Xineru 2008 – González&González

Altuxa blogs, abre pa blogs nuevos.

Tamos acabantes d’abrir el rexistru d’usuarios y blogs nuevos p’Altuxa blogs.

Esta historia entamó va un añu y unos meses, cuando entamamos a trastiar un pocu con WordPressµ, que nun ye más que la versión multi usuariu del famosísimu WordPress. La idea yera ver si somos quien a facer una comunidá tipo blogger o wordpress.com n’asturianu, y como escusa nació González y González.

La idea nun ye la d’ufiertar un serviciu de blogues gratuitos al usu. Pa eso hai yá servicios como’l de Nireblog. Pel momentu, el alta nel serviciu ye ‘manual’, esto ye: va ser un alministrador quien apruebe l’apertura del blogue acordies col interés del proyeutu candidatu. L’oxetivu, básicamente, ye dar soporte n’asturianu, con tola calidá que seya posible, a blogues temáticos que puean tar xestionaos por ún o dellos autores.

Depués de munches pruebes, y dellos cambeos importantes (llegamos a tar casi que un mes ensin actividá) podemos dicir que tamos nuna fase bastante estable del proyeutu, que podíemos dicir que sal d’una fase alpha pa entrar en beta (esto pa los mui geeks) anque presta más vhs como dicen los de chuza.

Enfin, que Altuxa blogs ye una comunidá pa blogs escritos n’asturianu, tol sistema funciona n’asturianu (dalgún mensaxe puede qu’entá salga n’inglés), ye de baldre y nun tien publicidá.

Ente les sos caracterítiques, inclúi soporte pa ḥ y Ḷḷ nel editor de testos. Esto ye pa los que nun pueden instalar el tecláu asturianu nel so sistema (Windows y Mac OSX). Son simplemente unos botones que permiten enxertar estes grafíes ensin tener que andar copia-pega.

El sistema permite esportar tol conteníu pa llevalu a otru blogue y tamién permite importar dende plataformes como Blogger, Blogware, LiveJournal, Movable Type, TypePad, otros WordPress y de feeds RSS.

Tien soporte pa incrustar video y audio, ye personalizble con estremaes plantíes y te puedes construir fácilmente la to barra llateral gracies a pequeños “widgets”. Tamién pueden utilizase plugins qu’añaden funcionalidá al blogue.

Anguaño tenemos mui poques plantíes y plugins (fuimos instalando según facía falta), de forma que quien quiera un diseñu que nun tea n’Altuxa.com tendrá qu’avisanos pa instalalo, hai munches plantíes pa WordPress.

Pel momentu ufrimos 10Mb d’espaciu (pa semeyes y ficheros).

Tamién tamos acabantes d’abrir un blogue nuevu onde diremos dando anuncia de les novedaes y proyeutos nuevos que puean surdir de les idees nes que yá tamos trabayando dende Altuxa.com, qu’esperamos que sean unos cuantos y que sean d’utilidá.

Lletrizante

Paez que dalgo se mueve col tema de la regasificadora y la retafila de centrales de ciclu combináu que nos van llantar per toa Asturies. Hai firmes y hai plataformes coles que movese. Entá nun hai muncha organización, y puede que seya tarde, pero dalgo habrá que facer pa evitar esa concepción d’Asturies como ciudá de vacaciones-parque temáticu nel que la mayor industria seya la d’apurrir pa Madrid, Lisboa, Valladolid y Oporto xenerando perres que se queden neses ciudaes, xenerando equí VENTE puestos de trabayu por central de ciclu combináu y una descomanada estroza paixasística y ambiental. Nun mos paga la pena.Más información: Regasificadora NON!!, Térmica de la Pereda NON!!, Térmica en Nubleo NON!!; Coordinadora Ecoloxista: Analís del ‘problema’ enerxéticu n’Asturies.

Uiquipediona

Esi ye’l nome ideal pa esti proyeutu cuando pareste a mirar les cifres que manexa esti xigante del saber universal…

Idiomes: 256

Númberu d’artículos: 9.454.038

Númberu de páxines: 31.625.332

Ediciones: 425.928.312

Alministradores: 4.285

Usuarios: 10.431.960

Ficheros multimedia: 1.503.289

… cuando canses de ver bombes y guerres pela tele, presta ver que la humanidá puede facer coses realmente constructives… perdonái ye que respigueme un pocu con estes cifres… gracies a tolos que faceis esto posible.

Por cierto Viquipèdia t’acabante d’algamar los 100.000 artículos, norabona a los catalanoparlantes.

Ai, El Águila Negra

Alcuérdome que de guaḥe, en casa, siempre había unos botellinos de ‘El Águila Negra’. Prestábenme porque yeren gordinos y col ferre serigrafiáu en blancu. Nun sé, paecíenme más prestosos que los de San Miguel, más estilizaos y cola etiqueta de papel qu’entá caltienen. Amás, en casa prestabamás El Aguila Negra porque, dicíen d’aquella, tenía más sabor, yera más gordona que la San Miguel, (que yera la otra marca que vendíen na tiendina d’embaxo casa).

El caso ye que, pa mín, El Aguila Negra tien munchu de sentimental. Entá anguaño vense bien dellos chigres col míticu cartelu del paisanón bávaru y la so xarra espumante, y presta… ye como cuando apaecen los electroduendes na tele…

Pues güei tenía’l día señardosu y dióme por baxar al Alimerka y comprar unes lates de ‘Águila Negra’, esa cerveza d’oferta que fabrica la empresa andaluza que compró la marca tres del pieslle de la fábrica de Cualloto. Y vaya la que fice. Embaxo esa marca venden auténticu mexo, una cerveza infame que nun val nin pa ferver salchiches. Una gochada, una mierda de cerveza que, eso sí, na so páxina web nin siquier mencionen ente les sos marques. Señores de cerveces Alhambra… güei rompieron un recuerdu d’infancia. Yá nunca más voi mercar les sos lates (nin les de ‘Águila Negra’ nin eses del papel de plata hixénicu na embocadura). Por cierto, l’anunciu d’enriba ye d’un exemplar de la revista ‘Asturias Semanal’ de xunetu de 1976. Publicidá refrescante p’aquel branu de transición.

La cosa medra…

Dende que entamamos col blogue siempres vi que yeramos cuatru frikis los que escribiamos n’internet, pero nun se si ye sensación mia o ye que cada vez hai más blogs n’asturianu. Y digo que igual ye sensación mia porque nun me paro en munchos blogues, y más de la metá nun los conozo. Esto veolo como una bona siñal, ya que dexamos de ser frikis pa ser una comunidá curiosina. Y ye que acabo topame con un blogue pa xente gocho n’asturianu… (mayores d’edá)

Motores de busqueda de webs n’asturianu… agora Nireblog

El vienres fice una xml pa poder buscar nel Diccionariu ALLA dende Firefox y iexplorer 7, y güei fice uno pal Google custom serach de Nireblog que espero vos sirva a tolos que teneis un blogue n’esta plataforma. Pa los que non, ye mui cenciellu facese uno (ficelo pa esti blogue…) podeis descargavos cualesquier xml de los que fice y nun ye mui complicáu entender como ye. De toes formes si vos ye mui complicáu o vos da pereza y tais interesaos en facer dalgún en concretu podeis pedilu n’esti post y miraré si soi a facelu.

Podeis instalar tolos motores que fice dende http://altuxa.com/motores_busqueda.php (más alantre preparé una web curiosina pa esto).

El DALLA nel to navegador

Creo que nun soi l’unicu, con ganes d’una versión web del Diccionariu de la Academia… anque la noticia ye mui bona, dame pena ver que entá hai xente que entá fae webs como nel sieglu pasáu y así ye que’l Diccionariu de l’ALLA ta codificáu con ISO-8859-1 y non en UTF-8 una cosa tan cenciella como esa, valdría pa que nel diccionariu de l’ALLA tuviese soporte pa ḥ y Ḷḷ (como cualesquier páxina codificada con UTF-8… por exemplu Uiquipedia).

Enfin a lo que diba… que fice un motor de busqueda pal Diccionariu, namás que ta probáu en Firefox pero en principiu tien que furrular tamién en IExplorer 7, si alguien con Window$ puede probalo y comentame como va taré-y mui agradecíu.

Sonia ye noticia…

Fai unos meses topeme pela cai a Sonia y a Rocio, les dos foron compañeres d’estudios y de folixes. Amás de falar pa xuntanos (los que nun somos lleendes urbanes) otra vegada nuna fartura, entrugamonos pola nuesa situación llaboral… Sonia taba ilusionada cola oposición que taba preparando pa ser maquinista na FEVE onde ya llevaba unos años trabayando na terminal de carga de Tresona, felicitela porque simpre me parecio un trabayu bien guapu, (dende guaḥe toi namoráu d’esti mediu de tresporte) y por supuesto alegreme munchu cuando m’enteré que yá yera maquinista.

Lo que nun me presto fue que Sonia ye noticia… ye que entá toi asustáu de que a estes altures de la vida seya noticia qu’heba muyeres trabayando en determinaes profesiones…

Felicidaes pol curro Sonia… y una cosina… ¿puedes colame na cabina? ;-p

Y gracies a Fer pol enllaz del youtube…

Calca equí p’amosar conteníu dende YouTube.
Consulta la política de privacidá de YouTube.

Amosar tol conteníu de YouTube dafechu

Caliao en CQC

Tien yá unos meses, pero como nun tengo tiempu nin pa mexar nun lo vi, gracies a San Youtube…

Calca equí p’amosar conteníu dende YouTube.
Consulta la política de privacidá de YouTube.

Amosar tol conteníu de YouTube dafechu

Tecláu n’asturianu pa xkb

Acabo facer una distribución pal tecláu con soporte pa ḥ y ḷḷ. Como lleva un tiempu ente que mando los nuevos ficheros de configuración y demás, equí vos pongo una chapucina pa los que nun queráis esperar.

Namás que ta probáu n’Ubuntu, espero que vos sirva.Lo primero ye baxase (calca col botón drechu y guardar como) el ficheru del tecláu y el del llistáu de distribuciones (esti últimu pesa casi 1 mb).

Lluéu hai que copiar el tecláu al direutoriu /usr/share/X11/xkb/symbols/

$ sudo mv es /usr/share/X11/xkb/symbols/es

y el llistáu a /usr/share/X11/xkb/rules/

$ sudo mv base.xml /usr/share/X11/xkb/rules/base.xml

Y p’acabar vamos al menú Sistema>Preferencias>Teclado

Na pestaña Distribuciones y col modelu de tecláu en “PC genérico 105 teclas (intl)”

Calcamos el botón añadir, nel menú “Capas” marcamos España y nel menú variantes marcamos l’asturiana y calcamos añadir, seleicionamos como predetermináu la distribución asturiana zarramos la ventana y llistu.

Pa poder escribir ḥ calcamos Alt Gr + h pa escribrir Ḥ Alt Gr + Shift + h y pa la ḷ Alt Gr + l y pa la Ḷ Alt Gr + Shift + l

ACTUALIZACIÓN: Tan acabantes d’aceptar el parche en freedesktop, na versión siguiente (mañana) de cvs ya tará soportáu, y pa les prosimes versiones de les distintes distribuciones de GNU/Linux ya deberíen incluilo.