Un clip que tien too pa llograr un exércitu de fans. En Bombai tamién-yos da la febre nel sábadu nueche. Paez que ye de la peli Ellam Inba Mayam, de 1981, y ta percorriendo l’internet de la manera. Y nun m’estraña. Ta disponible en DVD pel internet (dende’l Reinu Uníu), en llingua Tamil. La música ye de Ilayaraja, que firma la música de ¡¡893 películes!!. Kamal Hassan ye’l prota. Una cosa: a ver si atopais per dalgún lláu del videu el cartelu de Blancanieves. A video used to be embedded here but the service that it was hosted on has shut down.
Y pa finar esta esbilla n’homenaxe al nuevu amu d’Ensidesa, equí vos dexo esta demostración de creatividá friqui.
Ubuntu Studio quiciabes seya el productu qu’espero dende fai más tiempu con gran impaciencia, y ye que pa los que trabayamos con audiu y/o vídeu, o bien soltamos perres asgaya pa mercar unos productos que pa enriba creen dependencies, o ponemonos delantre d’un ordenador durante hores pa configurar y compilar les aplicaciones que necesitemos pal desenrollu de los nuesos proyeutos.
Anque en cuantes a edición de vídeu (y nun falo de modeláu y animación 3D) les posibilidaes dende GNU/Linux son llimitaes ya que aplicaciones como Final Cut tan a años lluz de les disponibles pal sistema del pingüinu, nel casu del audiu ya podemos falar de coses más series y competitives. Aplicaciones como Audacity, Rosegarden, Ardour, Wired, Linux Sampler, etc, y ya nun falemos de proyeutos tan importantes como los qu’entama la Fundación Xiph.org (creadores de vorbis, theora y ogg entre otros). Tou esto montáu enriba d’ALSA permiten trabayar col soníu de forma profesional pero claro ta, problemes… primeru ta el tema de facer les instalaciones (acabes fartucu de compilaciones) y lluéu configuralo too pa que furrule como debería, a día de güei ye un trabayu de chinos y lleva la de Dios de tiempu, amás d’esto ta el problema perconocíu del prauticamente soporte nulu que dan los fábricantes de hardware especializáu necesariu pa estos procesos.
Pos bien, a lo que diba, pal próximu mes d’abril anuncien la primer versión d’Ubuntu Studio, anqué ya hai versión nos repositorios oficiales en forma de paquetes instalables sobre Ubuntu. Tamos falando d’una distribución nueva basada n’Ubuntu que bien preparada y orientada pa la edición y composición d’audiu, videu, medios impresos (fotografía, ilustración y maquetación) y modeláu y animación 3D. Si bien tanto el tema gráficu y 3D ya ta bien superau pa cualisquier distribución GNU/Linux d’aguaño (namai hai que ver les grandes produciones “Hollywoodiegues” que tiren de productos como CinePaint o Blender), esta ye la primer distribución que va facilitanos el trabayu col audiu dixital y más p’alantre enfotarse col videu.
Ye una comunidá acabante d’entamar y ya tien dellos collaboradores, anque enta hai trabayu que facer. D’otra mena, y ya toi especulando, el fechu de que empreses tan importantes como NVIDIA, HP o Intel, por nomar unes poques, tean detrás d’un proyeutu tan interesante como ye Jahshaka, faime ser optimista en cuantes al futuru de la creción de multimedios con GNU/Linux.
Güei xulguen en Xixón a Cándido González Carnero y Juan Manuel Martínez Morala. Pal que nun tea enteráu, piden-yos seis años y mediu de cárcel por los disturbios qu’hubiere ente una protesta llaboral del naval na que se frañó’l caxetín d’un semáforu (valoráu en cásique 6.000 euros, que tamién reclámense-yos). La Casa Conceyu de Xixón (PSOE-IU) al traviés de la so Policía Llocal, ye quien empobina una denuncia dafechu surrealista, si detrás nun hubiere un claro interés n’apartar a estos dos dirixentes del sindicatu Corriente Sindical d’Izquierda de la so actividá de defensa de los trabayadores. (Va poco, Cándido ganó’l xuiciu escontra la prexubilación na que-y metieron en Naval Gijón siendo él del comité d’empresa y escontra la so voluntá. Enantes, quixeron unvialu a trabayar nuna sucontrata de la empresa n’Ucrania).
La historia de la Corriente ta enllena de lo que n’Asturies siempre se llamó ‘paisanos’. Demuestra de contino que sigue siendo un sindicatu de clas, un sindicatu cuya prioridá ye la defensa de los derechos de los trabayadores énte grandes operaciones inmobiliaries (véase el naval en Xixón), y especulatives de toa mena. Quiciabes, por eso, pola so dignidá, sigue siendo un sindicatu minoritariu (magar de los sos 5.000 afiliaos).
Cuesta creer qu’a Justo Rodríguez Braga (el so ¿sindicatu o academia de cursinos? UGT tamién participaba nes movilizaciones poles qu’agora se xulguen) fueran a metelu presu como a Cándido y Morala. Pero non, elli ye parte de la ‘famiglia’.
Como yá se dixera va meses en dellos foros, Localia va esplotar la única televisión privada autonómica dixital d’Asturies. Nun ye una sorpresa. Tampoco lo ye el repartu qu’Areces y el so gobiernín fizo públicu güei de les demás llicencies de televisión dixital terrestre n’Asturies. La Nueva España tendrá de facto una cadena autonómica de televisiones llocales al obtener toles llicencies posibles, lo que-y permitirá a esti periódicu empobinar una estratexa de desconexiones que yá se verá si-y furrula tan bien como col diariu. De mano, paez una clara recompensa al mou en que LNE ta tratando dende va un tiempu p’acá al gobiernín.
D’otra miente, el repartu contenta a El Comercio, siempre fiel a la causa, coles llicencies pa Uviéu, Xixón y Avilés, y premia a TeleAvilés, una canal que dende va unos meses entamó a pagar el sueldu a los pocos trabayadores qu’entá-y quedaben, al tiempu qu’entamaba una de les más patétiques y poco profesionales actitúes de tratu servil a la mano que ximielga la cuna. Oviedo Televisión y Televisión Local Gijón caltienen el preste pa seguir emitiendo pola ‘gracia’ d’Areces y compaña, a quien de xuru-yos abulta migaya ambes llicencies.
TeleAsturias ‘La Autonómica’ y Popular TV, xunto al rentista Blas Herrero, son les grandes damnificaes pola arbitrariedá del Gobiernín, y viven agora nes sos propies caNNes l’estilu ‘Soprano’ que ya sofriera cásique en silencio Radio Sele.
El panorama ye el que ye. Areces y compaña, la ‘famiglia’ sociata astur, reparten y alministren como-yos peta, y como-yos dexen, la ‘llibertá de prensa’ aprovechando una llexislación que, por demás, favorez esti control gubernamental y con dineru públicu de los mensaxes que se-yos apurre a la población. Yá sé que la llibertá ye d’empresa, non de prensa, pero coime, disimulái.
P’acabar dexámosvos un sermón illustrativu de cómo percibe Areces la televisión, y como funciona dafechu esi mediu, n’Asturies y en tol mundu. Entiéndese-y bien a esti home, y onde diz de ‘les montañes de Nepal a les biesques de Suramérica’, bien podemos pensar en Cabrales, Somiedu o los Ozcos. El casu ye que la televisión, como diz, uniforma, tresllada mensaxes qu’anulen la diversidá cultural, relixosa, política, y acaba apurriendo una mentalidá na qu’el mundu (n’esti casu Asturies), paez disneylandia (n’esti casu, el parque temáticu proxectáu por Areces p’Asturies). De xuru qu’el mensaxe d’esti curón musulmán ye simplón, pero ye, en esencia, el proyeutu que ta empobinando su ilustrísima Don Vicente.
Calca equí p'amosar conteníu dende YouTube. Consulta la política de privacidá de YouTube.
Asturies merez otra referencia política, otres idees, y éstes tan bien averaes a nós: en Portugal. Ellí desendolcó esti añu el Candidato Vieira una campaña imaxinativa, sincera, próxima a lo que mos prestaría ver perequé d’equí a un par de meses.
Eslóganes qu’esconsoñen a una sociedá entera, promeses reales pa xente real. Vieira, un home d’esti tiempu.
Ta mui feo facer comparances, pero nun mos digáis que lo que se ta viendo yá peles cais y los periódicos d’Asturies tien la credibilidá d’esti home.
Lleo en Asturias Liberal que la Fundación pola Denfensa de la Nación Española (Denaes) va presentase n’Asturies de la mano de Gustavo Bueno y el delegau d’esi ensame, Joaquín Santiago, nel club de prensa del diariu La Nueva España. Nun tengo mui claro qué ye lo que quier esta peña de la Denaes, ni qué España quieren defender, ni si ye verdá qu’España va españar, pero el caso ye que ehí tan, Santiago y cierra España. Españoleando, españoleando, atopé esti videu ilustrativu nel youtube, fala d’España y de La Nueva España. A lo meyor ye col que van entamar la so presentación.
Nun sé si taréis al tantu, pero al PP-y dio pol outing. Dende que se supo que la candidata del PSOE de Avilés ye la conceyala Pilar Varela, dellos sectores de la derecha avilesina enfotáronse en ¿desprestixala? asoleyando ‘rumores’ a mou ‘chistes de mariquitas’ revistíos de ‘apuntes biográficos’ de la susodicha.
Pero la cosa nun podía quedar ehí. Había que ‘destapar’ a esta muyer, sacala del armariu nel que taba metida, glayar al altu la lleva con quién s’acuesta y con quién se llevanta. Y ya lo ficieron cola collaboración, too hai que dicilo, de La Nueva España. Una acusación de nepotismu (sin más argumentu que la sospecha) y negada darréu pola afectada, foi la escusa perfeuta pa apuntar col deu a la conceyala socialista pa dici-y que ‘tien novia’, daque que tamién negó dafechu Pilar Varela.
La cosa tien un puntu. Habrá quien diga que, ‘qué pasa, ¿nun ye normal saber si un conceyal ta casáu o solteru?’. Y (emulando a Xabel) González y González diz: sí, ye normal, siempre qu’el conceyal en cuestión considere que deba o puea dicilo. Porque, de nun ser asina, taríamos xustificando actitúes llamargoses: ¿ha saber la ciudadanía con quién, con cuántes o cuántos, o cómo folla caún de los candidatos? De xuru que la política asturiano diba ser muncho más divertida, pero tamién díbamos perder la perspectiva de lo que ye importante pal país.
Si Pilar Varela ye o nun ye lesbiana, si-y gusta el BDSM o les freses con ñata, a nos, impórtanos un res. Bastante perversión ye tar nel PSOE, qu’eso sí qu’inflúi y ye importante, pa nun votala.
Pa los que vivimos nel tercer mundu, en cuantes a producción audiovisual se refier, falar de televisiones como la catalana ye falar y ponete a babear.
La televisión catalana ye un exemplu en cuantes a investigación y desarrollu tecnolóxicu. A mor d’exemplu: foi la primer (y única) televisión n’España qu’entamó a emitir en 5.1 por TDT, cuasi tolos programes tienen emisión dual (catalán/castellanu) y tolos programes tan subtitulaos nos dos idiomes.
Pues bien, ún de los problemes de los usuarios de sistemes operativos llibres, y mui grave nun pais democráticu, ye la incapacidá de poder acceder a servicios d’emisión en direutu (streaming) pol fechu de que les televisiones usen sistemes propietarios, como ye’l casu de TeleTini que namás da accesu si uses Windows, d’esta manera namás puedes ver estes emisiones si pagues la llicencia d’usu a Micro$oft, cosa que munchos nun podemos o nun queremos. D’otra banda, la televisión catalana adelántase otra vegada siendo la primer televisión nel mundu qu’ufre la posibilidá de ver la so programación n’internet usando codecs llibres, nesti casu theora y vorbis, utilizando el contenedor multimedia ogg desenrolláu pola comunidá Xiph. Amás, van un pasu más al integrar un reproductor Java pa ver la emisión na so web, d’esta manera nun necesites instalar codecs ya que tan nel propiu servidor.
El sistema, anque entá tan faciendo prebes, funciona mui bien, ye mui rápidu y tien bona calidá, anque hai versión de pagu con meyor calidá entá.
Si quereis probalu calcar esti enllace y abrilu darréu con Totem o Kaffeine, pa los que useis Window$ o MacOsX tendréis que instalavos los codecs enantes.
Pa cuándo veremos algo así nel restu de televisiones… peme que va pa llargu…
Toi acabante de descubrir un deporte perguapu: pelees d’almuhades. Nueches de cerveza y fumu, dos moces nel ring, un par d’almuhades, y a entamala.
L’inventu paez que vien de Canadá, y ya tien bien d’adeptos nos Estaos Xuníos, que pa esto del entertainment son mui agradecíos. Hai una lliga oficial, con una esbilla de lluchadores con nomes tan prestosos como Eiffel Power, Trashley, Polly Esther, Sarah Bellum o Digi Jones.
A manzorga tais viendo a Champain, anguaño campeona del mundu d’esti deporte tan guapu. Esta misma nueche, en New York City, va tener que defender el títulu énte Betty Clocker (a mandrecha, y de xuru que l’ambiente va ser de lo meyor. Champain fuma y bebe, tien 27 años y ye fía d’una pareya de moteros. Gusten-y les películes de mieu y kung-fu. D’otra banda, Betty Clocker diz de sí mesma que ‘llucha como una chica, y fai pastelinos como la to ma’. Nun fuma, pero presta-y dar al vasu, y gusta-y el pop de los 80. La caña.
Estes dos moces, ehí les tenéis, son la elite del Pillow fighting. La pena ye qu’entá esti deporte nun tien una presencia mundial, magar que yá ta empobinándose una versión europea (peme que n’Holanda).
La PFL (Pillow Fight League) ta abierta a la incorporación de lluchadores nueves. Tienen que ser ‘cool’, célebres y vivir na redolada de Toronto. Asina que, si dalguna s’anima, pue apuntase na web de la lliga. Yá tenemos un Asturiano na lliga de llucha llibre circense mexicana, por qué no una rapaza ‘cool’ y célebre na lliga d’almuhades d’América. Como siempre digo, too ye ponese.
Habrá quien diga que too esto ye un show pa calentorros, al estilo de les pelees nel barru. Pues sí, pero acaso el tenis ¿nun se sigue pa ver como se-y ximielguen les tetes a la Kournikova? o ¿nun ye’l fútbol una pasarela de modelos?, o les propies federaciones ¿nun roblaron cuantayá la mengua de les ropes de les xugadores de volley?. La llucha d’almuhades, ye la sinceridá fecha deporte.
Si vos peta ver una esbilla de combates (el desendolcu de la pelea ente Wynn Cognito y Vic Payback, por exemplu, podéis facelo darréu.
Air Asturias pieslla. Dame la risa. Va un mes qu’entamaron a ‘esnalar’ y piesllan. Confirmaronlo los sos directivos en rueda de prensa. Ya me paecía a mín que muncha empalmadura había con esta compañía aérea que tenía la so sé nun centru d’empreses dependiente del Conceyu d’Avilés ¿? ¿Nun teníen nin pa pagase una oficina? Tuve por convida-ys a abellugase na mio tienda campaña, pero nun me dio tiempu. Dame la risa. Cuantu listu hai pel mundu.
Dicen los sos responsables que pensaben que había n’Asturies mercáu suficiente para facer negociu con estos vuelos, pero que-ys fallaron los horarios que-ys asignaron pa operar. Yo, probín de mí, pensaba que yeren empresarios serios, d’estos con perres y esperiencia nel sector turísticu, que sabíen lo que facíen, que tendríen estudios de mercáu y ese coses. Y resulta que non, que namás tienen perres abondo y que ponen una aerolínea como quien merca una bolsa pipes (de les de Churruca).
Nun sé que pensar, si ye facer tuntu a tol mundu, si ye que hai munchu llistu, o que de verdá qu’ellos queríen y simplemente son unos auténticos ineptos. Esta ye una d’eses coses pa mexar y nun char gota.
A la vera d’esti testu ta la semeya d’un paisanucu que bien pudiera ser el presidente d’Air Asturias na rueda de prensa d’ayeri, preparáu pa colar darréu pal Caribe y con cara de que-y va dar la risa nun intre.
Ye una pena qu’estos ’empresarios’ por nun tener, nun tienen nin una migayina de la gracia de Leslie Nielssen, magar que xestionaren Air Asturias col mesmu xacíu qu’el cómicu empobinaba l’operativu de segurida en ‘Aterriza como puedas’. En fin, país. Nun sé si agora dirá dalgún conseyeru a cortar la cinta de clausura d’esta pantuflada aérea.
Air Asturias pieslla. Dame la risa. Va un mes qu’entamaron a ‘esnalar’ y piesllan. Confirmaronlo los sos directivos en rueda de prensa. Ya me paecía a mín que muncha empalmadura había con esta compañía aérea que tenía la so sé nun centru d’empreses dependiente del Conceyu d’Avilés ¿? ¿Nun teníen nin pa pagase una oficina? Tuve por convida-ys a abellugase na mio tienda campaña, pero nun me dio tiempu. Dame la risa. Cuantu listu hai pel mundu.