Una ferramienta más d’ese pa perder el tiempu nel Internet ye’l buscador Alexa. Busques un web y te diz qué llugar ocupa nel ránking mundial del Internet. Dexé de buscar al devalu y acabé faciendo una clasificación de los sitios asturianos allugaos ente’l millón más visto de la rede. Salen alrodiu d’una ventena. Equí los tenéis:
Month: Payares 2006
MediaWiki, les posibilidaes del software de Wikipedia
A estes altures tol mundu conoz la Wikipedia, la enciclopedia llibre que tien versiones en más de doscientos idiomes (incluyíu l’asturianu). Lo que quiciabes nun sía tan conocíu ye’l software qu’usa esti xigantescu repositoriu del saber humanu, MediaWiki.
Pos bien, los que me conoceis bien sabeis por qué llevo un mes llargu ensin dormir apenes, y ye que pal desarrollu d’ún d’esos proyeutos que van acabar cola mio salú física (la metal perdila hai tiempu yá), decidíme por esti software pal desendolcu del mesmu. Lo que yo consideraba un mui bon software como wikipedista que soi, nun roza nin de cerca el potencial que MediaWiki tien. Y ye que, yá non sólo como “Sysop” (que nun ye más qu’un usuariu con pequeños privilexos), sinon xugando con esti software como alministrador del sistema, permitióme descubrir tol pontencial del mesmu.
Pa facevos un pequeñu resumen, agora mesmu tengo furrulando nel mio servidor de desarrollu un portal nel que cuerren cinco instalaciones de MediaWiki, una pal asturianu, otra pal castellanu, otra pal inglés y otra pal francés, y la quinta ye un repositoriu multimedia que comparte les semeyes, sones y demás multimedios con toles versiones anteriores. Anque suene a una cosa complicadísima ye d’asustar lo cenciellu que resulta montar una “Wiki Family”, como ye conocíu esti tipu d’instalaciones, y ye que namás hai que camudar unes poques variables nel ficheru de configuración de cada wiki. Nun toi diciendo con esto qu’un usuariu común seya capaz a facelo, pero cualisquier programador con un mínimo de conocimientos nun tardaría más de 20 minutos en montar el sistema (con links d’interwiki y too).
En fin, qu’amás del proyeutu de la Wikipedia, con tola importancia que tien en multitú d’aspeutos sociales, culturales, etc… la fundación MediaWiki consiguió un software tan versatil que ye perfeutamente valido pa otros proyeutos… y nun quiero precisamente montar un wiki…
Espero que cuando pase el tiempu y me quite un pocu de trabayu d’encima pueda facer un artículu téunicu pa desplicar los pasos que seguí pa llevar a bon puertu el proyeutu (anque entá nun finé, falta personalizar el diseñu y más cosines).
Arguyu billingüe (Somos chinos ¿non? #1)
Pailin Rattanasangsatian (WhaWha), y Supachaya Lattisophonkul (Bell) son les ‘China Dolls’, una pareya vocal tailandesa pa teenagers asiáticos que fai de la so condición billingüe un elementu pal ésitu. El so primer bombazu foi’l cantar en tailandés Muay Ni Kha (Soi china), nel que facíen gala de la so condición de minoría étnica (magar que privilexada) en Tailandia, y que depués foi tornáu al mandarín. Nos sos discos amiesten cantares en mandarín y en tailandés, lo que-yos fexo ser abondo conocíes en China, Singapur o Malasia.
A la FSA nun-y salen les cuentes
LA FSA tien mieu. Y énte’l mieu, les culiebres muerden. Nos últimos años tamos asistiendo a una retafila d’acontecimientos que d’un tiempu p’acá tienen reflexu n’unes movilizaciones sociales ensin precedentes. El fechu de que más de diez mil persones s’axuntaren nes manifestaciones cellebraes apocayá n’Uviéu y Xixón pa reclamar la oficialidá de l’asturianu (el sábadu 19 payares) y en sofitu de los sindicalistes Cándido y Morala (el miércoles 22), nun tien precedentes. Son dos cites convocaes y empobinaes por un garrapiellu de coleutivos ¿minoritarios?, que s’escapen al control, a cada vegada más xabaz, que la FSA y los grandes sindicatos caltuvieren de trenta años p’acá en tolo que cinca a la movilización social n’Asturies. Ello nun ye un síntoma, ye la prueba de que la ‘curia’ socialista asturiana ta perdiendo la cai, y s’enfrenta a la posibilidá de qu’el colchón de votos del prexubilerismu nun seya suficiente pa caltener tamién el poder autonómicu. Frentes abiertos tien abondos.
Sigui lleendo A la FSA nun-y salen les cuentesNun faltar
Depués de la mani del CAO, hai otra cita ‘ineludible’ pa tolos que piensen qu’Asturies merez otra realidá. Contra los vicios del gobiernín, el ‘talante’ de la F$A y los sos promotores (inmobiliarios), contra la represión sindical afitada nel servilismu d’eses ONG cuya función ye más da-y el preste a les estratexes empobinaes dende’l mal empresariáu que defender los derechos de los trabayadores (home, cursinos y eso, sí que faen, coles perres de toos)… Y sobre too, en sofitu de Cándido y Morala, dos PAISANOS. Munchos como ellos, y como’l sindicatu CSI facían falta n’esti país, y en tol mundu. Esti miércoles, a las siete y media la tarde, na plaza L’Humedal de Xixón, tais toos convocaos:
Cursu d’ética periodística
La cobertura que-y dieron a la mani pola oficialidá nos trés diarios asturianos ye pa detenese un momentu. Talamente paez que los responsables d’estos periódicos saben más d’otra cosa que de periodismu. Vamos equí facer un breve analís, n’alcordanza tamién d’aquella estupenda seición del auténticu CQC, qu’en gloria tea.
15.000 persones!!!
Naide nun lo pue negar, la manifestación del CAO güei n’Uvieu foi un ésitu total, magar que munchos nun pudimos tar ellí. 15.000 persones diz el CAO, 10.000 la policía local uvieína… dame igual. Depués de trenta años, a una o dos manis añales pola oficialidá, lo que ta pernidio ye que ésta sí ye una ‘clara demanda social’ de los asturianos. Toi contentu, y arguyosu de sentir a muncha, muncha xente bien cerca.
Queríos Javier Fernández, Tini Areces, Fernando Lastra, Ovidio Sánchez, señores del Ridea, Javier Neira, Vilda d’Alarcos, y a tolos cerriles que perhí anden entá… n’esti momentu d’allegría pa gran parte de los asturianos, dexaime que vos dedique una canción…
https://www.youtube.com/watch?v=CiIlYz2n4Pg
Nun ye ñoña, tien coña, 😉
Nun vaya ser que se vos olvide
Parque temáticu
Yá lu dixera’l preclaru Tini Areces cuantayá: el so gobiernu ve Asturies como un parque temáticu, coles sos atracciones museístiques, aboríxenes, carbayos y osinos en perfeutu estáu de revista pal turista. Faltábamos la mascota, y yá la tenemos: Ye Yogui, l’osu Yogui col so collaciu Bubú.
Esta Asturies bizarra na que mos tamos convirtiendo va gastase 5,4 millones d’euros (Migoya dixit) en que los osinos de Yellowstone mos anuncien per España, o lo que ye lo mismo: más del doble del ‘históricu’ presupuestu pa promoción y proteición de la llingua.
Asturian entertainment
Va unos meses qu’entamó les sos emisiones la TPA. Magar la pila perres invertíes nella, la canal pública asturiana de televisión nun algamó entá un índiz d’audiencia más allá del 3% del share mediu diariu. ¿Qué falla? Crítiques tien habío abondes dende l’entamu les emisiones. La falta del usu de la llingua asturiana nes emisiones ye una d’elles. Pero la otra, la razón fondera de la pobretaya audiencia de la TPA ye la falta d’asturianidá de los sos conteníos. Los resultaos paez que concuerden con eses crítiques. Un humorista madrilanu de medio pelo, que nin conoz nin siente la idiosincrasia asturiana, nun pue aspirar a que-y rían les gracies como si fuera Jerónimo Granda, Cellero o El Maestru, por poner un exemplu. D’otra manera, un presentador amenorgáu, rescatáu de la emisora de la Ser en la llocalidá de Madrid, nun pue metese a cocineru chisposu ensin esperar un fracasu rotundu. ¿Qué pasa entós? ¿Cuál ye la solución? Ta nidio: recurrir al ‘asturian star system’.