Nun mos resistimos a facer referencies a Obama. Güei alcordeme del blogue artofobama.com, nel que diben amestando semeyes con espresiones artístiques más o menos populares y acertaes. Dende que lo descubriera medró enforme. Ente los últimos post, prestóme especialmente esta versión del American Gothic que fizo el caricaturista Frank Harris. Bien visto. Paezme.
dignidá pa la so llingua…
A la fin, un periodista fizo por llevá-y el madreñazu de la Xunta Pola a Fernando Lastra a una rueda de prensa. Pero tampocu foi quien a entrega-ylu. De fechu, Lastra ta enfotao en superase a sí mesmu pa’l añu qu’entra, y tamos seguros de que lo va consiguir. Pa ver les imáxenes de la frustrada entrega del madreñazu, calca no que sigue.
La UPyD de la República
La memoria histórica ye dalgo buenu, dalgo qu’hai que conservar. Magar que tea mui masuñada, na memoria histórica se puen atopar lleiciones interesantes. Como esa que cuenta esti llibru ‘El fascismo en Asturias (1931-1937)’, tesis del caderalgu d’historia de la Universidá de Cantabria, Manuel Suárez Cortina, que fuere asoleyada en 1981 por Silverio Cañada.
El llibru queda coxu en munchos aspeutos. El propiu autor llamenta la perda de datos del Gobiernu militar nos años más sangrinos de la represión facista. Pero, sicasí, nes sos páxines escuéndense pequeñes ayalgues. Güei toi por conseñar la de la paxina 134 que fala de cómo n’aquellos años de Segunda República, la CEDA, sabedora de que calteniendo firme el so ideariu derechista, nun va ser quien a quita-y adeptos a formaciones más moderaes, decide empobinar la creación d’un muérganu satélite suyo: la Unión de Clases Medias (UNCM).
N’Asturies, la formación tenía por cabezaleros a Gumersindo Riego y Gerardo Requejo, dambos venceyaos a la derecha tradicionalista, pero que s’enfotaron dende la UPyD (perdón, d’aquella UNCM) n’amosase como dalgo distinto. Diz el llibru: “la Unión se presentó como apolítica, republicana y no declaró su confesionalidad”. Y añede: “afirmaba no formar un partido político, sino una agrupación al servicio de ese sector de la sociedad que se encuentra entre dos fuerzas: la proletaria y la burguesa”.
Entá más: el so cabezaleru asturianu, Gerardo Requejo, convidaba a axuntase a la UNCM a quienes compartieren “dos postulados fundamentales: la defenda por todos los medios lícitos de España, arrancándola de manos de verdugos y traficantes profesionales, y la defensa, también enérgica y decidida, de nuestros intereses de clase, vejados y encarnecidos por los de arriba y por los de abajo”.
Siete décades depués, la derecha española recuperó esa estratexa pa tratar d’esgastar a la derecha moderada (agora en baxo les sigles del PSOE). Tres de texer una tupida rede d’opinion (universidaes privaes, medios de comunicación, fundaciones -FAES a la cabeza-), a la gran derecha española de tola vida nun-y queda otra y recurre a la UPyD pa quita-y al rival direutu aquel electoráu al que-y esmolez España, que tarrez de vascos y catalanes, y un poco de los galleguzos, pero que nun votaríen al PP nin de coña porque ellos son d’izquierdes de tola vida.
Y equí los tenemos, puxando por que se retire l’usu del ‘dialeutu’ catalán nos vuelos de Swissair con Cataluña, esmolecíos pol futuru del castellanu magar que seya la tercer o cuarta llingua más falada del mundu, y naguando por una reforma ellectoral que sirva, non ya pa que’l so grupu tenga la representación que-y correspuende con respeutu al PSOE y al PP, non, sinon pa que nun la tengan los grupos non españolistes. Y llueu… ¿nun-yos va preocupar qu’haya memoria histórica?
Perbona la entrevista que-y fizo Xuan Bello a Fernando Lastra en Les Noticies, y de la que tuvimos conocencia nel blogue de Mundu Xaime. ¿Como daquién, trenta años depués de la muerte de Franco, pue aneciar nel discursu del ‘falar en cristiano’? ¿Cómo ye que un asturianu que quiera falar asturianu o gallego asturianu n’Asturies ye lo mesmo qu’un británicu?
Yera sabío que Fernando Lastra ye un políticu intelectualmente llimitáu, por nun dicir ermu; que fai por esconder la so probitú a base de tochaes y dalgún argumentu de solapa de llibru que-y abulta de postín. Pero na estrevista amuésase un auténticu bocayón en porrica. Bien Les Noticies. Alderique en esbilla.
Anque solemos falar de música nunca falemos de Xera, algo que podría ser raru pa nos tratándose d’un grupu que usa llicencies Creative Commons y que amás ye asturianu, la razón ye que un de los GyG ta mui vinculáu a esti grupu y ye dificil falar de música cuando l’asocies a vivencies, momentos mui guapos (y mui duros, que tamién los hai).
Pos güei falamos de Xera porque tan acabantes d’asoleyar el so primer videu musical, “L’Anduriña”. Ye un adelantu de lo que será’l so segundu discu “Tierra”. L’Anduriña ye la historia, real, d’un naufraxíu cuntada por un home de Lloza, que como muncha xente de la mar arriesgaba la vida pa comer.
Ye un videu realizáu con un presupuestu de 40 €, y como tolo de Xera, fechu dende casa con muches ganes y pocos medios.
Pa mi ye un presto ver como la xente ye capaz de buscar alternatives a los modelos de trabayu establecios, y que traten la música con tantu respetu y cariño. Pero meyor sentilu vosotros mesmos…
Puedes baxar el videu en dellos formatos dende la web de Xera.
Nun ye que seya precisamente un aficionáu al manga nin al anime, pero güei cumple 20 años una película que tovía sigue impresionándome pola so riqueza visual, por encima de munches creaciones más modernes con munchos más medios técnicos… Akira, basada nel cómic homónimu y con un presupuestu ensin precedentes nel cine d’animación, sigue siendo, 20 años depués, una de les mios películes favorites… tou un clásicu…
Son derechos civiles…
Nun pudimos grabar munchu porque escaecí poner a cargar la batería, pero bono ye una pequeña amuesa de lo que foi la manifestación del sábadu…
Puedes descargar esti videu en dellos formatos n’Archive.org
Veríeis que nel Les Noticies d’esti vienres, col envís de la celebración del Día de la Santina, el periódicu aconceyó a cabezaleros del Bloque, UNA y Pas pa falar d’asturianismu, de les sos perspectives. Al tiempu, nun editorial faen un analís de la situación política asturianista que, en cierta manera, apunta lo que ye un evidente problema pal desenvolvimientu d’una opción política que tien que facer por amosase como dalgo creíble y atractivu. Nesti puntu, alcordéme d’esti puntu d’embaxu, que pa quien nun lo sepa ye’l llingüista George Lakoff. Esti puntu ye dalgo asina como la madre del corderu de la propaganda d’Obama, y tien a ZP como ún de los sos fans más fans.
El casu ye qu’el llibrín d’esti home, ‘Nun pienses nun elefante’, preséntase como una especie de manual de propaganda pa torpes que dexó ablucáu a Zapatero, hasta el puntu de fichar a Lakoff pal ‘think tank’ qu’asesoró la campaña última del PSOE. Esi llibrín destripa lo que ye la estratexa de propaganda conservadora n’Estaos Xuníos y apurre idees de per ónde debe dir la progresista pa ganar les elleiciones. Nun entra en pureces ideolóxiques y argumentales. Va al tueru de la cosa, a ganar les elleiciones. Espón les regles del xuegu.
Básicamente, la idea ye que la xente nun vota tanto idees como valores. La xente vota la opción cola que s’identifica, nun vota programes. El llibrín cuenta cómo la identificación parte de la estrutura social más básica, la familia (básicamente estrema la ‘familia del padre estictu/conservador’ y la ‘familia de padres protectores/progresistes’), y cómo el llinguaxe xenera ‘marcos’ nel cerebru de cada votante que tienen un efeutu concretu na percepción del mensaxe (Nun pienses nun elefante… l’elefante, símbolu republicano, ya ta na to cabeza). Asina, cuenta cómo los conservadores americanos vienen desendolcando una estratexa pa difundir los sos valores, espardilos como los únicos válidos, al tiempu qu’afiten una tupida rede d’influencia que configura una sólida clase dirixente conservadora. Y too ello, dende los años sesenta. (Asina ganó Bush… pese a too).
El PSOE vio les similitúes cola situación española de secute. Fundación Faes, nueves universidaes privaes, apoyu a los escritores, ensayistes, intelecutales más o menos afines… contribúin a texer esa nueva clase dirixente, mientres s’apela a valores ampliamente espardíos y asumíos pola población pa facilitar que s’identifique col PP (Apoyo a las víctimas, sí a la vida, defensa del idioma español, de la familia…).
Pues a lo que voi. N’Astuies tamién se puede ver esi modelu, solo qu’agora ya desenvueltu pol PSOE-PP. Ehí ta l’apueste pola llibertá pa usar la llingua, ensin imposiciones; la solidaridá (y non el chupar del bote) ente rexones cola financiación… la tupida clase dirixente asturiana, identificada col ‘progresismu’ FSA…
Énte eso, ¿qué facer?