista en cuantes al futuru de la creción de multimedios con GNU/Linux.
Güei xulguen en Xixón a Cándido González Carnero y Juan Manuel Martínez Morala. Pal que nun tea enteráu, piden-yos seis años y mediu de cárcel por los disturbios qu’hubiere ente una protesta llaboral del naval na que se frañó’l caxetín d’un semáforu (valoráu en cásique 6.000 euros, que tamién reclámense-yos). La Casa Conceyu de Xixón (PSOE-IU) al traviés de la so Policía Llocal, ye quien empobina una denuncia dafechu surrealista, si detrás nun hubiere un claro interés n’apartar a estos dos dirixentes del sindicatu Corriente Sindical d’Izquierda de la so actividá de defensa de los trabayadores. (Va poco, Cándido ganó’l xuiciu escontra la prexubilación na que-y metieron en Naval Gijón siendo él del comité d’empresa y escontra la so voluntá. Enantes, quixeron unvialu a trabayar nuna sucontrata de la empresa n’Ucrania).
La historia de la Corriente ta enllena de lo que n’Asturies siempre se llamó ‘paisanos’. Demuestra de contino que sigue siendo un sindicatu de clas, un sindicatu cuya prioridá ye la defensa de los derechos de los trabayadores énte grandes operaciones inmobiliaries (véase el naval en Xixón), y especulatives de toa mena. Quiciabes, por eso, pola so dignidá, sigue siendo un sindicatu minoritariu (magar de los sos 5.000 afiliaos).
Cuesta creer qu’a Justo Rodríguez Braga (el so ¿sindicatu o academia de cursinos? UGT tamién participaba nes movilizaciones poles qu’agora se xulguen) fueran a metelu presu como a Cándido y Morala. Pero non, elli ye parte de la ‘famiglia’.
Como yá se dixera va meses en dellos foros, Localia va esplotar la única televisión privada autonómica dixital d’Asturies. Nun ye una sorpresa. Tampoco lo ye el repartu qu’Areces y el so gobiernín fizo públicu güei de les demás llicencies de televisión dixital terrestre n’Asturies. La Nueva España tendrá de facto una cadena autonómica de televisiones llocales al obtener toles llicencies posibles, lo que-y permitirá a esti periódicu empobinar una estratexa de desconexiones que yá se verá si-y furrula tan bien como col diariu. De mano, paez una clara recompensa al mou en que LNE ta tratando dende va un tiempu p’acá al gobiernín.
D’otra miente, el repartu contenta a El Comercio, siempre fiel a la causa, coles llicencies pa Uviéu, Xixón y Avilés, y premia a TeleAvilés, una canal que dende va unos meses entamó a pagar el sueldu a los pocos trabayadores qu’entá-y quedaben, al tiempu qu’entamaba una de les más patétiques y poco profesionales actitúes de tratu servil a la mano que ximielga la cuna. Oviedo Televisión y Televisión Local Gijón caltienen el preste pa seguir emitiendo pola ‘gracia’ d’Areces y compaña, a quien de xuru-yos abulta migaya ambes llicencies.
TeleAsturias ‘La Autonómica’ y Popular TV, xunto al rentista Blas Herrero, son les grandes damnificaes pola arbitrariedá del Gobiernín, y viven agora nes sos propies caNNes l’estilu ‘Soprano’ que ya sofriera cásique en silencio Radio Sele.
El panorama ye el que ye. Areces y compaña, la ‘famiglia’ sociata astur, reparten y alministren como-yos peta, y como-yos dexen, la ‘llibertá de prensa’ aprovechando una llexislación que, por demás, favorez esti control gubernamental y con dineru públicu de los mensaxes que se-yos apurre a la población. Yá sé que la llibertá ye d’empresa, non de prensa, pero coime, disimulái.
P’acabar dexámosvos un sermón illustrativu de cómo percibe Areces la televisión, y como funciona dafechu esi mediu, n’Asturies y en tol mundu. Entiéndese-y bien a esti home, y onde diz de ‘les montañes de Nepal a les biesques de Suramérica’, bien podemos pensar en Cabrales, Somiedu o los Ozcos. El casu ye que la televisión, como diz, uniforma, tresllada mensaxes qu’anulen la diversidá cultural, relixosa, política, y acaba apurriendo una mentalidá na qu’el mundu (n’esti casu Asturies), paez disneylandia (n’esti casu, el parque temáticu proxectáu por Areces p’Asturies). De xuru qu’el mensaxe d’esti curón musulmán ye simplón, pero ye, en esencia, el proyeutu que ta empobinando su ilustrísima Don Vicente.
Calca equí p'amosar conteníu dende YouTube. Consulta la política de privacidá de YouTube.
Asturies merez otra referencia política, otres idees, y éstes tan bien averaes a nós: en Portugal. Ellí desendolcó esti añu el Candidato Vieira una campaña imaxinativa, sincera, próxima a lo que mos prestaría ver perequé d’equí a un par de meses.
Eslóganes qu’esconsoñen a una sociedá entera, promeses reales pa xente real. Vieira, un home d’esti tiempu.
Ta mui feo facer comparances, pero nun mos digáis que lo que se ta viendo yá peles cais y los periódicos d’Asturies tien la credibilidá d’esti home.
