González&González

Va unos posts, afirmábemos equí qu’a la FSA nun-y salíen les cuentes. Que tan mui lloñe de ganar les elecciones próximes y munchu más de facelo ensin necesidá de pactar otra vegada con IU-BA. Los fechos tan confirmando puntu por puntu tolo dicho.

A la FSA nun-y salen les cuentes, y énte esa realidá la opción ye marafundiar perres. La FSA va echar el restu n’estes elecciones en cuantes a propaganda. El fracasu del ‘Construyendo Asturies’ (aquella publicación anónima en edición ‘de luxe’ pagada por constructores y vaya vusté a saber quién más), tien agora la so continuidá na ablucante contratación d’espacios propagandísticos pa dar a conocer a les sos candidates más nueves.

Xunto a les habituales campañes ‘institucionales’ pagaes con dineru públicu, a más gloria del gobiernín, atopámonos estes selmanes co la semeya que-y ficieran a Paloma Sainz, candidata uvieína a la alcaldía que con una pose tipo ‘Operación Triunfo’ trata de preparar el tarrén pal so combate final con Gabino de Lorenzo. Visites a les asociaciones de vecinos ampliamente seguíes polos medios de comunicación (afines o perceptores d’esa propaganda), inxerciones (de les más cares) nel diariu de más tirada d’Asturies, un blog n’internet o cartelos publicitarios auquiera, son parte de la estratexa.

Daqué asemeyao ye’l caso de Pilar Varela, candidata nueva n’Avilés tamién nomada como tala de rebote, y a la que se-y quier ‘dar a conocer’ col repartu de miles de tarxetes buzoneaes pel conceyu y con bien d’ellos cartelos a la vera les principales avenides d’Avilés, ente otres acciones de propaganda.

Too ello ye l’amuesa clara de que la campaña va ser dura, ablucante, posiblemente la más cara de la historia de la autonomía asturiana. Y cuido que l’arrogancia propagandística de la FSA pa coles sos candidates, va ser mui positiva. Va ser la demostración de si realmente les perres marafundiaes en cartelos, banners y cartafueyos influin sustancialmente na movilización del votante.

A cada vegada, más ganes tengo de que lleguen les elecciones.

Yá sé que ta mui masuñada la comparanza ente la FSA y el Partíu Revolucionariu Institucional de México, pero ye que, pasu ente pasu, la realidá va dando la razón a quienes vieron, va tiempu, esa relación. A la fin, el PRI tien tanto de revalucionariu como la FSA de Socialista, y los finxos que caltuvieron al partíu mexicanu nel poder per 70 años foron el mieu a la derechona del PAN y una alministración pública que daba trabayu a un exércitu d’empleaos públicos d’estómagu agradecíu. ¿Tamos nel camín?

L’alternativa en México foi’l PAN, el Partíu d’Acción Nacional del ex presidente Vicente Fox, col que Vicente Areces fízose unes semeyes va unos meses. La derechona de Fox ganó énte’l cansanciu d’un país que llegó a pensar que, peor, nun-yos diba dir. ¿Será Ovidio Sánchez quién a calzar botes camperes cola gracia de don Vicente (Fox)?.

D’otra miente, ta’l PRD, un partíu al que se-y pudiera identificar, por averamientu ideolóxicu, con IU-BA, ¿acabará Jesús Iglesias autoproclamándose presidente asturianu nun actu alternativu na plaza La Escandalera?.

Ver veremos. De momentu, y nun intre d’entamar la campaña de les eleiciones de nueso, equí vos dexamos una retafila d’opciones pa votar (o pa fuxir del país) en amuesa. (A cada vegada que digan “México” nel videu, camudailo por “Asturies”. Si dicen “López Obrador”, ye Jesús Iglesias, “Felipe Calderón” ye Ovidio y “Roberto Madrazo”, Tini).